Yohanès 12
12
Maria nasèd binyak chèsngẽs ma jukh Yèsus
(Mat 26:6-13; Mrk 14:3-9)
1Tik enam arik èn tèk-tik tok nalèy-lòy ma arik raye Paskah, Yèsus nawèk ma Bètania, kampong Lasarus nagel. Lasarus nak rik Yèsus natèrwòg nòm kènbes hatòp. 2Dak èn anak umteꞌèl jamuwan untok muhormad ma Yèsus. Marta nabejamuk ma umnak, dak Lasarus ròb tamu rik gèhnih umga-géy samak Yèsus. 3#Luk 7:37,38. Bil nak Maria naꞌèn butol ajok binyak chèsngẽs rik umteꞌèl nòm èryès narwastu, rik mehal geb hèrgak eh. Dak nasèd ma jukh Yèsus, dak nasok sog eh ma jukh Yèsus. Dak ngõy binyak chèsngẽs nak nahos perèmꞌim èn kelòj dékh nak.
4Tapik Yudas Iskariot, hèhoh Yèsus rik akal namtulong ma mèsmus muròt ma Yèsus, nachal, 5“Hèrgak binyak chèsngẽs nak mehal geb — gerèk gajik sènꞌòy rik kerèꞌjak néy tawon!#12:5 gajik sènꞌòy rik kerèꞌjak néy tawon! Tèks asli Kitab: “300 kupang duid pèrak.” Lebéh méj kalòw naꞌog ma èk èmjuwal, bok duid eh nak èmꞌog ma sènꞌòy hèl-hal.” 6Yudas nachal gerèk nak kedak sebab nabegorgèr ma sènꞌòy hèl-hal, tapik sebab nanak nak sènꞌòy rik sèjyèj. Yudas irik kèmwòp puchòs duid untok Yèsus ròb mèn hèhoh Eh, dak nanak lèjgéj naseyèj duid nak untok rik eh.
7Yèsus nachal, “Agok lah haleked ma rik nak! Nanak nadol binyak nak bok nateꞌèl hal doh untok namtabéh ma arik mukep ma Yék. 8#Ter 15:11. Kalòw nyob chèn nyomtulong ma sènꞌòy hèl-hal, umnak akal selaluk mok èn nyob. Tapik Yék mok samak nyob agat hék.”
Pemimpin sènꞌòy Yahudi umꞌampèk mukèrbes ma Lasarus
9Jajéh sènꞌòy Yahudi umkeyòkh gah Yèsus mok èn kampong Bètania nak. Jadik umnak umwèk ma nak untok munéh ma Yèsus, bok umchèn munéh keꞌjèk ma Lasarus, rik Yèsus hòj natèrwòg eh nòm kènbes. 10-11Dak sebab umkeyòkh ilok hòj nabelakuk ma Lasarus nak, jajéh sènꞌòy umpechaye ma Yèsus bok tok umhèh-hoh wèl ma mèn pemimpin Yahudi. Sebab nak, mèn ketuwe imam umꞌampèk mukèrbes ma Lasarus keꞌjèk.
Yèsus namòj ma kote Yèrusalèm gerèk Rajak
(Mat 21:1-11; Mrk 11:1-11; Luk 19:28-40)
12Dak is jakal eh nak, najekh lah gah Yèsus hòj namlèj-lãj ma Yèrusalèm. Èn kote nak hòj mok jajéh geb sènꞌòy umbekumpol untok muhoh ma arik Paskah. 13#En 118:25,26. Umnak umkod tapag kelape dak umwèk ma béng kote untok musambud ma Yèsus. Dak umꞌèh-éh,
“Hosana! Èhmah lah ma Allah!”
“Allah nateꞌèl méj lah ma Nanak rik nalãj nòm kuwase Tuhan Allah!”
“Allah nateꞌèl méj lah ma Rajak Israꞌèl doh!”
14Yèsus nabedapad néy kuwòt kuda kelday, dak nakabed èn kerek eh. Dak gerèk nak lah nabelakuk Gah Allah rik natulis èn kelòj Kitab:
15 #
Sak 9:9. “Agok tukh, sènꞌòy rik gèl-gel èn Siòn! #12:15 Siòn nak kenëh mòy umkòw ma kote Yèrusalèm, sebab umteꞌèl kote Yèrusalèm nak èn balikh pok rik bekenëh Pok Siòn.
Néh lah! Rajak nyob hòj nalãj,
nabekabed èn kuwòt kuda kelday.”
16Bil mase nak hèhoh-hèhoh Yèsus tik tok umlèng-lèkh maksod kenèmbek hal nak. Tapik bil Allah hòj natèrwòg Yèsus nòm kènbes bok napèrnéh kuwase ròb renayak Yèsus, umnak umbelekh ilok sènꞌòy jajéh umteꞌèl untok Yèsus, bok umlèkh ilok rik mèn nabi hòj umramal èn kelòj Kitab manah tòp nak tentang Rik Nak.
