Jenadik 24
24
Abraham naꞌor ma kuli eh namkèk léh untok kuwòt eh Isak
1Bil nak Abraham hòj tatak karõh. Dak TUHAN hòj nateꞌèl méj ma rik nak èn kenèmbek hal. 2-3Dak bil néy arik Abraham nakòw ma ketuwe mèn kuli eh, rik beꞌuros kenèmbek harte eh, dak nachal, “Yék ichèn mok néy hal hãk hampèrhod ma yék. Pèrhod bok pantakh lah èn mad TUHAN, Allah langid ròb bumi. Dak cherog lah tikh hãh nak èn dadak belìk yéh doh, gerèk tande perènhod hãh nak.#24:2-3 cherog lah tikh hãh nak èn dadak belìk yéh doh. Udoh néy adad sènꞌòy Ibrani manah tòp: bil mok sènꞌòy nateꞌèl perènhod ma sènꞌòy mòy, nacherog tikh eh èn dadak belìk sènꞌòy nak, gerèk tande akal nateꞌèl ilok rik napèrhod nak. Yék igel èn tèk sènꞌòy Kanaꞌan doh, tapik agok lah kèk babok nòm sènꞌòy Kanaꞌan untok namjadik léh kuwòt yék Isak. 4Hãk haros hawèk ma tèk asal yék, bok hamkèk babok nòm sakèy rik yéh rik namjadik léh Isak.”
5Tapik kuli nak natanyak ma rik nak, “Dak rèk lok kalòw itèrbuk babok nak, tapik najèk tok nahèh-hoh samak yék ma tèk doh? Bok hachèn ke yimꞌéd kuwòt hãh ma tèk asal rik hãh?”
6Tapik Abraham nasaꞌod, “Hõy! Yab gerèk lok pon, agok éd kuwòt inak ma nak! 7TUHAN, Allah langid, hòj naꞌéd ma yék imperak nòm dékh apak yéh bok nòm tèk asal yéh, dak Rik Nak hòj napèrhod napantakh namꞌog tèk doh ma waris yéh. Rik Nak akal natèrꞌen melaykat Eh untok namcheroh nèng-nèng untok namtulong ma hãk, supaye èn anak hãk akal hatèrbuk néy babok rik namjadik léh kuwòt yéh. 8Tapik kalòw babok nak najèk namhoh ma hãk, dak hãk akal habébas bok tok habesalah kalòw tok hatèlꞌèl ilok rik hapèrhod doh. Tapik yab rèk lok pon, agok éd kuwòt inak ma nak.” 9Jadik kuli nak nacherog tikh eh èn dadak belìk Abraham tuwan eh, dak napèrhod napantakh untok namteꞌèl ilok rik Abraham nasemany nak.
10Pas nak ketuwe kuli nak nakod sepuloh ikor unta Abraham, dak namèrwãd ibuk barang rik méj bok behèrgak nòm tuwan eh nak. Dak rik nak naꞌéd maròp-maròp kuli gèhnih dak umwèk ma Aram, ma belah èn gagid nar òng tibok èn tèk Mèsopotémiya. Dak anak umwèk ma kote Nahor, mèrpek Abraham nak.
Kuli Abraham natèrbuk ma Ribkah
11Dak bil hòj umbeleh ma perigi èn béng kote nak, ketuwe kuli nak naꞌor ma mèn unta nak muꞌub bok mutarak èn anak. Is eh hòj lèngꞌakh, unak lah mase mèn bèꞌbok nòm kote nak umlãj ma perigi nak untok mukod òng. 12Dak anak kuli Abraham nak napèꞌtak, “TUHAN, Allah tuwan yéh Abraham! Pèrnéh lah senayèkh Hãh rik setiye ma tuwan yéh Abraham, bok tulong lah uy ma yék imbehasil is doh. 13Néh lah, yék itèd-ted èn chening perigi doh. Dak puꞌdoh bèhléh nòm kote doh umhuwòl untok mukod òng. 14Yék isemany ma Hãk hamꞌog tande gerèk doh: yék akal isemany ma néy benaléh nak untok namꞌog yék imꞌòng nòm tabol eh. Dak kalòw rik nak naꞌog òng ma yék, dak nachal nachèn namtèrꞌòng wèl ma mèn unta yéh keꞌjèk, bok ilèkh rik nak lah babok rik hòj hapili untok kuli Hãh Isak. Kalòw nabelakuk gerèk nak, yék akal ilèkh Hãk hòj hapèrnéh senayèkh Hãh rik setiye ma tuwan yéh Abraham.”
