Jenadik 45
45
Yusop naꞌoglèkh ma mèrpek eh chok rik nak
1Bil nak Yusop tok boléh namꞌed ma rik eh; hòj namòg yam èn mad kenèmbek kuli eh. Jadik Yusop naꞌèh-éh ma mèn kuli eh, “Perak lah nyob kenèmbek nòm bilik doh!” Dak bil èn umnak dèꞌrik, Yusop naꞌoglèkh ma mèrpek eh nak chok rik nak. #Tèn 7:13. 2Dak Yusop nayam nabeꞌarew, sampéy sènꞌòy Mesir rik hòj umperak nòm bilik naꞌtèk umkeyòkh, bok umtèrlòy gah nak ma sènꞌòy èn istane rajak keꞌjèk. 3Yusop nachal ma mèrpek eh, “Yék doh Yusop! Mok ke apak yéh tik nagos?” Tapik mèrpek Yusop tok umbesaꞌod sebab umnak umtukh geb ma rik nak. 4Dak Yusop nachal ma mèrpek eh, “Chib lah ma doh.” Bil hòj umlãj tilok, nanak nachal ma umnak, “Yék doh Yusop, pek nyob rik nyob juwal nèng-nèng tòp supaye yék imjadik kuli èn Mesir! 5Tapik puꞌdoh agok lah suwéh! Bok agok lah õl rik ma rik nyob sebab nyob hòj nyob juwal ma yék. Che kènmën eh, Allah irik terèn-èn yék ma doh nèng-nèng nòm nyob, untok imtèrgos ma jajéh sènꞌòy. 6Hòj nar tawon mok chènrok rik terok èn kenèmbek tèk. Dak tik limak tawon wèl tok umchèꞌkũk bok tok umtèg-tòg. 7Tapik èn tèk-tik nyob tok nyob lèj-lãj ma Mesir, Allah hòj natèrꞌèn yék ma doh supaye namtèrgos ma nyob nòm tènꞌèl kuwase Eh, bok supaye mèn waris nyob dapad sejèkh mugos èn bumi doh. 8Jadik kedak nyob lah irik terèn-èn yék ma doh, tapik Allah. Dak Allah najadik ma yék menterik rajak, dak naꞌog ma yék kuwase imꞌuros èn istane rajak bok ibeperintah ma kenèmbek tèk Mesir.
9Puꞌdoh wèk lah mak hès ma apak yéh dak oglèkh ma rik nak kuwòt babeh eh, Yusop, nachal gerèk doh: Allah hòj naꞌuy ma yék ibekuwase ma kenèmbek tèk Mesir. Lãj lah lulòw bok gel samak yék èn anuh, agok deh.#Tèn 7:14. 10Éd lah kenèmbek kuwòt hãh, chachok hãh, mèn kambikh biri hãh, mèn kambikh hãh, mèn lembu hãh, ròb kenèmbek barang milik hãh. Dak nyob akal nyob gel èn belah Gosèn, tilok ma yék. 11Dak èn anak yék boléh ijagak bok iꞌog mènhik ma nyob. Chènrok doh tik nasèrjèkh limak tawon wèl. Bok kalòw nyob tok nyob jèg-jog ma doh, hãk samak kenèmbek kewarge ròb kuli hãh bok ròb chok bènleh hãh akal nyob cherok geb tok beꞌilok-ilok.”
12Yusop nachal wèl ma mèrpek eh, “Puꞌdoh nyob hòj nyob néh mad rik nyob, bok pek yéh Bènyamin pon nanéh: mémang kemën lah yék doh Yusop! Bok yék ibecharak ma nyob nòm kuy rik èh. 13Jadik wèk lah oglèkh ma apak èk gerèk lok sènꞌòy èn Mesir doh umhormad ma yék. Dak oglèkh lah ma rik nak kenèmbek ilok rik hòj nyob néh èn anuh. Dak éd lah hès rik nak ma doh.”
