oLuka 8
8
Anya ni gboso Oyesu ni
1Itikpi ko omani Oyesu bose gogya leke kpo onyakwu, oya tono ko oshu neshi ko obula ko Owuso. Igwepa ni ga kpa anu, 2kweyi kpa ashishini ka anya ni angma awa shi ipu ko omaku bibi kpo ose ni; kpo Omeremu bwa agye ko Omagdalin ni omaku bibi ahapa bose ikpiye nu ni; 3Ojuwana onya ko Okuza, ni wo oteyi kole ko Ohiridu ni, kpo Osuzana kpa ashishini kase nwashika. Anya mani ba to Oyesu kpa awogboso abo kpo oza ni agbo ni.
Elase ikweyi ko Osheho
(oMatiyu 13.1-9; oMak 4.1-9)
4Ni ewa gbayi ni, ase lewa we ebe ko Oyesu bwo ogya gogo-gogo, okelase da awa mo, 5<<Osheho oye ge eho ko myizire, ishini oya myizire ni, ashishini shonu okoka ko owe, ebeni ano wayi kpo re. 6Ashishini shonu ikweyi ko okpo, kweyi ishini abwu ni, agekwu koni agbagye nwashika lo ni. 7Ashishini ki izire shonu ipu ki igye, kweyi igye gye yuwa bya. 8Ashishini shonu ipu ka agye neshi. Agye kweyi gwi izire, ashishini ma asa ikpo ogbogbo oye, ni sho olamuni omyi ni.>>
Ishini okela mani kweyi ni okamo, <<Ase ni gba akpaha ko pwe ela na pwo.>>
Ikweyi ke Elase
(oMatiyu 13.10-17; oMak 4.10-12)
9Awogboso ka da anu mo ona gwi ikweyi kelase da awa. 10Owuso kamo, <<Oza gyogye ko obula ki iso ni teba ni ayi gwa da ala, ase shishini nyya ka ipu kelase shini,
<<<Aba ma, bya aba ma lo ni;
aba pwo, aba gyo oza ni aka ni lo.>#8.10 ISH 6.9
Oyesu Ki Ikweyi ke Elase Ikweyi ko Osheho
(oMatiyu 13.18-23; oMak 4.13-20)
11<<Ikweyi kelase mani yoma: Izire we ela ko Owuso. 12Oni shonu ikweyi ko owe ni wa awase ni pwo, kweyi ibiri ke wa yo oza ni apwo ni yi bize sho otu wa, shini ana ka kyogwu kpa anu shini ana pyo minyo lo. 13Oni shonu ikweyi ko okpo ni lema bya awase ni pwe ela ko Owuso kweyi akyogwu kpo otushosha, ake gbo ogba loshu lo. Ayo otuse ki ishi gbayayi, ishini omama ke wa da awa ni akwikye itikpi. 14Izire ni shonu ipu ki igye ni lema byo awase ni pwe ela ko Owuso, kweyi otu byobya ikweyi ko odu kpo onye ko yagye kese mani yuwa ma lo. 15Izire ni ke shonu ikweyi ka agye neneshi ni lema bya awase ni pwo oshu kweyi ayi ti ipu ko otu neshi ni ya zikweyi iso loni, aha gye giri kweyi ami izire.
Elase Ikweyi ki Ikwomu
(oMak 4.21-25)
16<<Ashishe ya kwola ikwomu kweyi yayi leba ipu ke eyi kwe yi heye ko ogwudu lo. Apa ba yi hi ikweyi ko oka nu, shini ase ni ya wi ipu kole na mebe. 17Ojoji ni ayi leba aba yifu tese, kweyi ojije ni gwogwu aba yi gwa. 18Mani oni, ala gbera kpo oza ni ala pwo. Kpiri kase ni gbo oza aba fu manu da anu; kpiri kase ni gbo lo, ko ogbayayi ni ogbo ni aba yi bize sho.>>
Ayene ko Oyesu kpi Inanu
(oMatiyu 12.46-50; oMak 3.31-35)
19Ene ko Oyesu kpa ayinanu wa ko mo, ake gege ko mo lo ikweyi koni ase lewa ebe ni. 20Ashe ga ka da anu mo, <<Ene wo kpa ayene wo hagye ese, aba yimu ko mo.>>
21Okamo, <<Enen kpa ayene hin wa awase ni pwe ela ko Owuso ki yo oko kpa anu ni.>>
Oyesu Yo Owu Nyakwu Hagye
(oMatiyu 8.23-27; oMak 4.35-41)
22Eno oye, Oyesu ka da awogboso mo, <<Ala gipu ko owu ki inyo shini ahan sheyi ki ishu ge ese.>> Ebeni agipu ko owu ki inyo ko sheyi. 23Ni aba ga ni, ola yo bize. Ebeni owu nyakwu ta ikweyi ki ishu, kweyi owu ki inyo ya yimu ko ga agye, kweyi ebi ya yimu ko ruwa. 24Awogboso Oyesu shi iyi mo, <<Adole, Adole, inyo ya yaha re!>>
Onyiso kweyi ka do owu kpo ogwa ki inyo mo ana hagye. 25Oda awogboso oka mo, <<Otuse kala yini?>>
Ipu ko oshi kpi igbashi adi iyiwa oka mo, <<Omani wa anoho, no owu kpi inyo, ba apwe ela nu?>>
Oyesu Do Ongo ni Gbo Omaku bibi ni Ogege
(oMatiyu 8.28-34; oMak 5.1-20)
26Oyesu kpa awogboso sheyi ki ishu ga agbabo ko oGerasa bwa agye ko Ogalili. 27Ishini Oyesu sa ega ki ishu ni, ogbayi kpo ongo oye ni gbo omaku bibi bwo ogya ni. Ogbeji ni ongo mani ya osho oshiye lo ni, oya yo ole lo, oya kya ebe ka amiri. 28Ishi no omo Oyesu ni, ozoko iso ya kyegba kweyi kamo, <Oji ni oya yimu ebe hin, Oyesu, Oyi ko Owuso Ada Nyakwu? Nyya bo mo ka yumo ojije lo!>> 29Oka mani ikweyi koni Oyesu sho omaku bibi eha mo ona bose sho. Ongo mani ishi nwashika aba yo sha ashirika, oya ya aba yayi kweyi omaku bibi ya byo ge ebe ni gba ashishe lo ni. Ase ko Oyahuda.
