Yohanès 9
9
Yèsus natèrhakh ma néy babeh rik bebèybëy nòm amèk eh nayos
1Mase Yèsus nachèb-chib samak mèn hèhoh Eh, Yèsus nanéh mok néy babeh rik bebèybëy nòm amèk eh nayos. 2Hèhoh-hèhoh Yèsus umtanyak ma Rik Nak, “Guruk, chok lah rik bedose sampéy sènꞌòy doh najadik bebèybëy nòm amèk eh nayos? Nòm rik eh ke nabedose, atòw wèh amèk apak eh rik bedose nak?”
3Yèsus nasaꞌod ma umnak, “Hõy. Sènꞌòy doh nabebèybëy bok kedak nòm dose rik eh, bok kedak wèh amèk apak eh wèbedose. Tapik hal nak nabelakuk supaye Allah nampèrnéh kerènjak Eh rik bekuwase èn nèsgos eh nak. 4-5Bil Yék tik mok èn duniak doh gerèk tik ès-is, sebab Yék lah Chènlakh ma duniak doh. Jadik puꞌdoh èk haros èmteꞌèl kèrjak nòm Apak rik terèn-èn ma Yék. Tapik tok lamad wèl akal narengah, dak bil nak tok mèk-mok néy sènꞌòy pon dapad namkèrjak wèl.”#9:4-5 Maksod “tok lamad wèl akal narengah” nak: Yèsus akal nakebes bok tok mèk-mok wèl samak hèhoh Eh. Yèsus nak Chènlakh ma duniak, jadik kalòw Chènlakh nak hòj tok mèk-mok wèl najadik rengah. Mok keꞌjèk sènꞌòy rik umbèdlod maksod “layèg/rengah” nak kènbes èk: jadik èk rik hèh-hoh ma Yèsus haros èmteꞌèl kèrjak Tuhan èn tik ègos, sebab bil èkebes jakal hòj tok boléh èmteꞌèl ilok-ilok wèl. #Mat 5:14; Yoh 8:12.
6Nòm kerek Yèsus nachal nak, Nanak nagetòh ma tèk. Yèsus nalumbéy gèntòh Eh nak samak tèk dak najadik bepayak, dak nasok ma mad sènꞌòy bebèybëy nak. 7Yèsus nachal ma rik nak, “Wèk lah ma Kolam Siloam nak dak lab lah mad hãh nak.” (Èn kuy sènꞌòy Yahudi “Siloam” nak bemaksod “tèrꞌèn.”) Jadik sènꞌòy nak nawèk dak nalab mad eh ma kolam nak, dak bil nanak nalos nanak hòj boléh nanéh.
8Pas nak sènꞌòy ènsekh dékh eh nak ròb sènꞌòy gèhnih rik selaluk umnéh nanak nabetadok duid umcha-chal kaban rik um, “Ke naꞌdoh nak sènꞌòy bebèybëy rik selaluk nagèl-gel bok nabetadok duid?”
9Mok rik besaꞌod, “Hek, mémang kemën rik nak.” Tapik sènꞌòy gèhnih wèl umchal, “Hõy, nanak had gerèk hiréng sènꞌòy rik bebèybëy nak.”
Tapik sènꞌòy bebèybëy nak tik nachèl-chal, “Hek, mémang kemën yék lah irik eh nak!”
10Dak umnak umtanyak ma rik nak, “Gerèk lok hãk bok boléh hanéh?”
11Dak nanak nachal, “Rik bekenëh Yèsus nak naꞌuy payak bok nasok ma mad yék. Nanak naꞌor ma yék imwèk bok imlab ma Kolam Siloam nak. Yék pon iwèk dak ilab, bok pas nak sejèkh yék hòj boléh inéh.”
12Dak umnak umtanyak, “Ma lok eh Sènꞌòy nak?”
Dak nanak nasaꞌod, “Éw èh, yék tok ilèng-lèkh.”
