Lukas 19
19
Yèsus ròb Sakius
1Bil nak Yèsus namòj ma kote Yèrikho dak nachèb-chib sejèkh èn kote nak. 2Èn anak mok néy babeh rik bekenëh Sakius. Rik nak ketuwe sènꞌòy rik bechatuk duid chukay, dak rik nak sènꞌòy bekaye geb. 3Dak Sakius nachèn namnéh chok Yèsus nak. Tapik nanak tok boléh namnéh, sebab esik eh apèt, dak mok jajéh sènꞌòy èn anak umkèrlakh. 4Jadik nadabal nacheroh nòm sènꞌòy jajéh nak, dak naꞌòj ma jehuk#19:4 jehuk nak néy jenis jehuk ara. supaye namnéh ma Yèsus bil Yèsus nahawul èn tempad nak. 5Bil Yèsus nalòy ma nak, nabelay ma Sakius dak nachal, “Sakius, taw lah ulow! Is doh mestik Yék imgel èn dékh hãk.”
6Jadik Sakius nataw ulow. Nanak nabeꞌadés geb, dak naꞌéd Yèsus ma dékh eh. 7Tapik sènꞌòy jajéh umnéh hal nak dak umꞌabad, “Éh! Sakius nak sènꞌòy bedose, dak Yèsus nagel èn dékh eh!”
8Tapik èn dékh eh, Sakius nated dak nachal ma Tuhan Yèsus, “Yãng, yék imꞌog ènsekh harte yék ma sènꞌòy hèl-hal. Dak mok sènꞌòy rik hòj inyanyak, yék akal imbayar imtabeh ibuk wèl#19:8 tabeh ibuk wèl Tèks asli: “empad kalik gande.” Chòntoh eh, kalòw hatòp nakod RM10 nòm sènꞌòy mòy, akal nabayar RM40 ma sènꞌòy nak. ma umnak!”
9Dak Yèsus nachal supaye kenèmbek sènꞌòy umkeyòkh: “Is doh Allah natèrgos ma sènꞌòy doh ròb kewarge eh, sebab rik nak napechaye ma Allah gerèk Abraham,#19:9 pechaye ma Allah gerèk Abraham Tèks asli: “rik nak kemën-kemën nòm kewarge Abraham.” Sakius nak mémang nòm waris Abraham gerèk kenèmbek sènꞌòy Yahudi, tapik masarakat Yahudi umꞌanggap rik nak tok méj sebab nakèrjak nabechatuk duid chukay untok kerajaꞌan Roma (dak naseyèj duid sènꞌòy keꞌjèk). Tapik puꞌdoh, bil nanéh ma pechaye ròb tènꞌèl Sakius, Yèsus nachal Allah hòj naterime Sakius ma kelòj kewarge penili Eh. yak dòt bej èk. 10#Mat 18:11.Yék, Sènꞌòy Nòm Sorga, ilãj imkèk bok imtèrgos ma sènꞌòy rèj-ruj.”
Yèsus naꞌoglèkh chenal tentang rajak ròb sepuloh kuli eh
(Mat 25:14-30)
11Yèsus hòj tèꞌlok namlèy-lòy ma kote Yèrusalèm. Mok jajéh sènꞌòy umsabok bil Yèsus nalãj ma Yèrusalèm, Rik Nak sejèkh namtekèd Kerajaꞌan Allah èn anak. Sebab umbebèdlod silab gerèk nak, Yèsus naꞌoglèkh chenal gerèk chòntoh supaye nambetènglèkh ma umnak.
12Yèsus nachal, “Mok sènꞌòy penting nòm kewarge rik umbekuwase. Rik nak gerèk namwèk ma negerik mòy rik jerok untok namdapad kuwase namjadik rajak. Pas nak akal nalos ma negerik rik eh dak naperintah èn anak. 13Jadik nanak nakòw ma sepuloh kuli eh, dak naꞌog kupang mas#19:13 kupang mas Duid doh néy duid besik Yunani rik umkòw “mina.” Nilay eh rayak, gerèk gajik sènꞌòy rik hòj bekèrjak 100 arik. ma umnak pinéy-pinéy. Dak nachal, ‘Nyob gunak duid doh, kèrjak supaye nambetabeh wèl sampéy imak ma doh.’
14Tapik sènꞌòy mòy rik umgèl-gel èn negerik eh nak umcheꞌẽs ma rik nak. Jadik, bil hòj nawèk, umtèrꞌèn sènꞌòy ma negerik mòy nak keꞌjèk untok muchal, ‘Kandék kijèk sènꞌòy nak namjadik rajak kandék.’
