Yohanès 13
13
Yèsus nasuj ma jukh mèn hèhoh Eh
1Hòj tilok namlèy-lòy ma arik raye Paskah, dak Yèsus nalèkh hòj nalòy mase Eh Nanak namperak ma duniak doh bok nammak ma Apak. Yèsus nasayèkh ma kenèmbek hèhoh Eh èn duniak doh, dak puꞌdoh Nanak napèrnéh rèk lok Nanak sejèkh-serajèkh nasayèkh geb ma umnak.
2Layèg nak, Yèsus ròb hèhoh-hèhoh Eh umga-géy. Dak Iblis hòj nakèrjak èn hup Yudas Iskariot, kuwòt Simon, supaye namtulong ma mèsmus muròt ma Yèsus. 3Yèsus nalèkh Apak Eh hòj naꞌog kenèmbek kuwase ma Rik Nak. Yèsus nalèkh keꞌjèk Rik Nak hòj nalãj nòm Allah, bok akal namlos ma Allah. 4Èn tik umga-géy, Yèsus nated, nateg bajuk jèꞌrok Eh, dak nabeg tuwale èn wakh Eh. 5Nanak nasèd òng ma kelòj talang dak natekèd nasuj ma jukh kenèmbek hèhoh Eh nak. Dak nasok tuwale rik nabeg èn wakh Eh nak supaye namkaréh. 6Bil Yèsus nabeleh ma Simon Pètrus, Pètrus nak nachal ma Yèsus, “Yãng, tok payah lah hamsuj ma jukh yék!”
7Yèsus nasaꞌod ma rik nak, “Puꞌdoh hãk tok halèng-lèkh ilok rik Yék itèlꞌèl doh. Tapik ma bilok bok halèkh.”
8Pètrus nachal wèl ma Yèsus, “Hõy, Yãng! Sampéy ma bilok pon yék tok iꞌèr-or Hãk hamsuj ma jukh yék!”
Tapik Yèsus nasaꞌod ma Pètrus, “Kalòw Yék tok isèj-suj ma jukh hãk, hãk kedak hèhoh Yék wèl.”
9Dak Pètrus nasaꞌod, “Kalòw gerèk nak, Yãng, agok lah suj had ma jukh yéh hék, tapik suj lah ma tikh ròb kuy yéh keꞌjèk!”
10Yèsus nasaꞌod, “Sènꞌòy rik hòj mèh-muh pastik kenèmbek esik eh hòj méj; kalòw pas nak nachèb-chib had perlu nasuj ma jukh eh hék. Nyob rik hèh-hoh ma Yék doh hòj méj èn mad Tuhan, tapik mok èn nyob rik tok méj.” 11Yèsus nachal gerèk nak sebab Nanak hòj nalèkh chok rik akal betulong ma mèsmus Eh muròt ma Rik Nak. Unak lah sebab eh Nanak nachal, “Mok èn nyob rik tok méj.”
12 #
Luk 22:27. Nòm kerek Yèsus hòj sòj nasuj ma jukh umnak, Nanak nalòg wèl bajuk jèꞌrok rik nateg atèk dak nalos nagel wèl ma tempad rik nagel tèk. Dak Nanak natanyak ma umnak, “Bok hòj nyob lèkh lah ilok rik Yék pay doh iteꞌèl ma nyob? 13Nyob kòw ma Yék ‘Guruk’ bok ‘Yãng.’ Hek, kemën lah ilok rik nyob kòw nak, sebab Yék mémang Guruk bok Tuwan nyob. 14Dak Yék, rik Tuwan bok Guruk nyob, hòj iteꞌèl kèrjak gerèk kuli bok isuj ma jukh nyob. Jadik nyob keꞌjèk haros lah nyomsuj ma jukh kaban rik nyob. 15Yék hòj iꞌog chòntoh ma nyob, supaye nyob keꞌjèk nyomkèrdakh nyomtulong kaban rik nyob, gerèk ilok rik Yék hòj iteꞌèl untok nyob. 16#Mat 10:24; Luk 6:40; Yoh 15:20. Kemën Yék ichal ma nyob, tok mèk-mok kuli rik lebéh rayak nòm tuwan eh. Dak kalòw mok sènꞌòy rik naꞌor ma sènꞌòy mòy namtèrlòy gah ma sènꞌòy gèhnih, sènꞌòy rik terèylòy gah nak kedak lah lebéh rayak nòm sènꞌòy rik terèn-èn eh. 17Puꞌdoh nyob hòj nyob lèkh hal doh, bok Allah akal nateꞌèl méj ma nyob kalòw nyomhoh ma chòntoh Yék.
18 #
En 41:10. Ilok rik Yék ichal doh kedak tentang nyob kenèmbek. Yék ikenal ma sènꞌòy rik hòj ipili. Tapik ilok rik hòj natulis èn kelòj Kitab nak haros nabelakuk: ‘Sènꞌòy rik gèy-géy samak Yék akal nabemès-mus ma Yék.’ 19Yék iꞌoglèkh hal doh ma nyob puꞌdoh, èn tèk-tik tok nabelakuk, supaye bil hòj nabelakuk jakal nyob akal nyob pechaye Yék lah Yék. 20#Mat 10:40; Mrk 9:37; Luk 9:48; 10:16. Kemën Yék ichal ma nyob doh: chok rik beterime ma sènꞌòy rik Yék itèrꞌèn, bemaksod nanak naterime ma Yék. Dak chok rik beterime ma Yék, bemaksod nanak naterime ma Apak rik terèn-èn ma Yék.”
