Lukas 21
21
Nègꞌog néy sènꞌòy balakh rik hèl-hal
(Mrk 12:41-44)
1Bil Yèsus mok èn Dékh Tuhan, Nanak nanéh ma sènꞌòy kaye rik umchèr-chor duid ma kelòj kotak nèrchor duid rik umꞌog ma Tuhan. 2Dak Yèsus nanéh keꞌjèk mok néy sènꞌòy balakh rik hèl-hal nachor nar kupang rik ajok geb nilay eh. 3Dak Yèsus nachal, “Kemën Yék imchal ma nyob, balakh rik hèl-hal nak naꞌog lebéh rayak nilay eh nòm kenèmbek sènꞌòy mòy. 4Sebab sènꞌòy mòy umꞌog nòm kenaye rik beduyon um. Tapik balakh doh, rik nahal geb, naꞌog kenèmbek duid rik mok èn nanak — tok mèk-mok wèl nambelik nèygéy eh.”
Yèsus nachèl-chal tentang nèytuy Dékh Tuhan
(Mat 24:1-2; Mrk 13:1-2)
5Dak maròp-maròp hèhoh Yèsus umcha-chal tentang Dékh Tuhan, sebab umnéh ma batuk-batuk eh rik méj geb ròb kenèmbek barang méj-méj rik sènꞌòy umꞌog untok muhiyas ma Dékh Tuhan. 6Tapik Yèsus nachal, “Mok néy arik akal kenèmbek rik nyob néh doh akal umtuy, sampéy tok mèk-mok néy batuk pon namdol èn balikh batuk rik mòy.”
Yèsus naberèngleng ma hèhoh-hèhoh Eh tentang senikse rik nalãj
(Mat 24:3-14; Mrk 13:3-13)
7Pas nak hèhoh-hèhoh Eh umtanyak ma Yèsus, “Guruk, bil nambelakuk mutuy ma Dékh Tuhan? Bok ilok tande eh — rèk lok kimlèkh gah nak hòj nambelakuk?”
8Dak Yèsus nasaꞌod, “Bejagak-jagak lah! Agok hoh ma senèꞌlok! Sebab jajéh sènꞌòy akal umlãj bok umgunak kenëh Yék, dak umchal, ‘Yék lah irik Eh nak!’ dak ‘Mase eh hòj namlèy-lòy!’ Agok hoh ma umnak. 9Bil nyob keyòkh gah perang ròb gah sènꞌòy umlawan ma kerajaꞌan, agok nyob tukh. Kenèmbek hal doh haros umbelakuk nèng-nèng, tapik bil nak tèk-tik tok nalèy-lòy ma nèjsòj duniak.”
10Yèsus nachal wèl, “Kaum-kaum akal umbeperang kaban rik um, bok kerajaꞌan umbelawan samak kerajaꞌan. 11Bok akal nabelakuk gempah bumi èn lok-lok tempad, ròb chènrok tok mèk-mok mènhik sènꞌòy mugéy. Dak akal nabelakuk èn langid tande-tande terok geb rik berèngtukh ma sènꞌòy. 12Tapik èn tèk-tik kenèmbek nak tok nabelakuk, sènꞌòy akal umròt dak umsikse nyob. Dak akal umsak ma nyob èn dékh senindol, dak umjél nyob. Sebab nyob pechaye ma Yék, akal umꞌéd nyob untok nyomtèrbuk ma rajak-rajak ròb sènꞌòy bekuwase untok musak nyob. 13Nak lah chan untok nyob oglèkh ma umnak Gah Méj tentang Yék. 14Sebab nak, èn tèk-tik tok umsak ma nyob, kod keputusan nèng-nèng supaye nyob agok id tentang rèk lok nyomsaꞌod bil umtanas ma nyob. #Luk 12:11,12. 15Sebab bil nak Yék akal iꞌog cherèndìk ma nyob supaye nyob lèkh ilok nyomchal, sampéy mèsmus nyob tok dapad musaꞌod bok mulawan ma nèlchal nyob nak. 16Dak kewarge rik nyob pon — amèk apak, mèrpek, sakèy — ròb kéy-kéy nyob keꞌjèk akal umròt ma nyob dak umꞌog ma sènꞌòy bekuwase. Dak sènꞌòy bekuwase nak akal umcheleg ènsekh sènꞌòy nòm nyob keꞌjèk. 17Kenèmbek sènꞌòy akal umcheꞌẽs ma nyob sebab nyob hoh ma Yék. 18Tapik ruway nyob pastik tetab selamad.#21:18 ruway nyob pastik tetab selamad. Tèks asli mok kiasan anuh: “Tok benéy sog pon nòm kuy nyob namhõy.” Maksod eh, yab mèsmus umperèdjèd bok umcheleg ma hèhoh Yèsus, tapik Allah hòj natèrgos ma hèhoh Yèsus. Jadik mèsmus nak had boléh cheleg ma esik hék — tapik hèhoh Yèsus tetab selamad dak akal umgos jalꞌéng samak Tuhan. 19Kalòw nyob tehan bok setiye, akal nyob gos jalꞌéng samak Tuhan.”
