Jenadik 25
25
Waris Abraham nòm léh eh rik gèhnih
(1 Sej 1:32-33)
1Abraham naselòg wèl ma néy babok rik bekenëh Keturah. 2Keturah nak nayos enam kuwòt bèhbeh untok Abraham. Kenëh umnak Simran, Yoksan, Médan, Midiyan, Isbak, ròb Suwah. 3Yoksan nak apak Séba ròb Dédan. Waris Dédan nak kaum Asur, kaum Lètus, ròb kaum Léyum. 4Kuwòt Midiyan nak Èpah, Èpèr, Hènokh, Abida, ròb Èldaꞌah. Umnak kenèmbek nòm waris Keturah.
5Abraham naꞌog kenèmbek harte eh ma Isak. 6Tapik bil Abraham tik nagos, rik nak naꞌog hadiah ma mèn kuwòt eh nòm mèn léh eh rik gèhnih. Dak rik nak naꞌor ma mèn kuwòt eh rik gèhnih nak mujog ma mòy tèk ma apah sòy is, jerok nòm kuwòt eh Isak.
Abraham nakebes dak umkep
7-8Abraham nak nagos méj bok jerok umor eh. Dak bil umor eh nalòy 175 tawon bok sog eh pon hòj sakòl, rik nak natèrsèk henèmhum eh rik sèj-sòj bok namèk-mak ma yak dòt bej eh. 9-10Dak Isak ròb Ismaꞌèl, kuwòt eh nak, wèdol mayad apak wèh nak èn kelòj guwok èn Makpéla, tilok ma Mamré, èn selay rik Abraham nabelik nèng-nèng tòp nòm Èpròn kuwòt Sohar, sènꞌòy Hèt nak. Unak lah tempad chachod rik Abraham hòj nakep ma léh eh Sarah. #Jen 23:3-16. 11Dak nòm kerek kènbes Abraham, Allah nateꞌèl méj ma kuwòt eh Isak. Bil nak Isak nagel tilok ma perigi rik umdéh Beꞌèr Lahay Roy.#Jen 16:14.
Waris Ismaꞌèl
(1 Sej 1:28-31)
12Udoh lah senaray waris Ismaꞌèl, kuwòt Abraham nòm Hagar, kuli babok Sarah nòm Mesir nak. 13Ismaꞌèl nak mok nar belas kuwòt bèhbeh eh. Udoh lah kenëh umnak, natekèd nòm mulak long sampéy ma las alëj nak: Nebayot, Kèdar, Adbeꞌèl, Mibsam, 14Misma, Duma, Masa, 15Hadad, Téma, Yètur, Napis, ròb Kèdma. 16Nar belas kuwòt Ismaꞌèl nak umjadik tuwak ma nar belas suku um. Dak umnak kenèmbek umjog bok mok kampong ròb tempad umbekémah pimòy-pimòy. 17Bil Ismaꞌèl umor eh nalòy 137 tawon, rik nak natèrsèk henèmhum eh rik sèj-sòj bok namèk-mak ma yak dòt bej eh. 18Tèk rik waris Ismaꞌèl umgel nak natekèd nòm Hawilah bok nalòy ma Sur, ma apah sòy is nòm tèk Mesir bok ma arah tèk Asur. Umnak umgel pamòy nòm waris Abraham rik gèhnih.
Nèsyos Èsaw ròb Yakob
19Udoh lah renipod tentang waris Isak, kuwòt Abraham. 20Isak nak umor eh empad puloh tawon bil rik nak nababéy ma Ribkah, kuwòt babok Bètuèl bok pek Laban. Umnak sènꞌòy Aram nòm belah Padan-Aram, èn tèk Mèsopotémiya. 21Tapik Ribkah nak manang. Isak napèꞌtak ma TUHAN untok léh eh nak, dak TUHAN nasaꞌod ma pèntak eh bok léh eh Ribkah nakayod. 22Ribkah nakayod kuwòt eh kamar, dak èn kelòj éj eh wèh kuwòt eh nak wèbecha-chët. Dak Ribkah nachal, “Nahey bok nabelakuk gerèk doh ma rik yéh?” Dak rik nak pon nawèk bok nabepèꞌtak ma TUHAN.