Yèsus naramal Yudas akal naꞌog Rik Nak ma mèsmus Eh
(Mat 26:20-25; Mrk 14:17-21; Luk 22:21-23)
21Nòm kerek Yèsus nachal gerèk nak, Nanak nagahmak nasuwéh geb hup Eh dak nachal tèꞌlalah, “Yék ichal kemën ma nyob, mok néy sènꞌòy èn nyob doh akal rik èg-og Yék ma mèsmus Yéh.”
22Mèn hèhoh Eh umꞌèd-id dak umna-néh samak mad um. Umnak tok umlèng-lèkh chok isènꞌòy eh rik namaksod nak. 23Hèhoh rik Yèsus nasayèkh nak nagel èn chening Eh. 24Jadik Pètrus nagajwij ma rik nak bok nachal, “Tanyak lah ma Guruk, chok sènꞌòy rik namaksod nak?”
25Hèhoh nak naset tilok dak natanyak ma Yèsus, “Yãng, chok irik eh nak, rik hachal nak?”
26Yèsus nasaꞌod, “Yék akal ichelok ruti ma kelòj hòk bok iꞌog ma rik nak. Nanak lah irik eh.” Dak Yèsus nakod ruti dak nachelok ma kelòj hòk, dak naꞌog ruti nak ma Yudas kuwòt Simon Iskariot. 27Nòm kerek Yudas nakod ruti nak, Iblis namòj ma kelòj hup eh. Dak Yèsus nachal ma Yudas, “Ilok rik hamòg teꞌèl nak, teꞌèl lah lulòw!” 28Tok mèk-mok néy sènꞌòy pon rik gèy-géy èn anak namlèkh ilok maksod Yèsus nachal gerèk nak ma Yudas. 29Sebab Yudas nak rik kèmwòp puchòs duid umnak, maròp-maròp hèhoh Yèsus umbèdlod Yèsus naꞌor ma Yudas nambelik ilok rik umperlu bil ma arik Paskah jakal. Mok keꞌjèk rik umbèdlod Yèsus naꞌor Yudas namꞌog ma sènꞌòy hèl-hal.
30Jadik nòm kerek Yudas hòj nagéy ruti nak, nanak sejèkh nahuwòl. Bil nak is eh hòj layèg.
Yèsus naꞌor ma mèn hèhoh Eh musayèkh ma kaban rik um
31Nòm kerek Yudas hòj nahuwòl, Yèsus nachal, “Puꞌdoh Allah hòj nampèrnéh ma sènꞌòy kuwase ròb renayak Yék, Sènꞌòy Nòm Sorga. Dak nòm tènꞌèl Yék akal sènꞌòy umnéh ma kuwase ròb renayak Allah keꞌjèk. 32Dak sebab Yék akal ipèrnéh kuwase ròb renayak Allah, Allah keꞌjèk akal napèrnéh ma sènꞌòy kuwase ròb renayak Yék, Kuwòt Eh. Dak géj doh kal nabelakuk.” 33#Yoh 7:34. Yèsus nachal wèl, “Kuwòt-kuwòt Yék, had agat hék wèl Yék tik mok samak nyob. Pas nak nyob akal nyob kèk ma Yék. Tapik gerèk ichal ma pemimpin sènꞌòy Yahudi hatòp, nyob tok dapad nyomwèk ma tempad rik Yék iwèk. 34#Yoh 15:12,17; 1 Yoh 3:23; 2 Yoh 1:5. Puꞌdoh Yék iꞌog nèrꞌor rik pay ma nyob: Sayèkh lah ma kaban rik nyob. Gerèk Yék hòj isayèkh ma nyob, dak nyob haros lah besayèkh ma kaban rik nyob. 35Kalòw nyob sayèkh ma kaban rik nyob, kenèmbek sènꞌòy akal umlèkh nyob lah hèhoh Yék.”
Yèsus naramal Pètrus akal nachal tok nakèlnal ma Yèsus
(Mat 26:31-35; Mrk 14:27-31; Luk 22:31-34)
36Simon Pètrus natanyak ma Yèsus, “Yãng, ma lok Hãk hamwèk?”
Yèsus nasaꞌod, “Puꞌdoh nyob tok dapad nyomwèk ma tempad rik Yék iwèk. Tapik ma bilok bok nyob sar ma Yék.”
37Pètrus natanyak wèl, “Yãng, bok nahey puꞌdoh yék tok boléh imhoh ma Hãk? Yék isanggob imkebes untok Hãk!”
38Tapik Yèsus nasaꞌod, “Kemën ke hãk hasanggob hamkebes untok Yék? Kemën Yék ichal ma hãk: èn tèk-tik ayam tok nabekukok, hãk hòj tigak kalik hachal tok hakèlnal ma Yék!”
ទើបបានជ្រើសរើសហើយ៖
Yohanès 13: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
