Lukas 10
10
Yèsus napili tujoh puloh nar sènꞌòy untok muꞌoglèkh Gah Allah
1Nòm kerek Tuhan Yèsus nacharak samak sènꞌòy naꞌtèk, Nanak napili tujoh puloh nar sènꞌòy#10:1 Nanak napili tujoh puloh nar sènꞌòy Mok keꞌjèk tèks Yunani rik umdol “70.” mòy. Dak Yèsus naꞌor umnak muwèk wèbanar dak mucheroh nèng-nèng nòm Rik Nak ma kenèmbek kote ròb tempad rik Yèsus namwèk akal. 2Yèsus nachal ma umnak, “Mok jajéh sènꞌòy rik tèk-tik tok umpechaye ma Gah Méj Tuhan. Umnak gerèk nègtòg èn selay rik ibuk geb, tapik tèk-tik tok benègtòg. Tapik sènꞌòy rik kerèꞌjak untok mukod hasil nak amès hék. Sebab nak, bepèꞌtak lah ma Tuhan supaye namtèrꞌèn sènꞌòy untok mukod hasil nak, sebab kenèmbek nègtòg nak milik Eh.” #Mat 9:37,38. 3Yèsus nachal wèl, “Dak Yék itèrꞌèn nyob. Jadik, wèk lah! Tapik keyòkh lah: ma lok-lok nyob wèk, nèbchib nyob nak akal bahaye — gerèk kambikh biri rik umchèb-chib èn gagid chuwòk mènghòng. #Mat 10:16. 4Agok èn upòh, agok èn apek, agok èn sepèh kasod. Agok nyob tèrgëb èn nèbchib nyob nak untok becharak samak sènꞌòy. 5Bil nyob lòy ma néy tempad dak nyob mòj ma kelòj dékh, chal nèng-nèng ma sènꞌòy èn dékh nak, ‘Tuhan namtèrméj ma nyob.’ 6Dak kalòw sènꞌòy rik umgèl-gel èn anak umterime nyob bok umchèn muma-méj, Tuhan pon natèrméj ma umnak. Tapik kalòw umjèk, Tuhan tok naterèjméj ma umnak. 7Gel lah èn dékh umnak sampéy nyob perak tempad nak, agok tukar dékh mòy. Terime lah ilok umjamuk ma nyob, nèygéy bok nèngꞌòng, sebab nyob kèrjak untok Yék, dak sènꞌòy rik kerèꞌjak patod terime upah eh. #1 Kor 9:14; 1 Tim 5:18. 8Bil nyob wèk ma néy tempad dak mok sènꞌòy èn anak umterime ma nyob, géy lah ilok rik umjamuk ma nyob. 9Dak tèrhakh lah ma sènꞌòy jèk-jik èn anak. Oglèkh ma sènꞌòy rik gèl-gel èn anak, ‘Kerajaꞌan Allah hòj tilok ma nyob!’ 10Tapik bil nyob wèk ma néy tempad dak mok sènꞌòy èn anak tok umterime ma nyob, wèk ma nòng dak èh-éh supaye sènꞌòy mukeyòkh: #Tèn 13:51. 11‘Yar banar yaratòh habog rik nachaked èn jukh yah doh nòm kote nyob, gerèk tande Allah akal nahukom ma nyob. Tapik keyòkh lah: yab nyob tok terime, Kerajaꞌan Allah hòj tilok!’ #Mat 10:7-14; Mrk 6:8-11; Luk 9:3-5. 12#Jen 19:24-28; Mat 11:24; Mat 10:15.Dak Yék ichal ma nyob, pastik sèj-sòj akal Allah nahukom sènꞌòy èn kote nak, dak henukom umnak lebéh ènjoh nòm henukom sènꞌòy èn kote Sòdom#10:12 kote Sòdom néy kote èn Perènhod Manah. Allah natëh os nòm balikh dak natèrhõy ma kote nak, sebab sènꞌòy èn kote nak jèdhad geb, dak umjèk ma Allah bok umjèk ma melaykat rik Allah natèrꞌèn ma umnak. Cherite nak mok èn bukuk Jenadik 19:24-28. manah tòp.”
