Lukas 11
11
Yèsus nabetènglèkh tentang pèntak
(Mat 6:9-13; 7:7-11)
1Mok néy arik Yèsus napèꞌtak èn néy tempad. Hòj sòj napèꞌtak, néy sènꞌòy nòm hèhoh Eh nachal, “Yãng, tènglèkh lah che kandék rèk lok kimpèꞌtak, gerèk Yohanès Pembaptis natènglèkh ma hèhoh-hèhoh eh.”
2Yèsus nachal ma umnak, “Bil nyob bepèꞌtak, chal lah gerèk doh:
Yah Apak,
Had Hãk hék lah Allah.
Tulong lah kenèmbek sènꞌòy supaye muhormad ma Hãk.
Kandék kiꞌas Hãk hamlãj hamjadik Rajak ma kenèmbek perènhéj Hãh.
3Og lah che kandék tiyab-tiyab arik nèygéy rik kiperlu.
4Ampon lah dose kandék, sebab kandék kiꞌampon tiyab sènꞌòy rik betès-dos ma kandék.
Dak agok perak lah kandék ma kelòj tenarèk.”
5Yèsus nachal wèl naꞌog chòntoh ma hèhoh-hèhoh Eh, “Bèdlod lah, kalòw èn nyob mok néy sènꞌòy rik nawèk ma dékh kéy eh bil gagid layèg dak nachal: ‘Kéy, og lah yék impinjam tigak panggel ruti. 6Sebab kéy yék èn nèbchib eh natekoh ma dékh yék, dak yék tok mok nèygéy yéh untok imjamuk ma rik nak!’ 7Tapik kéy nak nasaꞌod nòm kelòj dékh eh, ‘Agok lah berèngtokh ma yék! Rèngkak hòj ikaldèb, dak yék ròb mèn kuwòt yéh hòj kibesalòg. Yék tok dapad imwòg dak imꞌog ilok-ilok.’” 8Yèsus nachal wèl, “Tapik Yék ichal ma nyob: mungkin kéy nak tok nachèn-chèn namwòg namꞌog peninjam nak ma hãk, yab hãk nak kéy rik eh. Tapik kalòw hãk tok habèd-bod untok sejèkh-serajèkh haꞌèj-oj nòm rik nak, nanak akal nawòg keꞌjèk dak naꞌog hãk pinjam ilok-ilok rik hãk haperlu. 9Sebab nak, Yék ichal ma nyob: Oj lah, dak akal nyob terime. Kèk lah, dak akal nyob tèrbuk. Tãnggõh lah ma rèngkak, dak Tuhan akal napog rèngkak untok nyob. 10Sebab tiyab-tiyab sènꞌòy rik èj-oj akal naterime, tiyab-tiyab sènꞌòy rik kèk-kèk akal natèrbuk, dak tiyab-tiyab sènꞌòy rik betãnggõh, Tuhan akal napog rèngkak untok rik nak.
11Dak nyob rik hòj nyob jadik apak: kalòw kuwòt nyob umsemany kak, pastik nyob tok èg-og tajuk ma umnak. 12Atòw kalòw umsemany tab, pastik nyob tok èg-og mangay! 13Yab nyob jèdhad, nyob lèkh nyomꞌog ilok rik méj-méj ma kuwòt nyob. Tabeh wèl Apak nyob èn sorga namꞌog ma nyob! Hek, Rik Nak akal naꞌog Ruway Kudus pon ma nyob rik sènymany nòm Rik Nak!”
Yèsus lebéh bekuwase nòm Iblis
(Mat 12:22-30; Mrk 3:20-27)
14Mok néy arik Yèsus nakiron yel jèdhad nòm sènꞌòy beꞌawak. Kerek yel nak nahuwòl, sènꞌòy beꞌawak nak pon namulak nabecharak, dak sènꞌòy jajéh umbelaꞌih. 15Tapik mok èn umnak rik chèl-chal, “Bèlsebul,#11:15 Bèlsebul kenëh mòy sènꞌòy Yahudi umkòw ma Iblis, ketuwe yel jèdhad. ketuwe yel jèdhad, hòj naꞌog kuwase ma Yèsus untok namkiron yel jèdhad.” #Mat 9:34; 10:25. 16Mok keꞌjèk sènꞌòy gèhnih rik umchèn mutarèk ma Yèsus. Umnak umsemany ma Yèsus nampèrnéh tande kuwase untok nambukti Rik Nak nalãj nòm Allah. #Mat 12:38; 16:1; Mrk 8:11.
