Maliko 13
13
Yesu akulonga mbuli ya kubomolwa kwa Kaya ya Mulungu
Matayo 24:1-2; Luka 21:5-6
1Yesu ivo akalile akulawa kui Kaya ya Mulungu, imwe wa mwanahina wake akamulongela, “Mfunza, lola maibwe yano ya kaya zino ivo zidamane nk'hani!”
2Yesu akamulongela, “Vino, ukukangawala kuyaona mazumba yano ivo makulu? Habule hata ibwe dimwe dikulonda kusigala mchanya mwa dimwenga, kila ibwe nadibomolwe.”
Kugaya na kuhenyezwa
Matayo 24:3-14; Luka 21:7-19
3Yesu ivo akalile mchanya mdigamba dikutangwa mizeituni haguhi na Kaya ya Mulungu, aho Petulo na Yakobo na Yohana na Endelea ivo wakalile wadumwe wakamuuza Yesu, 4“Chilongele mbuli izo nazilawile lini? Na chilongele vilagiso vake ni vili vikulonda kulagisa mbuli izo zihaguhi kulawila?”
5Yesu akandusa kuwalongela, “Muiteganye msekwiza kuhunilwa na mnt'hu yoyote. 6Want'hu wengi naweze kwa zina dyangu na kulonga uhuni, nakulonga, ‘Nie ndo Kilisito.’ Na kuwahunila want'hu wengi. 7Msekuogoha mkahulika mbuli za nk'hondo na kambwekambwe za nk'hondo. Mbuli izo nazilawile, mbali seke iwe ndo nk'homelezo. 8Want'hu wa isi imwe nawatoane na want'hu wa isi imwenga, want'hu wa umwene nawatoane na want'hu wa umwene umwenga. Nakuwe na gudemeko dya ulongo na nzala. Mbuli zino naziwe ni gesa mwanduso tu wa mahenyezo.” 9“Mbali mweye muiteganye. Kwa vila namugwilwe na kugalwa mvitala, namtoigwe muna zi kaya za kufikanila Wayahudi. Namgaligwe halongozi ha vilongozi na mamwene kwa ajili yangu ili mukawalongela Mbuli Zidamane za Mulungu. 10Mbuli Idamane ikulondigwa ilongigwe tenk'hu kwa want'hu wa isi zose. 11Wakawagwileni na kuwagala muna vitala, msekuogoha kugesa namulonge mbwani. Chipindi icho, longeni chochote mkulonda kwink'higwa, kwa vila sio mweye na mulonge mbali ni Muhe wa Mulungu. 12Aho ndugu naamulave ndugu yake akomigwe na tata naamulave mwanake akomigwe. Wana nao nawawatoe welesi wao na kuwakoma. 13Want'hu wose nawawehile mweye kwa vila mkunikola nie. Mbali akulonda kufinyiliza hadi nk'homelezo ndo naahonyeke.
Mahenyeko makulu yakwiza
Matayo 24:15-28; Luka 21:20-24
14“Mkeza kuona kint'hu kikumwihiza Mulungu ki mui Kaya yake. Want'hu wala wa muna isi ya Yudea wasumkile mmagamba. Mnt'hu akasoma naamanye. 15Mnt'hu akunze ya kaya yake asekuingila mgati ya kaya yake kusola kint'hu chochote. 16Mnt'hu eli kumgunda asekubwela ukaya kusola mwenda wake. 17Nawaluone nk'hani wanake weli na inda na wala wakuonk'heza mzi siku izo! 18Lombeni Mulungu nk'hani mbuli izo zise kulawila muna kihuhwe. 19Muna zisiku izo nakuwe na mahenyeko makulu nk'hani hayanawahi kulawila kuandusila aho Mulungu aumbile isi hadi dielo na sekeyeze kulawila kaidi. 20Ingi Mndewa hazihunguze siku izo, habule hata mnt'hu imwe alondile kuhona. Mbali kwaajili ya want'hu wake awasagule, Mndewa naazihunguze siku izo.
21“Muna zi siku izo mnt'hu akawalongela, ‘Loleni, Kilisito ahano egu Ahala.’ Msekumtogola, 22kwa vila nakulawile walotezi wa uhuni na want'hu wakuitanga, ‘Kilisito.’ Nao nawatende vilagiso na uzonza, ikadahika kuwahunila want'hu wa Mulungu wala awasagule. 23Iteganyeni, kwavila nie niwalongela kale mbuli zose zikulonda kulawila.”
Mwana wa Mnt'hu akwiza
Matayo 24:29-31; Luka 21:25-28
24Ivo, siku izo za mahenyeko zikafosa zuwa nadiwe na ziza na mulenge sekeulave lumuli lwake. 25Nt'hondo nazilagale na vint'hu va kuchanya kuulanga navitingisike. 26Kamala want'hu nawanione nie Mwana wa Mnt'hu hwiza muna mdi wingu kwa nguvu nyingi na ukulu. 27Kamala naniwatume wasank'hani wa kuulanga kwita banzi zose za isi kuwaduganya want'hu wasaguligwe na Mulungu kulawa banzi imwe hadi banzi imwenga ya isi.
Funzo kulawa mumkuyu
Matayo 24:32-35; Luka 21:29-33
28Ifunzeni mbuli ino kulawa mumkuyu, mkaona muna matambi yake, mazani mateke yakusuka mmanye ni chipindi cha mulao. 29Vilavila na mweye mkaona mbuli zila niwalongele zilawila, manyeni nie Mwana wa Mnt'hu nihaguhi nk'hani kwiza. 30Kweli huwalongela, weleko uno sekeubwele kwa Mulungu hadi mbuli izo zose zilawile. 31Ulanga na isi navibwele kwa Mulungu mbali mbuli zangu sekezifose mbwi.
Habule mnt'hu aimanyile siku wala saa
Matayo 24:36-44
32“Mbuli ya siku egu saa ya kubwela kwangu nie Mwana wa Mnt'hu habule mnt'hu yoyote aimanyile naiwe lini. Hata nie Mwana wa Mnt'hu siimanyile, ni Tata adumwe ndo akuimanya. 33Muiteganye na mkale tiali kwavila hamkumanya chipindi icho nakiwe lini. 34Naiwe gesa vila mnt'hu aitile nt'hambo, kuno kaleka kaya yake na watwna wake na kamwink'ha kila mnt'hu mbuli yake ya kutenda na akamulagiliza mwamizi awaamile. 35Ivo, chelezeni kwa vila hammanyile mwenye kaya naabwele lini, ikudaha kuwa dihungile egu muna ichilo kikulu egu lukwili egu nalugunzu. 36Chelezeni ikawa naabwele kwa kutukiza asekuwafika mgona. 37Kino huwalongela mweye vilavila huwalongela want'hu wose chelezeni!”
ទើបបានជ្រើសរើសហើយ៖
Maliko 13: DBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Dowe @The Word for The World International and Dowe Language translation. All rights reserved.