Yèsus nachèl-chal tentang sènꞌòy mèsmus rik akal umtuy ma kote Yèrusalèm
(Mat 24:15-21; Mrk 13:14-19)
20Yèsus nachal wèl ma hèhoh Eh, “Bil nyob néh tentere umkepong Yèrusalèm, nyob akal nyob lèkh hòj nalòy mase mèsmus nak mutuy ma kote nak. 21Bil nak, sènꞌòy èn Yudéya mestik umda-dok ma pok-pok. Sènꞌòy rik èn kelòj kote Yèrusalèm nak mestik umperak kote, dak sènꞌòy èn béng kote nak agok mòj wèl ma kelòj kote. 22Sebab unak lah mase Allah nahukom ma sènꞌòy Israꞌèl, supaye nambelakuk kenèmbek rik mèn nabi umtulis manah tòp. #Hos 9:7. 23Tapik bil nak kalõn geb ma bèꞌbok rik umbekayod, bok ma amèk rik tik terèmèm kuwòt tik chelèkh! Akal mok senikse rik terok geb èn kenèmbek negerik doh, sebab Allah naꞌõl geb ma kaum Israꞌèl. 24Bil nak mèsmus akal umcheleg jajéh sènꞌòy Israꞌèl nòm juwòj, dak mok wèl sènꞌòy mòy rik umròt dak umꞌèn ma jajéh negerik mòy. Dak akal kaum mòy umkèrlah dak umkuwase ma Yèrusalèm, sampéy nalòy mase Allah nakod wèl kuwase nak nòm mèsmus nak.”
Nèjlãj Yèsus, Sènꞌòy Nòm Sorga
(Mat 24:29-35; Mrk 13:24-31)
25Yèsus nachal wèl, “Dak bil nak akal mok sènꞌòy umnéh ma tande nabelakuk ma mad is, gechèk, ròb pèrlòy. Dak èn bumi sènꞌòy kenèmbek kaum umtukh geb, dak umbèlꞌih umnéh ma umbak laud kèlkeꞌũl dak chèghog. #Yès 13:10; Yeh 32:7; Yl 2:31; Per 6:12,13. 26Allah akal nayèh-yoh ma kenèmbek kuwase èn langid, dak bil nak sènꞌòy umtukh umgahmak ummòg kèsbes sebab umgahmak gah rik terok geb nambelakuk èn bumi keꞌjèk. 27Pas nak kenèmbek sènꞌòy akal umnéh Yék, Sènꞌòy Nòm Sorga, ilãj èn keliling sagub, nòm kuwase ròb chènlakh rik bedeyãr geb. #Dan 7:13; Per 1:7. 28Dak bil hal-hal nak natekèd nabelakuk, ted dak lamid bok néh ma Yék. Beꞌadés lah, sebab Allah sejèkh namlãj namtèrgos ma nyob!”
Tenènglèkh nòm jehuk kebek
(Mat 24:32-35; Mrk 13:28-31)
29Dak Yèsus naꞌoglèkh chòntoh doh ma hèhoh Eh, dak nachal, “Néh lah jehuk kebek,#21:29 Tèks asli: “jehuk ara” (néy jènis jehuk gerèk jehuk kèlpong). ròb kenèmbek jehuk rik mòy. 30Bil nyob néh jehuk namulak nabesèꞌlak, nyob lèkh jehuk nak hòj tilok nambekèꞌbek. Hal nak hòj tèꞌlalah, tok perlu sènꞌòy namꞌoglèkh ma nyob. 31Gerèk nak keꞌjèk, bil nyob néh ma mase senusah ròb tande-tande mòy naꞌtèk, akal nyob lèkh tèꞌlalah Kerajaꞌan Allah hòj tilok.
32Kemën Yék ichal ma nyob, sènꞌòy jaman doh tik umgos bil kenèmbek hal nak umbelakuk. 33Langid ròb bumi akal tok mèk-mok wèl, tapik nèlchal Yék jalꞌéng sampéy bilok-bilok.”
Betabéh lah selaluk untok nèjlãj Yèsus
34Yèsus nachal wèl, “Bejagak-jagak lah! Agok lah nyob beꞌidéh mase nyob bebèdlod ma bèngbokh ròb nèngꞌòng belènywény. Agok lah èd-id bok besibok ma nèsgos èn duniak doh. Sebab kalòw nyob beꞌidéh mase gerèk nak, akal nyob tok betabéh dak nyob kèdjed bil Yék tok-tok ilãj, 35gerèk lawok rik kèdjed bil siding tok-tok nasa-sèk. Sebab pastik kenèmbek sènꞌòy èn bumi doh akal umkèdjed bil arik nak. 36Jadik, bebèh-bèh lah selaluk. Bok bepèꞌtak lah supaye nyob mok kènwad untok nyomtehan kenèmbek hal susah rik akal nabelakuk nak. Dak bil Yék, Sènꞌòy Nòm Sorga, ilãj, nyob dapad ted samak Yék bok tok nyob tèng-tukh.”
37Tiyab-tiyab arik Yèsus nabetènglèkh èn Dékh Tuhan, dak bil lèngꞌakh Rik Nak nahuwòl nòm kote dak nasèglòg èn Pok Sayton. #Luk 19:47. 38Dak tiyab-tiyab yèhyah sènꞌòy jajéh umwòg awal dak umlãj ma Dékh Tuhan untok mukeyòkh tenènglèkh Yèsus.
ទើបបានជ្រើសរើសហើយ៖
Lukas 21: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
