Yohanès 11
11
Lasarus nakebes
1Bil mase nak mok néy kéy Yèsus rik jèk-jik, kenëh eh nak Lasarus. Rik nak nagel èn kampong Bètania nak èn tèk Yudéya samak kelok bèꞌbok eh, Maria ròb Marta. #Luk 10:38,39. 2(Maria nak lah babok rik sèd-sèd binyak chèsngẽs ma jukh Tuhan Yèsus bok nasok nòm sog eh. Dak Lasarus rik jèk-jik nak pek eh.)#Yoh 12:3. 3Jadik, Maria ròb Marta wèꞌor ma sènꞌòy namwèk bok namdalag ma Yèsus, “Yãng, kéy Hãh rik hasayèkh nak hòj najèk-jik.”
4Bil Yèsus nakeyòkh gah nak, Rik Nak nachal, “Ma sèj-sòj eh Lasarus tok nakèsbes nòm chenèk eh nak. Hal doh nabelakuk untok nampèrnéh kuwase ròb renayak Allah. Bok nòm hal doh akal sènꞌòy umnéh bok umhormad ma renayak Kuwòt Allah.”
5Yèsus nasayèkh ma Marta, Maria, ròb Lasarus nak. 6Tapik yab Nanak hòj nakeyòkh gah Lasarus najèk-jik, Yèsus tik nagel èn tempad nak nar arik wèl. 7Dak hòj nòm kerek nak, Nanak nachal ma hèhoh-hèhoh Eh, “Jok lah, èk èmlos wèl ma Yudéya.”
8Umnak umsaꞌod, “Tapik Guruk, pay hatòp sènꞌòy Yahudi èn Yudéya nak umteréy mubedal batuk bok mukèrbes ma Hãk! Dak puꞌdoh Hãk hachèn hamlos wèl ma tuy?”
9Yèsus nasaꞌod, “Halok lah, tik mok mase wèl. Tiyab arik mad is nak nachelakh nar belas jam. Chok rik chèb-chib bil is tik beyug tok umbetades, sebab umnak umnéh tèꞌlalah ma Chènlakh duniak doh. 10Tapik chok rik chèb-chib èn rèhngah, umnak akal umtades sebab tok mèk-mok chènlakh èn umnak.”
11Pas nak Yèsus nachal wèl, “Kéy èk Lasarus nak hòj nasèglòg, tapik Yék imwèk imtèrꞌih ma rik nak.”
12Dak mèn hèhoh Eh umchal, “Yãng, kalòw rik nak nasèglòg, rik nak akal nahakh.”
13Umnak umsabok maksod Yèsus nak Lasarus had nasèglòg gerèk biyase, kemoh maksod Eh nak Lasarus hòj kemën-kemën nakebes. 14Jadik Yèsus nachal tèꞌlalah ma umnak, “Lasarus hòj nakebes. 15Tapik Yék iꞌadés Yék tok mèk-mok samak rik nak hatòp. Hal nak lebéh méj ma nyob, supaye nyob boléh kemën-kemën nyompechaye ma Yék. Jok lah, èk èwèk puꞌdoh ma Lasarus.”
16Dak Tòmas, rik umdéh Kamar, nachal ma hèhoh Yèsus rik gèhnih, “Jok lah, èk èhoh keꞌjèk, bok èk boléh èmkebes samak Yèsus.”
Yèsus lah rik terègwòg ma sènꞌòy kèsbes bok naꞌog nèsgos
17Bil Yèsus ròb hèhoh-hèhoh Eh umbeleh ma kampong Bètania, dak umꞌoglèkh ma Yèsus mayad Lasarus nak hòj umkep empad arik. 18Bètania nak tok jèꞌrok nòm Yèrusalèm, kirak-kirak tigak kilomiter jènrok eh, 19dak jajéh sènꞌòy Yahudi hòj umlãj ma Maria ròb Marta untok muchèrmun ma wènar nak sebab pek wèh Lasarus hòj nakebes.
20Bil Marta nakeyòkh gah Yèsus hòj namlèj-lãj, nanak nawèk namtèrbuk ma Yèsus. Tapik Maria tik èn dékh eh. 21Bil Marta natèrbuk ma Yèsus dak nanak nachal, “Tuhan, kalòw Hãk mok èn anuh hatòp, pastik pek yék tok nakèsbes. 22Yab gerèk nak, yék ilèkh puꞌdoh pon Allah akal naꞌog ma Hãk ilok pon rik hasemany ma Rik Nak.”