17Tapik Yèsus nalèkh ilok umbèdlod nak, dak nachal ma umnak, “Kalòw kaban rik umbema-mus èn néy negerik, kerajaꞌan nak akal berachuy. Bok kalòw èn néy kewarge umbema-mus kaban rik um, kewarge nak akal berachuy. 18Nyob doh nyomchal Iblis hòj naꞌog kuwase ma Yék untok imkiron ma yel jèdhad eh! Tapik kalòw Iblis nabemès-mus rik ma rik eh gerèk nak, kerajaꞌan eh pastik tok boléh namtehan. 19Dak kalòw nyob nyomchal Yék ikiron yel-yel jèdhad nòm kuwase Iblis, bok nòm kuwase chok wèl hèhoh nyob umkiron yel-yel jèdhad? Kalòw hèhoh nyob boléh umkiron yel jèdhad nòm kuwase Allah, pastik nyob sèk bil nyob chal kuwase Yék nòm Iblis! 20Tapik bil Yék ikiron yel jèdhad nòm kuwase Allah, hal doh napèrnéh Allah hòj natekèd nabeperintah èn nyob.”
21Yèsus nachal wèl naꞌog chòntoh ma umnak: “Iblis nak gerèk sènꞌòy kèdwad rik najagak ma dékh eh nòm ibuk senjate eh, supaye milik eh nak selamad. 22Tapik bil sènꞌòy rik lebéh kèdwad naserang dak nakèrlah ma rik nak, akal nakod kenèmbek senjate eh, narus milik eh, dak nasér ma sènꞌòy mòy.
23 #
Mrk 9:40. Sènꞌòy rik tok bepihak ma Yék nabelawan ma Yék. Dak chok rik tok kerèꞌjak samak Yék untok namꞌéd sènꞌòy ma Allah, nanak naꞌuy sènꞌòy umda-dok nòm Allah.”
Yèsus nachèl-chal tentang yel jèdhad rik nalos wèl ma sènꞌòy rik chachod
(Mat 12:43-45)
24Yèsus nachal wèl naꞌog néy chòntoh: “Bil yel jèdhad naperak néy sènꞌòy, yel nak akal nachèb-chib ma tempad rik karéh untok namkèk tempad pay namgel. Tapik bil yel jèdhad nak tok naterèꞌbuk tempad namgel, yel nak akal nachal, ‘Yék imlos hék ma dékh rik hòj iperak nak.’
25Kerek yel nak nalos, natèrbuk sènꞌòy rik naperak hatòp nak gerèk dékh bekènwãj bok hòj besenèbyab. 26Jadik yel nak akal nawèk nakòw tujoh yel jèdhad gèhnih rik lebéh jèdhad nòm rik eh nak. Dak kenèmbek yel nak akal ummòj ma sènꞌòy nak dak umgel èn anak. Sèj-sòj eh, nèsgos sènꞌòy nak najadik lebéh laꞌes nòm mulak hatòp.”
Beꞌadés lah sènꞌòy rik umhèh-hoh ma Gah Allah
27Bil Yèsus tik nachèl-chal, èn sènꞌòy jajéh nak mok néy babok nachal ma Yèsus, “Pastik beꞌadés lah babok rik yès-yos dak terènbòt ma Hãk!”
28Tapik Yèsus nachal, “Hek, tapik lebéh beꞌadés wèl sènꞌòy rik kèngyòkh Gah Allah bok umhoh!”
Sènꞌòy umsemany Yèsus namꞌog tande nòm Allah
(Mat 12:38-42)
29Bil nak sènꞌòy jajéh umherimung ma Yèsus. Dak Yèsus nachal, “Sènꞌòy jaman doh jehad geb! Nyob chèn Yék impèrnéh tènꞌèl kuwase gerèk tande nòm Allah. Tapik Yék tok iꞌèg-og tande ma nyob. Had nyob néh akal tande gerèk ilok rik nabelakuk ma nabi Yunus#11:29 nabi Yunus néy nabi Tuhan manah tòp. Kak rayak nalig ma Yunus, tapik pas tigak arik Tuhan natèrgos rik nak. (Néh ma bukuk Yunus 1:17; 2:10). manah tòp. #Mat 16:4; Mrk 8:12. 30Sebab ilok rik belakuk ma Yunus najadik tande ma sènꞌòy Niniwéh. Gerèk nak keꞌjèk, ilok nabelakuk ma Yék, Sènꞌòy Nòm Sorga, akal najadik tande ma nyob sènꞌòy jaman puꞌdoh. #Yun 3:4.
