Yohanès 10
10
Yèsus lah rèngkak untok sènꞌòy mumòj ma Kerajaꞌan Allah
1Yèsus naꞌog chòntoh mòy bok nachal, “Kemën Yék ichal ma nyob: sènꞌòy rik namòj ma kandang mèn kambikh biri haros lah namòj nòm rèngkak. Kalòw mok sènꞌòy naꞌòj bok namòj nòm balikh rèndèd, nanak nak pastik sènꞌòy rik sèjyèj ma lawok nak! 2Tapik kël kambikh biri nak pastik lah namòj nòm rèngkak. 3Bil kël nak nalãj, sènꞌòy rik bejagak ma kandang nak napog rèngkak untok rik nak. Dak bil nakòw ma kenëh tiyab lawok eh nak, dak mèn kambikh biri eh nak umkenal ma kuy kël um nak. Dak bil naꞌéd, umhoh bok umhuwòl ma béng. 4Dak hòj natèrwòl kenèmbek lawok eh nak ma béng, nanak nachib èn sòy, dak mèn lawok nak umhoh sebab umkenal ma kuy eh nak. 5Tapik kalòw sènꞌòy mòy rik tok umkèlnal, mèn kambikh biri nak pastik tok umhèh-hoh. Umnak akal umda-dok nòm sènꞌòy nak sebab tok umkèlnal ma kuy eh nak.”
6Yèsus naꞌoglèkh chòntoh nak, tapik umnak kenèmbek rik umkèngyòkh tok umlèng-lèkh maksod tenènglèkh Eh nak.
7Jadik Yèsus nachal wèl, “Kemën Yék ichal ma nyob doh: Yék lah rèngkak untok mèn kambikh biri nak. 8Jajéh sènꞌòy mòy hòj umlãj nèng-nèng nòm Yék bok umchal mok chare mòy untok mumòj ma kandang nak, tapik umnak kenèmbek had sènꞌòy sèjyèj hék. Tapik mèn kambikh biri nak tok umhèh-hoh ma sènꞌòy mòy nak. 9Hek, Yék lah rèngkak nak. Dak chok rik pechaye ma Yék bok boléh ummòj, dak Tuhan akal natèrgos um. Dak umnak akal umbébas bok umterime kenèmbek ilok rik umperlu, gerèk kambikh biri rik mèj-mòj bok hèlwòl nòm kandang dak umtèrbuk pantil rik berambang untok mugéy. 10Sènꞌòy rik sèjyèj nak nalãj had untok namseyèj, bok namkèrbes, bok namtèrhõy. Tapik Yék ilãj ma duniak doh untok imꞌog ma sènꞌòy nèsgos rik kènmën, nèsgos rik beduyon-duyon nòm Allah.”
Yèsus lah Kël rik méj-méj
11“Yék lah Kël rik méj-méj. Kël rik méj nak naꞌog nèsgos eh untok namtèrgos ma kambikh biri eh. 12Kalòw mok sènꞌòy rik beꞌupah untok namjagak mèn kambikh biri nak, sènꞌòy nak kedak lah kël, bok kambikh biri nak kedak chok rik eh nak. Bil nanéh chuwòk mènghòng nalãj, dak nanak pon akal nada-dok naperak ma mèn kambikh biri nak. Dak chuwòk mènghòng nak akal nabeluh ma kambikh biri nak naꞌuy ma umnak chéy-baruy. 13Sènꞌòy nak nada-dok sebab nanak had nakerèꞌjak untok namdapad upah eh, bok tok nabegorgèr ma mèn kambikh biri nak. 14-15#Mat 11:27; Luk 10:22. Tapik Yék lah Kël rik méj-méj. Yék ikenal ma kambikh biri Yék, samak gerèk Apak Yéh nakenal ma Yék. Dak umnak umkenal ma Yék, samak gerèk Yék ikenal ma Apak Yéh. Dak Yék iꞌog nèsgos Yéh untok imtèrgos ma umnak. 16Dak tèk-tik mok mòy kambikh biri Yék wèl. Umnak kedak nòm kandang doh. Jadik Yék haros iꞌéd umnak ma Yék, dak umnak akal umkenal ma kuy Yék. Dak Yék akal iꞌéd ma umnak kenèmbek mujadik néy kumpolan, bok Kël umnak had néy hék.#10:16 Bil Yèsus nachal mok mòy kambikh biri Eh wèl, maksod eh nak Yèsus akal natèrgos sènꞌòy nòm kenèmbek kaum mòy keꞌjèk. Dak Yèsus akal naꞌéd ma kenèmbek sènꞌòy rik hèh-hoh ma Rik Nak (kaum Yahudi ròb kaum gèhnih) untok mumòj ma kewarge Tuhan bok mujadik néy kaum rik pay — unak kaum penili Allah.
