Lukas 20
20
Tenanyak tentang kuwase Yèsus
(Mat 21:23-27; Mrk 11:27-33)
1Mok néy arik Yèsus nabetènglèkh ma sènꞌòy èn Dékh Tuhan dak naꞌèg-oglèkh Gah Méj nòm Allah. Dak bil nak mèn ketuwe imam, guruk agama, ròb tèꞌtak sènꞌòy Yahudi umlãj ma Rik Nak. 2Dak umnak umtanyak, “Oglèkh lah ma kandék, nòm lok hadapad kuwase hamteꞌèl hal-hal doh? Chok irik èg-og kuwase nak ma Hãk?”
3Tapik Yèsus nachal ma umnak, “Yék imtanyak néy senuꞌal ma nyob keꞌjèk. Oglèkh ma Yék, 4chok rik èg-og kuwase ma Yohanès nambaptis ma sènꞌòy? Allah èn sorga ke atòw sènꞌòy hék?”
5Umnak pon umcha-chal èn kaban rik um, “Rèk lok èmsaꞌod? Tok boléh èmchal, ‘Allah èn sorga’, sebab Yèsus pastik nachal, ‘Kalòw gerèk nak, nahey tok nyob pechaye ma Yohanès?’ 6Tapik tok boléh keꞌjèk èmchal ‘Sènꞌòy hék’, sebab pastik sènꞌòy jajéh umbedal batuk mukèrbes ma èk! Sebab umnak kenèmbek umpechaye Yohanès nak nabi nòm Tuhan.” 7Jadik umnak umsaꞌod, “Kandék tok kilèng-lèkh.”
8Sèj-sòj eh, Yèsus nachal, “Kalòw gerèk nak, Yék pon tok iꞌèg-oglèkh ma nyob nòm kuwase ilok Yék iteꞌèl hal-hal doh.”
Chenal tentang sènꞌòy rik umbeséwe selay
(Mat 21:33-46; Mrk 12:1-12)
9Yèsus nabetènglèkh wèl ma sènꞌòy jajéh, dak naꞌèg-oglèkh chenal ma umnak. Nanak nachal, “Mok néy sènꞌòy rik tèm-tap selay anggor. Kerek nak nanak naꞌog sènꞌòy mòy umséwe selay anggor nak, dak nawèk ma negerik mòy dak nagel lamad èn anak. #Yès 5:1. 10Bil nalòy musim nègtòg, rik beselay natèrꞌèn néy kuli namwèk ma sènꞌòy rik beséwe selay, untok namkod ènsekh nòm hasil selay eh nak. Tapik umnak umteboh ma kuli nak, dak umꞌor namak, tok naꞌèn-èn ilok-ilok. 11Rik beselay nak natèrꞌèn néy kuli mòy wèl. Tapik umnak umteboh dak umserèny-ngẽny ma rik nak keꞌjèk, dak umꞌor nammak, tok naꞌèn-èn ilok-ilok. 12Pas nak natèrꞌèn kuli tenigak. Tapik umnak umteboh ma kuli nak keꞌjèk sampéy bebakad, dak umsuwèd ma béng selay nak. 13Sèj-sòj eh nak, rik beselay nak nachal, ‘Ilok wèl imteꞌèl? Yék iꞌor kuwòt yék rik isayèkh namwèk ma umnak. Pastik umnak akal umhormad ma kuwòt rik yék!’ 14Tapik bil sènꞌòy rik beséwe selay nak umnéh ma kuwòt eh nak, umchal kaban rik um, ‘Udoh lah kuwòt rik eh. Nanak jakal namjadik pemilik selay doh. Jok lah, èmcheleg ma rik nak supaye selay doh namjadik milik èk!’ 15Umnak pon umsuwèd rik nak ma béng selay dak umcheleg.”
Dak Yèsus natanyak, “Jadik ilok sènꞌòy rik beselay nak akal namteꞌèl ma umnak? 16Pastik rik nak akal nalãj bok nacheleg sènꞌòy rik beséwe nak, dak naꞌog sènꞌòy mòy umséwe selay anggor eh nak.”
Bil sènꞌòy èn anak umkeyòkh ma chenal nak, umchal, “Hõy! Kandék kiꞌas hal nak agok nambelakuk!”