15Tapik sènꞌòy penting nak tik nadapad kuwase najadik rajak. Dak bil namak nak, naꞌor sènꞌòy namkòw ma sepuloh kuli rik naꞌog duid eh nak hatòp. Nachèn namlèkh duid nak maròp nabetabeh. 16Kuli rik mulak nalãj dak naripod, ‘Yãng, rik néy kupang mas haꞌog hatòp hòj nabetabeh wèl sepuloh kupang mas.’ 17Rajak nasaꞌod, ‘Méj geb kèrjak hãh nak! Hãk kuli rik méj-méj. Sebab yék boléh pechaye ma hãk èn hal amès, puꞌdoh imꞌog kuwase ma hãk, dak hãk akal haperintah sepuloh kote.’
18Kuli rik kedua nalãj dak naripod, ‘Yãng, rik néy kupang mas haꞌog hatòp hòj nabetabeh wèl limak kupang mas.’ 19Dak rajak nachal ma rik nak keꞌjèk, ‘Méj lah! Yék imꞌog kuwase ma hãk dak haperintah ma limak kote.’
20Tapik pas nak mok néy kuli mòy wèl nalãj ma rajak dak nachal, ‘Yãng, doh lah rik néy kupang mas haꞌog hatòp. Yék isapod ikèrdëk èn abat amès supaye selamad. 21Yék iteꞌèl gerèk nak sebab itukh ma hãk, sebab ilèkh hãk nak sènꞌòy kenèngrang. Hãk hakod nòm hasil kèrjak sènꞌòy mòy. Chòntoh eh, hãk hachòkh hachatuk nègtòg selay rik tok pernah hatèm-tap.’ 22Dak rajak nasaꞌod, ‘Hãk kuli rik jèdhad! Yék imhukom ma hãk nòm nèlchal rik hãh. Hòj halèkh yék sènꞌòy kenèngrang, yék ikod nòm hasil kèrjak sènꞌòy mòy, dak ichòkh ichatuk nègtòg selay rik tok pernah itèm-tap. 23Kalòw habebèdlod gerèk nak, patod eh hachor duid inak ma kelòj bank supaye nambetabeh wèl! Dak bil imak, bok boléh ikod duid yék bok ròb duid rik umtabeh nak.’
24Dak anak rajak naꞌor ma sènꞌòy rik umtèd-ted tilok, ‘Kod lah kupang mas doh nòm rik eh nak, dak og ma kuli rik mok sepuloh kupang mas nak.’ 25Dak umchal, ‘Tapik Yãng, nanak hòj mok sepuloh kupang mas!’ 26Rajak nasaꞌod, ‘Sènꞌòy rik umgunak méj ilok rik Allah naꞌog ma umnak, akal Allah naꞌog lebéh ibuk wèl. Tapik sènꞌòy rik tok umtèlꞌèl ilok-ilok, akal Allah nakod kenèmbek nòm umnak.’ #Mat 13:12; Mrk 4:25; Luk 8:18. 27#Mat 25:14-30.Dak anak rajak nachal wèl, ‘Tapik tentang sènꞌòy mèsmus rik umjèk ma yék imjadik rajak: èn ma doh dak kèrbes umnak kenèmbek èn mad yék!’”
Yèsus namòj ma Yèrusalèm gerèk Rajak
(Mat 21:1-11; Mrk 11:1-11; Yoh 12:12-19)
28Hòj sòj chenal Eh atèk, Yèsus nachib wèl namwèk ma kote Yèrusalèm. 29Yèsus ròb sènꞌòy rik umhèh-hoh ma Rik Nak hòj tèꞌlok mulèy-lòy ma Yèrusalèm, èn kampong Bètpajé ròb kampong Bètania èn Pok Sayton. Dak anak Yèsus naꞌor ma nar hèhoh Eh wèmwèk nèng-nèng. 30Dak nachal, “Wèk lah ma kampong rik èn sòy nak. Bil kaꞌan mòj ma kampong nak, akal kaꞌan tèrbuk néy ikor kuwòt kuda kelday rik umbeg, rik tèk-tik tok umbekabed sènꞌòy. Teg lah dak èn kuda kelday nak ma doh. 31Kalòw mok sènꞌòy umtanyak, ‘Nahey kaꞌan teꞌèl gerèk nak?’ kaꞌan chal, ‘Yãng naperlu.’”
