Yohanès 3
3
Yèsus nabetènglèkh tentang nèsyos rik pay nòm Ruway Kudus ròb nèsgos rik jalꞌéng
1Bil nak mok néy sènꞌòy pemimpin agama Yahudi nòm pitak sènꞌòy Parisi rik bekenëh Nikodimus. 2Bil néy layèg, Nikodimus nak nalãj namtèrbuk ma Yèsus. Rik nak nachal, “Guruk, kandék kilèkh Hãk nak guruk rik Allah natèrꞌèn untok hambetènglèkh ma kandék. Sebab kalòw Allah tok mèk-mok samak Hãk, pastik Hãk tok boléh hamteꞌèl tande kuwase gerèk Hãk hateꞌèl nak.”
3Yèsus nasaꞌod ma rik nak, “Kemën Yék ichal ma hãk: Tiyab-tiyab sènꞌòy haros lah nakenak nèsyos rik pay wèl. Kalòw hõy, rik nak tok dapad namnéh ma Kerajaꞌan Allah.”
4Dak Nikodimus natanyak, “Bok rèk lok sènꞌòy rik hòj tatak boléh namkenak nèsyos rik pay wèl? Tok mungkin sènꞌòy dapad namlos nammòj ma éj amèk eh, bok amèk eh namlos namyos nar kalik wèl!”
5Yèsus nasaꞌod, “Kemën lah Yék ichal ma hãk: tiyab-tiyab sènꞌòy haros lah nakenak nèsyos rik pay wèl, nòm òng bok nòm Ruway Kudus. Kalòw hõy, sènꞌòy nak tok dapad nammòj ma Kerajaꞌan Allah. 6Bok mèn amèk èh rik yès-yos ma esik èk, tapik Ruway Allah naꞌog nèsyos rik pay nak ma ruway èk. 7Jadik agok lah bèlꞌih bil Yék ichal, ‘Kenèmbek sènꞌòy haros lah umkenak nèsyos rik pay wèl.’ 8Nèsyos pay nòm Ruway Kudus nak gerèk chòntoh doh: tèrhòr nak nahũb ma lok-lok nachèn. Sènꞌòy umkeyòkh chëh eh bok umlèkh tèrhòr nak mok, tapik umnak tok umlèng-lèkh nòm lok tèrhòr nak nalãj, atòw ma lok nawèk. Gerèk nak lah keꞌjèk, tok mèk-mok sènꞌòy rik lèng-lèkh rèk lok chare Ruway Kudus nakerèꞌjak èn kelòj hup sènꞌòy, tapik èk boléh ènéh hasil eh èn nèsgos umnak.”
9Dak Nikodimus natanyak wèl, “Bok rèk lok wèl kenèmbek hal nak nambelakuk?”
10Yèsus nasaꞌod, “Hãk kan guruk agama rik penting èn sènꞌòy Israꞌèl, che patod eh nak hãk hòj halèkh ma hal doh! 11Ilok rik Yék ichal ma hãk doh mémang kemën: Yék ròb hèhoh Yék kiꞌèg-oglèkh tentang ilok rik kandék hòj kilèkh bok hòj kinéh, tapik nyob jèk tok nyob beterime ma nèlchal kandék nak. 12Bil Yék itènglèkh tentang hal-hal èn duniak doh, nyob nak tok nyob pechaye. Bok kalòw Yék imꞌoglèkh ma hãk tentang hal-hal èn sorga, pastik hãk tok hapechaye keꞌjèk! 13Tok mèk-mok néy sènꞌòy pon rik pernah naꞌòj ma sorga bok boléh namꞌoglèkh tentang hal-hal sorga nak. Had Yék, Sènꞌòy Nòm Sorga, rik boléh imꞌoglèkh tentang hal nak, sebab Yék irik tèw-taw nòm sorga.
14 #
Ken 21:9. Manah tòp bil mèn yak dòt bej èk umgel èn pantil gurun, Musa natayod patong tajuk èn balikh palok.#3:14 Bil mase nak tòp, sènꞌòy Israꞌèl umbedose bok tok umhèh-hoh ma nènchèn Allah. Sebab nak Allah natèrꞌèn ibuk tajuk èmpĩd untok namkèrbes ma umnak. Tapik pas nak sènꞌòy Israꞌèl umperak nòm dose um dak umsemany ma Allah namtèrgos ma umnak. Jadik Allah naꞌor ma Musa namteꞌèl patong tajuk nòm besik bok namtayod èn balikh ad, dak chok-chok rik nèh-néh ma patong nak Allah natèrgos ma umnak. (Cherite nak nabelakuk èn bukuk kitab Kenirak 21:4–9). Gerèk nak keꞌjèk, sènꞌòy umtayod ma Yèsus èn palok salib. Dak chok-chok rik pechaye ma Yèsus, Allah akal natèrgos ma umnak. Dak gerèk nak keꞌjèk mestik akal umtayod ma Yék, Sènꞌòy Nòm Sorga, 15supaye kenèmbek sènꞌòy rik umpechaye ma Yék umdapad nèsgos rik jalꞌéng. 16Allah nasayèkh geb ma sènꞌòy èn duniak doh, sampéy naꞌog Kuwòt Eh rik tungal, supaye kenèmbek sènꞌòy rik pechaye ma Rik Nak akal tok umkèsbes jalꞌéng, tapik umterime nèsgos rik jalꞌéng. 17Allah natèrꞌèn Kuwòt Eh nak ma duniak doh kedak lah untok namhakim ma sènꞌòy èn duniak, tapik supaye nòm Rik Nak lah Allah dapad namtèrgos ma sènꞌòy èn duniak.