17Udoh lah sebab eh Apak nasayèkh ma Yék: sebab Yék hòj itabéh imꞌog nèsgos Yék, supaye imlos imgos wèl. 18Tok mèk-mok chok-chok pon namkod nèsgos Yék, had iꞌog nòm hup rik Yéh. Yék mok hak Yéh untok imꞌog nèsgos Yék bok untok imlos imgos wèl. Unak lah rik Apak hòj naꞌor ma Yék.”
19Dak bil umkeyòkh ma tenènglèkh Yèsus nak, sènꞌòy Yahudi nak umtekèd umbera-rok wèl kaban rik um. 20Jajéh sènꞌòy èn umnak umchal, “Nanak hòj nasid yel jèdhad bok naꞌahyèny! Tok payah lah èk èmkèngyòkh ma Nanak!”
21Tapik mok sènꞌòy gèhnih umchal, “Kalòw sènꞌòy rik sèd-sid yel jèdhad, ma lok mok namcharak gerèk Rik Nak! Bok ma lok mok yel jèdhad namtèrhakh ma mad sènꞌòy bebèybëy?!”
Mèn pemimpin Yahudi umjèk ma Yèsus
22Nòm kerek nak, bil hòj musim sèꞌjuk, sènꞌòy èn kote Yèrusalèm umberaye arik raye Hanukah.#10:22 Arik Raye Hanukah. Bil jènman manah tòp, sènꞌòy kaum mòy rik bemès-mus umserang bok umkèrlah ma sènꞌòy Israꞌèl, dak umnak umlèrꞌes ma Dékh Tuhan. Tapik mok néy pitak sènꞌòy Israꞌèl rik umbelawan bok umkiron ma mèsmus nak. Dak umtèrlos umtèrméj ma Dékh Tuhan, bok umpèrmòy wèl tempad nak has untok musindol ma Allah. Sènꞌòy Yahudi tik umsambud arik raye nak sampéy puꞌdoh. 23Bil nak Yèsus nachèb-chib èn Baléy Salomo èn kelòj halaman Dékh Tuhan. 24Dak anak mèn pemimpin sènꞌòy Yahudi umlãj bok umherimung ma Yèsus dak umchal, “Hòj lamad kandék kichèn kimlèkh chok Hãk nak! Chal lah tèꞌlalah ma kandék kalòw kemën Hãk nak Mèsias!”
25Yèsus nasaꞌod ma umnak, “Yék hòj iꞌoglèkh ma nyob, tapik nyob tok nyob pechaye. Yék hòj iteꞌèl jajéh tènꞌèl nòm kuwase Apak Yék; unak lah rik perèhnéh chok Yék doh. 26Tapik nyob doh tok nyob pechaye sebab nyob kedak kambikh biri Yék. 27Kambikh biri Yék umkeyòkh ma kuy Yék. Yék ikenal ma umnak, dak umnak umhoh ma Yék. 28Dak Yék iꞌog nèsgos jalꞌéng ma umnak, dak umnak akal tok umkèsbes sampéy bilok-bilok. Tok mèk-mok chok-chok pon namrus umnak nòm Yék. 29Apak Yék hòj naꞌog umnak ma Yék, dak Rik Nak lebéh rayak nòm chok-chok pon. Dak tok mèk-mok chok-chok pon namrus umnak nòm Apak Yék. 30Yék ròb Apak nak néy.”
