Yohanès 2
2
Yèsus nateꞌèl tande kuwase Eh rik mulak èn kampong Kana
1Bil arik maꞌyah eh nak, mok sènꞌòy umteꞌèl kenurik benabéy èn kampong Kana èn tèk Galiliya. Amèk Yèsus nahoh, 2dak umsèryéh ma Yèsus ròb hèhoh Eh ma kenurik benabéy nak keꞌjèk. 3Mèn tamu umꞌòng umtèrsòj kenèmbek òng anggor rik mok èn anak. Jadik amèk Yèsus nachal ma Rik Nak, “Néh lah, òng anggor umnak hòj sòj!”
4Tapik Yèsus nasaꞌod, “Nahey bok haꞌoglèkh ma Yék? Mase Yék tèk-tik tok nalèy-lòy.”
5Tapik amèk Eh nachal ma mèn kuli rik kerèꞌjak èn kenurik nak, “Teꞌèl hék lah ilok rik Yèsus nachal ma nyob nak!”
6Èn dékh nak mok enam tabol rik umteꞌèl nòm batuk; nòm tabol nak umgit òng untok adad nèjsuj agama sènꞌòy Yahudi nak. Tabol nak rayak, boléh umsèd kirak-kirak seratos liteh. 7Dak Yèsus nachal ma mèn kuli naꞌtèk, “Sèd lah òng ma kelòj tabol nak sampéy tebikh.” Dak umnak pon umsèd òng nak sampéy sangõr. 8Pas nak Yèsus nachal ma umnak, “Chuwoh lah òng nòm tabol nak dak og ma sènꞌòy rik beꞌuros èn kenurik doh.” Dak umnak pon umꞌèn òng nak. 9Bil sènꞌòy rik beꞌuros nak natalok, òng nak hòj nasanglik najadik òng anggor! Nanak tok nalèng-lèkh òng anggor nak nòm lok (tapik mèn kuli rik sèd-sèd òng naꞌtèk umlèkh). Dak rik beꞌuros nak nakòw ma abéy babeh nak, 10dak nachal ma rik nak, “Che biyase eh nak, sènꞌòy umjamuk òng anggor rik paléng méj nèng-nèng, dak bil mèn tamu nak hòj umꞌòng hòj umluwény, bok umjamuk wèl òng anggor rik murah hék. Tapik pay doh bok nyob jamuk òng anggor rik paléng méj!”
11Gerèk nak lah èn kampong Kana èn tèk Galiliya Yèsus nateꞌèl tande kuwase Eh rik mulak, bok napèrnéh renayak kuwase Eh nak. Dak mèn hèhoh Eh pon umpechaye ma Rik Nak.
12 #
Mat 4:13. Nòm kerek nak Yèsus nawèk ma kote Kapernaum samak amèk ròb mèn pek Eh bok mèn hèhoh Eh. Dak umnak umgel èn anak maròp-maròp arik.
Yèsus nakiron ma sènꞌòy rik umjèlwal èn Dékh Tuhan
(Mat 21:12-13; Mrk 11:15-17; Luk 19:45-46)
13 #
Her 12:1-27. Bil nak arik raye agama sènꞌòy Yahudi rik umdéh Paskah hòj tilok. Jadik Yèsus nawèk ma kote Yèrusalèm. 14Èn halaman Dékh Tuhan, Yèsus nanéh jajéh sènꞌòy rik umjèlwal lembu, kambikh biri, ròb chèp kukur untok mujamuk ma Allah. Mok keꞌjèk rik umgèl-gel èn anak bok umbetukar duid.#2:14 Èn Israꞌèl nèng-nèng tòp hòj mok duid rik umnak, tapik bil jaman Yèsus nak kerajaꞌan Roma hòj umbeperintah ma negerik Israꞌèl nak. Tapik sènꞌòy Yahudi umjèk tok umgunak duid nòm kerajaꞌan Roma nak èn Dékh Tuhan. Jadik sènꞌòy Yahudi umbetukar duid Roma nak supaye boléh mugunak duid rik umnak èn Dékh Tuhan. 15Dak Yèsus narebad talik untok namhemẽd, dak nakiron ma umnak kenèmbek nòm Dékh Tuhan nak, samak mèn lembu ròb kambikh biri um. Dak Yèsus natulag pantar tenukar duid nak, sampéy duid umnak najekh beralõy ma lok-lok. 16Yèsus nachal ma sènꞌòy rik umjèlwal chèp kukur nak, “Èn lah kenèmbek chèp doh muhuwòl nòm doh. Agok lah nyob jadik dékh Apak idoh pasah!” 17#En 69:10. Dak bil nak mèn hèhoh Eh umbelekh ma ayad Kitab doh: “Yék isayèkh ma dékh Hãk, yah Allah, sampéy ikènꞌĩs gerèk os natèrbëd ma hup Yék!”
18Dak anak mèn pemimpin sènꞌòy Yahudi umꞌõl ma Yèsus dak umchal, “Éh! Tok boléh hateꞌèl gerèk nak èn anuh! Kalòw lah mok hak Hãh nòm Allah untok hamteꞌèl hal doh, teꞌèl lah tande kuwase bok pèrnéh lah ma kandék!”
19 #
Mat 26:61; 27:40; Mrk 14:58; 15:29. Yèsus nasaꞌod ma umnak, “Nak, tuy lah Dékh Tuhan doh, dak Yék akal ilos iteꞌèl wèl èn mase tigak arik.”
20Dak umnak umchal, “Hòj empad puloh enam tawon umkerèꞌjak untok muteꞌèl Dékh Tuhan doh! Bok Hãk nak hachal hamlos hamteꞌèl wèl èn tigak arik hék?!”
21Tapik che kènmën eh nak bil Yèsus nachal “Dékh Tuhan doh,” Nanak nabemaksod esik rik Eh nak. 22Dak akal, nòm kerek Allah hòj natèrwòg ma Yèsus nòm kènbes Eh, mèn hèhoh Eh umbelekh ma nèlchal Eh tentang Dékh Tuhan nak. Dak bil nak lah umnak umpechaye ma Gah Allah bok ma kenèmbek nèlchal Yèsus nak.
Yèsus nalèkh tiyab hup sènꞌòy
23Bil mase Yèsus tik èn Yèrusalèm untok arik raye Paskah nak, mok jajéh sènꞌòy umnéh ma tande-tande kuwase rik Yèsus nateꞌèl èn anak bok umpechaye ma Rik Nak. 24-25Tapik rik Yèsus nalèkh ma tiyab hup umnak. Nanak hòj nalèkh ilok rik mok èn hup kenèmbek sènꞌòy, bok tok payah chok-chok pon muꞌèg-oglèkh ma Rik Nak. Dak sebab nak Yèsus tok napechaye ma sènꞌòy jajéh nak.
ទើបបានជ្រើសរើសហើយ៖
Yohanès 2: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
