Yohanès 1
1
Yèsus, Gah Tuhan bok Chènlakh Duniak
1Bil mulak eh tòp, èn bumi doh tèk-tik tok mèk-mok, Rik Nak hòj mok rik kenëh Eh Gah. Dak Gah nak mok samak Allah, bok Gah nak lah Rik Allah. 2Rik Nak hòj mok samak Allah nòm mulak. 3Nòm Rik Nak lah Allah napèrhéj kenèmbek, bok tok mèk-mok ilok-ilok pon rik napèrhéj tanpe Rik Nak. 4Gah nak lah rik èg-og nèsgos ma kenèmbek perènhéj Eh, dak nèsgos Eh nak naꞌog chènlakh ma kenèmbek sènꞌòy. 5Chènlakh nak bedeyãr ma kelòj rèhngah, dak rèhngah nak tok dapad namtèrped eh.
6 #
Mat 3:1; Mrk 1:4; Luk 3:1,2. Dak nalãj lah néy sènꞌòy rik Allah natèrꞌèn, kenëh eh Yohanès. 7Yohanès nalãj untok namꞌèg-oglèkh ma sènꞌòy tentang Chènlakh nak, supaye kenèmbek sènꞌòy mukeyòkh gah eh nak bok mupechaye ma Chènlakh nak. 8Rik Yohanès nak kedak lah Chènlakh nak, tapik nanak had nalãj untok namꞌèg-oglèkh tentang Chènlakh nak. 9Chènlakh rik kènmën hòj namlèj-lãj ma duniak untok namchelakh ma kenèmbek sènꞌòy.
10Rik kenëh Eh Gah nak hòj mok èn duniak. Dak yab Allah napèrhéj duniak doh nòm Rik Nak, tapik sènꞌòy èn duniak doh tok umkèlnal ma Rik Nak. 11Nanak nalãj ma tèk milik rik Eh, tapik sènꞌòy kaum rik Eh umjèk ma Rik Nak. 12Tapik mok keꞌjèk sènꞌòy rik umbeterime bok umpechaye ma Rik Nak. Dak Nanak naꞌog ma umnak kenèmbek hak untok mujadik kuwòt Allah. 13Chare umjadik kuwòt Allah nak kedak nòm jenòm sènꞌòy gerèk èn duniak doh, bok kedak lah nòm enampèk atòw nènchèn sènꞌòy. Tapik Allah irik najadik ma umnak kuwòt Eh.
14Rik kenëh Eh Gah nak hòj najadik sènꞌòy dak nagel samak èk. Jadik èk hòj ènéh ma kuwase ròb renayak Eh; Rik Nak rayak bok bekuwase sebab Rik Nak Kuwòt tungal Apak. Dak Rik Nak napèrnéh kenèmbek rik kènmën tentang Allah bok kenèmbek nèjméj hup Eh ma èk.
15Bil Yohanès Pembaptis naꞌèg-oglèkh ma sènꞌòy tentang Rik Nak, nanak naꞌèh-éh nòm kuy kènwad eh, “Udoh lah iRik Eh, rik yék ichal hatòp ma nyob: Rik Nak nalãj nòm kerek yék, tapik Nanak lebéh rayak nòm yék, sebab Nanak hòj mok nèng-nèng, èn tèk-tik yék tok mèk-mok.”
16Sebab nèjméj hup Eh rik beduyon-duyon, Nanak sejèkh-serajèkh nateꞌèl méj ma èk kenèmbek. 17Nòm Musa, Allah naꞌog Hukom Tuhan ma èk. Tapik nòm Yèsus Kristus, Allah hòj napèrnéh ma èk nèjméj hup Eh bok kenèmbek ilok rik kènmën. 18Tok mèk-mok chok-chok pon rik pernah nanéh ma Allah, had Kuwòt tungal rik Allah. Rik Nak pon Allah, dak Rik Nak lah rik paléng tilok ma Apak. Dak Rik Nak hòj napèrnéh Allah ma èk.
Yohanès Pembaptis natabéh sènꞌòy untok nèjlãj Yèsus
(Mat 3:1-12; Mrk 1:1-8; Luk 3:1-18)
19-20Bil nak mèn pemimpin sènꞌòy Yahudi èn kote Yèrusalèm umꞌor ma maròp-maròp imam ròb sènꞌòy Lèwi (rik umkerèꞌjak èn Dékh Tuhan) supaye muwèk bok mutanyak ma Yohanès, “Chok ihãk doh?”
Dak Yohanès nak nasaꞌod kemën ma umnak bok nachal tèꞌlalah: “Yék kedak Mèsias rik Allah napèrhod nak.”
21 #
Mal 4:5;
Ter 18:15,18. Jadik umnak umtanyak ma rik nak, “Kalòw gerèk nak, dak chok ihãk doh wèl? Ke hãk doh nabi Èliya?”