23 #
Rm 9:12. Dak TUHAN nasaꞌod ma rik nak:
“Wèh kuwòt bèhbeh hãh rik èn kelòj éj nak akal wèjadik nar kaum,
kuwòt rik hayos akal wèjadik nar kaum rik bema-mus.
Néy kaum nak akal lebéh kuwad nòm kaum rik naꞌnéy nak,
kelok nak akal najadik kuli ma pek eh.”
24Nòm kerek nak, bil nalòy mase eh untok namyos, dak kemën lah Ribkah nayos kuwòt eh kamar! 25Kuwòt rik mulak nak chelekh tehõny, dak kenèmbek esik eh nak barsog gerèk bajuk rik besayũl. Sebab nak umnak umtèrjal kenëh eh Èsaw.#25:25 Èsaw nak chëh eh gerèk nèlchal Ibrani rik maksod eh “besayũl.” 26Dak pas nak pek eh nak nahuwòl, tikh eh nakèmwòp ma dèldël Èsaw. Sebab nak umtèrjal kenëh eh Yakob.#25:26 Yakob nak chëh eh gerèk nèlchal Ibrani rik maksod eh “dèldël.” Isak umor eh enam puloh tawon bil Ribkah nayos ma wèh kuwòt eh nak.
Èsaw najuwal hak eh gerèk kuwòt mulak long ma pek eh Yakob
27Dak bil wèh kuwòt bèhbeh nak hòj wèrèꞌyak, Èsaw nak sènꞌòy rik lèng-lèkh sèꞌyèk dak nachèn nachèb-chib rèjdòj ma pantil. Tapik Yakob nak sènꞌòy rik sèꞌngẽk bok nachèn nagel nènyon èn tempad rik umbekémah nak. 28Isak lebéh nasayèkh ma Èsaw, sebab nachèn geb nagéy séj lawok rik Èsaw naseyèk nak. Tapik Ribkah lebéh nasayèkh ma Yakob.
29Bil néy arik, Yakob napèhgoh sop ber kachakh chènglekh. Dak anak Èsaw namak nòm sènyèk eh, dak rik nak nagahmak namòg sèljok sebab nacherok geb. 30Dak nachal ma Yakob, “Yék icherok geb! Og lah che yék ènsekh rik chènglekh nak imgéy.” (Unak lah isebab eh umdéh Èsaw nak Èdom; maksod eh nak “chelekh.”)
31Yakob nasaꞌod, “Nak, tapik mok néy hal rik yék ichèn hãk hamteꞌèl untok yék nèng-nèng. Hãk nak kuwòt rik mulak long, dak bil apak nakebes akal hajadik tuwak èn kewarge èk bok hadapad harte rik lebéh ibuk nòm yék. Jadik yék ichèn hãk hamꞌog che yék hak hãh nak.”
32Èsaw nachal, “Néh lah, yék hòj icherok imòg kèsbes! Ilok iperik eh hak nak ma yék?!”
33 #
Ibr 12:16. Yakob nasaꞌod, “Pèrhod bok pantakh lah nèng-nèng, hãk akal hamꞌog hak nak ma yék.”
Dak Èsaw pon napèrhod napantakh bok naꞌog hak eh ma Yakob. 34Dak Yakob pon naꞌog ma rik nak ruti ròb sop ber kachakh rik chènglekh nak. Èsaw nagéy naꞌòng, dak pas nak nated bok nawèk.
Dak gerèk nak lah Èsaw tok nabegorgèr ma hak eh gerèk kuwòt mulak long nak.
ទើបបានជ្រើសរើសហើយ៖
Jenadik 25: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.