Lukas 12
12
Yèsus naberèngleng ma hèhoh Eh tentang sènꞌòy rik umbegèw-gòw
(Mat 10:26-27)
1Bil nak beribuk-ribuk sènꞌòy hòj umherimung, cheratud sampéy umnak umjelog jukh kaban rik um. Yèsus mulak nachèl-chal wèl ma mèn hèhoh Eh, “Bejagak-jagak lah! Agok nyob kenak ma ibu ruti#12:1 ibu ruti nak bahan untok tènꞌèl ruti namkemakh. Gerèk ibu ruti nak nachèhruh bok natukar ma tepong, nèwgòw sènꞌòy Parisi nak natèrjekh ma sènꞌòy mòy. nòm sènꞌòy Parisi — maksod Yék, chare umbegèw-gòw méj. #Mat 16:6; Mrk 8:15. 2Kenèmbek hal rik sènꞌòy umkèrdëk puꞌdoh, jakal nak pastik Allah napèrnéh tèꞌlalah. Dak hal rik sènꞌòy tok umlèng-lèkh puꞌdoh, jakal pastik Allah naꞌoglèkh, sampéy kenèmbek sènꞌòy mulèkh. #Mrk 4:22; Luk 8:17. 3Ilok rik nyob charak ajok èn gagid layèg, akal umkeyòkh tèꞌlalah èn ès-is. Dak ilok rik nyob chehor èn kelòj bilik becherèntekh, akal naꞌèh-éh nòm balikh renabong supaye kenèmbek sènꞌòy mukeyòkh.”
Agok tukh ma sènꞌòy, tapik tukh lah ma Allah
(Mat 10:28-31)
4Yèsus nachal wèl, “Yék ichal ma nyob, kéy-kéy Yék, agok tukh ma sènꞌòy rik umchèn mukèrbes ma nyob, sebab pas nak umnak tok dapad muteꞌèl ilok-ilok wèl ma nyob. 5Tapik Yék imꞌoglèkh ma nyob ma chok rik nyob mestik nyomtukh. Tukh lah ma Allah. Sebab bil Allah nakèrbes ma sènꞌòy, Rik Nak bekuwase keꞌjèk nabes sènꞌòy nak ma kelòj nerake! Hek, Yék ichal ma nyob, Allah rik haros nyob nyomtukh!
6Bèdlod lah chòntoh doh: limak ikor chèp hẽj umjuwal hèrgak nar kupang. Yab gerèk nak, tok néy ikor pon Allah nawel. 7Jadik, agok lah tukh! Sebab èn mad Allah nyob lebéh penting nòm ibuk chèp hẽj nak! Hek, sog èn kuy nyob pon Allah hòj nalèkh lènbéh kenèmbek um.”
Akuk lah Tuhan Yèsus èn mad sènꞌòy
(Mat 10:32-33; 12:32; 10:19-20)
8Dak Yèsus nachal wèl, “Yék ichal ma nyob, chok rik beꞌakuk ma rik eh hèhoh Yék èn mad sènꞌòy, akal Yék, Sènꞌòy Nòm Sorga, iꞌakuk keꞌjèk sènꞌòy nak hèhoh Yék èn mad melaykat Allah. 9Tapik chok rik tok beꞌakuk ma rik eh hèhoh Yék èn mad sènꞌòy, akal Yék, Sènꞌòy Nòm Sorga, tok iꞌakuk ma rik nak èn mad melaykat Allah.
10Chok rik chèl-chal belawan ma Yék, Sènꞌòy Nòm Sorga, Allah dapad naꞌampon. Tapik chok rik bemèhnah ma Ruway Kudus, Allah tok naꞌampon. #Mat 12:32; Mrk 3:29.
11Akal sènꞌòy umròt ma nyob dak umꞌéd nyob ma dékh senindol, atòw ma sènꞌòy beperintah ròb sènꞌòy bekuwase, untok musak ma nyob. Bil nak, agok id tentang gerèk lok nyob haros nyomchal untok nyomsaꞌod ma tenanas umnak. #Mat 10:19,20; Mrk 13:11; Luk 21:14,15. 12Sebab ma mase nak Ruway Kudus akal natènglèkh ma nyob ilok rik haros nyob nyomchal.”
Chenal tentang sènꞌòy kaye rik beyayéw
13Néy sènꞌòy nòm sènꞌòy jajéh nak nachal ma Yèsus, “Guruk, apak yék hòj nakebes. Or lah ma kelok yék supaye namsér ma yék nòm harte rik apak yar naperak.”
