Lukas 9
9
Yèsus natèrsèk ma nar belas hèhoh Eh
(Mat 9:35; 10:5-15; Mrk 6:6-13)
1Bil néy arik, Yèsus nakòw ma nar belas sènꞌòy hèhoh Eh, dak naꞌog ma umnak kuwase supaye dapad mukiron kenèmbek yel jèdhad bok mutèrhakh chenèk. 2Nòm kerek nak Yèsus naꞌor umnak muwèk untok muꞌèg-oglèkh gah Kerajaꞌan Allah bok mutèrhakh sènꞌòy jèk-jik. 3Dak Yèsus nachal ma umnak, “Agok nyob èn ilok-ilok pon èn nèbchib nyob: agok èn ad nènchòt, apek, nèygéy, atòw duid. Agok èn sepèh bajuk pon. 4Ma lok-lok nyob wèk, bil mok sènꞌòy umsambud ma nyob èn dékh umnak, gel lah èn anak sampéy nyob perak nòm tempad nak. 5Tapik kalòw tok mèk-mok sènꞌòy rik muterime ma nyob, perak lah nòm kote umnak bok ratòh lah habog nòm jukh nyob, untok bèrlekh ma umnak Allah akal nahukom ma umnak.” #Tèn 13:51.#Luk 10:4-11.
6Hèhoh-hèhoh Yèsus pon umwèk nòm kampong ma kampong, dak ma lok-lok tempad umwèk umtèrlòy Gah Méj bok umtèrhakh ma sènꞌòy jèk-jik.
Rajak Hèrodès nakachéd nakeyòkh tentang Yèsus
(Mat 14:1-12; Mrk 6:14-29)
7Bil nak Hèrodès, rajak Galiliya, nakeyòkh tentang Yèsus ròb kenèmbek gah rik hòj nabelakuk nak. Dak rajak nak nakachéd bil nakeyòkh ilok sènꞌòy umchèl-chal tentang Yèsus. Sebab mok sènꞌòy rik chèl-chal, “Tuhan hòj natèrwòg ma Yohanès Pembaptis nòm kènbes wèl!” #Mat 16:14; Mrk 8:28; Luk 9:19. 8Mok keꞌjèk rik chèl-chal, “Rik Nak Nabi Èliya rik hòj nalãj wèl!” Mok sènꞌòy mòy wèl rik chèl-chal, “Rik Nak néy sènꞌòy nabi Tuhan jènman anin, hòj nalos nagos wèl.” 9Dak Rajak Hèrodès nachal, “Yohanès nak hòj ipanychokh kuy eh! Jadik chok sènꞌòy doh? Yék hòj ikeyòkh ibuk tentang Rik Nak.” Dak pas nak Rajak Hèrodès nakèk nòng untok namtèrbuk ma Yèsus.
Yèsus naꞌog nèygéy ma limak ribuk sènꞌòy
(Mat 14:13-21; Mrk 6:30-44; Yoh 6:1-14)
10Bil nar belas rasul rik Yèsus natèrsèk nak umlos ma Yèsus, umꞌoglèkh kenèmbek rik hòj umteꞌèl. Pas nak umperak sènꞌòy jajéh, dak Yèsus naꞌéd hèhoh-hèhoh Eh muwèk dèꞌrik ma kote Bètsayda. 11Tapik bil sènꞌòy jajéh umlèkh Yèsus ma lok nawèk, umnak umsar ma Yèsus. Yèsus nasambud ma umnak. Nanak nabetènglèkh ma umnak tentang Kerajaꞌan Allah, dak natèrhakh ma kenèmbek sènꞌòy jèk-jik.
12Bil is eh hòj tilok nambelayèg, nar belas sènꞌòy hèhoh Eh nak umlãj ma Yèsus dak umchal, “Or lah kenèmbek sènꞌòy doh muwèk ma kampong bok ma dékh rik umgèl-gel tilok èn kawasan doh, supaye mukèk nèygéy ròb tempad muselòg. Sebab tempad doh sèꞌngẽk, tok mèk-mok ilok-ilok èn anuh.”
13Tapik Yèsus nachal ma umnak, “Nyob lah rik èg-og nèygéy ma umnak.”
Umnak umsaꞌod, “Tapik kandék had mok limak panggel ruti bok nar ikor kak. Ke hachèn kandék kimwèk kimbelik nèygéy untok kenèmbek sènꞌòy jajéh doh?!”
14(Sebab èn anak mok kirak-kirak limak ribuk sènꞌòy bèhbeh.#9:14 limak ribuk sènꞌòy bèhbeh Had umkirak bèhbeh hék, tapik mok jajéh bèꞌbok ròb sèdyẽd èn anak keꞌjèk.)