Sènꞌòy Parisi umtanyak tentang chok rik terènghakh ma sènꞌòy bebèybëy
13Nòm kerek nak, umnak umꞌèn sènꞌòy rik bebèybëy naꞌtèk ma mèn guruk agama nòm pitak Parisi. 14Bil Yèsus naꞌuy payak bok natèrhakh ma mad sènꞌòy bebèybëy nak, arik nak Is Tenarak. 15Jadik sènꞌòy Parisi nak umtanyak ma rik nak, “Gerèk lok hãk bok boléh hanéh?” Nanak nachal, “Yèsus nasok ma mad yék payak. Dak yék ilab, dak puꞌdoh bok boléh inéh.”
16Pas nak sènꞌòy Parisi umtekèd umbera-rok kaban rik um tentang Yèsus. Mok rik chèl-chal, “Sènꞌòy nak tok nahèh-hoh ma Hukom Tuhan tentang Is Tenarak, jadik Rik Nak tok nalèj-lãj nòm Allah.”
Tapik mok sènꞌòy gèhnih umchal, “Tapik tok mèk-mok lah sènꞌòy rik bedose boléh namteꞌèl tande kuwase gerèk doh!”
17Dak sènꞌòy Parisi nak umtanyak wèl ma sènꞌòy rik bebèybëy naꞌtèk, “Hãk doh hachal Nanak hòj natèrhakh ma mad hãk. Dak rèk lok ma benèdlod hãk tentang Rik Nak?”
Sènꞌòy nak nasaꞌod, “Nanak nak néy sènꞌòy Nabi.”
18Tapik pemimpin sènꞌòy Yahudi nak umnak tik tok umpechaye kalòw nanak nak nabebèybëy hatòp bok puꞌdoh boléh nanéh. Sebab nak umnak umkòw ma amèk ròb apak eh. 19Dak umnak umtanyak, “Kemën ke naꞌdoh nak kuwòt kaꞌan? Bok nanak nòm tik nèsyos eh nabebèybëy? Dak gerèk lok puꞌdoh nanak hòj boléh nanéh?”
20Dak amèk ròb apak eh wèsaꞌod, “Hek, nanak nak kuwòt yar. Mémang kemën nanak nak nòm tik nèsyos eh nabebèybëy. 21Tapik yar tok yalèng-lèkh gerèk lok puꞌdoh nanak hòj boléh nanéh, dak yar keꞌjèk tok yalèng-lèkh chok rik terènghakh ma mad eh nak. Tanyak lah ma rik nak. Nanak hòj rayak, bok boléh nachal rik eh.” 22Amèk ròb apak eh wèchal gerèk nak sebab wètukh ma pemimpin sènꞌòy Yahudi nak. Sebab pemimpin Yahudi nak hòj umhuwok ma sènꞌòy jajéh agok muchal Yèsus nak Mèsias, bok sènꞌòy nak akal tok umꞌèr-or mumòj ma dékh senindol wèl. 23Unak lah sebab eh amèk ròb apak eh wèchal, “Nanak hòj rayak, tanyak lah ma rik nak.”
24Dak umnak umkòw wèl ma sènꞌòy rik bebèybëy naꞌtèk dak umchal ma nanak, “Pantakh lah èn mad Allah! Bok chal kemën ma kandék! Kandék kilèkh Yèsus nak Sènꞌòy bedose.”
25Sènꞌòy nak nasaꞌod, “Yék tok ilèng-lèkh Nanak nak bedose atòw hõy. Tapik néy hal rik yék ilèkh: nèng-nèng tòp yék ibebèybëy, dak puꞌdoh yék hòj boléh inéh!”
26Dak umnak umtanyak wèl ma rik nak, “Ilok Nanak hòj nateꞌèl ma hãk? Dak gerèk lok natèrhakh ma mad hãk hòj boléh hanéh?”
