Jenadik 26
26
TUHAN napèrhod wèl ma Isak gerèk hòj napèrhod ma Abraham
1Bil mase Isak nak, nabelakuk lah chènrok èn tèk nak, gerèk hòj mok nabelakuk èn jènman apak eh Abraham nèng-nèng tòp. Sebab nak Isak nawèk ma kote Gerar, tempad Abimelèkh rajak sènꞌòy Pilistin. 2Dak TUHAN napèrnéh rik Eh ma Isak dak nachal, “Agok lah wèk ma tèk Mesir! Yék akal itilèk ma hãk èn lok hãk haros hamgel. 3#Jen 22:16-18. Gel lah èn anuh, dak Yék akal mok samak hãk bok iteꞌèl méj ma hãk. Dak Yék akal iteꞌèl ilok rik ipèrhod ma Abraham, apak hãh, bok iꞌog kenèmbek tèk doh ma hãk ròb waris hãh. 4Yék akal iꞌog ma hãk waris rik jajéh geb gerèk pèrlòy èn langid, dak Yék akal iꞌog menanuk tèk doh ma umnak. Dak nòm waris hãh nak Yék akal iteꞌèl méj ma kenèmbek kaum èn bumi. 5Yék akal iteꞌèl méj ma hãk sebab apak hãh Abraham nataꞌãd ma Yék. Rik nak selaluk nahoh ma nènchèn Yéh, ma nèrꞌor Yéh, ma tenènglèkh Yéh, bok ma hukom Yéh.”
Isak nasèꞌlok ma sènꞌòy èn Gerar
6Jadik Isak pon nagel èn kote Gerar nak. 7Dak Ribkah, léh Isak nak, babok rik lawah geb. Sebab nak bèhbeh èn kote nak umtanyak ma Isak chok rik nak. Tapik Isak natukh namꞌakuk Ribkah nak léh eh. Rik nak nasabok bèhbeh èn kote nak akal umkèrbes ma rik nak bok mukod léh eh nak. Sebab nak Isak nasaꞌod, “Rik nak pek yéh.” #Jen 12:13; 20:2. 8Nòm kerek nak, bil Isak hòj lamad nagel èn anak, mok néy arik Abimelèkh, rajak sènꞌòy Pilistin nak, nanéh nòm tingkap eh, dak natèrbuk ma Isak ròb Ribkah wèbelamãj. 9Dak Abimelèkh nakòw ma Isak dak nachal, “Puꞌdoh yék ilèkh rik nak léh hãk! Nahey bok hachal rik nak pek hãh?”
Isak nasaꞌod, “Yék isabok kalòw ichal rik nak léh yék, pastik mok bèhbeh rik kerèsbes ma yék bok mukod rik nak.”
10Tapik Rajak Abimelèkh nachal, “Ilok bok hateꞌèl hal rik laꞌes doh bok hasèꞌlok ma kandék? Che rèk doh senang hék néy sènꞌòy nòm kandék namkod bok namselòg ma léh hãh nak. Dak kalòw lah hal nak nabelakuk, hãk haꞌuy ma kandék kenèmbek kibesalah untok dose rik rayak!” 11Kerek nak Rajak Abimelèkh nahuwok ma kenèmbek kaum eh nak bok nachal, “Chok rik tèlꞌèl jèdhad ma sènꞌòy doh atòw ma léh eh, pastik ihukom namkebes.”
Isak nakaye geb dak sènꞌòy Pilistin umtehak ma rik nak
12Kerek nak Isak naruy menéh èn tèk nak. Dak TUHAN nateꞌèl méj ma rik nak, bok bil èn tawon nak rik nak natèg-tòg èn selay eh nak, dak nadapad hasil rik ibuk: nòm tiyab-tiyab lènlut eh nak nadapad seratos mad menéh! 13Rik nak najadik kaye, dak kenaye eh nak nabetabeh lèrhir. 14Isak mok ibuk geb chok bènleh eh: kambikh biri, kambikh, ròb lembu. Bok mok keꞌjèk jajéh kuli eh. Rik nak had kaye geb sampéy sènꞌòy Pilistin èn anak umtehak ma rik nak. 15Sebab nak umnak umtèb tèk ma kenèmbek jehòl perigi rik mèn kuli apak eh Abraham umchelòkh nèng-nèng tòp, mase Abraham tik nagos.
16Kerek nak Rajak Abimelèkh nachal ma Isak, “Hãk nak hòj lebéh rayak kuwase hãh nòm kandék. Jadik, wèk hãh lah nòm tèk kandék doh.” 17Jadik Isak naperak nòm nak samak kewarge eh ròb kenèmbek milik eh, dak umjog ma Luwag Gerar. Dak anak umnak umdèg kémah um bok umgel èn anak.
Sènꞌòy Gerar umra-rok ma mèn kuli Isak tentang perigi
18Èn tempad nak keꞌjèk mok maròp-maròp perigi mòy rik mèn kuli apak eh Abraham umchelòkh nèng-nèng tòp, bil mase Abraham tik nagos. Tapik nòm kerek Abraham nakebes nak, sènꞌòy Pilistin nak hòj umtèb tèk ma jehòl mèn perigi nak keꞌjèk. Jadik Isak ròb mèn kuli eh umchelòkh wèl jehòl perigi nak. Dak Isak natèrjal kenëh perigi eh nak nahoh ma terènjal apak eh nèng-nèng tòp.