Yèsus nachal ma hèhoh-hèhoh Eh, “Or lah umnak mugel bepenol-penol, kirak-kirak néy penol nak mok limak puloh sènꞌòy.”
15Jadik hèhoh Yèsus umhoh ma nèrꞌor Yèsus nak, dak kenèmbek sènꞌòy pon umgel. 16Yèsus nakod limak panggel ruti ròb nar ikor kak nak. Rik Nak nabelay ma sorga dak nachal terime kaséh ma Allah untok nèygéy nak. Pas nak nageyèg ruti ròb kak nak, dak naꞌog ma hèhoh-hèhoh Eh untok musér ma sènꞌòy jajéh nak. 17Umnak kenèmbek umgéy sampéy umbehik. Pas nak hèhoh-hèhoh Yèsus umchatuk ènsekh umgéy naꞌtèk, tèk-tik mok nar belas ragok.
Pètrus naꞌakuk Yèsus Mèsias rik Allah napèrhod
(Mat 16:13-20; Mrk 8:27-30)
18Bil néy arik, Yèsus napèꞌtak dèꞌrik. Had hèhoh-hèhoh Eh mok samak Rik Nak. Dak Yèsus natanyak ma umnak, “Ilok sènꞌòy jajéh umchal, chok Yék doh?”
19Umnak umsaꞌod, “Mok rik chèl-chal Hãk Yohanès Pembaptis. Mok sènꞌòy gèhnih umchal Hãk Nabi Èliya. Mok wèl sènꞌòy umchal Hãk néy nabi nòm mèn nabi jènman anin tòp rik hòj nawòg nòm kènbes.” #Mat 14:1,2; Mrk 6:14,15; Luk 9:7,8.
20Yèsus natanyak, “Tapik dak rèk lok ma nyob wèl? Chok Yék doh?” #Yoh 6:68,69.
Pètrus nasaꞌod, “Hãk Kristus, Mèsias rik Allah napèrhod.”
Yèsus nachal tentang kènbes Eh
(Mat 16:20-28; Mrk 8:30—9:1)
21Yèsus nahuwok ma hèhoh-hèhoh Eh, “Agok oglèkh ma chok-chok pon gah tentang Yék doh.” 22Rik Nak nachal wèl, “Yék, Sènꞌòy Nòm Sorga, mestik iderite ibuk. Mèn tèꞌtak, ketuwe imam, ròb guruk agama akal umjèk ma Yék. Dak mestik akal sènꞌòy umkèrbes ma Yék, tapik ma arik tenigak Yék akal ilos iwòg wèl.”
23Pas nak Yèsus nachal ma sènꞌòy jajéh, “Kalòw sènꞌòy nachèn namhoh ma Yék, mestik nanak tok nahèh-hoh ma nènchèn rik eh. Tapik tiyab-tiyab arik nanak mestik nagulap palok salib eh — maksod eh, mestik lah nasanggob namderite bok namkebes supaye namhoh ma Yék. #Mat 10:38; Luk 14:27. 24Chok rik namtèrgos nèsgos eh èn duniak doh, akal naruj nèsgos eh rik jalꞌéng. Tapik chok rik èg-og nèsgos eh untok Yék akal natèrgos nèsgos rik jalꞌéng eh nak. #Mat 10:39; Luk 17:33; Yoh 12:25. 25Tok begunak eh sènꞌòy nak mok kenèmbek harte èn duniak doh, tapik naruj rik ma rik eh ròb nèsgos eh rik jalꞌéng. 26Sebab chok rik sènyngẽny namhoh ma Yék ròb tenènglèkh Yék, akal Yék, Sènꞌòy Nòm Sorga, isengẽny imterime ma sènꞌòy nak keꞌjèk bil ilãj nòm kuwase ròb chènlakh Yék, bok nòm kuwase ròb chènlakh Apak Yék samak mèn melaykat suchi. 27Kemën Yék ichal ma nyob, mok maròp-maròp sènꞌòy èn anuh tok umkèsbes, èn tèk-tik tok umnèh-néh ma Kerajaꞌan Allah.”