17Yèsus natemèl ma umnak dak nachal, “Nyob as hal nak agok nambelakuk. Tapik mestik hòj nyob bache ayad doh èn kelòj Kitab, dak nyob patod nyob lèkh maksod eh: #En 118:22.
‘Sènꞌòy rik umtèlꞌèl dékh umbes
néy batuk rik umjèk nak.
Batuk nak hòj najadik batuk paléng penting — batuk betunggol
rik namchèrgod ma dékh nak.’
18Chok rik nakelek ma batuk nak akal napeleg. Dak kalòw batuk nak nakelek ma sènꞌòy, nahapid ma sènꞌòy nak.”
19Dak kenèmbek pemimpin sènꞌòy Yahudi rik umlãj naꞌtèk umlèkh maksod chenal Yèsus nak: Yèsus lah rik gerèk batuk betunggol nak, dak umnak lah gerèk sènꞌòy jèdhad rik beséwe selay naꞌtèk. Bil nak keꞌjèk umchèn mukèk nòng untok muròt ma Yèsus, tapik umtukh ma sènꞌòy jajéh.
Tenanyak tentang duid chukay
(Mat 22:15-22; Mrk 12:13-17)
20Kerek nak pemimpin sènꞌòy Yahudi umtemèl jèngling ma Yèsus, dak umpòj chan untok muròt ma Rik Nak. Dak umnak umbayar maròp-maròp sènꞌòy supaye umbegèw-gòw gerèk sènꞌòy méj-méj. Dak umꞌor umnak mubetanyak hal susah ma Yèsus. Umnak umꞌas Yèsus namsaꞌod sèk, supaye boléh muròt bok muꞌog ma kuwase menterik rayak nòm rajak Roma.
21Jadik sènꞌòy rik umbegèw-gòw nak umchal ma Yèsus, “Guruk, kandék kilèkh ilok hachal bok hatènglèkh nak kemën. Hãk tok hatèng-tukh ma benèdlod sènꞌòy, tapik hatènglèkh tèꞌlalah nòng nènchèn Allah ma sènꞌòy. 22Jadik, hachal ma kandék: kalòw èhoh ma Hukom Tuhan, boléh bayar ke chukay nak ma Rajak Rayak èn Roma, atòw hõy?”
23Tapik Yèsus nalèkh ma senèꞌlok umnak. Jadik, Nanak nachal, 24“Pèrnéh ma Yék néy kupang pèrak. Gambah ròb kenëh chok rik natulis èn kupang doh?” Dak umnak umsaꞌod, “Rajak Roma.”
25Dak Yèsus nachal, “Jadik kupang doh milik rajak Roma. Kalòw gerèk nak, og lah milik rajak Roma ma rajak Roma, bok milik Allah ma Allah.”
26Jadik umnak tok dapad mukèrnak ma Yèsus, sebab Rik Nak tok nachèl-chal ilok-ilok rik sèk èn mad sènꞌòy jajéh. Bil umkeyòkh chare nasaꞌod nak, umbèlꞌih geb dak umkedëk sengẽk.
Tenanyak tentang nègwòg sènꞌòy kèsbes
(Mat 22:23-33; Mrk 12:18-27)
27Maròp-maròp sènꞌòy Saduki umlãj ma Yèsus. (Sènꞌòy Saduki nak guruk agama Yahudi rik tok umpechaye sènꞌòy kèsbes mulos muwòg wèl.) Umnak umchal ma Yèsus, #Tèn 23:8. 28“Guruk, Musa hòj natulis hukom doh untok èk: ‘Kalòw néy babeh nakebes èn tèk-tik tok bekuwòt, mèrpek babeh eh haros naselòg ma balakh eh nak supaye namdapad kuwòt#20:28 Ter. 25:5-10. Èn jènman Israꞌèl manah tòp, mok adad sènꞌòy Yahudi doh. Had kuwòt rik mulak nak umꞌanggap kuwòt sènꞌòy rik hòj kèsbes nak. rik najadik waris untok sènꞌòy rik kèsbes nak.’ #Ter 25:5. 29Rèk lok kalòw mok tujoh sènꞌòy mèrpek bèhbeh. Rik mulak long nak naselòg ma babok, bok nakebes èn tèk-tik tok bekuwòt. 30Dak pek rik kedua naselòg ma balakh eh nak, tapik nanak pon nakebes èn tèk-tik tok bekuwòt. 31Hal chachod keꞌjèk nabelakuk ma pek rik tenigak. Dak gerèk nak keꞌjèk ma mèn mèrpek bèhbeh gèhnih, sampéy rik tenujoh. Umnak kenèmbek umkebes èn tèk-tik tok bekuwòt. 32Dak sèj-sòj eh nak, babok nak nakebes keꞌjèk. 33Jadik, kalòw kemën sènꞌòy kèsbes nak akal umwòg wèl, dak bil nak léh chok lah babok nak? Sebab tujoh mèrpek bèhbeh nak hòj pernah umbabéy ma rik nak.”