17Jajéh sènꞌòy mok samak Yèsus hatòp bil Rik Nak nakòw ma Lasarus namhuwòl nòm kubor bok natèrwòg nòm kènbes eh, dak sènꞌòy jajéh nak umꞌèg-oglèkh gah nak ma téh ma rèh. 18Dak sebab hòj umkeyòkh gah tande kuwase rik Yèsus nateꞌèl nak, jajéh sènꞌòy umlãj untok musambud ma Rik Nak. 19Dak sènꞌòy Parisi umcha-chal kaban rik um, “Néh lah, kenèmbek duniak hòj umhoh ma Rik Nak! Berugik hék èkerèngdakh bok tok behasil èh!”
Yèsus nachèl-chal tentang kènbes Eh bok terèngos Eh ma kenèmbek kaum
20Èn sènꞌòy jajéh rik umlèj-lãj ma Yèrusalèm untok musindol bil arik Paskah nak, mok keꞌjèk sènꞌòy kedak Yahudi. 21Umnak umlãj ma Pilipus dak umchal, “Yãng, kandék kichèn kimtèrbuk ma Yèsus.” (Pilipus nak nòm kote Bètsayda èn tèk Galiliya.) 22Jadik Pilipus naꞌoglèkh ma Andréas ilok rik umsemany atèk, dak pas nak Andréas ròb Pilipus wèwèk dak wèꞌoglèkh ma Yèsus.
23Yèsus nasaꞌod ma umnak, “Hòj nalòy mase eh Allah nampèrnéh kuwase ròb renayak Yék, Sènꞌòy Nòm Sorga. 24Kemën Yék ichal ma nyob, ilok rik akal nabelakuk ma Yék gerèk chòntoh mad menéh doh: kalòw tok tèm-tap, mad menéh nak had néy hék. Menéh nak haros lah nakelek ma tèk bok nakebes, bok akal nahin nabekèꞌbek ibuk.#12:24 Yèsus gerèk mad menéh nak sebab Yèsus akal nakebes dak umkep, dak nòm kènbes Yèsus nak akal mok hasil: jajéh sènꞌòy nòm kenèmbek kaum akal boléh umtèrbuk bok umpechaye ma Yèsus. 25#Mat 10:39; 16:25; Mrk 8:35; Luk 9:24; 17:33. Chok rik besayèkh ma nèsgos eh èn duniak doh akal naruj nèsgos eh rik jalꞌéng. Dak chok rik tok nabegorgèr ma nèsgos eh èn duniak doh akal nakuwòp ma nèsgos eh rik jalꞌéng nak. 26Chok rik chèn-chèn mukèrjak ma Yék, haros lah umhoh ma lok pon Yék iwèk, bok mèn kuli Yéh haros lah selaluk mok samak Yék. Dak Apak Yék akal nahormad ma chok-chok rik kerèꞌjak untok Yék.”
27Yèsus nachal wèl, “Puꞌdoh hup Yék igahmak isuwéh, bok ilok Yék imchal? Tok mèk-mok Yék imchal, ‘Apak, tèrgos lah che Yék nòm derite doh!’ Sebab unak lah tujuwan eh Yék ilãj ma duniak doh. 28Jadik Yék had ipèꞌtak, ‘Apak, pèrnéh lah kuwase ròb renayak Hãk!’”
Dak anak mok kuy nòm langid nachal, “Yék hòj ipèrnéh kuwase ròb renayak Yék, dak Yék akal ipèrnéh wèl.”
29Sènꞌòy jajéh èn anak umkeyòkh ma kuy nak dak umchal, “Naꞌagah!” Tapik gèhnih umchal, “Bèꞌbòk! Nanak nak kuy melaykat nabecharak ma Rik Nak!”
30Tapik Yèsus nachal, “Kuy rik nyob keyòkh nak kedak untok Yék, tapik untok nyob, supaye nyompechaye ma Yék. 31Puꞌdoh hòj nalòy mase eh Allah namhakim ma sènꞌòy èn duniak doh. Bok puꞌdoh lah Allah hòj namkiron ma Iblis, rik bekuwase èn duniak doh. 32Bil sènꞌòy umtayod ma Yék nòm tèk, Yék akal iꞌéd ma kenèmbek sènꞌòy mulãj ma Yék.” 33(Yèsus nachal gerèk nak untok namꞌoglèkh gerèk lok chare Nanak akal nakebes èn palok salib.)