23Yèsus nasaꞌod ma Marta, “Pek hãh nak akal nawòg wèl.”
24Dak Marta nachal ma Yèsus, “Hek, yék ilèkh nanak akal nawòg wèl, bil kenèmbek sènꞌòy umwòg nòm kènbes bil èn sèj-sòj duniak jakal.”
25Yèsus nachal ma rik nak, “Yék lah irik terègwòg ma sènꞌòy kèsbes bok iꞌog nèsgos. Chok rik pechaye ma Yék akal umgos, yab umnak umkebes. 26Sènꞌòy rik gès-gos bok umpechaye ma Yék akal tok umkèsbes sampéy bilok-bilok. Bok hapechaye lah ma hal doh, Marta?”
27Marta nasaꞌod, “Hek, Tuhan. Yék ipechaye Hãk lah Mèsias, Kuwòt Allah, rik Allah hòj napèrhod namlãj ma duniak doh.”
28Nòm kerek Marta nachal gerèk nak, nanak nalos ma dékh eh. Nanak nakòw ma pek eh Maria nòm sènꞌòy gèhnih èn dékh nak, dak nachehor ma rik nak, “Guruk hòj mok èn anuh, bok nakòw ma hãk.” 29Bil Maria nakeyòkh ma gah nak, nanak nated hès dak nawèk namtèrbuk ma Yèsus. 30Bil nak Yèsus tèk-tik tok namèj-mòj ma kampong nak. Nanak tèk-tik èn tempad rik Marta natèrbuk Eh atèk. 31Sènꞌòy Yahudi rik umcherènmun ma Maria èn dékh nak umnak umnéh Maria nated hès dak nahuwòl ma béng. Dak umnak umbèdlod Maria nawèk ma kubor Lasarus untok namyèm-yam, jadik umnak pon umhoh.
32Bil Maria nabeleh ma tempad rik Yèsus nated nak dak nanéh ma Yèsus, nanak sejèkh nakèm-këm bok natud èn jukh Yèsus. Dak Maria nachal, “Tuhan, kalòw lah Hãk mok èn anuh hatòp, pastik pek yék tok nakèsbes!”
33Bil Yèsus nanéh ma Maria nayèm-yam, bok ma sènꞌòy gèhnih rik hèh-hoh nak umyèm-yam keꞌjèk, Yèsus nagahmak nangòm geb bok nasuwéh hup Eh. 34Dak Nanak natanyak, “Èn lok nyob dol mayad eh?”
Dak umsaꞌod, “Yãng, jok lah bok néh rik Hãh!”
35Yèsus pon nayam. 36Dak sènꞌòy Yahudi èn anak umchal, “Néh lah! Rik Nak nasayèkh geb ma Lasarus.”
37Tapik mok maròp-maròp sènꞌòy èn umnak umchal, “Yèsus nak hòj natèrhakh ma sènꞌòy bebèybëy. Nahey Rik Nak tok nabetulong supaye Lasarus tok nakèsbes?”
Yèsus natèrwòg ma Lasarus nòm kènbes
38Yèsus nagahmak nangòm geb bok nasuwéh hup Eh wèl. Dak Nanak nawèk ma kubor nak. Kubor nak èn kelòj guwok rik hòj umchèrtekh batuk rayak. 39Yèsus nachal, “Kèrléh lah batuk nak ma chening.”
Tapik Marta nachal, “Tuhan, hòj empad arik nanak nakebes; pastik hòj seꞌèg ngòy eh!”