18Chok rik pechaye ma Kuwòt Eh nak, akal Allah tok nabehukom. Tapik chok rik tok bepechaye, umnak hòj umbesalah èn mad Allah bok akal nahukom um sebab tok umpechaye ma Kuwòt Eh rik tungal. 19Chènlakh Allah nak hòj nalãj ma duniak, tapik sènꞌòy umjèk ma Rik Nak. Umnak lebéh umchèn ma rèhngah nòm Chènlakh, sebab tènꞌèl umnak jehad. Unak lah sebab eh Allah nahakim ma umnak hòj umbesalah. 20Kenèmbek sènꞌòy rik tèlꞌèl jehad umcheꞌẽs ma Chènlakh nak, bok umjèk tok umlèj-lãj ma Chènlakh nak sebab umtukh Rik Nak akal napèrnéh tèꞌlalah tènꞌèl jèdhad umnak. 21Tapik kenèmbek sènꞌòy rik tèlꞌèl ilok rik kènmën umlãj ma Chènlakh nak, supaye sènꞌòy gèhnih munéh ilok rik umteꞌèl nak bok umlèkh umnak umhoh ma nènchèn Allah.”
Yèsus lebéh rayak nòm Yohanès Pembaptis
22Nòm kerek nak Yèsus ròb hèhoh-hèhoh Eh umwèk ma negerik Yudéya. Dak èn anak Yèsus nagel maròp lènmad samak umnak, dak nabaptis ma sènꞌòy. 23-24#Mat 14:3; Mrk 6:17; Luk 3:19,20. Bil nak Yohanès Pembaptis tèk-tik tok umjèl-jél eh, dak Yohanès keꞌjèk tik nabebaptis ma sènꞌòy. Yohanès nak èn kampong Ainòn, tilok ma kote Salim, sebab èn anak mok ibuk òng. Dak sènꞌòy jajéh umlèj-lãj ma Yohanès untok nambaptis ma umnak èn òng nak.
25Dak mase nak maròp-maròp hèhoh Yohanès Pembaptis umtekèd umbera-rok samak néy sènꞌòy Yahudi rik mòy tentang adad nèjsuj rik umhoh èn adad agama Yahudi nak. 26Pas nak mèn hèhoh eh nak umwèk dak umchal ma Yohanès, “Guruk, habelekh lah Sènꞌòy rik samak hãk hatòp èn lantiw Òng Tibok Yordan, rik hòj hapèrnéh ma kandék hatòp? Keyòkh lah, puꞌdoh Rik Nak keꞌjèk hòj nabebaptis ma sènꞌòy, sampéy kenèmbek sènꞌòy umwèk ma Rik Nak hék!”
27Dak Yohanès nasaꞌod, “Èk sènꞌòy had èterime ilok rik Allah naꞌog ma èk. 28#Yoh 1:20. Nyob hòj nyob keyòkh bil yék ichal, ‘Yék doh kedak lah Mèsias rik Allah napèrhod nak. Yék doh had sènꞌòy rik Allah natèrꞌèn nèng-nèng supaye imtabéh nòng untok Rik Nak.’ 29Gerèk chòntoh doh lah: Yèsus nak gerèk abéy babeh, dak yék doh gerèk kéy rik betulong ma abéy babeh. Abéy babeh nak lah irik bedapad ma abéy babok eh. Kéy eh nak had nadèh-deh bok nakèngyòkh ma nèjlãj abéy babeh nak. Dak bil hòj nakeyòkh ma kuy abéy babeh nak, kéy nak naꞌadés. Gerèk nak lah yék pon iꞌadés geb sebab Rik Nak hòj nalãj. 30Nanak haros lèrhir nabetabeh lebéh rayak, bok yék doh had ijadik lebéh ajok wèl.”
Yèsus lah rik Allah natèrꞌèn nòm sorga
31Rik Nak nalãj nòm balikh, bok Nanak irik lebéh balikh nòm kenèmbek eh. Sènꞌòy rik beꞌasal èn bumi doh had sènꞌòy biyase, had umbebèdlod bok umbecharak hal-hal èn bumi hék. Tapik Nanak rik nalãj nòm sorga nak lebéh rayak nòm kenèmbek eh. 32Nanak naꞌoglèkh ilok rik hòj nanéh bok nakeyòkh, tapik sènꞌòy umjèk tok umterime ma nèlchal Eh nak. 33Tapik sènꞌòy rik umterime bok umpechaye ma nèlchal Eh nak umpèrnéh ilok rik Allah napèrhod nak kemën. 34Allah natèrꞌèn Rik Nak bok naꞌog ma Rik Nak Ruway Kudus Eh rik tok sèj-sòj–sèj-sòj. Jadik Rik Nak naterèylòy gah nòm rik Allah. 35#Mat 11:27; Luk 10:22. Allah Apak nasayèkh ma Kuwòt Eh nak dak hòj naꞌog ma Rik Nak kuwase èn kenèmbek ilok rik mok. 36Chok-chok rik bepechaye ma Kuwòt Allah nak akal nagos jalꞌéng. Tapik chok rik tok tèdꞌãd ma Kuwòt Eh nak akal tok dapad namgos jalꞌéng, dak Allah nahukom eh sampéy bilok-bilok.
ទើបបានជ្រើសរើសហើយ៖
Yohanès 3: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