34Yèsus nasaꞌod wèl, “Bèhbeh ròb bèꞌbok rik tèk-tik gès-gos èn duniak doh umselòg. 35Tapik tok samak ma sènꞌòy rik Allah napili untok muwòg wèl nòm kènbes bok mugos jalꞌéng samak Rik Nak. Bil nak bèhbeh ròb bèꞌbok tok umsèglòg wèl. 36Dak umnak tok mèk-mok umkèsbes wèl, tapik umgos jalꞌéng gerèk melaykat. Dak umjadik kuwòt Allah, sebab Allah hòj natèrwòg umnak nòm kènbes. 37Musa pon napèrnéh sènꞌòy kèsbes akal umwòg wèl. Bil natulis cherite tentang bèrher rik nachak os, nakòw Tuhan ‘Allah Abraham, Isak, ròb Yakob.’#20:37 Abraham, Isak, ròb Yakob Kenëh yak dòt bej sènꞌòy Israꞌèl rik mulak. #Her 3:6. 38Yab tigak yak dòt bej èk nak hòj umkebes manah tòp, tapik umnak tik umgès-gos samak Allah. Jadik, Nanak kedak Allah sènꞌòy kèsbes, tapik Nanak Allah sènꞌòy gès-gos. Sebab èn mad Allah, kenèmbek sènꞌòy tik umgos.”
39Pas nak ènsekh guruk agama èn anak umchal, “Guruk, tehad nèlchal Hãh nak!” 40Jadik tok mèk-mok wèl sènꞌòy mulamid mutanyak ma Yèsus.
Yèsus Mèsias lebéh rayak nòm Rajak Daud
(Mat 22:41-46; Mrk 12:35-37)
41Pas nak Yèsus nabetanyak ma kenèmbek sènꞌòy èn anak, “Dak rèk lok sènꞌòy boléh umchal Mèsias nak nòm waris Rajak Daud? 42Sebab pastik Rajak Daud irik natulis èn kelòj kitab Enèhmah nak: #En 110:1.
‘TUHAN Allah nachal ma Tuhan yék:
Gel lah èn tempad paléng hormad ènlẽng tep Yék
43sampéy Yék imkèrlah ma sènꞌòy rik ummès-mus ma Hãk,
dak imsèrngẽny ma umnak idol èn tèk jukh Hãh.’
44Rajak Daud irik kèw-kòw Mèsias nak ‘Tuhan yék.’ Jadik, maksod eh Mèsias pastik lebéh rayak nòm Rajak Daud, yab nalãj nòm waris Rajak Daud. Rèk lok bok rèk nak?”
Agok hoh ma chare guruk agama
(Mat 23:5-7; Mrk 12:38-40)
45Dak anak bil kenèmbek sènꞌòy jajéh umkèngyòkh, Yèsus nachal ma hèhoh-hèhoh Eh, 46“Bejagak-jagak lah! Agok hoh ma chare guruk agama. Umnak umchèn umchèb-chib ma téh ma rèh umlòg bajuk jèꞌrok rik mèlhal, dak umchèn sènꞌòy mutabék ma rik umnak èn pasah. Umnak umchèn mugel èn tempad hormad rik paléng penting èn kelòj dékh senindol bok èn tempad jamuwan. 47Umnak umsèꞌlok ma balakh supaye mukod harte um. Tapik untok mukèrdëk tènꞌèl jèdhad umnak, umgèw-gòw dak umpèꞌtak jerok-jerok supaye sènꞌòy munéh umnak méj. Sebab tènꞌèl jèdhad umnak, Allah akal naꞌog henukom rik ènjoh geb!”
ទើបបានជ្រើសរើសហើយ៖
Lukas 20: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
