Jenadik 46
46
Allah nabecharak ma Yakob
1Jadik Israꞌèl ròb kewarge eh umbesayab kenèmbek barang milik um dak umtekèd umcha-chib ma Mesir. Bil umlòy ma kote Beꞌèr-Séba, Yakob naged maròp-maròp lawok bok najamuk ma Allah — unak lah Allah chachod rik apak eh Isak nasindol nèng-nèng tòp. 2Bil layèg nak Allah napèrnéh perènnéh ma Israꞌèl. Allah nachal ma rik nak, “Yakob, Yakob!”
Dak Yakob nasaꞌod, “Ilok, Tuhan? Yék mok èn anuh.”
3Dak Allah nachal, “Yék lah Allah, Allah apak hãh. Agok lah tukh hamwèk ma Mesir. Yék akal iꞌuy ma mèn waris hãh mujadik kaum rik rayak èn anak. 4Yék irik akal mok samak hãk èn nèbchib nyob ma Mesir. Dak Yék pastik akal iꞌéd ma mèn waris hãh mulos nòm Mesir ma tèk Kanaꞌan. Dak bil hãk hakebes, Yusop akal mok samak hãk, bok nasèrwah ma mad hãh.”
Kewarge Israꞌèl umjog ma Mesir
5Yèhyah jakal eh nak, Yakob ròb kewarge eh umperak nòm Beꞌèr-Séba. Dak kuwòt bèhbeh Israꞌèl umtèrꞌòj ma apak umnak, mèn kuwòt um, ròb mèn léh um ma kerite lembu rik rajak Mesir hòj natèrꞌèn nak. 6-7Umnak umꞌèn keꞌjèk chok bènleh um ròb kenèmbek barang rik umnak hòj umdapad èn tèk Kanaꞌan. Dak Yakob naꞌéd kenèmbek waris eh nak umwèk ma Mesir: kenèmbek kuwòt ròb chachok eh, bèhbeh ròb bèꞌbok. #Tèn 7:15.
Waris Israꞌèl
8-15Doh lah kenëh mèn waris Israꞌèl rik umhèh-hoh samak rik nak ma tèk Mesir:
Kuwòt ròb chachok Yakob nòm Léya
Udoh lah kenëh mèn kuwòt Yakob rik Léya nayos èn Padan-Aram, ròb kenëh mèn kuwòt umnak:
Rubèn nak kuwòt babeh Yakob rik mulak long. Udoh lah kenëh kuwòt bèhbeh Rubèn:
Hanok, Palu, Hèsròn, ròb Karmi.
Udoh lah kenëh kuwòt bèhbeh Simion:
Yèmuèl, Yamin, Ohad, Yakin, Sohar, ròb Saul (Amèk Saul nak sènꞌòy Kanaꞌan.)
Udoh lah kenëh kuwòt bèhbeh Lèwi:
Gèrsòn, Kohat, ròb Merari.
Udoh lah kenëh kuwòt bèhbeh Yèhudah:
Èr, Onan, Sélah, Pèrès, ròb Sèrah.
(Tapik Èr ròb Onan hòj wèkebes èn tèk Kanaꞌan).
Pèrès mok kuwòt bèhbeh eh rik bekenëh Hèsròn ròb Hamul.
Udoh lah kenëh kuwòt bèhbeh Isakar:
Tola, Puah, Yasub, ròb Simròn.
Udoh lah kenëh kuwòt bèhbeh Sèbulòn:
Serèd, Èlòn, ròb Yahleꞌèl.
Léya nayos keꞌjèk kuwòt babok eh rik bekenëh Dinah. Jadik Yakob ròb Léya mok 33 kuwòt ròb chachok wèh.
Kuwòt ròb chachok Yakob nòm Silpah
16-18Yakob naselòg keꞌjèk ma kuli babok Léya rik bekenëh Silpah (belok Yakob, Laban, naꞌog kuli babok nak ma kuwòt eh Léya). Udoh lah kenëh mèn kuwòt rik Silpah nayos untok Yakob, ròb kenëh mèn kuwòt umnak.
Udoh lah kenëh kuwòt bèhbeh Gad:
Sipyòn, Hagi, Suni, Èsbòn, Èri, Arodi, ròb Aréli.
Udoh lah kenëh kuwòt bèhbeh Aser:
Yìmnah, Yìswah, Yìswi, ròb Bèriya.
Aser mok kuwòt babok eh keꞌjèk rik bekenëh Sèrah.