14Yèsus nachal ma rik nak, “Kéy, kedak kèrjak Yék untok imchal chok rik kemën bok chok rik sèk. Dak kedak kèrjak Yék untok imsér harte èn kaꞌan nar banar.” 15Yèsus nachal wèl ma umnak kenèmbek, “Bebèh-bèh lah bok bejagak-jagak lah! Agok lah nyob jadik hèm-hep! Nèsgos nyob kedak èn duid bok èn kenaye hék.”
16Pas nak Yèsus naꞌoglèkh chenal nambetènglèkh ma umnak. Nanak nachal, “Néy sènꞌòy kaye mok tèk selay rik behasil ibuk. 17Nanak nabebèdlod èn kelòj hup, ‘Yék tok mèk-mok tempad untok imdol kenèmbek hasil selay yék. Dak ilok yék imteꞌèl?’ 18Dak nanak nachal, ‘Méj lah yék iteꞌèl gerèk doh: yék imtuy dékh nèldol hasil yék, dak imteꞌèl dékh nèldol hasil rik lebéh rayak. Dak èn anak yék dapad idol hasil selay yék ròb kenèmbek harte yék rik mòy. 19Dak pas nak yék ichal rik ma rik yéh, “Yék hòj idol ibuk barang méj doh, tehad untok jajéh tawon. Jadik, yék tok ikerèꞌjak wèl — yék hòj isenang! Yék igèy-géy, iꞌèng-òng, dak ibeꞌadés hék!”’
20Tapik Allah nachal ma rik nak, ‘Hãk sènꞌòy beyayéw! Layèg doh keꞌjèk akal hãk hakebes! Pas nak chok rik namdapad kenèmbek harte rik hòj hãk hachatuk untok rik ma rik hãh nak?’”
21Dak Yèsus natèrsòj cherite Eh dak nachal, “Gerèk nak lah nabelakuk ma sènꞌòy rik bechatuk harte untok rik ma rik eh, kemoh tok bekaye èn mad Allah.”
Agok èd-id, pechaye lah ma Allah
(Mat 6:25-34)
22Yèsus nachal ma hèhoh-hèhoh Eh, “Unak lah isebab eh Yék ichal ma nyob: Agok lah èd-id tentang nèsgos nyob, tentang ilok rik akal nyob géy, atòw ilok rik akal nyob lòg. 23Sebab nèsgos nak lebéh penting nòm nèygéy, bok esik nak lebéh penting nòm nèglòg. 24Néh lah chèp ègꞌag. Chèp nak tok umtèm-tap menéh, tok bechatuk nègtòg, dak tok mèk-mok dékh nèldol untok mudol nèygéy. Tapik Allah naꞌog nèygéy ma umnak. Nyob jerok lebéh penting èn mad Allah nòm chèp nak! 25Tok mèk-mok néy sènꞌòy pon èn nyob namjerok nèsgos eh sebab selaluk naꞌèd-id. 26Nyob tok dapad nyomteꞌèl hal ajok gèk nak pon. Jadik, agok èd-id lah tentang hal mòy. 27Néh lah ma bungak rik hèn-hin èn béng. Bungak nak tok kerèꞌjak bok tok tèlyèl. Tapik Yék ichal ma nyob, Rajak Salomo ròb kenèmbek kenaye eh tok nalèg-lòg méj gerèk bungak nak! #1 Raj 10:4-7; 2 Sej 9:3-6. 28Allah nahiyas rambang èn pantil, rik mok is doh tapik ma is jakal eh sènꞌòy nachòkh dak nachur ma os. Jadik, pastik Nanak akal naꞌog nèglòg ma nyob! Tapik nahey nyob amès hék nyob pechaye?
29Jadik, agok lah èd-id, dak agok lah selaluk bebèdlod ilok rik nyob géy bok nyob òng. 30Kaum-kaum mòy èn duniak rik tok umkèlnal Allah selaluk umbèdlod hal-hal gerèk nak. Tuhan Apak nyob nalèkh ma nyob nyomperlu kenèmbek nak. 31Tapik kèk lah nèng-nèng Kerajaꞌan Allah, dak kenèmbek rik nyob perlu nak akal natabeh keꞌjèk ma nyob.”