Henukom untok sènꞌòy èn kote-kote rik umjèk ma Yèsus
(Mat 11:20-24)
13Yèsus nachal wèl, “Terok geb lah Allah nahukom ma nyob rik gèl-gel èn kote Korasin! Bok terok keꞌjèk ma nyob èn kote Bètsayda! Yék hòj iteꞌèl ibuk tènꞌèl kuwase èn kote nyob. Kalòw lah Yék iteꞌèl tènꞌèl kuwase gerèk nak èn kote Tirus ròb kote Sidon manah tòp,#10:13 kote Tirus ròb kote Sidon manah tòp Nar kote nak èn negerik mòy, dak sènꞌòy rik gèl-gel èn kote nak kaum kedak Yahudi. Èn jènman anin tòp, kenèmbek sènꞌòy umlèkh sènꞌòy rik gèl-gel èn nar-nar kote nak jèdhad geb, sebab umjèk ma Allah dak umsindol ma alëj bèj-bòj. pastik sènꞌòy èn kote nak hòj umsisal nòm dose um, dak umlòg abat uchang bok umchub èn kuy um habog nòm os untok mupèrnéh umchèn muperak nòm dose bok mulos ma Tuhan. #Yès 23:1-18; Yeh 26:1—28:26; Yl 3:4-8; Am 1:9,10; Sak 9:2-4. 14Sènꞌòy èn kote nak tok umnéh ma kuwase Yék dak tok umpechaye ma Yék. Tapik bil èn arik Allah nahukom ma kenèmbek sènꞌòy, umnak umterime henukom rik lebéh hanyõk nòm henukom nyob, sènꞌòy Korasin ròb Bètsayda.
15Dak nyob sènꞌòy Kapernaum wèl! Ke nyob bèdlod Allah akal namꞌangkìd ma nyob ma sorga? Hõy! Nyob akal nabes ma nerake!”#10:15 nerake Tempad sènꞌòy kèsbes rik umjèk-jèk tok umpechaye ma Tuhan. #Yès 14:13-15.
16 #
Mat 10:40; Mrk 9:37; Luk 9:48; Yoh 13:20. Dak Yèsus nachal ma hèhoh-hèhoh Eh, “Kalòw sènꞌòy nakeyòkh ma nyob, maksod eh nakeyòkh keꞌjèk ma Yék. Tapik kalòw sènꞌòy nak najèk ma nyob, maksod eh najèk keꞌjèk ma Yék. Dak kalòw sènꞌòy umjèk ma Yék, maksod eh umjèk ma Apak Yék rik terèn-èn Yék.”
Tujoh puloh nar hèhoh umlos ma Yèsus
17Dak tujoh puloh nar hèhoh rik Yèsus natèrsèk hatòp umlos ma Yèsus. Umnak umbeꞌadés geb dak umchal, “Yãng, yel-yel jèdhad pon umtaꞌãd ma kandék bil kiꞌor umnak nòm kuwase kenëh Hãk!”
18Dak Yèsus nasaꞌod ma umnak, “Hek, bil nyob kiron yel-yel jèdhad nak, Yék inéh Iblis nakalah — nakelek gerèk kilat nòm langid. 19Keyòkh lah! Yék hòj iꞌog kuwase ma nyob supaye nyob dapad jelog ma tajuk ròb mangay, dak nyob kèrlah ma kenèmbek kuwase Iblis, Mèsmus èk. Tok mèk-mok namperèdjèd ma nyob. #En 91:13. 20Tapik agok beꞌadés sebab yel-yel jèdhad umtaꞌãd ma nyob hék. Lebéh méj nyob beꞌadés sebab Tuhan hòj natulis kenëh nyob èn sorga.”#10:20 Tuhan hòj natulis kenëh nyob èn sorga Èn sorga, Tuhan natulis kenëh kenèmbek sènꞌòy rik hòj natèrgos bok rik umgos jalꞌéng samak Rik Nak akal.
Yèsus naꞌadés
(Mat 11:25-27; 13:16-17)
21Bil nak keꞌjèk Ruway Kudus naꞌuy Yèsus nagahmak beꞌadés geb. Dak Yèsus nachal, “Yah Apak, Tuhan langid ròb bumi! Yék ibeterime kaséh ma Hãk sebab tenènglèkh Kerajaꞌan Hãk hakèrdëk nòm sènꞌòy rik chèrdìk ròb sènꞌòy rik ibuk nènglèkh um. Tapik Hãk hapèrnéh tèꞌlalah ma sènꞌòy biyase rik tok umlèng-lèkh ibuk, gerèk sèdyẽd jèꞌjok. Hek, Apak, gerèk nak lah chare Hãk hachèn.”
22Yèsus nachal wèl, “Apak Yék hòj naꞌog kenèmbek nak ma Yék. Had Apak hék rik nakenal Yék, Kuwòt Eh. Dak had Yék hék ikenal ma Apak, sebab Yék Kuwòt Eh. Dak had sènꞌòy rik Yék ipili iꞌoglèkh tentang Apak Yék.” #Yoh 3:35; Yoh 10:15.
23Pas nak Yèsus nawãr ma hèhoh-hèhoh Eh, dak nachal èn umnak dèꞌrik um, “Beꞌadés lah sebab nyob dapad nyob néh ilok rik nabelakuk èn mad nyob! 24Bok lèkh lah, jajéh nabi ròb rajak èn jènman anin tòp umchèn munéh ilok rik hòj nyob néh puꞌdoh, tapik tok dapad munéh. Dak umchèn mukeyòkh ilok rik hòj nyob keyòkh, tapik tok dapad mukeyòkh.”