34 #
En 110:4; Yès 9:6; Yeh 37:25; Dan 7:14. Dak èn sènꞌòy jajéh nak mok rik umchèl-chal, “Kandék hòj kibache èn kelòj Hukom Tuhan nachal Mèsias nak akal nagos sampéy bilok-bilok. Jadik gerèk lok Hãk hamchal Sènꞌòy Nòm Sorga akal umtayod bok umkèrbes èn palok salib? Bok ilok maksod hakòw rik ma Rik Hãh ‘Sènꞌòy Nòm Sorga?’ Hãk nak Mèsias ke hõy?”
35Yèsus nachal ma umnak, “Had agat hék Chènlakh doh mok samak nyob. Jadik chib lah èn kelòj chènlakh Yéh mase Yék tik mok samak nyob, bok bil rèhngah nalãj tok nabekuwase ma nyob. Sènꞌòy rik chèb-chib èn kelòj rèhngah tok umlèng-lèkh ma lok umnak muwèk. 36Yék lah Chènlakh, jadik bil Yék tik mok samak nyob, pechaye lah ma Yék, bok akal nyob jadik kuwòt Allah bok nyob gos èn kelòj chènlakh.” Hòj sòj nachal gerèk nak, Yèsus naperak ma sènꞌòy jajéh nak bok nakèrdëk rik Eh nòm umnak.
Jajéh sènꞌòy Yahudi umjèk tok umpechaye ma Yèsus
37Yab sènꞌòy Yahudi hòj umnéh Yèsus nateꞌèl jajéh tande kuwase nak, tapik umnak tik tok umpechaye ma Rik Nak. 38#Yès 53:1. Gerèk nak lah nabelakuk Gah Allah rik nabi Yèsaya hòj naramal manah tòp:
“Yah Tuhan, bil yék iterèylòy gah nòm Hãk,
gerèk tok mèk-mok rik mupechaye!
Dak bil Hãk hapèrnéh tebikh kuwase Hãh,
gerèk tok mèk-mok rik mulèkh.”
39Unak lah sebab eh sènꞌòy nak tok umpechaye, tehad gerèk nabi Yèsaya hòj nachal:
40 #
Yès 6:10. “Tuhan hòj naꞌuy ma mad um bebèybëy
bok ma hup um sèlsadel#12:40 sèlsadel chegod hup, tengin.
sampéy mad umnak tok dapad munéh,
bok èn benèdlod um tok dapad mulèkh,
dak umnak tok dapad mulos ma Yék
untok imtèrhakh ma umnak.”
41Nabi Yèsaya nachal gerèk nak sebab hòj nanéh kuwase ròb renayak Yèsus, jadik rik nak pon naramal tentang Yèsus.
42Yab gerèk nak, mok keꞌjèk jajéh pemimpin sènꞌòy Yahudi pon rik umpechaye ma Yèsus. Tapik umnak tok belamid muꞌakuk tèꞌlalah, sebab umnak umtukh pitak sènꞌòy Parisi akal umkiron um nòm dékh senindol umnak. 43Umnak lebéh umchèn nòm sènꞌòy mòy muꞌèhmah ma rik umnak, bok tok umbegorgèr ma enèhmah nòm Allah.
Allah akal nahukom ma sènꞌòy rik jèk-jèk tok umpechaye ma Gah Yèsus
44Dak Yèsus naꞌèh-éh, “Chok rik pechaye ma Yék, kedak napechaye ma Yék hék, tapik napechaye keꞌjèk ma Nanak rik terèn-èn Yék. 45Chok rik nèh-néh ma Yék, bemaksod hòj nanéh ma Nanak rik terèn-èn ma Yék. 46Yék ilãj ma duniak doh gerèk chènlakh, supaye kenèmbek sènꞌòy rik pechaye ma Yék tok umgèl-gel èn kelòj rèhngah. 47Yék ilãj ma duniak doh kedak imkèrlek henukom ma sènꞌòy, tapik untok imtèrgos ma umnak. Jadik bil sènꞌòy umkeyòkh ma tenènglèkh Yék tapik tok umhèh-hoh, kedak Yék irik behakim ma umnak. 48Tapik chok rik jèk-jèk ma Yék bok tok beterime ma tenènglèkh Yék, hòj mok rik akal behakim um. Ma arik sèj-sòj jakal, Apak akal nahukom ma umnak sebab umjèk tok umpechaye ma gah rik Yék itèrlòy doh. 49Sebab Yék tok ibecharak nòm nènchèn rik Yéh, tapik Apak rik terèn-èn ma Yek hòj naꞌor ma Yék ilok rik Yék imchal bok imꞌoglèkh. 50Dak Yék ilèkh ilok rik Nanak naꞌor nak naꞌog nèsgos rik jalꞌéng. Sebab nak lah Yék selaluk ibetènglèkh tehad gerèk ilok rik Apak hòj naꞌoglèkh ma Yék.”
ទើបបានជ្រើសរើសហើយ៖
Yohanès 12: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