Dol lah harte èn sorga
(Mat 6:19-21)
32Yèsus nachal ma mèn hèhoh Eh, “Agok lah tukh, yab lènbéh nyob ajok.#12:32 lènbéh nyob ajok Tèks asli mok kiasan anuh: “kawanan ajok.” Yèsus nabanding hèhoh Eh ma néy kawanan kambikh biri. Hèhoh Yèsus nak kumpolan ajok hék, tapik Tuhan najagak ma umnak (gerèk sènꞌòy rik nabeleh kambikh biri najagak ma umnak keꞌjèk). Sebab Apak nyob èn sorga naꞌadés namꞌog nyob nyommòj ma Kerajaꞌan Eh! 33Juwal lah harte nyob, bok og lah duid nak ma sènꞌòy hèl-hal. Gerèk nak lah nyob tabéh ma rik nyob puchòs rik tok bejèny-jony, dak nyob dol harte èn sorga rik tok pernah sèj-sòj. Sebab èn anak sènꞌòy rik sèjyèj tok dapad nammòj, bok garuj tok dapad naberosak harte nak.#12:33 garuj tok dapad naberosak harte nak. Èn jènman Kitab manah tòp, sènꞌòy umꞌanggap nèglòg mèlhal nak gerèk harte rik behèrgak. Nak lah maksod Yèsus: mèn garuj nak umgéy nèglòg sènꞌòy èn bumi doh, tapik kalòw harte èn sorga garuj tok dapad mugéy. 34Sebab èn lok nyob chatuk harte nyob, èn anak lah nènchèn hup nyob keꞌjèk.”
Selaluk betabéh untok nèjlãj Yèsus
35Yèsus nachal, “Selaluk betabéh untok nèjlãj Yék, gerèk sènꞌòy rik selaluk umtabéh untok bekèrjak. Umnak umlòg bajuk kèrjak um, dak umnak selaluk mok peliteh rik chèk-chak. #Mat 25:1-13. 36Nyob gerèk kuli rik umdèh-deh ma tuwan um nammak nòm jamuwan benabéy. Bil tuwan nak namak dak natãnggõh ma rèngkak, umnak hòj umtabéh dak sejèkh umpog rèngkak nak ma rik nak. #Mrk 13:34-36. 37-38Beꞌadés lah mèn kuli nak bil tuwan natèrbuk umnak tik umbejagak bok betabéh bil tuwan namak! Tuwan umnak mungkin namak bil gagid layèg, atòw pon mungkin namak bil yèhyah tik chup. Tapik bil nak pastik beꞌadés geb lah umnak, sebab tuwan um natèrbuk ma umnak tik umbejagak! Kemën Yék ichal ma nyob, tuwan nak akal nalòg bajuk kèrjak, naꞌor kuli-kuli eh mugel, dak nanak nabejamuk ma umnak.”
39Dak Yèsus nachal wèl, “Bèdlod lah chòntoh doh: tuwan dékh tok nalèng-lèkh jam maròp sènꞌòy sèjyèj namlãj. Kalòw nalèkh, pastik rik nak akal betabéh bok tok napèꞌrak sènꞌòy sèjyèj nak nammòj ma kelòj dékh eh. #Mat 24:43,44. 40Gerèk nak keꞌjèk lah nyob: sebab Yék, Sènꞌòy Nòm Sorga, akal ilãj bil nyob tok besabok. Jadik, haros lah nyob betabéh selaluk!”
Kuli rik besetiye ròb kuli rik tok besetiye
(Mat 24:45-51)
41Dak Pètrus natanyak, “Yãng, mok ke haꞌoglèkh chòntoh nak ma kandék hèhoh Hãk hék, atòw ma kenèmbek sènꞌòy mòy keꞌjèk?”
42Tuhan Yèsus nasaꞌod naꞌog chòntoh mòy wèl, “Jadik lah kuli-kuli rik cherèꞌdìk bok setiye! Sebab tuwan dékh boléh pechaye ma kuli gerèk nak, bok napili untok namꞌuros dékh eh dak namꞌog nèygéy ma kuli gèhnih bil mase eh. 43Beꞌadés lah kuli rik beꞌuros dékh nak kalòw tuwan eh tok-tok nalãj dak natèrbuk rik nak tik natèlꞌèl tugas eh. 44Kemën Yék ichal ma nyob: tuwan eh nak akal napechaye ma rik nak namꞌuros kenèmbek harte eh. 45Tapik kalòw kuli rik beꞌuros nak nachal èn kelòj hup eh, ‘Tik lamad wèl tuwan yék akal namlos.’ Dak rik nak natekèd nateboh ma kenèmbek kuli rik gèhnih, bèhbeh atòw pon bèꞌbok. Dak rik nak nagéy bok naꞌòng sampéy naluwény. 46Tapik bil arik ròb mase rik nak tok nabesèꞌbok, tuwan eh tok-tok nalos. Bil nak, tuwan nak akal nahukom ma kuli rik beꞌuros nak terok geb, dak naperak samak sènꞌòy mòy rik tok besetiye.