Mad Yèsus nasanglik
(Mat 17:1-8; Mrk 9:2-8)
28Kirak-kirak lapan arik nòm kerek natèrlòy kenèmbek tenènglèkh nak, Yèsus naꞌéd tigak hèhoh Eh, Pètrus, Yohanès ròb Yakobus, dak naꞌòj ma balikh pok untok nampèꞌtak. 29Bil Yèsus tik nabepèꞌtak, mad Eh nasanglik dak nèglòg Eh najadik beyug gemèrlãb. 30Tok-tok kelit nar sènꞌòy wèbecharak samak Yèsus. Wènar nak Musa ròb Nabi Èliya. 31Wènar nak bedeyãr keꞌjèk chènlakh nòm sorga. Dak wècha-chal samak Yèsus tentang kènbes Eh rik tok lamad akal nabelakuk èn Yèrusalèm, gerèk nènchèn Allah. 32Bil nak Pètrus ròb nar kéy-kéy eh umsèglòg umwel. Dak bil umya-yèw, umnéh Yèsus bedeyãr nòm chènlakh nòm sorga, ròb nar sènꞌòy rik tèd-ted samak Rik Nak. 33Bil Musa ròb Nabi Èliya wèchèn wèmperak ma Yèsus, Pètrus nachal ma Rik Nak, “Yãng, méj geb lah kandék mok èn anuh! Kandék akal kiteꞌèl tigak dékh nèmdep: néy untok Hãk, néy untok Musa, néy wèl untok Èliya.” (Pètrus had nachal gerèk nak sebab tok nalèng-lèkh ilok namchal).
34Bil Pètrus nachèl-chal gerèk nak, sagub nataw dak nachub ma umnak, dak umnak umtukh. 35Dak nòm sagub nak mok kuy nachal, “Doh lah Kuwòt Yék, rik hòj ipili. Keyòkh lah ma nèlchal Rik Nak!” #Yès 42:1; Mat 3:17; 12:18; Mrk 1:11; Luk 3:22.#2 Ptr 1:17,18.
36Hòj sòj kuy chenarak nak, umnak umnéh Yèsus mok dèꞌrik èn anak. Pas nak tigak hèhoh Eh nak tok umchèl-chal ilok-ilok tentang kenèmbek nak. Bil mase nak, umnak tok èg-oglèkh ma chok-chok pon ilok rik hòj umnéh nak.
Yèsus natèrhakh ma sayẽd rik sèd-sid yel jèdhad
(Mat 17:14-18; Mrk 9:14-27)
37Is jakal eh nak, bil Yèsus ròb tigak hèhoh Eh naꞌtèk umtaw nòm pok nak, dak mok sènꞌòy jajéh èn anak umdèh-deh umchèn mutèrbuk ma Yèsus. 38Néy babeh èn sènꞌòy jajéh nak nabeꞌèh-éh, “Guruk, néh lah! Tulong lah ma kuwòt yék doh! Rik nak kuwòt tungal yék. 39Mok yel jèdhad mayek-mayek natèrsid eh: tok-tok nabekaraw dak nakenak sabat sampéy nyag eh bechèg-bèg. Yel jèdhad nak sejèkh naperèdjèd ma rik nak dak tok nachèn namtèrsèk eh. 40Yék hòj isemany lèdbëd ma hèhoh-hèhoh Hãh mukiron yel jèdhad nak, tapik umnak tok dapad muteꞌèl.”
41Yèsus nachal, “Nyob sènꞌòy rik tok pechaye! Hòj lamad Yék samak nyob bok ibesabah ma nyob, tapik nyob tèk-tik tok pechaye wèl!” Dak Yèsus nachal ma sènꞌòy naꞌtèk, “Èn lah kuwòt hãh ma doh.”
42Bil sayẽd nak nalãj tilok ma Yèsus, yel jèdhad nak nabes ma tèk dak nagèryèg-gèryèg ma esik eh. Tapik Yèsus natèdchod bok nakiron ma yel jèdhad nak, dak natèrhakh sayẽd nak dak natèrlos ma apak eh. 43Kenèmbek sènꞌòy èn anak umbèlꞌih umnéh kuwase Allah rik rayak geb!
Yèsus nachèl-chal wèl tentang kènbes Eh
(Mat 17:22-23; Mrk 9:30-32)
Bil umnak tik umbelaꞌih ma kenèmbek rik Yèsus nateꞌèl naꞌtèk, Yèsus nachal ma mèn hèhoh Eh, 44“Agok lah wel akal ilok rik Yék ichal ma nyob doh: Yék, Sènꞌòy Nòm Sorga, akal umꞌog ma kelòj kuwase sènꞌòy.” 45Tapik umnak tok umlèng-lèkh maksod Eh nak. Nèlchal Yèsus nak gerèk perèmnim, umnak tok dapad mulèkh. Tapik umnak umtukh mutanyak wèl ma Yèsus tentang nèlchal Eh nak.