31Bil jènman Rajak Salomo manah tòp, ratu negerik Siba#11:31 ratu negerik Siba néy babok rik beperintah èn negerik Siba, rik jèꞌrok geb nòm tèk Israꞌèl. Yab ratu nak kedak sènꞌòy Yahudi, nakeyòkh ma tenènglèkh Rajak Salomo. nalãj nòm hawëj belèl untok namkeyòkh tenènglèkh Rajak Salomo rik chèrdìk geb. Bil sèj-sòj akal, èn arik Allah nahukom kenèmbek sènꞌòy, ratu Siba nak akal nawòg dak natanas ma nyob sènꞌòy jaman puꞌdoh. Sebab nanak nakeyòkh ma Rajak Salomo. Tapik néh lah! Yék doh lebéh rayak nòm Rajak Salomo. Dak Yék mok èn anuh, tapik nyob jèk tok nyomkèngyòkh! #1 Raj 10:1-10; 2 Sej 9:1-12. 32#Yun 3:5.Dak sènꞌòy Niniwéh keꞌjèk akal umwòg bil arik Allah nahukom kenèmbek sènꞌòy, dak umnak pon umtanas ma nyob sènꞌòy jaman doh. Sebab bil sènꞌòy Niniwéh umkeyòkh ma nèlchal Yunus, umperak dose um dak umlos ma Allah. Tapik néh lah! Yék, rik lebéh rayak nòm Yunus, mok èn anuh, tapik nyob tok nyob pèꞌrak ma dose nyob!”
Yèsus nachèl-chal tentang chènlakh ròb rengah
(Mat 5:15; 6:22-23)
33Yèsus nachal, “Tok mèk-mok sènꞌòy namchakat peliteh tapik pas nak namkèrdëk, atòw namdol peliteh nak èn dadak bèldi. Peliteh nak nadol èn balikh, supaye sènꞌòy rik mèj-mòj ma dékh dapad munéh chènlakh nak. #Mat 5:15; Mrk 4:21; Luk 8:16. 34Mad hãh gerèk peliteh nak: bil mad hãh boléh néh tèꞌlalah, kenèmbek nèsgos hãh tebikh nòm chènlakh. Tapik bil mad hãh sèrbër, kenèmbek nèsgos hãh pon najadik rengah kerèmlam. 35Sebab nak bèdlod méj-méj ilok hapechaye, supaye kemën-kemën chènlakh dak kedak rengah. 36Kalòw kenèmbek nèsgos hãh nak tebikh nòm chènlakh, dak tok mèk-mok bahagian rik rengah, kenèmbek hãh najadik tèꞌlalah, gerèk mok peliteh nachelakh ma hãk.”
Yèsus natanas chare mèn guruk agama Yahudi nak salah
(Mat 23:1-36; Mrk 12:38-40)
37Kerek Yèsus natèrsòj chenarak Eh, mok néy guruk agama nòm pitak Parisi naꞌéd Rik Nak namgéy ma dékh eh. Yèsus pon namòj, dak nagel untok namgéy. 38Sènꞌòy Parisi nak nakèdjed bil nanéh Yèsus tok nasèj-suj tikh Eh nèng-nèng, gerèk adad agama sènꞌòy Yahudi. 39Tapik Tuhan Yèsus nachal ma rik nak, “Nyob sènꞌòy Parisi nyob suj kuléh ròb hok nòm béng hék, tapik èn kelòj hup nyob tebikh nòm bèngbokh ròb jènhad. 40Nyob sènꞌòy rik beyayéw! Allah napèrhéj ma bahagian béng, dak Nanak napèrhéj bahagian kelòj keꞌjèk. 41Jadik, agok bebèngbokh wèl, tapik og lah ma sènꞌòy hèl-hal nòm ilok rik mok èn nyob. Kalòw nyob teꞌèl gerèk nak, akal nyob jadik kemën-kemën méj èn mad Tuhan, èn béng ròb èn kelòj hup keꞌjèk.
42Tapik terok geb Allah nahukom ma nyob akal, sènꞌòy Parisi! Nyob hoh ma Hukom Tuhan bok nyob og ènsekh#11:42 ènsekh Tèks asli: “sepuloh peratos.” Chòntoh eh, kalòw sènꞌòy nak nadapad 10, naꞌog 1 ma Tuhan nòm hasil nadapad nak. hasil nòm selay nyob, yab ber chenèhruh#11:42 ber chenèhruh Tèks asli: “selasih, inggu, ròb ber chenèhruh mòy.” rik ajok geb. Tapik nyob tok hèh-hoh ma Hukom Tuhan rik paléng penting: nyob tok beꞌadil ma sènꞌòy mòy, dak nyob tok nyob sayèkh ma Allah. Nyob patod nyob sayèkh ma Allah bok teꞌèl rik adil ma sènꞌòy mòy, dak og ma Allah hal ajok nak keꞌjèk. #Im 27:30.
