oLuka 10
10
Oyesu ta ase awahapa ayepa oleho
1Itikpi ko oza mani Adole sha ase awahapa ayepa kpase shishini kweyi tuwo oleho ase epepa bo ohobu nu gogya ni oya yimu ko ga ni. 2Oka da awa mo, <<Izire ko kye nwashika, awo yo oko ke le gbayayi. Tinarigwu Adole ine ke eho shini na sa awo yo oko nwashika abo gipu ke eho ga yo oko. 3Ala ga! Nyya sa ala abo bya aso oyi ko otukpo abo go otutehe ka awiwo ni. 4Ala ka zo oshu ki iyo kwe ki ikwiri kwe okpabawu lo; ala ka ta ashishe ogbogba owe lo.
5<<Ishini ala gipu kole, ikyikyo ala kamo, <Omene na yo kpo ole mani.> 6Owoni ase gbo otu mene ye ebe ni, eshi ko omene kala na yo kpa anu; owoni olemani lo, omene kala ya kwikye we ebe kala. 7Ala bagye ole ni, ala re ala gwo oza ni ada ala kpiri, ikweyi koni ino yoko shu ko pya abola. Ala ka bwo ole bwo ole lo.
8<<Ishini ala gogya ni aya ala omaba, ala roza ni ada ala ni. 9Ala da awase ni loshu lo ni be ebeni ogege kweyi ala ka da awa mo, <Obula ko Owuso wa pee kpa ala.> 10Ishini ala ke gogya kweyi atela ko ya ala omaba, ala gi ikweyi ko owe, kweyi ala kamo, 11<Kwo omula ko ogya kala ni ba aha ikpo ni ayi gwo shonu shini na wo olobene ikweyi kala. Ala gye mo: Obula ko Owuso yo pee.> 12Nyya kadala, eno ko ke epwo, Owuso ya dase ko ogya ni owe ni sha kase ko Osodom ni!
Ogya ni tela ko Oyesu ni
(oMatiyu 11.20-24)
13<<Igbe na ta ala ase ko Okorazi kpo Obetseda! Oza ki igbashi ni nyya ogya kala ni abi ya okpagye ko Otaya kpo Osidon, ase ke ebeni bi sho oshiye ko otu byobya, kweyi abi shi iyawu ikpiye shini ase na mamo asho ozalabi wa bita. 14Eno ko kepwo oyawa labi da ala sha ako Otaya kpo Osidon. 15Kweyi awo Okapanahu, oya yimu ana nga awo iso? Aayi, aba to go ola.>>
16<<Ase ni pwe ela kala, opwe ela hin, ase ni tela kala otela hin, ase ni ke tela hin otela kase ni tumo oleho ni.>>
Okwikye kase awahapa ayepa
17Ase awahapa ayepa ni kwikye kpo otunehe kweyi kamo, <<Adole, omaku bibi geyagye daha ipu ki iye wo.>>
18Okyogwu mo, <<Nmi Ibiri ya gbo bwi iso byo ola ka akpula ni. 19Ala pwo! Ndala oshu shini ala yawu ikweyi ke egwa kpe ena, kweyi oshu kala na sha ko omonyekwotu kala; kweyi ojije ya ta ala lo. 20Ala ka shotunehe koni ibiri geyagye da ala ni lo, ala ke shotunehe koni ati iye kala ipu ki iso ni.>>
Oyesu shotunehe ipu ko Omaku ko Owuso
(oMatiyu 11.25-27; 13.16-17)
21Ipu ki ishi oni otu ko Oyesu nwu kpo otunehe bwe ebe ko Omaku ko Owuso kweyi okamo, <<Nyya sha awo iye Ada, Adole ki iso kpo okpagye, ikweyi koni oyo oza mani yi teba da awase ni ziyi kpa awase ni gyo oza ni kweyi oyi shiya ayileke. Olemani, Ada, omani wo oza ni sho otu ni la.