19Mèn kuli Isak umchelòkh keꞌjèk perigi rik mòy wèl èn Luwag Gerar nak, dak umtèrbuk òng. 20Tapik mok sènꞌòy Gerar rik umbejagak kambikh biri èn anak umbera-rok ma mèn kuli Isak rik bejagak ma kambikh biri eh. Umnak umchal, “Òng doh anok kandék!” Sebab nak Isak natèrjal kenëh perigi nak Èsèk (maksod eh nak “Bera-rok”), sebab èn anak sènꞌòy umbera-rok ma kuli eh nak.
21Mèn kuli Isak umchelòkh perigi rik mòy wèl, tapik umnak umbera-rok tentang perigi nak keꞌjèk. Sebab nak Isak natèrjal kenëh perigi nak Sitna (maksod eh nak “Bema-mus.”) 22Dak umnak umjog nòm nak dak umchelòkh wèl perigi rik mòy. Dak tok mèk-mok umbera-rok tentang perigi nak. Jadik Isak nachal, “TUHAN hòj naꞌog ma èk tèk sèydey untok èmgel bébas. Èk akal ègos méj bok èbetabeh lèrhir kenaye èk èn anuh.” Sebab nak rik nak natèrjal kenëh perigi nak Rèhobòt (maksod eh nak “Tèk sèydey”).
23Nòm nak, Isak nawèk ma kote Beꞌèr-Séba. 24Hòj nalòy ma nak, èn layèg eh nak TUHAN napèrnéh rik Eh ma Isak dak nachal, “Yék lah Allah apak hãh Abraham. Agok lah tukh, Yék mok besamak hãk. Yék akal iteꞌèl méj ma hãk bok iꞌog ma hãk waris rik ibuk, tehad gerèk hòj ipèrhod ma kuli Yéh Abraham.” 25Dak anak Isak nateꞌèl néy tempad jenamuk nòm batuk bok nasindol ma TUHAN. Dak èn anak keꞌjèk umdèg kémah, dak mèn kuli eh umchelòkh perigi rik pay wèl.
Isak ròb Abimelèkh wèteꞌèl perènhod
26Bil néy arik, Rajak Abimelèkh nalãj nòm kote Gerar untok namtèrbuk ma Isak. Rajak nak naꞌéd samak rik eh nak Ahusat, kéy eh rik tilok, ròb Pikol, ketuwe tentere eh nak. #Jen 21:22. 27Isak nachal ma umnak, “Hatòp nak nyob cheꞌẽs ma yék, bok nyob kiron ma kandék nòm tèk nyob nak! Jadik nahey bok nyob lãj nyomtèrbuk ma yék?”
28Dak umnak umsaꞌod, “Puꞌdoh kandék kilèkh TUHAN mok samak hãk, dak kandék kigahmak méj kalòw èperahod bok èpantakh besamak. 29Kandék doh tok pernah kiteꞌèl jehad ma hãk. Belekh lah, bil hãk hagel èn tempad kandék tòp, kandék had kiteꞌèl méj ma hãk. Bok bil kandék kiꞌor hamperak nòm tèk kandék nak, unak pon kiꞌor hamwèk méj. Dak puꞌdoh pon TUHAN tik nateꞌèl méj ma hãk. Jadik puꞌdoh pèrhod lah hãk akal tok hatèlꞌèl jehad ma kandék.”
30Jadik Isak naꞌor ma mèn kuli eh mutabéh nèygéy jamuwan ma umnak, dak umnak kenèmbek umgéy bok umꞌòng. 31Dak ma is jakal eh nak umnak umwòg bil yèhyah tik chup dak umbeperahod bok umbepantakh untok mugos bema-méj kaban rik um. Hòj sòj nòm nak, Isak naperak ma umnak muwèk méj.
32Bil is nak keꞌjèk, mèn kuli Isak umlãj dak umꞌoglèkh ma rik nak hòj umchelòkh perigi rik pay wèl. Umnak umchal, “Kandék hòj kitèrbuk òng!” 33Isak natèrjal kenëh perigi nak “Beꞌèr-Séba” (maksod eh nak “Perigi Perènhod”). Dak gerèk nak lah kote Beꞌèr-Séba nak mok kenëh eh sampéy lah ma puꞌdoh.
Èsaw nababéy ma nar bèꞌbok nòm kaum mòy
34Bil Èsaw, kuwòt Isak naꞌtèk, umor eh hòj 40 tawon, rik nak nababéy nar léh eh, wènar nak bèꞌbok nòm kaum Hèt. Kenëh wèh nak Yudit kuwòt Beꞌèri ròb Basmat kuwòt Èlòn. 35Dak Isak ròb Ribkah wèngòm geb hup wèh sebab wèh léh Èsaw nak.
ទើបបានជ្រើសរើសហើយ៖
Jenadik 26: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.