Chok rik rèꞌyak
(Mat 18:1-5; Mrk 9:33-37)
46Nòm kerek nak hèhoh-hèhoh Yèsus umtekèd umbera-rok kaban rik ma rik um tentang chok èn umnak rik paléng rayak. #Luk 22:24. 47Yèsus nalèkh ilok rik umbèdlod èn kelòj hup umnak. Jadik Nanak naꞌéd néy sayẽd nated èn chening Eh. 48#Mat 10:40; Luk 10:16; Yoh 13:20. Yèsus nachal, “Kalòw nyob terime néy sayẽd gerèk doh sebab nyob hoh ma Yék, bemaksod nyob terime ma Yék. Bok bil nyob terime ma Yék, nyob terime keꞌjèk ma Allah rik terèn-èn ma Yék. Dak chok rik bebèdlod rik ma rik eh paléng tok bepenting èn nyob, nanak lah rik paléng rayak èn mad Tuhan.”
Chok rik tok belawan ma èk, bepihak ma èk
(Mrk 9:38-40)
49Pas nak Yohanès, néy hèhoh Yèsus, nachal, “Yãng, kandék kinéh néy sènꞌòy nakiron yel-yel jèdhad nòm kuwase kenëh Hãk. Dak kandék kihuwok ma rik nak, sebab nanak kedak hèhoh èk.”
50Tapik Yèsus nachal ma rik nak, “Agok huwok ma nanak. Sebab sènꞌòy rik tok belawan ma nyob, nanak bepihak ma nyob.”
Sènꞌòy kampong èn Samariya umjèk ma Yèsus
51Bil hòj tilok mase eh Allah namtayod Yèsus ma sorga, Yèsus nakod keputusan untok namwèk ma kote Yèrusalèm. 52Yèsus naꞌor sènꞌòy muwèk nèng-nèng nòm Rik Nak. Umnak umwèk ma néy kampong èn Samariya untok mutabéh kenèmbek untok Yèsus. 53Tapik sènꞌòy kampong nak umjèk tok umterime ma Yèsus, sebab umlèkh Rik Nak namwèk ma Yèrusalèm. 54Bil Yakobus ròb Yohanès, hèhoh-hèhoh Yèsus, wènéh gah nak, wètanyak ma Yèsus, “Yãng, mok ke hachèn kandék kimꞌor os namkelek nòm sorga namkèrbes ma sènꞌòy Samariya doh?” #2 Raj 1:9-16.
55Tapik Yèsus nawãr dak natèdchod ma umnak. 56Jadik umnak umwèk ma kampong mòy.
Sènꞌòy rik umchèn muhoh ma Yèsus
(Mat 8:19-22)
57Bil Yèsus ròb hèhoh-hèhoh Eh umchèb-chib èn nòng, mok néy sènꞌòy nalãj dak nachal ma Yèsus, “Yék ichèn imhoh ma Hãk ma lok-lok!”
58Tapik Yèsus nachal ma rik nak, “Lèdlèd mok tabòh eh, dak chèp mok sòm eh. Tapik Yék, Sènꞌòy Nòm Sorga, tok mèk-mok tempad untok imsèglòg bok imbetarak.”
59Nòm kerek nak Yèsus nachal ma sènꞌòy rik mòy, “Hoh lah ma Yék!”
Tapik sènꞌòy nak nasaꞌod, “Yãng, or lah yék immak nèng-nèng untok imkep mayad apak yék, pas nak ilos ihoh ma Hãk.”
60Tapik Yèsus nachal ma rik nak, “Sènꞌòy rik tok umpechaye ma Tuhan gerèk sènꞌòy kèsbes. Perak lah umnak mukep ma sènꞌòy kèsbes. Tapik hãk hawèk lah haꞌoglèkh gah Kerajaꞌan Allah.”
61Sènꞌòy mòy wèl nachal, “Yék ichèn imhoh ma Hãk, Yãng, tapik or lah yék imwèk imchal ma kewarge yéh nèng-nèng, ‘Nak, selamad, yék hòj iperak ma nyob.’” #1 Raj 19:20.
62Tapik Yèsus nachal ma rik nak, “Sènꞌòy rik natekèd nahoh ma Yék, tapik tik nawãr nabèdlod ma chare nèsgos eh rik manah,#9:62 Sènꞌòy rik natekèd nahoh ma Yék, tapik tik nawãr nabèdlod ma chare nèsgos eh rik manah Tèks asli mok chòntoh kiasan èn anuh: “sènꞌòy rik natekèd nabajak (maksod eh, nagunak lembu sapi ròb alad khas supaye nabay tèk namtabéh selay untok nèmtap), tapik nawãr nanéh ma yek.” nanak tok begunak èn kelòj Kerajaꞌan Allah.”
ទើបបានជ្រើសរើសហើយ៖
Lukas 9: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