47Kalòw mok kuli rik lèng-lèkh ma nènchèn tuwan eh, tapik tok nabetabéh bok tok nahèh-hoh ma nèrꞌor tuwan eh nak, akal tuwan eh nateboh ma rik nak terok geb. 48Tapik kalòw mok kuli rik tok nalèng-lèkh ma nènchèn tuwan eh, dak sebab nak nateꞌèl salah, akal tuwan eh had nateboh ma rik nak maròp-maròp kalik hék. Kalòw sènꞌòy naterime ibuk nòm Tuhan, sènꞌòy nak seteréd namteꞌèl ibuk untok Tuhan keꞌjèk. Dak bil Tuhan naꞌog lebéh ibuk wèl, sènꞌòy nak seteréd namteꞌèl lebéh ibuk wèl untok Tuhan keꞌjèk.”
Sènꞌòy akal umbelawan tentang Yèsus
(Mat 10:34-36)
49Yèsus naꞌog chòntoh mòy wèl, dak nachal, “Yék ilãj untok imꞌèn ma bumi henukom Allah rik terok gerèk os.#12:49 Tèks asli mok kiasan èn anuh: Yèsus nachal nalãj untok namꞌèn “os” ma bumi. Maksod Yèsus bil nachal tentang “os” nak: Yèsus tok naterèꞌchak os ma bumi, tapik Nanak naꞌèn henukom nòm Allah rik terok geb, gerèk os nak. Dak gerèk sènꞌòy umda-dok bok umberachuy bil os naguj ma kampong, sebab Yèsus nalãj jajéh sènꞌòy akal umbelawan kaban rik um bok umberachuy. Méj geb lah kalòw henukom nak hòj natekèd! 50Tapik Yék haros iderite ibuk bok ikebes.#12:50 Yék haros iderite ibuk bok ikebes Tèks asli Kitab mok kiasan èn anuh: “Yék haros iterime benaptis.” Terjemahan Temiar naꞌog tèꞌlalah maksod kiasan nak. Dak suwéh hup Yék sampéy nalòy mase eh! #Mrk 10:38. 51Agok lah nyob bebèdlod Yék ilãj ma bumi doh untok imꞌuy sènꞌòy mubema-méj! Hõy, ichal ma nyob, Yék ilãj imꞌuy sènꞌòy muberachuy. 52Mulak puꞌdoh, kewarge akal umbelawan kaban rik um sebab Yék. Kalòw néy kewarge mok limak sènꞌòy, akal umbelawan: tigak lawan nar, dak nar lawan tigak. 53#Mi 7:6.Apak akal nalawan ma kuwòt babeh, dak kuwòt babeh akal nalawan ma apak. Dak amèk akal nalawan ma kuwòt babok, dak kuwòt babok akal nalawan ma amèk. Dak belok babok akal nalawan ma mènsaw babok, dak mènsaw babok akal nalawan ma belok babok.”
Néh bok lèkh lah ma tande Tuhan napèrnéh nak
(Mat 16:2-3)
54Nòm kerek nak Yèsus nachal ma sènꞌòy jajéh, dak naꞌog chòntoh doh: “Bil nyob néh sagub rèhngah naꞌòj èn kèd is, nyob chal, ‘Oya, hòj namtèh-teh,’ dak akal nateh. 55Dak bil natehòr nòm arah selatan, nyob chal, ‘Is doh akal bëd,’ dak akal nabëd.#12:55 Èn tèk Israꞌèl, tèhteh biyase eh nalãj nòm kèd is, sebab èn belah nak mok òng laud. Dak èn belah selatan tèk Israꞌèl mok pantil gurun, jadik bil natehòr nòm pantil gurun nak, mok is bèd-bëd. 56Bil nyob néh tande gerèk nak èn langid ròb èn bumi, nyob lèkh rèk lok is nak. Nyob sènꞌòy bemèrhĩr! Bok bil nyob néh tande kuwase rik Tuhan napèrnéh ma nyob puꞌdoh, nyob patod nyob lèkh maksod eh keꞌjèk.”
Bema-méj lah lulòw ma Allah
(Mat 5:25-26)
57Yèsus nachal wèl, “Dak nyob patod nyob lèkh untok rik nyob ilok rik kemën. 58Chòntoh eh, kalòw mok sènꞌòy nachèn namtanas ma hãk èn makamah, kèrdakh lah méj-méj untok kaꞌan bema-méj èn tèk-tik kaꞌan tok lèj-lãj ma makamah. Kalòw hõy, sènꞌòy nak akal naꞌèn hãk ma sòy hakim, dak hakim akal naꞌog hãk ma polis, dak polis akal natèrmòj hãk ma kelòj jél. 59Dak Yék kemën ichal, hãk tok hahèlwòl nòm jél nak sampéy hãk habayar kenèmbek utang hãh.”
ទើបបានជ្រើសរើសហើយ៖
Lukas 12: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