30Oyesu do oka mo, <<Iye wo wa anoho?>>
Okyogwu mo, <<Iye hin wo nwashika,>> ikweyi koni omaku bibi nwashika bi ikpiye nu ni. 31Awo omaku bibi mani bo Oyesu mo ona ka nawenya ga aleku lo.
32Aruma nwashika ba ashikwu kikpokyi ba roza. Awomaku bibi mani bo Oyesu mo ona na awa enya gipu ka awaruma ni, kweyi oda awo okwunu. 33Ishini awomaku bibi mani bose sho ongo mani, agipu ka awaruma mani, awaruma nyinya ga shonu ipu ki ishu, kweyi ishu yuwa re.
34Awase ni ba gbeho ka awaruma mani mo oza ni gbodagye ni, anyinya gipu ko ogya ga gbi igwu ko oza ni gbodagye ni da awa ipu ka awogya leke kpo onyakwu, 35kweyi ase bose ge ese ko ga mo oza ni gbodagye ni. Ishini awe ebe ko Oyesu ni, awa to ongo ni omaku bibi bose sho mani yagye obutu ko Oyesu, osho oshiye kweyi otu nu ka agye; kweyi oshi yuwa kwu. 36Awase ni mo oza mani ka da ase oza ni omaku bibi ya kpo ongo mani ni ada nu ogege ni. 37Ebeni ase ka agbabo ko oGerasa ka do Oyesu mo ona sho ogya wa bita, ikweyi koni oshi yuwa kwu ni. Ogipu ko owu ki ishu kweyi ganu.
38Ongo ni omaku bibi bose sho mani bo Oyesu shini ona ga kpa anu, Oyesu ke ka da anu mo, 39<<Go ole ga ko oza ni Owuso ya da awo ni.>> Ebeni ongo mani gaga tono do ogya kpiri ikweyi ko oza ni Oyesu ya da anu ni.
Onya ni Loshu lo ni kpo Oyi ko ojayirus
(oMatiyu 9.18-26; oMak 5.21-43)
40Ni Oyesu kwikye ni, ewa ka asuse yo omaba, koni ananoho ba gbeyi nu ni. 41Ebeni ongo oye ni aba yogwu mo Oyayirus, oteyi ke ekpa we ebe ko Oyesu wa kwagye obutu nu kweyi bo mo ona go ole nu, 42ikweyi koni oyi nu ki ishayi igwepa nonya yo okwunu ki ikwu.
Ni Oyesu yikweyi ko owe ko go ole ko ojayirus ni, ewa ka asuse ba sa abo. 43Kweyi onya oye ye ebe ni ya gboyi ishayi igwepa, oyoji ni ogbo ipu koyagye nu ngmo dawoloboshi, ashishe ke gege da anu ogege lo. 44Ebeni oyawu bwi itikpi wa ga abo oshiye ko Oyesu, ebebeni ogboyi nu hagye.
45Oyesu doka mo, <<Anoho ga ami abo?>>
Kpiri wa tawashu. Kweyi Obitrus kamo, <<Adole, ase lewa ba sa abo.>>
46Oyesu ke kamo, <<Ashe ga ami abo; nggye oshu bose ikpiyen.>>
47Ebeni onya ni, ma mo anu ya gege yaga mani kin lo, oshi yo kwu, kweyi obose wa kwagye obutu ko Oyesu. Obutu ka asuse kpiri, oko oza ni ya ni ogo Oyesu abo kweyi opyo ogege nu ebebeni. 48Ebeni Oyesu ka da anu mo, <<Oyin, otuse wo da awo ogege, ga kpo otumene.>> 49Ni Oyesu tayayo ya kela ni, ase bwo ole ko ojayirus oteyi ke ekpa wa ka da anu mo, <<Oyi wo gekwu, ka yi inofoza apya kelo.>>
50Ni Oyesu pwo mani ni, oka do ojayirus mo, <<Ka yoshi lo; totuse, kweyi oyi wo ya pyo ogege.>>
51Ishini Oyesu pwo ole ko ojayirus ni, osha ashishe bita gipu kpa anu lo so Obitrus kpo Oyohana kpo Oyakubu, kpa ada kpe ene ko oyi mani. 52Ase shishini ke be ese ba kyegba kpo otu byobya ikweyi ko oyi mani. Oyesu ke kamo, <<Ala she egba kyokye bita, ikweyi koni oyi mani gekwu lo, oke ya gbola kin la.>>
53Ayo Oyesu eye koni agye mo oyi mani gekwu ni. 54Oyesu ke bya abo kweyi kamo, <<Oyin, nyiso!>> 55Omaku nu kwikye, kweyi otakpa nyiso. Ebeni Oyesu mo ana da anu oza na re. 56Igbashi ya ada kpe ene ko oyi mani kwu. Oyesu pyuwa akpaha ma ana ka ka da ashishe oza ni gbodagye mani lo.
ទើបបានជ្រើសរើសហើយ៖
oLuka 8: ALA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
THE WORD FOR THE WORLD INTERNATIONAL, THE WORD FOR THE WORLD NIGERIA
