Maliko 15
15
Yesu akugalwa kulongozi kwa Pilato
Matayo 27:1-2,11-14; Luka 23:1-5; Yohana 18:28-38
1Nalugunzu gunzu, chitala chose, walava nt'hambiko wakulu, hamwenga na vilongozi na wafunza Malagilizo wakatogolelana wakamfunga mikono Yesu, wakamgala kwa Pilato akalile kilongozi wa Chilumi.
2Ivo wafikile kwa Pilato, Pilato akamuza Yesu, “Vino weye ndo Mwene wa Wayahudi?” Yesu akamulongela, “Gesa weye ivo kulonga.”
3Walava nt'hambiko wakulu wakalonga mbuli nyingi za kuhuna kuhusu Yesu. 4Kamala Pilato akamuuza kaidi Yesu, akalonga, “Kuhulika mbuli zose zikulongwa kuhusu weye! Vino una mbuli yoyote ya kuiyalala?”
5Mbali Yesu halongile mbuli, ivo Pilato akakangawala.
Yesu akulamulwa kukomwa
Matayo 27:15-26; Luka 23:13-25; Yohana 18:39; 19:16
6Kila ikafika sikunk'hulu ya Pasaka, Pilato kakala na ila ya kumulekela mfungigwa imwe want'hu wamulondile. 7Kukala na mnt'hu imwe akutangwa Balaba, ino nae kakala kafungigwa hamwe na want'hu wehile wakalile walamulwa kwa kukoma na kutenda timbwayaya. 8Kamala uyama wa want'hu ukamwitila Pilato na kumulomba awatendele gesa vila akuwatendelaga. 9Pilato akawauza wala want'hu, “Vino, mkulonda nimulekele Mwene wa Wayahudi?” 10Pilato Kalonga ivo kwa vila kamanya kuwa walava nt'hambiko wakulu wamgala Yesu kumwake kwa kumonela miongo.
11Mbali mulava nt'hambiko mkulu akawasongeza want'hu wamulombe Pilato amlekele Balaba. 12Pilato akawauza kaidi, “Elo mkulonda nimtendeze mnt'hu ino mkumtanga Mwene wa Wayahudi?”
13Want'hu wose wakatowa mazange wakalonga, “Muwambe mumsalaba.”
14Pilato akawaauza, “kwani katenda mbuli ili ihile?” Mbali ao wakagendelela kutowa mazange na kulonga, “Muwambe mumsalaba!”
15Pilato kalonda kuwabwedeza want'hu, ivo akamulekela Balaba kulawa mchifungo. Kamala akalagiliza Yesu asapuligwe na awambigwe mumsalaba.
Asikali wakumzela Yesu
Matayo 27:27-31; Yohana 19:2-3
16Kamala asikali wakamgala Yesu hai kaya ya Pilato akalile kilongozi wa Chilumi, kaya iyo itangigwa Pulaitolia. Umo ndo waduganyike asikali wose. 17Wakamvika mwenda wa kimwene, wakaluka kigata cha miwa na kumvika Yesu mmutwi. 18Kamala Wakandusa kumulamsa, “Mbukwa Mwene wa Wayahudi!” 19Wakamtoa mmutwi kwa mulugwa, wakamtemela mate, wakamtowela mavindi na kumwinamila. 20Kamala ivo wakomeleze kumzela, wakamuhambula mwenda ula wa kimwene, wakamvika mwenda wake, kamala wakamgala akawambigwe.
Yesu akuwambigwa mumsalaba
Matayo 27:32-44; Luka 23:26-43; Yohana 19:17-27
21Ivo wakalile muinzila, wakafikana na mnt'hu imwe akutangwa Saimoni, mkaya wa bululu dya Kilene, tati yawe Alekizanda na Lufo. Mnt'hu iyo kakala akulawa kumgunda kwita kudibululu. Aho, asikali wakamsulutiza ausole msalaba wa Yesu. 22Kamala wakamgala Yesu hadi hant'hu hautangwa Goligota, manake ni pupa da mutwi. 23Wakamwink'ha Yesu divai ihanganywe na dawa ya manemane, mbali yeye akailema kuing'wa. 24Aho wakamuwamba Yesu kamala wakaigawila mienda yake kwa simbi niyani naapate chibwani. 25Ikala saa nt'hatu ya lugunzu Yesu ivo akalile akuwambwa mumsalaba. 26Mchanya mumsalaba wake wakala waandika kosa dyake vino, “Mwene wa Wayahudi.” 27Hamwenga nae, wakala wawambwa wabavi waidi mmisalaba, imwe kakala ubanzi wake wa kulume na imwenga ubanzi wake wa kumoso. 28Aho zikalawila mbuli ziandikwe muna chitabu cha Mulungu zilongile, “Kaikwa hamwe na want'hu wehile.”#15:28 Bibilia zimwenga za umwaka zibule msitali uno.
