Jenadik 44
44
Umtèrbuk kuléh Yusop èn kelòj apek Bènyamin
1Bil mèrpek eh hòj umbesayab muma-mak, Yusop naꞌor ma ketuwe kuli rik beꞌuros èn dékh eh, “Chuwoh lah menéh ma kenèmbek apek sènꞌòy nak sampéy terabikh. Dak chor lah duid pèrak ma umnak pinéy-pinéy èn apek um keꞌjèk, èn balikh menéh nak. 2Dak bil hòj hachor duid pèrak rik pek las alëj nak nabayar, kod lah kuléh rik yéh, kuléh pèrak inak, dak chor lah ma kelòj apek eh nak keꞌjèk.” Jadik kuli eh nak nateꞌèl ilok rik Yusop naꞌor nak. 3Is jakal eh nak, bil mad is natekèd nabejuray, mèrpek nak umwèk samak mèn kuda kelday umnak. 4Tapik bil mèrpek eh tik pay umhèlwòl nòm kote nak, Yusop nachal ma ketuwe kuli eh nak, “Dabal lah ulòw ma umnak, bok bil hãk habeleh chal lah ma umnak: ‘Tuwan yéh nateꞌèl méj ma nyob. Bok nahey inyob nyob tèrlos nyob teꞌèl laꞌes ma rik nak 5bok nyob seyèj kuléh eh?! Tuwan yéh naꞌòng nòm kuléh eh nak, bok nagunak keꞌjèk untok halak supaye boléh namlèkh ilok rik akal nabelakuk ma sòy bilok. Nyob doh hòj nyob teꞌèl jènhad rik rayak geb!’”
6Jadik kuli eh nak pon nadabal ma mèrpek Yusop nak. Dak bil nabeleh ma umnak, rik nak nachal ma umnak gerèk rik Yusop hòj naꞌor naꞌtèk. 7Tapik umnak umsaꞌod ma kuli nak, “Yãng, nahey hãk hatanas ma kandék gerèk nak? Kandék tok kisèjyèj kuléh nak! Kandék doh kuli hãh, pastik tok kitèlꞌèl hal laꞌes gerèk nak! 8Bok hãk halèkh lah kandék hòj kitèrmak ma hãk duid pèrak rik kitèrbuk èn kelòj apek kandéh hatòp nak bil kilos nòm tèk Kanaꞌan. Jadik pastik lah kandék tok kisèjyèj pèrak atòw mas nòm dékh tuwan hãh nak! 9Kalòw lah hatèrbuk chok-chok èn kandék doh rik mok kuléh nak, hãk boléh hakèrbes ma sènꞌòy nak, dak kandék kenèmbek akal kijadik kuli hãh.”
10Dak kuli Yusop nak nachal, “Nak lah, yék akal ikèk. Dak chok rik mok kuléh nak akal najadik kuli yéh. Mèrpek rik gèhnih tok umbesalah bok boléh ummak.” 11Dak hès umnak kenèmbek umyak apek um ma tèk dak umpog. 12Kuli Yusop natekèd napès-pos ma apek umnak, natekèd nòm kelok rik mulak long sampéy lah ma pek las alëj um, dak natèrbuk kuléh nak èn apek Bènyamin. 13Dak mèn kelok eh umsuwéh geb sampéy umchèg ma nèglòg um. Dak ummèrwãd wèl apek um èn mèn kuda kelday dak umlos ma kote.
14Bil Yèhudah ròb mèrpek eh nak umbeleh, Yusop tik mok èn dékh eh. Dak mèrpek eh nak umtud èn sòy rik nak. 15Dak Yusop nachal ma umnak, “Ilok rik nyob teꞌèl nak? Tok nyob lèng-lèkh ke sènꞌòy bekuwase gerèk yék doh mok halak bok boléh inéh ilok rik nyob teꞌèl julak-julak nak?”
16Yèhudah nasaꞌod, “Ilok kandék kimchal ma hãk, yãng? Bok rèk lok kimsaꞌod? Kandék tok mèk-mok bukti pon bok kandék tok kibesalah. Allah hòj napèrnéh ma hãk kandék kuli hãh doh kibesalah. Yãng, puꞌdoh kandék kenèmbek kijadik kuli hãh samak lenitòw rik mok kuléh hãh naꞌtèk.”