Dak udoh lah kenëh kuwòt bèhbeh Bèriya, kuwòt Aser nak:
Hébèr ròb Malkièl.
Jadik Yakob ròb Silpah mok 16 waris wèh.
Kuwòt ròb chachok Yakob nòm Rahèl
19-22Udoh lah kenëh kuwòt Rahèl rik nayos untok Yakob, ròb kenëh kuwòt umnak:
Udoh lah kenëh kuwòt bèhbeh Yusop:
Manaseh ròb Èprayim.
Asnat léh Yusop nayos ma kuwòt wèh nak èn tèk Mesir.
Asnat nak kuwòt Pòtipèra, imam èn kote Òn.
Udoh lah kenëh kuwòt bèhbeh Bènyamin:
Béla, Béker, Asbèl, Gèra, Naman, Èhi, Ros, Mupim, Hupim, ròb Ared.
Jadik Yakob ròb Rahèl mok 14 waris wèh.
Kuwòt ròb chachok Yakob nòm Bilhah
23-25Yakob naselòg keꞌjèk ma kuli babok Rahèl rik bekenëh Bilhah (belok Yakob, Laban, naꞌog kuli babok nak ma kuwòt eh Rahèl). Udoh lah kenëh kuwòt bèhbeh rik Bilhah nayos untok Yakob, ròb kenëh kuwòt umnak:
Udoh lah kenëh kuwòt babeh Dan:
Husim.
Udoh lah kenëh kuwòt bèhbeh Naptali:
Yahsèl, Guni, Yèser, ròb Silèm.
Jadik Yakob ròb Bilhah mok tujoh waris wèh.
26Jadik kuwòt ròb chachok Yakob rik umjog samak rik nak ma Mesir nak lènbéh um 66 sènꞌòy. Dak kenèmbek mènsaw bèꞌbok Yakob umhoh samak umnak keꞌjèk. 27#Tèn 7:14. Jadik bil umkirak umtabeh nar kuwòt bèhbeh Yusop rik léh eh nayos èn Mesir, lènbéh waris Yakob èn tèk Mesir nak nalòy lah 70 sènꞌòy.#46:27 70 sènꞌòy: Lènbéh waris Yakob rik jèg-jog ma Mesir nak 66 sènꞌòy bèhbeh (tok umbetulis kenëh mèn bèꞌbok). Dak pas nak umkirak umtabeh ma nar kuwòt Yusop èn tèk Mesir, bok mungkin umkirak umtabeh keꞌjèk rik Yakob ròb Yusop.
Kewarge Israꞌèl umlòy ma tèk Mesir
28Bil hòj tilok mulèy-lòy ma Mesir, Yakob naꞌor ma Yèhudah namwèk nèng-nèng bok namtanyak ma Yusop nòng untok muwèk ma belah Gosèn. Bil umnak hòj umlòy ma belah Gosèn nak, 29Yusop naꞌòj ma kerite kuda eh dak nawèk namtèrbuk ma apak eh, Israꞌèl. Bil Yusop natèrbuk ma apak eh, nanak nachab ma rik nak dak nayam lamad geb. 30Dak Israꞌèl nachal ma Yusop, “Yék hòj inéh mad hãh bok ilèkh hãk tik hagos. Jadik puꞌdoh yék boléh ikebes nòm hup tèngnang.”
31Dak Yusop nachal ma mèrpek eh ròb kenèmbek kewarge apak eh, “Yék akal iwèk imcharak ma rajak, dak ichal, ‘Mèrpek yéh ròb kewarge apak yéh, rik gèl-gel èn tèk Kanaꞌan nak, hòj umlãj ma yék. 32Umnak sènꞌòy rik bejagak ma chok bènleh, dak hòj umꞌèn mèn kambikh biri, mèn kambikh, bok mèn lembu um, ròb kenèmbek barang milik um.’ 33Bil rajak nakòw ma nyob nyomtèrbuk ma rik nak, dak akal natanyak ilok kèrjak nyob nak. 34Chal lah ma rajak nyob nak nyob jagak ma chok bènleh nòm tik èꞌjok nyob, samak gerèk yak dòt bej èh. Sènꞌòy Mesir nak umbechòd ma sènꞌòy rik bejagak kambikh biri. Jadik gerèk nak lah rajak akal naꞌor nyob nyomgel èn belah Gosèn, jerok nòm tempad sènꞌòy Mesir umgel.”
ទើបបានជ្រើសរើសហើយ៖
Jenadik 46: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.