31Bil nak sènꞌòy Yahudi umros batuk wèl ummòg bedal bok mukèrbes ma Yèsus. 32Tapik Yèsus nachal ma umnak, “Yék hòj ipèrnéh ma nyob jajéh tènꞌèl rik méj-méj nòm kuwase Apak Yék. Ke mok tènꞌèl kuwase rik Yék iteꞌèl nak sèk, sampéy nyob mòg bedal batuk ma Yék?”
33 #
Im 24:16. Sènꞌòy Yahudi nak umsaꞌod, “Bèꞌbòk! Kandék tok kibèldal batuk ma Hãk sebab tènꞌèl méj rik hateꞌèl nak, tapik sebab Hãk habemèhnah ma Allah! Hãk nak sènꞌòy biyase hék, tapik Hãk hachal gerèk rik Hãh nak Allah.”
34 #
En 82:6. Yèsus nasaꞌod ma umnak, “Nyob pastik hòj nyob lèkh ilok rik natulis èn kelòj Kitab nyob, bil Allah nachal ma pemimpin penili Eh, ‘Nyob nak gerèk allah.’#10:34 Nyob nak gerèk allah Yèsus nakod ayad doh nòm Bukuk Enèhmah, 82:6-7. Bil Allah nakòw ma mèn pemimpin nak “allah-allah,” maksod eh nak kedak lah umnak nak umjadik allah. Tapik Allah nachal gerèk nak sebab Rik Nak hòj napili ma umnak untok mupimpin ma kaum penili Eh bok muterèylòy gah nòm Allah ma sènꞌòy gèhnih. Jadik Yèsus nagunak ayad nòm Bukuk Enèhmah nak untok nampèrnéh ma mèn pemimpin Yahudi nak Rik Nak mok hak Eh bok boléh nachal Rik Eh Nak samak ma Allah Apak, bok tok nabemèhnah ma Allah. 35Èk hòj èlèkh Kitab nak kemën sampéy bilok-bilok, dak sènꞌòy rik beterime Gah Allah nak Tuhan Allah hòj nakòw ma umnak gerèk ‘allah-allah.’ 36Jadik agok lah nyob tanas ma Yék ibemèhnah ma Allah bil Yék ichal Yék lah Kuwòt Allah! Nanak lah irik bepili ma Yék bok natèrꞌèn Yék ma duniak doh. 37Kalòw lah Yék tok itèlꞌèl kèrjak Apak Yék, agok lah nyob pechaye ma Yék. 38Tapik kalòw Yék hòj iteꞌèl, yab nyob tok pechaye ma Yék, pechaye lah ma tènꞌèl kuwase rik hòj iteꞌèl nak, supaye nyob kemën-kemën nyomlèkh Apak mok èn Yék, bok Yék mok èn Apak.”
39Umnak umkèrdakh wèl untok muròt ma Yèsus, tapik léj sebab Yèsus pèy-pesũy nòm umnak.
40 #
Yoh 1:28. Pas nak Yèsus nalos ma lantiw Òng Tibok Yordan, ma tempad Yohanès Pembaptis nabaptis ma sènꞌòy nèng-nèng tòp, dak Yèsus nagel èn anak. 41Jajéh sènꞌòy umlãj ma Rik Nak. Dak umnak umchal, “Yohanès nak tok natèlꞌèl tande kuwase, tapik kenèmbek rik Yohanès nachal tentang Yèsus doh mémang kemën.” 42Dak èn anak jajéh sènꞌòy umpechaye ma Yèsus.
ទើបបានជ្រើសរើសហើយ៖
Yohanès 10: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