22<<Ada hin yo ojoji kpiri yi da ami. Ashishe gya ase ni Oyi we nilo sa Ada nu, kweyi ashishe ki gya ase ni Ada we nilo so Oyi kpase ni Oyi yimu ko yo shiya awa ni.>>
23Ebeni opya ge ebe ka awogboso kweyi kela da awa kyo mo, <<Otunehe yo kpi iyi ni mo oza ni ala mani. 24Nyya kadala okwokwoshi mo awobane nwashika kpo ose yimu ko mo oza ni ala mani, ake ma lo, ko pwo oza ni ala pwo ni, ake pwo lo.>>
Elase ikweyi ko ongo ko Osamariya ni gbi iyinyinyi ni
25Ishi oye, inofono oye nyiso hagye iso ko mo Oyesu ma. Odo oka mo, <<Inofoza, ojini nyyaya shina pyo olayi ko gbogbo-gbogbo?>>
26Okyogwu mo, <<Oji ni ata ipu ko okpa ko ono? Oma moji ipu ni?>>
27Okamo <<<Yimu ka Adole Owuso wo kpo otu wo kpiri, kpo omaku wo kpiri, kpo oshu wo kpiri, ki kpo ogyogye wo kpiri> kweyi, <Yimu ko oya ko oyagye wo byoni oyimu ki iyo ni.>>>
28Oyesu ka da anu mo, <<Okela gyogye, ya mani oya pyo olayi.>>
29Anu ke ya yimu ko shiyo Oyesu mo anu gbo ozalabi lo, odo oka mo, <<Anoho wo oya ko oyagye hin?>> 30Oyesu kyogwu mo, <<Ongo oye bwo Ojerusele wa go Ojeriko, owa ga abo ka awowiyi. Ayo oshiye ke, agwo gbi ishini osheku kweyi aga wa. 31Osapa oye wa shigbo bwo owe ni, ishini omo ongo mani ni, obwo okoka kweyi ganu. 32Mamani ongo oye bwi ipwoma ko Olawi, obwe ebeni kweyi omo, obwo okoka kweyi ganu. 33Ongo ko Osamariya oye ke wa shigbo, obwe ebeni ongo mani gwutagye ni, omi iyinyinyi nu. 34Oge ebe nu, ga bo oza ipi, kweyi sha ano kpi inyi anu. Ebeni oyo ongo mani yi ti ikweyi ko odagyi nu kweyi byo go ole ka awogboga kweyi yi iyi kwo. 35Ni ebe nya ni oda ase ni ya yi iyi kwe ebeni ni opami epa kweyi kamo, <Yi iyi kwo, ishini nkwikye wa, nyya da awo oza ni ongmo ikweyi ko ikwiri ni ndawo mani.>
36Oyesu do oka mo, <<Anoho ipu kase eta mani ni oma mo owo oya ko oyagye ko ongo ni awowi gwo mani?>>
37Inofono kyogwu mo, <<Ase ni mi iyinyinyi nu ni.>> Oyesu ka da anu mo,
<<Awo, gaya mamani.>>
Oyesu go ole ko Omata kpo Omeremu
38Ni Oyesu kpa awogboso yawu ba ga ni, apwo ogya leke oye ebe ni onya oye ni aba yogwu mo Omata ni gwofunu kole nu da anu. 39Omata gbo oyene oye, iyenu wo Omeremu, owa yagye obutu ka Adole ya pwe ela ni oya kani. 40Omata ke iyi nu yebe ko yo ozarore. Owebe nu wa kamo. <<Adole, oko ojije lo, oyene hin shun bita yayo oko fufun? Ka danu na wa tumabo!>>
41Adole kamo, <<Omata, Omata, oya byotu ikweyi ko oza nwashika, 42oje oye kponu pini oke ya yimu la. Omeremu zo oza ni shoshi she ni, kweyi aba gege ko yi bize sho lo.>>
ទើបបានជ្រើសរើសហើយ៖
oLuka 10: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