29Want'hu wakalile wakufosa hant'hu hala wakamdukana kuno wakutingisa mwitwi yawe na kulonga, “Hee! Weye mwenye kuibomola Kaya ya Mulungu na kuizenga kwa siku nt'hatu! 30Ihonye elo, telemka mumsalaba!”
31Vilavila wakulu wa walava nt'hambiko hamwenga na wafunza malagilizo wakamzela Yesu kwa kulonga, “Kawahonya wamwenga, mbali yeye akupotwa kuihonya! 32Leka chilole Kilisito mwene wa Waizilaeli ivo naatelemke kulawa mumsalaba ili chimtogole.” Vilavila hata wala waidi wawambigwe hamwenga na Yesu wakamdukana.
Yesu akudanganika mumsalaba
Matayo 27:45-56; Luka 23:44-49; Yohana 19:28-30
33Kwandusila saa sita ya msanya hadi saa tisa ya dihungile ziza dikaigubika isi yose. 34Saa tisa ya dihungile, Yesu akalila kwa izi kulu, akalonga, “Eloi, Eloi, lama sabakitani?” Maanake, Mulungu wangu, Mulungu wangu, hangi kunileka?
35Want'hu wamwenga watimalalile hant'hu hala ivo wahulike ivo, wakalonga, “Tegelezeni! Miyenu akumtanga Eliya.” 36Mnt'hu imwe akasumka akaita kuchofeka sipomchi muna isiki na kuika mchanya mu lumango, kamala akamwink'ha Yesu ili aing'we, akalonga, “Goza chilole ge Eliya naeze kumtelemsa kulawa mumsalaba!”
37Yesu akalila kwa usungu, akadanganika.
38Aho panzia da kaya ya Mulungu dikadegeka mabanzi maidi kulawa kuchanya hadi hasi. 39Mkulu imwe wa asikali akalile katimalala kulongozi ya msalaba na kuona vila Yesu adanganike, akalonga, “Kweli mnt'hu ino ni Mwana wa Mulungu!”
40Ivila kukala na wanachike wamwenga wakalile wakulola kwa kutali. Imwenga wa ao kakala Malia kulawa kuna dibululu dya Magidala na Salome na Malia mami yawe Yakobo mdodo na Jose. 41Wano wakala wamkumkola Yesu ivo akalile Galilaya na wakala wakumsank'hanila. Vilavila kukala na wanachike wamwenga wengi wezile Yelusalemu hamwenga na Yesu.
Yesu akuzikwa
Matayo 27:57-61; Luka 23:50-56; Yohana 19:38-42
42Dihungile ikala ifika na iyo ikala siku ya kuisasala, kwa vila siku ya kaidi yake ni Siku ya Humulo, 43aho akeza Josefu mkaya wa Alimataya, mnt'hu wa chitala chikulu cha Wayahudi atogoligwe nk'hani. Ivila naye kakala akugozela kwiza kwa Umwene wa Mulungu. Ivo akamwitila Pilato bila kuogoha na akalomba apigwe mtufi wa Yesu. 44Pilato a kakangawala ivo ahulike Yesu kadanganika. Ivo akamtanga mkulu wa asikali na kumuuza mbuli iyo. 45Pilato ivo alongelwe na ila mkulu wa asikali kuwa Yesu kadanganika, Pilato akamtogolela Josefu kuusola mtufi wa Yesu. 46Ivo Josefu akagula sanda na akautelesa mtufi wa Yesu kulawa mumsalaba, kamala akauvika sanda na kuuwika mgati ya kabuli dikalile disongolwe mditalawe. Kamala akabimbilisa ibwe kulu kugubika uuwingililo wa kabuli. 47Malia wa kulawa Magidala na Malia mami yake Josefu wakahaona hant'hu ugonenezigwe mtufi wa Yesu.
ទើបបានជ្រើសរើសហើយ៖
Maliko 15: DBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Dowe @The Word for The World International and Dowe Language translation. All rights reserved.