15Dak bil kuli nak tik nabepèꞌtak, nalãj lah néy benaléh rik bekenëh Ribkah, nagulap tabol òng èn pòg eh. Ribkah nak kuwòt Bètuèl, bok chachok Milkah ròb Nahor. Nahor nak mèrpek Abraham. 16Ribkah nak benaléh rik lawah geb bok tik tok nasèglòg babeh. Rik nak nachareh ma perigi nak, nakod òng dak nasèd ma tabol eh, dak nalos natagoh wèl. 17Kerek nak kuli Abraham nak nadabal untok namtèrbuk ma rik nak dak nasemany, “Aléh, tulong og lah che yék imꞌòng amès nòm tabol hãh nak.”
18Ribkah nasaꞌod, “Nak, òng hãh lah, yãng.” Dak rik nak hès nayak tabol nòm pòg eh dak nakuwòp bok naꞌog kuli Abraham nak naꞌòng. 19Hòj kuli nak sòj naꞌòng, dak Ribkah nachal, “Yék imkod òng untok mèn unta hãh nak keꞌjèk, sampéy umnak kenèmbek umꞌòng sey.” 20Dak anak Ribkah nasèd òng nòm tabol eh nak ma tempad nèngꞌòng mèn unta, dak rik nak nadabal nalos ma perigi untok namkod òng wèl. Dak rik nak naꞌulakh wèl sampéy kenèmbek unta eh nak hòj umꞌòng sey. 21Dak kuli Abraham nak tok nabecharak, had natemèl jèngling ma Ribkah untok namlèkh kalòw TUHAN hòj naꞌuy ma nèbchib eh nak behasil ke hõy.
22Bil hòj mèn unta umꞌòng sey, kuli Abraham nak nakod subang mëh mas rik bechèngwang bok mèlhal, ròb nar gelang mas rik rayak.#24:22 rayak èn jènman manah tòp mok umgunak chare keniloh rik mòy. Subang mëh nak enènjoh eh umdéh néy “bèka,” kirak-kirak 6 grèm. Dak nar gelang nak enènjoh eh umdéh 10 “sèkel,” samak ma 120 grèm. Rik nak naꞌog kenèmbek nak ma Ribkah. 23Dak kuli nak natanyak, “Kuwòt chok hãk doh? Tulong oglèkh ma yék, mok ke tempad èn dékh apak hãk untok kimselòg layèg doh?”
24Ribkah nasaꞌod, “Yék doh kuwòt Bètuèl. Atak yék kenëh eh Nahor, dak ayak yék kenëh eh Milkah. 25Èn dékh kandék mok tempad sènlòg, dak mok ibuk nèygéy ròb sasoh untok mèn unta keꞌjèk.”
26Dak anak kuli nak natud bok nasindol ma TUHAN. 27Dak nachal, “Èhmah lah ma TUHAN, Allah tuwan yéh Abraham! Rik Nak hòj napèrnéh senayèkh ròb setiye Eh ma tuwan yék, bok hòj naꞌéd yék sejèkh ma dékh sakèy tuwan yéh doh.”
Kuli Abraham natèrbuk ma kewarge Ribkah
28Dak Ribkah nadabal ma dékh dak naꞌoglèkh ma amèk ròb kewarge eh kenèmbek ilok rik nabelakuk naꞌtèk. 29-30Ribkah mok néy kelok babeh eh rik bekenëh Laban. Rik nak nakeyòkh cherite pek eh tentang ilok rik kuli Abraham nachal naꞌtèk. Dak nanéh ma subang èn mëh pek eh ròb gelang èn chènrèng eh. Nòm nak Laban nadabal ma béng untok namtèrbuk ma kuli Abraham, rik tik natèd-ted tilok ma perigi nak samak mèn unta eh. 31Dak Laban nachal, “Yãng, TUHAN hòj nateꞌèl méj ma hãk! Nahey bok hãk hatèd-ted èn béng doh? Jok lah, kandék hòj kitabéh bilik èn dékh kandék untok nyob, dak mok keꞌjèk tempad untok mèn unta nyob.”