43Terok geb Allah nahukom ma nyob akal, sènꞌòy Parisi! Nyob chèn gel èn tempad hormad èn kelòj dékh senindol, dak nyob chèn sènꞌòy mutabék ma nyob èn pasah. 44Terok geb lah nyob! Nyob kèrdëk benèdlod belaꞌes èn kelòj hup nyob, gerèk tempad kubor tok betande. Sènꞌòy umnéh ma tempad nak gerèk tèk biyase hék — umchèb-chib èn balikh bok tok umlèng-lèkh mok bende belaꞌes èn tèk.”
45Mok néy guruk agama mòy nachal ma Yèsus, “Guruk, bil Hãk hachal gerèk nak ma sènꞌòy Parisi, Hãk hapègyog ma kandék rik gèhnih keꞌjèk!”
46Dak Yèsus nasaꞌod, “Terok geb Allah nahukom ma nyob guruk agama mòy keꞌjèk! Nyob or ma sènꞌòy muhoh ma ibuk adad agama rik susah geb, gerèk nyob pedug bende rik ènjoh èn pòg umnak. Tapik nyob irik tok nyob chèn-chèn betadok néy tikh pon untok nyomtulong ma umnak muhoh ma adad agama nak. 47Terok geb lah ma nyob akal! Manah tòp, yak dòt bej nyob umcheleg ma mèn nabi Allah. Dak nyob puꞌdoh nyob teꞌèl tande berènleng méj-méj èn tempad kubor mèn nabi nak! 48Dak bil nyob teꞌèl gerèk nak, nyob pèrnéh nyob setujuk ma tènꞌèl yak dòt bej nyob bil umcheleg ma mèn nabi nak. Sebab nyob nyomteꞌèl kubor ma mèn nabi, tapik tok nyomhèh-hoh ma tenènglèkh umnak! 49Nak lah sebab eh nèng-nèng tòp Allah nachal nòm cherèndìk Eh, ‘Yék akal itèrꞌèn nabi-nabi ròb rasul-rasul Yék ma nyob, tapik mok rik akal nyob cheleg, dak mok rik akal nyob keseh.’ 50Nòm mase Allah napèrhéj duniak, yak dòt bej nyob umcheleg ma mèn nabi Eh. Dak sebab nyob pon tok nyob hèh-hoh ma tenènglèkh mèn nabi, Allah akal nahukom nyob sènꞌòy jaman doh untok kenèmbek chènleg nak: 51nòm chènleg Habèl#11:51 Habèl Néy kuwòt Adam, sènꞌòy rik mulak. Kelok eh nacheleg ma rik nak. Cherite nak èn kelòj bukuk Jenadik 4:8. sampéy ma chènleg Sakariya rik nabelakuk èn sòy Dékh Tuhan tilok ma tempad jenamuk. Hek, Allah akal nahukom ma nyob sènꞌòy jaman doh untok chènleg kenèmbek nabi nak. #Jen 4:8; 2 Sej 24:20,21.
52Terok geb lah Allah nahukom ma nyob, guruk agama! Sebab nyob chal hòj nyob lèkh ma Gah Allah, rik napèrnéh rèk lok sènꞌòy dapad mukenal ma Allah.#11:52 Sebab nyob chal hòj nyob lèkh ma Gah Allah, rik napèrnéh rèk lok sènꞌòy dapad mukenal ma Allah. Tèks asli mok kiasan èn anuh: “nyob dol kunchi rik napog rèngkak nènglèkh.” Gah Allah gerèk “kunchi” nak, sebab napèrnéh ma sènꞌòy chare mukenal ma Allah. Tapik nyob tok hèh-hoh ma Gah nak, dak nyob kèrlakh keꞌjèk ma sènꞌòy mòy rik umchèn muhoh ma Allah!”
53Bil Yèsus nahuwòl nòm dékh nak, mèn sènꞌòy Parisi ròb mèn guruk agama mòy umꞌõl, dak umtekèd umbetanyak jajéh hal susah ma Rik Nak. 54Umꞌas Yèsus namsaꞌod sèk supaye muròt ma Rik Nak.
ទើបបានជ្រើសរើសហើយ៖
Lukas 11: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