14Dak Yusop nachab ma pek eh, Bènyamin, dak nayam wèl. Dak Bènyamin keꞌjèk nachab ma Yusop dak wèya-yam. 15Tik nayèm-yam, Yusop nachab bok nachey ma kenèmbek mèrpek eh nak. Dak nòm kerek nak mèrpek Yusop umtekèd umbecharak ma rik nak.
Rajak Mesir nasèryéh kewarge Yakob mugel èn Mesir
16Bil sènꞌòy èn istane rajak umkeyòkh gah mèrpek Yusop nak hòj umlãj ma Mesir, rajak ròb kenèmbek pegaway eh umꞌadés geb. 17Rajak nachal ma Yusop, “Or lah ma mèrpek hãh nak mumèrwãd menéh èn kuda kelday um bok mumak ma tèk Kanaꞌan. 18Bok or lah muꞌéd apak nyob ròb kewarge nyob ma yék èn anuh. Yék akal iꞌog ma umnak mugel èn tèk rik paléng méj èn Mesir. Dak umnak akal umdapad nèygéy rik paléng méj nòm tèk kandéh doh. 19Dak or lah ma umnak muꞌèn maròp-maròp kerite lembu nòm tèk Mesir doh ma tèk Kanaꞌan, supaye muꞌéd mèn kuwòt um rik èꞌjok ròb léh um. Dak éd lah ma apak nyob bok los lah ma doh. 20Bok umnak tok payah muꞌèd-id lah kalòw haros umperak barang umnak èn tèk Kanaꞌan, sebab yék akal iꞌog ma umnak barang rik paléng méj nòm tèk Mesir doh.”
21Jadik kuwòt bèhbeh Israꞌèl umteꞌèl ilok rik rajak naꞌor nak. Yusop naꞌog kerite lembu ma umnak, gerèk rajak naꞌor, dak naꞌog keꞌjèk nèygéy untok nèbchib umnak. 22Yusop naꞌog néy sèt nèglòg rik pay ma tiyab kelok babeh eh. Tapik ma pek eh Bènyamin Yusop naꞌog limak sèt nèglòg rik pay, bok naꞌog keꞌjèk tigak ratos duid pèrak. 23Dak Yusop natèrꞌèn ma apak eh sepuloh kuda kelday beh rik ummèrwãd barang rik paléng méj nòm tèk Mesir nak. Bok natèrꞌèn keꞌjèk sepuloh kuda kelday bok, rik ummèrwãd menéh, ruti, ròb nèygéy mòy untok apak eh namgéy èn nèbchib eh ma Mesir. 24Dak Yusop naꞌor ma mèrpek eh mumak ma tèk Kanaꞌan bok nachal, “Agok lah bera-rok èn nèbchib nyob nak!”
Mèrpek Yusop umꞌoglèkh ma apak um Yusop tik nagos
25Jadik mèrpek Yusop umperak nòm Mesir dak ummak ma apak um, Yakob, èn tèk Kanaꞌan. 26Dak umnak umchal ma Yakob, “Yusop tik nagos! Bok rik nak hòj nabeperintah ma kenèmbek tèk Mesir!” Yakob nakèdjed semoryokh. Rik nak tok napechaye ma nèlchal umnak.
27Tapik umnak umꞌoglèkh ma Yakob kenèmbek hal rik Yusop hòj nachal ma umnak. Dak Yakob nanéh ma mèn kerite lembu rik Yusop hòj natèrꞌèn untok namꞌéd eh ma Mesir. Dak anak Yakob nagahmak besemangad wèl. 28Dak Yakob nachal, “Puꞌdoh yék ipechaye kuwòt yéh Yusop tik nagos! Yék haros imwèk imnéh ma rik nak èn tèk-tik tok ikèsbes.”
ទើបបានជ្រើសរើសហើយ៖
Jenadik 45: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.