Yèsus naꞌoglèkh chenal tentang sènꞌòy Samariya rik méj hup
25Mok néy guruk agama nated untok namtarèk ma Yèsus. Nanak natanyak, “Guruk, ilok yék imteꞌèl supaye imgos jalꞌéng samak Tuhan?” #Mat 22:35-40; Mrk 12:28-34.
26Yèsus nachal, “Ilok rik natulis èn kelòj Hukom Tuhan? Ilok hãk habache tentang hal nak?”
27Guruk agama nak nachal, “Èn Kitab nak natulis, ‘Hãk haros sunggoh-sunggoh sayèkh ma TUHAN, Allah hãk: nòm hup hãk, nòm ruway hãk, nòm benèdlod hãk, ròb nòm kènwad hãk.’ Dak mok keꞌjèk, ‘Sayèkh lah ma sènꞌòy mòy gerèk hasayèkh rik ma rik hãh.’” #Ter 6:5; Im 19:18.
28Yèsus nachal, “Hãk hasaꞌod kemën. Teꞌèl lah gerèk nak, hãk akal hagos jalꞌéng.” #Im 18:5.
29Tapik guruk agama nak nachèn nampèrnéh nènglèkh eh, jadik natanyak wèl ma Yèsus, “Chok sènꞌòy rik imsayèkh nak?”
30Dak Yèsus naꞌoglèkh chenal doh ma rik nak: “Mok néy sènꞌòy babeh nachib nòm kote Yèrusalèm nawèk ma kote Yèrikho. Èn nèbchib nak, mok sènꞌòy sèjyèj umròt ma rik nak dak umseyèj sòj — nèglòg eh pon umkod. Umnak umteboh tèꞌlok namkebes, dak umperak ma rik nak. 31Tok lamad nòm kerek nak mok néy sènꞌòy imam Yahudi had-terènhad nachèb-chib èn nòng nak keꞌjèk. Bil imam nak nanéh ma sènꞌòy atèk, nachiwar jerok nòm rik nak dak nasèrjèkh wèl nèbchib eh. 32Pas nak mok keꞌjèk néy sènꞌòy suku Lèwi (rik kerèꞌjak èn Dékh Tuhan) nachèb-chib èn nòng nak. Bil nanéh ma sènꞌòy nak, nachiwar keꞌjèk nòm rik nak dak nachib wèl. 33Tapik pas nak mok néy sènꞌòy kaum Samariya nachèb-chib èn nòng nak. Dak bil nanéh ma sènꞌòy rik nasèglòg èn tempad nak, nakalõn ma rik nak. #2 Sej 28:15. 34Dak nawèk nasok bakad eh#10:34 nasok bakad eh Tèks asli: “nasok bakad eh nòm òng anggor ròb binyak.” Nak lah chare biyase sènꞌòy Yahudi jènman nak, umgunak òng anggor ròb binyak sayton gerèk ubad. dak nalad abat senèg. Pas nak natayod sènꞌòy nak nasèrlòg èn balikh kuda kelday eh, dak naꞌèn ma dékh nèmdep dak najagak èn anak. 35Bil is jakal sènꞌòy Samariya nak naꞌog nar kupang pèrak ma sènꞌòy rik bardékh èn anak dak nachal, ‘Jagak lah ma rik nak. Kalòw duid doh tok chèbkob, bil ilos wèl ma doh akal bok ibayar.’”
36Sèj-sòj chenal Eh nak, Yèsus natanyak ma guruk agama nak, “Mok tigak sènꞌòy umnéh ma sènꞌòy nak lepas sènꞌòy sèjyèj umperak ma rik nak èn nòng. Rèk lok ma benèdlod hãk: èn tenigak sènꞌòy nak, chok rik nasayèkh ma sènꞌòy nak?”
37Guruk agama nak nasaꞌod, “Sènꞌòy rik nakalõn dak natulong ma rik nak.”
Yèsus nachal, “Hek, wèk lah, teꞌèl gerèk nak keꞌjèk!”
Yèsus nawèk ma dékh Marta ròb Maria
38Nòm kerek nak Yèsus ròb hèhoh-hèhoh Eh umchèb-chib wèl dak umlòy ma néy kampong. Dak mok néy babok èn anak rik bekenëh Marta naterime Yèsus ma dékh eh. #Yoh 11:1. 39Maria, pek Marta, nagel èn tèk, tilok ma Tuhan Yèsus, dak nakeyòkh ma tenènglèkh Eh. 40Tapik Marta nasuwéh sebab ibuk kèrjak eh namjamuk ma umnak. Jadik nalãj naꞌabad ma Yèsus, “Yãng, pek yék doh naperak ma yék kerèꞌjak dèꞌrik. Tok habegorgèr? Or lah namtulong ma yék!”
41Tapik Tuhan Yèsus nasaꞌod, “Marta, Marta, hãk hasuwéh habebèdlod ibuk geb hal. 42Tapik mok néy hal hék rik penting. Maria napili hal rik penting nak — hal rik paléng méj — dak tok chok namtèrgëb ma rik nak.”
ទើបបានជ្រើសរើសហើយ៖
Lukas 10: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