40Yèsus nachal ma Marta, “Bok hòj ichal ma hãk naꞌtèk! Kalòw hãk hapechaye ma Yék, hãk akal hanéh kuwase ròb renayak Allah!” 41Jadik umnak pon umkèrléh batuk rayak nak. Dak Yèsus nabelay ma balikh dak nachal, “Apak, Yék ibeterime kaséh ma Hãk sebab hakeyòkh ma Yék. 42Yék ilèkh Hãk selaluk hakeyòkh ma Yék, had ichal gerèk doh untok kenèmbek sènꞌòy èn anuh mukeyòkh, supaye umnak mupechaye Hãk lah irik terèn-èn ma Yék.” 43Hòj sòj chenarak Eh nak, Yèsus naꞌèh-éh nòm kuy kènwad Eh, “Lasarus, huwòl lah!” 44Dak Lasarus pon nahuwòl. Jukh ròb tikh eh tik benènlat abat, bok mad eh tik benèbtub abat keꞌjèk. Pas nak Yèsus naꞌor ma sènꞌòy gèhnih èn anak, “Teg lah abat nak, perak nanak namchib!”
Mèn pemimpin Yahudi umꞌampèk mukèrbes ma Yèsus
(Mat 26:1-5; Mrk 14:1-2; Luk 22:1-2)
45Jadik jajéh sènꞌòy Yahudi rik umgagoh ma Maria atèk umnéh ilok rik Yèsus nateꞌèl nak, dak umnak pon umpechaye ma Rik Nak. 46Tapik mok keꞌjèk èn umnak sènꞌòy gèhnih rik umwèk bok umripod ma sènꞌòy Parisi ilok rik Yèsus hòj nateꞌèl nak. 47Jadik mèn ketuwe imam ròb sènꞌòy Parisi umkòw ma kenèmbek sènꞌòy nòm Majlis Agama muterabuk. Umnak umchal kaban rik um, “Ilok èk èmteꞌèl? Sènꞌòy nak nateꞌèl ibuk tande kuwase! 48Kalòw èk èperak Nanak sejèkh nateꞌèl gerèk nak, pastik kenèmbek sènꞌòy akal umpechaye ma Rik Nak. Dak sèj-sòj eh kerajaꞌan Roma akal umlãj dak umtuy ma Dékh Tuhan bok umtèrhõy ma kaum èk!”
49Mok èn umnak néy sènꞌòy rik bekenëh Kayapas, rik nak Imam Rayak Yahudi bil tawon nak. Dak nanak nachal, “Nyob kenèmbek tok nyob lèng-lèkh ilok-ilok! 50Bèdlod lah: lebéh méj untok èk kenèmbek kalòw néy Sènꞌòy nak nakebes untok kaum èk. Gerèk nak lah lebéh méj nòm kerajaꞌan Roma mutèrhõy ma kenèmbek kaum èk!” 51Ilok rik Kayapas nachal nak kedak nòm rik eh nak. Tapik sebab rik nak Imam Rayak, nanak natèrlòy gah nòm Allah bok naramal Yèsus akal nakebes untok kenèmbek kaum Yahudi. 52Bok kedak untok kaum Yahudi hék, tapik untok namrimpon kenèmbek kuwòt Allah nòm kaum mòy rik chéy-baruy supaye mujadik néy kaum penili Allah.
53Dak nòm arik nak pemimpin sènꞌòy Yahudi umtekèd umꞌampèk untok mukèrbes ma Yèsus. 54Sebab nak Yèsus tok nachèb-chib tèꞌlalah èn sènꞌòy Yahudi nak wèl. Tapik Nanak nawèk ma kote Èprayim tilok ma pantil gurun, dak nagel èn anak samak mèn hèhoh Eh.
55Bil nak hòj tilok namlèy-lòy ma arik Paskah sènꞌòy Yahudi. Dak jajéh sènꞌòy nòm lok-lok kampong hòj umlãj nèng-nèng ma kote Yèrusalèm untok muteꞌèl adad bok mujadik méj èn mad Tuhan supaye mutabéh untok arik raye nak. 56Dak sènꞌòy jajéh nak umka-kèk ma Yèsus. Umnak umted èn halaman Dékh Tuhan, dak umnak umcha-chal kaban rik um, “Dak rèk lok ma benèdlod nyob? Yèsus nalãj ke hõy ma arik raye doh?” 57Bil nak mèn ketuwe imam ròb sènꞌòy Parisi hòj umꞌor ma sènꞌòy jajéh bok umchal chok rik lèng-lèkh èn lok Yèsus nak, umnak haros muripod supaye umnak dapad muròt ma Yèsus.
ទើបបានជ្រើសរើសហើយ៖
Yohanès 11: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