32Jadik wènar nak wèwèk dak wètèrbuk kuda kelday nak gerèk Yèsus nachal atèk. 33Asòh wèta-teg kuda kelday nak, mok sènꞌòy rik bemilik kuda kelday nak umtanyak ma wènar nak, “Éh, nahey kaꞌan teg ma kuda kelday kandék?” 34Dak wènar nak wèsaꞌod, “Yãng naperlu.”
35Dak wènar nak wèꞌèn kuda kelday nak ma Yèsus, wèdab nèglòg wèh ma kuda kelday, dak wètulong Yèsus naꞌòj ma kuda kelday. 36Bil nak Yèsus nawèk nabekabed èn kuda kelday nak, dak mok jajéh sènꞌòy umdab nèglòg èn nòng untok muhormad ma Yèsus.
37Bil Yèsus ròb jajéh hèhoh Eh umtaw nòm Pok Sayton bok tèꞌlok mulèy-lòy ma kote Yèrusalèm, kenèmbek hèhoh Yèsus umꞌadés geb. Umnak umꞌèh-éh nòm kuy kènwad um, bok umꞌèhmah ma Allah sebab kenèmbek tènꞌèl kuwase rik hòj umnéh. 38Dak umꞌèh-éh: #En 118:26.
“Allah nateꞌèl méj lah ma Rajak
rik nalãj nòm kuwase TUHAN Allah!”
“Sebab Rik Nak, puꞌdoh èk èbema-méj samak TUHAN èn sorga!
Èhmah lah ma Allah èn tempad rik paléng balikh!”
39Tapik mok èn sènꞌòy jajéh nak maròp-maròp sènꞌòy Parisi rik umchal ma Yèsus, “Guruk, or lah ma hèhoh Hãh musengẽk!”
40Yèsus nasaꞌod, “Hõy! Yék ichal ma nyob, kalòw umnak umsengẽk, akal batuk-batuk èn nòng doh umbeꞌèh-éh!”
Yèsus nayam untok kote Yèrusalèm
41Bil Yèsus tilok nambèhleh, Nanak nanéh ma kote Yèrusalèm nak dak nayam. 42Yèsus nachal, “Kalõn geb lah nyob rik gèl-gel èn Yèrusalèm! Méj lah kalòw is doh nyob lèkh chare bema-méj samak Allah, tapik puꞌdoh nyob tok dapad nyomnéh bok nyomlèkh. 43Jadik akal nalãj mase bil mèn mèsmus umhangkal dak umkepong ma kote nyob. Dak umserang nòm lok-lok chening. 44Umnak akal umkèrbes ma nyob kenèmbek dak umtuy ma kote nyob nak, sampéy tok mèk-mok néy batuk pon namdol èn balikh batuk rik mòy. Sebab tok nyob kèlnal ma Yék bil ilãj nòm Allah imtèrgos ma nyob.”
Yèsus nakiron ma sènꞌòy rik umjèlwal èn Dékh Tuhan
(Mat 21:12-13; Mrk 11:15-18; Yoh 2:13-16)
45Nòm kerek nak, Yèsus namòj ma kelòj halaman èn sòy Dékh Tuhan. Èn anak Yèsus natekèd nabekiron ma kenèmbek sènꞌòy rik umjèlwal èn anak. 46Dak Yèsus nachal ma umnak, “Èn kelòj Kitab mok natulis: Allah nachal, ‘Dékh Yék akal umdéh tempad pèntak.’#19:46 Dékh Yék akal umdéh tempad pèntak. Ayad doh Yèsus nakod nòm kitab nabi Yèsaya (Yès 56:7). Tapik hòj nyob jadik eh gerèk ‘guwok tempad sènyèj umgel!’”#19:46 guwok tempad sènyèj umgel! Yèsus nakod chòntoh doh nòm kitab nabi Yèremiah (Yèr 7:11). #Yès 56:7; Yèr 7:11.
47Pas nak Yèsus nabetènglèkh èn Dékh Tuhan tiyab-tiyab arik. Dak mèn ketuwe imam, guruk agama, ròb tèꞌtak sènꞌòy Yahudi umkèk nòng untok mukèrbes ma Rik Nak. #Luk 21:37. 48Tapik tok umdapad muteꞌèl, sebab selaluk mok jajéh sènꞌòy umsenak mukeyòkh ma nèlchal Yèsus.
ទើបបានជ្រើសរើសហើយ៖
Lukas 19: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