Yohanès nasaꞌod, “Hõy.”
Dak umnak umtanyak wèl, “Ke hãk doh rik bargah èn Hukom Tuhan, Nabi Rayak rik akal namlãj?”
Dak nanak nasaꞌod, “Hõy.”
22Sèj-sòj eh nak umnak umtanyak ma rik nak, “Jadik chok ihãk doh? Tulong oglèkh lah ma kandék, supaye kandék boléh kimꞌoglèkh ma sènꞌòy rik èr-or kandék kimlãj ma doh! Ilok hamchal tentang rik ma rik hãh?”
23 #
Yès 40:3. Dak anak Yohanès nasaꞌod, “Yék lah kuy rik beꞌèh-éh èn pantil gurun, ‘Gerèk nyob sèrjèkh nòng bil rajak namlãj, puꞌdoh tabéh lah hup nyob untok Tuhan!’” Gerèk nak lah nabi Yèsaya naramal manah tòp.
24Dak sènꞌòy rik mèn Parisi umtèrꞌèn nak 25umtanyak ma Yohanès, “Jadik kalòw hãk nak kedak Mèsias, bok kedak nabi Èliya atòw pon Nabi rik Musa naramal nak, bok nahey hãk habebaptis ma sènꞌòy?”
26Yohanès nasaꞌod, “Yék doh had ibaptis ma sènꞌòy nòm òng. Tapik mok èn anuh, èn gagid nyob nak, néy Sènꞌòy rik tok nyob kèlnal. 27Rik Nak lah rik nalãj nòm kerek yék. Rik Nak jerok lebéh rayak nòm yék, bok yék doh tok behakak imtèg-teg talik kasod Eh pon.”
28Kenèmbek nak nabelakuk èn kampong Bètania èn lantiw Òng Tibok Yordan, tempad Yohanès nabebaptis ma sènꞌòy.
Yèsus lah irik terèyhõy ma dose èk
29Dak is jakal eh nak, Yohanès nanéh Yèsus nalèj-lãj ma rik nak, dak Yohanès nachal ma sènꞌòy èn anak, “Néh lah! Rik Nak lah Kuwòt Kambikh Biri Allah#1:29 Kuwòt Kambikh Biri Allah Udoh néy nèwkòw untok Yèsus. Èn agama sènꞌòy Yahudi nak, bil sènꞌòy umbedose umnak umged bok umjamuk kuwòt kambikh biri ma Allah supaye namꞌampon ma dose umnak. Yèsus, Kuwòt Allah, nalãj ma bumi untok namꞌog nèsgos Eh bok nakebes gerèk lawok jenamuk nak, supaye namtèrhõy ma dose sènꞌòy èn mad Allah. rik natèrhõy ma dose duniak! 30Udoh lah iRik Eh, rik yék hòj ichal ma nyob: ‘Rik Nak nalãj nòm kerek yék, tapik Nanak lebéh rayak nòm yék, sebab Nanak hòj mok nèng-nèng èn tèk-tik yék tok mèk-mok.’ 31Hatòp nak yék pon tok ilèng-lèkh Rik Nak chok. Tapik Allah natèrꞌèn ma yék untok imbaptis ma sènꞌòy Israꞌèl nòm òng, supaye umnak dapad mukenal ma Rik Nak.”
32-33Dak Yohanès naꞌèg-oglèkh ma umnak ilok rik hòj nanéh bok nakeyòkh, “Nèng-nèng tòp yék tèk-tik tok ikèlnal Rik Nak chok. Tapik Allah, rik natèrꞌèn ma yék untok imbaptis ma sènꞌòy nòm òng, hòj nachal ma yék gerèk doh: ‘Hãk akal hanéh Ruway Yék nataw dak nakabed ma néy Sènꞌòy. Nanak lah irik akal nabaptis ma sènꞌòy nòm Ruway Kudus.’”
Yohanès nachal wèl, “Dak yék hòj inéh hal nak! Yék inéh Ruway Kudus nataw nòm langid gerèk chèp kukur nabekabed èn balikh Rik Nak. 34Jadik yék hòj inéh dak iꞌoglèkh ma nyob, mémang kemën Nanak nak Kuwòt Allah.”
Hèhoh-hèhoh Yèsus rik mulak
35Dak is jakal eh nak, Yohanès mok èn anak wèl natèd-ted samak nar hèhoh eh. 36Bil Yohanès nanéh Yèsus nahawul nòm nak, nanak nachal, “Néh lah! Rik Nak Kuwòt Kambikh Biri Allah!”
37Bil wènar nak wèkeyòkh ma nèlchal Yohanès nak, dak sejèkh wèhoh ma Yèsus. 38Yèsus nawãr dak nanéh ma wènar nak wèhèh-hoh ma Rik Nak, dak Nanak natanyak, “Ilok kaꞌan kèk?”
