oLuka 9
9
Oyesu ta Awogboso Igwepa Oleho
(oMatiyu 10.5-15; oMak 6.7-13)
1Ishini Oyesu ya awogboso igwepa ogwu gbayi ni, oda awo oshu ko no omaku bibi enya kweyi da awine ko ose ogege, 2kweyi otuwo oleho ko ga tono ko obula ko Owuso, ana ki da awine ko ose ogege. 3Kweyi oka da awa mo, <<Ala ka zo ojije ki iyawu lo, kwe okposhi, kwe oshu, kwo ikyoga, kwe ikwiri, kwe oshiye. 4Ole ni ala ga anu kpiri, ala banu gbishini ala sho ogya ni bita. 5Owoni ase ya ala omaba lo, ala gwo omutu ki ikpo kala ishini ala ba sho ogya ni bita, oni ya na wo olobene ikweyi wa.>> 6Bwebeni abose gogya gogya, ba tono ko oshu neshi aki ba da ase ogege ebebe nya.
7Ishini oteyi Ohiridus pwo oshu ko oza ni gbodagye ni. Kweyi oshi yo kwu ikweyi koni ashishini ba kamo Oyohana shiyi bwa amiri, 8ashishini mi Iliya bose, kweyi ashishini mo inobane nekye oye pini bose la. 9Ohiridus ke kamo, <<Nyyo Oyohana ikweyi ngma. Anoho ni nyya pwe ela mani ikweyi nu ni?>> Kweyi oya yimu ko mo.
Oyesu da ase okpaku eho ozarore
(oMatiyu 14.13-21; oMak 6.30-44; Oyohana 6.1-14)
10Ishini ayikoko ko Oyesu ko Oyesu kwikye ni, aka da anu oza ni aya ni kpiri. Ebeni obyuwa gogya ko Obetseda, 11ewa ka asuse ke gye ebeni aba ga ni kweyi agboso. Oyuwa omaba oki kela da awa ikweyi ko obula ko Owuso, oki da awase ni gbo ose ni ogege.
12Ni eno ya sha ni ayikoko ko Oyesu igwepa ni wa ta anu kweyi kamo, <<Ashishe be ebe mani lo, ka da awase mani na gogya leke kpo onyakwu naga labo ko oza rore kpe ebe ko kya ikweyi koni ebe ko kya ye ebe mani lo.>>
13Okyogwu mo, <<Ala da awo oza rore shini ana re.>>
Akamo, <<Aha gbo ikyoga eho kpe ebinyi epa kin la, kwe an ga roza rore wa da awase mani kpiri?>> 14Ango okpakwu eho pini be ebeni la.
Oke ka da awogboso mo, <<Ala yuwa na bagye ikpo ikpo ase awa aweho.>> 15Awogboso ya mani, kweyi ananoho bagye okpagye. 16Oyesu zo ikyoga eho kpe ebinyi epa kweyi otiyi mi iso, kweyi osho Owuso iye, oyi kyigbo. Ebeni oda awogboso, kweyi ako da ase. 17Kpiri wa ha yipu, kweyi awogboso kpo shishini sho ogwugwu igwepa.
Obitrus kase ni Oyesu we ni
(oMatiyu 16.13-19; oMak 8.27-29)
18Eno oye Oyesu ya tinarigwu anu fufunu, kweyi awogboso bagye kpa anu. Oduwo oka mo, <<Anoho ni ase ba ka mo ami we?>>
19Akyogwu mo, <<Ashishini mo owo Oyohana ino Obatisma, ashishini kamo owi Iliya, ashishini mo owo oye ipu ka awinobane nekye pini kwikye ya gbo layi la.>>
20Oduwo oka mo, <<Ala ke, anoho ni ala kamo nwwe?>>
Obitrus kamo, <<Okristi ko Owuso.>>
21Oyesu pyuwa akpaha kamo ana kaka da ashishe lo. 22Kweyi okamo, <<Oya wo otiri shini awanyakwase kpo ose ka awosapa kpa awofono, na do Oyi ka Asuse owe nwashika. Aba tela nu ki ba yo ngmo, oki ya nyiso eno ko omweta.>>
23Ebeni Oyesu ka da awa mo: <<Ase ni ya yimu ko gbosun, ona tela ki iyinu ishi kpiri na zo oshi nu na gbosun. 24Ase ni ya yimu ko gbo olayi nu oya yi tonu, ase ni ke yo olayi nu tonu ikweyin, oya yo gbo. 25Ojiya shoshi da asuse owoni opyo oza kese mani kpiri okwunu ko olayi nu? 26Ase ni yi iweyi hin kpe ela hin, Oyi ka Asuse ya yi iweyi nu ishini oyawa ipu kigyashi nu kpigyashi ka Ada kpa aka ayoleho sere. 27Nyya kadala okwokwoshi, ashishini kala ni hagye ebe mani ni, aba gekwu ome ba mo obula ko Owuso lo.>>
Ikpiye ko Oyesu Pya
(oMatiyu 17.1-8; oMak 9.2-8)
28Oyesu kela mani kpe eno ahata, kweyi oyo Obitrus kpo Oyohana kpo Oyakubu ogwu, kweyi atoshi gi iso ke efu ko tinarigwu. 29Ni oya tinarigwu ni, aheyi nu pya, kweyi oshiye nu ki pya wo shehe purututu. 30Ango epa, Omusa kpi Iliya, 31bose ipu kigyashi neshi ba kela kpo Oyesu. Aba kela ikweyi ki ikwu nu ni oyawa gbodagye Ojerusele ni. 32Ola yo Obitrus kpa awoya ki iyawu nu bize ge ebe lenu, ishini ake shiyi ni, amo ipu kigyashi nu, kpa ango epa hagye kpa anu. 33Ni ango mani ba sho Oyesu bita ni, Obitrus kamo, <<Adole, oshoshi ni aha be ebeni ni, an gwa adaba eta, oye na wa akakoho, oye na wa ko Omusa, oye na wa aki Iliya.>> Obitrus gyo oza ni oya ka ni lo.