17Tapik Yusop nachal, “Hõy, yék pastik tok itèlꞌèl gerèk nak! Had sènꞌòy rik sèjyèj kuléh yéh naꞌtèk bok najadik kuli yéh. Nyob rik gèhnih boléh nyob mak méj-méj ma apak nyob.”
Yèhudah nasèdꞌëd ma Yusop
18Dak Yèhudah nawèk tilok ma Yusop dak nachal, “Yãng, kuwase hãh nak samak gerèk kuwase rik rajak, bok yék doh had kuli hãh hék. Tapik agok lah õl ma yék, tulong lah og che yék chan untok imcharak ma hãk. 19Yãng, hatòp nak hãk hatanyak ma kandék, kuli hãh doh, kalòw mok apak atòw pek kandéh rik mòy. 20Dak bil nak kandék kisaꞌod, ‘Kandék mok apak kandéh, rik nak hòj tatak. Dak apak kandéh nak tik mok néy kuwòt babeh eh rik lenitòw. Amèk eh nayos ma pek kandéh nak bil apak kandéh hòj tatak. Amèk eh nak had nayos nar kuwòt bèhbeh eh, dak kuwòt eh rik mulak long nak hòj nakebes. Jadik puꞌdoh had kuwòt rik las alëj nak hék rik tik nagos, dak apak nasayèkh geb ma rik nak.’ 21Dak anak hãk haꞌor ma kandék kimꞌéd pek babeh kinak ma hãk hamnéh mad rik hãh. 22Dak kandék kisaꞌod, ‘Lenitòw nak tok boléh namperak ma apak eh. Kalòw lah naperak, apak eh akal nakebes.’ 23Tapik hãk haꞌor ma kandék pek kandéh rik las alëj nak haros lah nalãj samak kandék. Kalòw hõy tok nalèj-lãj, kandék tok boléh kimtèrbuk ma hãk wèl.
24Dak bil kandék kimak ma apak kandéh, kandék kiꞌoglèkh ma rik nak ilok rik hachal nak. 25Hòj nòm kerek nak, apak kandék naꞌor kimlos ma doh bok kimbelik nèygéy wèl. 26Tapik kandék kisaꞌod, ‘Kandék tok boléh kimwèk. Had kalòw pek kandéh rik las alëj nak nahoh samak kandék bok boléh kiwèk ma Mesir. Kalòw rik nak tok nahèh-hoh, kandék tok boléh kimtèrbuk ma menterik rayak nak.’ 27Dak apak kandéh nachal léh eh, Rahèl, had nayos nar kuwòt bèhbeh untok rik nak. 28Rik mulak nak hòj nawèk dak tok namèk-mak wèl. Apak kandék nasèꞌbok pastik ab rik kèjlaj hòj nakapìj jès-jas ma kuwòt eh nak. Dak sampéy is doh rik nak tok naterèꞌbuk ma kuwòt eh nak wèl. 29Dak apak kandék nachal rik nak hòj tatak, bok kalòw kandék kikod kuwòt las alëj eh nak nòm rik nak keꞌjèk dak ilok-ilok nabelakuk ma kuwòt eh nak, akal kiꞌuy ma rik nak nangèm-ngòm sampéy nakebes.”
30-31Dak Yèhudah nachal wèl ma Yusop, “Yãng, apak kandéh akal tok nagès-gos kalòw kuwòt senayèkh eh nak hõy. Jadik kalòw yék immak ma apak yéh bok tok iterèꞌmak lenitòw nak, pastik apak yéh akal nakebes. Apak kandéh hòj tatak, bok akal kiꞌuy ma rik nak nangèm-ngòm sampéy nakebes. 32Tabeh wèl, yék hòj ipèrhod ma apak yéh: yék irik bejagak ma pek inak, dak kalòw yék tok iterèꞌmak, apak kandék boléh natanas ma yék doh besalah sampéy yék ikebes. 33Jadik, yãng, tulong or lah yéh imgel èn anuh bok imjadik kuli hãh, igantik nòm pek inak. Dak perak lah rik nak nammak ma apak kandéh samak kelok bèhbeh eh. 34Bok gerèk lok yék dapad immak ma apak yéh kalòw pek yéh tok nahèh-hoh samak yék? Hõy, tok isanggob lah imnéh apak yéh nahõg geb gerèk nak!”
ទើបបានជ្រើសរើសហើយ៖
Jenadik 44: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.