Dak wènar nak wètanyak, “Rabbi, èn lok Hãk hagel?” (Èn kuy sènꞌòy Yahudi “Rabbi” nak bemaksod “Guruk.”)
39Dak Yèsus nasaꞌod, “Jok lah, bok akal kaꞌan néh.”
Jadik wènar nak pon wèhoh dak wènéh èn lok tempad Yèsus nagel. Bil nak kirak-kirak pukol empad lèngꞌakh. Dak is nak wènar nak pon wègel èn anak samak Yèsus.
40Néy sènꞌòy nòm wènar rik kèngyòkh ma nèlchal Yohanès bok wèhoh ma Yèsus naꞌtèk kenëh eh Andréas. Rik nak pek Simon Pètrus. 41Andréas nak nawèk hès natèrbuk ma kelok eh Simon, dak nachal ma rik nak, “Yar hòj yatèrbuk ma Mèsias!” (“Mèsias” nak maksod eh samak ma “Kristus,” Rajak rik Allah napèrhod.) 42Pas nak Andréas naꞌéd Simon nak ma Yèsus.
Dak Yèsus nanéh ma Simon dak nachal, “Hãk Simon kuwòt Yohanès, tapik Yék itèrjal kenëh hãk Képas.” (“Képas” nak èn kuy sènꞌòy Yahudi maksod eh samak ma kenëh Yunani eh “Pètrus,” rik bemaksod “batuk.”)
43-44Dak ma is jakal eh nak wèl, Yèsus nachèn namwèk ma tèk Galiliya. Yèsus natèrbuk ma néy sènꞌòy rik bekenëh Pilipus. Pilipus nak nabeꞌasal nòm kote Bètsayda, samak gerèk Andréas ròb Pètrus naꞌtèk. Dak Yèsus nachal ma rik nak, “Jok lah, hoh ma Yék!” 45Pas nak Pilipus nawèk natèrbuk ma kéy eh Natanaꞌèl dak nachal, “Kandék hòj kitèrbuk ma Sènꞌòy rik Musa naramal èn Hukom Tuhan nak, bok mèn nabi hòj umramal èn kelòj Kitab! Nanak nak Yèsus, kuwòt Yusop nòm kampong Nasarèt.”
46Tapik Natanaꞌèl nak nachal ma Pilipus, “Nasarèt?! Tok mèk-mok ilok-ilok pon rik méj nòm kampong nak!”
Dak Pilipus nasaꞌod, “Jok lah bok néh mad rik hãh!”
47Bil Yèsus nanéh ma Natanaꞌèl nalèj-lãj ma Rik Nak, Nanak nachal tentang Natanaꞌèl nak, “Néh lah, nanak nak sènꞌòy Israꞌèl rik kènmën; tok mungkin nambesèꞌlok.”
48Natanaꞌèl natanyak ma Yèsus, “Yãng, gerèk lok Hãk hakenal ma yék?”
Dak Yèsus nasaꞌod, “Yék hòj inéh ma hãk bil hagèl-gel èn kèd jehuk kèlpong#1:48 jehuk kèlpong atòw jehuk aròk nak, èn tèk-tik Pilipus tok nakèw-kòw ma hãk.”
49Dak Natanaꞌèl nakèdjed bok nachal ma Yèsus, “Guruk, Hãk lah Kuwòt Allah! Bok Hãk lah Rajak kaum Israꞌèl!”
50Yèsus nachal ma rik nak, “Hãk hòj hapechaye sebab Yék ichal Yék inéh ma hãk bil hagèl-gel èn kèd jehuk kèlpong naꞌtèk. Tapik hãk akal hanéh hal-hal rik jerok lebéh rayak nòm nak!” 51#Jen 28:12. Yèsus nachal wèl, “Kemën-kemën Yék ichal ma nyob, nyob akal nyob néh langid napa-pog, dak mèn melaykat Allah umꞌòj umtaw nòm Yék, Sènꞌòy Nòm Sorga.”#1:51 Èn anuh Yèsus nachèl-chal tentang nèꞌpòk Yakob, yak dòt bej Israꞌèl jènman manah tòp. Cherite eh nak èn bukuk Jenadik 28:12. Bil nak Yakob natapòk bok nanéh mèn melaykat Allah umꞌòj umtaw tangge nòm sorga ma bumi. Nòm nèꞌpòk eh nak, Yakob nalèkh Allah hòj napili rik nak ròb waris eh untok mujadik kaum penili Allah. Gerèk nak keꞌjèk, mèn hèhoh Yèsus akal umlèkh Allah hòj napili ma Yèsus untok namjadik Mèsias, Sènꞌòy Nòm Sorga rik napèrnéh Allah ma sènꞌòy. Dak Yèsus gerèk nòng rik naꞌéd èk èmlos ma Allah.
ទើបបានជ្រើសរើសហើយ៖
Yohanès 1: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