27Rik nak nasaꞌod, “Yék hòj iꞌoglèkh ma nyob atèk, tapik nyob jèk tok nyomkèngyokh! Bok nahey nyob chèn nyomkeyòkh wèl? Ke nyob keꞌjèk nyob chèn nyomjadik hèhoh Rik Nak?”
28Dak umnak umpègyog ma rik nak dak umchal, “Hãk lah hèhoh Sènꞌòy nak, kandék doh hõy! Kandék doh hèhoh Musa. 29Kandék kilèkh Allah hòj nachal ma Musa manah tòp. Tapik kandék tok kilèng-lèkh nòm lok Sènꞌòy nak nalãj.”
30Sènꞌòy nak nasaꞌod ma umnak, “Ibèlꞌih che yék kalòw nyob tok nyob lèng-lèkh nòm lok Sènꞌòy nak nalãj! Rik Nak hòj natèrhakh ma mad yék hòj boléh inéh. 31Èk hòj èlèkh Allah tok nakèngyòkh ma sènꞌòy rik bedose. Tapik Allah had nakeyòkh ma sènꞌòy rik umbehormad ma Rik Nak bok umteꞌèl nènchèn Eh. 32Nòm mulak Allah napèrhéj duniak sampéy ma puꞌdoh, èk tok pernah èkèngyòkh kalòw mok sènꞌòy rik dapad namtèrhakh ma mad sènꞌòy rik bebèybëy nòm tik amèk eh nayos! 33Jadik, Sènꞌòy nak pastik nalãj nòm Allah. Kalòw hõy, Nanak tok boléh namteꞌèl ilok-ilok!”
34Umnak umsaꞌod ma rik nak, “Hãk nak hòj habedose nòm amèk hãh nayos ma hãk! Bok halamid che hãk hamtènglèkh ma kandék!” Dak umnak umkiron ma rik nak nòm dékh senindol nak.
Sènꞌòy rik tok umpechaye ma Yèsus gerèk sènꞌòy rik bebèybëy
35Yèsus nakeyòkh gah mèn pemimpin Yahudi nak hòj umkiron ma sènꞌòy rik bebèybëy naꞌtèk nòm dékh senindol. Yèsus nakèk ma rik nak, dak bil hòj natèrbuk eh Yèsus natanyak, “Hapechaye che hãk ma Sènꞌòy nòm Sorga?”
36Sènꞌòy nak nasaꞌod, “Yãng, chok lah iRik Eh Nak? Chal lah ma yék, supaye yék impechaye ma Rik Nak!”
37Yèsus nachal, “Hãk hòj hanéh ma Rik Nak. Rik becharak ma hãk puꞌdoh nak, udoh lah iRik Eh.”
38Sènꞌòy nak nasaꞌod, “Hek Tuhan, yék ipechaye!” Dak natud èn sòy Yèsus.
39Pas nak Yèsus nachal, “Yék ilãj ma duniak doh impèrmòy ma sènꞌòy: sènꞌòy rik bebèybëy bok tik tok umlèng-lèkh ilok rik kènmën, akal boléh umnéh bok umlèkh. Tapik sènꞌòy rik umbèdlod rik umnak hòj boléh umnéh bok umlèkh, umnak lah irik bebèybëy akal.”
40Dak èn anak mok maròp-maròp sènꞌòy Parisi umkeyòkh ma nèlchal Yèsus nak. Dak umnak umtanyak ma Rik Nak, “Ilok hachal nak?! Kandék doh gerèk sènꞌòy bebèybëy lah?”
41Yèsus nasaꞌod ma umnak, “Kalòw lah nyob kemën-kemën bebèybëy bok tok nyob lèng-lèkh ilok rik kènmën, nyob nak tok bedose èn mad Allah. Tapik sebab nyob hòj nyob chal boléh nyob néh bok nyob lèkh, maksod eh nyob nak bedose èn mad Allah.”
ទើបបានជ្រើសរើសហើយ៖
Yohanès 9: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.