34Ni Obitrus yipu kela ya ka ni, akpa sa wa yuwa gwu, kweyi oshi yuwa kwu ni abi ipu ka akpa ni. 35Oko bwi ipu ka akpa ya kamo, <<Omani pini wo Oyi hin, ni ami shu ni la. Ala ya akpaha tagye shini ala pwo oza ni oya kani.>> 36Ishini oko mani kela kweyi ni, amo Oyesu fufunu hagye. Awogboso ka da ashishe oza ni ama ni lo.
Oyesu do oyi nongo oye ni gbo omaku bibi ni ogege
37Gbe ebenya asa bwi iso ke efu, ewa kase wa ta anu. 38Ongo oye ipu ke ewa wa kyegba do Oyesu mo, <<Inofoza, nyya bo mo wa mo oyin. Anu fufunu woyin la. 39Omaku bibi yo oyin kwu, kweyi oyo ya sheha; oki yi ikpikpi kwo kweyi okwunu nu ya kyowu. Oya shobita lo so oyo ofo. 40Nba awogboso ko nenya, agege lo.>>
41Oyesu kyogwu mo, <<Ala ase ki ishi mani, awo gbotuse lo ki gbo otu meme, gbi ishi wonya ni nyya yagye kpa ala? Gbi ishi wonya ni nyya gbotu kpa ala? Byo oyi wo we ebeni.>>
42Ni oyi mani yawu ya we ebe ko Oyesu ni, omaku bibi yi ikpikpi gwo tonu. Oyesu ke gbo omaku bibi eha, kweyi oyi mani pyo gege, kweyi oyo da Ada nu 43Kweyi igbashi ya ananoho kwu ikweyi koni amo neneshi ko Owuso ni.
Igbashi ya ananoho kwu ikweyi ko oza ni Oyesu ya ni. Oka da awogboso mo, 44<<Ala ya akpaha tagye shini ala pwo oza ni nyya kadala mani: Aba yo Oyi ka Asuse ya ra kweyi yo nabo ya da ase.>> 45Awogboso ke gyo oza ni oya ka ni lo. Ayikweyi kela mani yi teba da awa, agyo oza ni owe ni lo, aba yoshi ko do Oyesu oka.
Anoho ya wo Oneneshi
(oMatiyu 18.1-5; oMak 9.33-37)
46Ebeni awogboso kwotu ko tawashu kpi iyiwa ikweyi koni anoho ya wo oneneshi. 47Oyesu gyo oza ni yipu ko otu wa ni, okwo oyi leke wa hagye ashikwu nu. 48Ebeni oka da awa mo, <<Kpiri kase ni yo oyi leke mani omaba ipu ki iyen, oyumo omaba pini yoma; ase ni yumo omaba oya ase ni tumo oleho ni oma. Koni ase ni le titi ipu kala anu pini wo oneneshi la.>>
49Oyohana kamo, <<Adole, aha ma ashe ya no omaku bibi enya ipu ki iye wo kweyi aha takirikwu wobi; ikweyi koni oyipu ka aha lo ni.>>
50Oyesu kamo, <<Ala ka wobi lo, ikweyi koni ase ni wo omonye-kwotu wo lo, owa akaka wo la.>>
Awo Osamariya tela ko Oyesu
51Ni ishi ba pya koni aba zo Oyesu ya giso ni, ozo otu nu ko go Ojerusele. 52Kweyi ota ayoleho nu oleho yohobu gogya kase ko Osamariya ko ga kye ebetu gbeyi nu; 53awase ni bebeni ke tela ko yo omaba ikweyi koni amo yowe ko go Ojerusele ni. 54Ishini awogboso, Oyakubu kpo Oyohana ma mani ni, ado oka mo, <<Adole, oya yimu shini ahan yo ola ogwu bwi iso shini na ya awase mani yi la?>> 55Oyesu ke pya kweyi opyuwa akpaha, 56abose gogya oye.
Owe ko gboso Oyesu
(oMatiyu 8.19-22)
57Ni aba yawu ikweyi ko owe ni, ongo oye wa ka da anu mo, <<Nyya gboso ge ebeni oya ga kpiri.>>
58Oyesu kyogwu mo, <<Iwo-apashi gbo ogo wa, igbano ni yawu iso gbo ole wa, oyi ka Asuse ke gbe ebe ko kya lo.>>
59Oka da ashe hoha mo, <<Gbosun.>>
Ongo mani ke kyogwu mo, <<Adole, na ga ya Ada hin nyi ome.>>
60Oyesu ke ka da anu mo, <<Sha awokwu bita na nyo okwu wa, awo ke ga shini oga tono ko obula ko Owuso.>>
61Ashe ki ka mo, <<Nyya gboso, Adole, ke shun bita na ga ka da ase ki ipwoma hin ma ana mowa hin.>>
62Oyesu kyogwu mo, <<Ase ni bye enu kweyi ya pyi iyi ya mi itikpi, oshu ko go obula Owuso lo.
ទើបបានជ្រើសរើសហើយ៖
oLuka 9: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