32Dak kuli Abraham nak pon umhoh ma rik nak, dak ummòj ma kelòj dékh. Laban nayak barang nòm mèn unta nak dak naꞌog sasoh ròb nèygéy ma mèn unta nak. Nòm kerek nak rik nak naꞌèn òng untok kuli Abraham nak musuj jukh um. 33Dak umjamuk nèygéy ma umnak. Tapik ketuwe kuli Abraham nak nachal, “Pòj anèng. Yék ichèn imchal ma nyob nahey yék ilãj ma doh, pas nak bok igéy.”
Laban nachal, “Nak, chal lah.”
34Dak kuli nak nachal, “Yék doh kuli Abraham. 35TUHAN hòj nateꞌèl méj ma tuwan yék beduyon-duyon, dak rik nak hòj najadik kaye geb. TUHAN hòj naꞌog ma rik nak jajéh kambikh, kambikh biri, lembu, unta, ròb kelday. Bok hòj naꞌog keꞌjèk ibuk duid pèrak ròb mas, bok jajéh kuli eh, bèhbeh ròb bèꞌbok. 36Dak bil Sarah léh tuwan inak hòj jajak, nanak hòj nayos néy kuwòt babeh untok Abraham. Dak tuwan yék hòj naꞌog kenèmbek harte eh ma kuwòt eh nak. 37Dak tuwan yék naꞌor ma yék impèrhod impantakh untok imkèk léh kuwòt eh. Tapik nanak nahuwok ma yék imkèk babok nòm sènꞌòy Kanaꞌan, tèk rik nagel nak. 38Dak rik nak naꞌor imwèk ma doh untok imkèk babok nòm sakèy ròb kaum rik eh untok namjadik léh kuwòt eh nak. 39Dak bil nak yék itanyak ma tuwan yéh, ‘Dak rèk lok kalòw babok nak najèk tok nahèh-hoh samak yék?’ 40Dak rik nak nasaꞌod bok nachal rik nak lèjgéj nahoh ma nènchèn TUHAN bok nagos tok besalah èn mad Eh. Bok nachal TUHAN akal natèrꞌèn melaykat Eh samak yék untok namtulong bok naꞌuy ma nèbchib yék behasil, supaye imtèrbuk léh untok kuwòt eh nòm kaum rik eh bok nòm sakèy apak eh. 41Tapik rik nak nachal keꞌjèk, kalòw yék iwèk ma nyob kaum rik eh doh, tapik nyob jèk tok nyob èr-or babok nak namhoh samak yék, dak yék hòj ibébas bok tok ibesalah kalòw tok itèlꞌèl ilok rik ipèrhod nòm penantakh inak.
42Dak is doh yék hòj ilòy ma perigi naꞌtèk, dak ipèꞌtak ma TUHAN, Allah tuwan yéh Abraham, supaye namtulong bok namꞌuy ma nèbchib yéh imbehasil. 43Dak anak yék isemany ma TUHAN namꞌog tande ma yék bil itèd-ted èn chening perigi nak, gerèk doh: bil néy babok benaléh nalãj namkod òng, yék akal isemany ma rik nak namꞌog ma yék imꞌòng nòm tabol eh. 44Dak kalòw rik nak naꞌog, dak nachèn namtèrꞌòng keꞌjèk ma mèn unta yék, bok ilèkh rik nak lah babok rik TUHAN hòj napili untok namjadik léh kuwòt tuwan yéh. 45Bil yék tik ibepèꞌtak èn kelòj hup yéh, Ribkah pon nalãj! Nanak nagulap tabol èn pòg eh, dak rik nak nachareh ma perigi nak untok namkod òng. Dak yék isemany ma rik nak, ‘Tulong og che yék imꞌòng.’ 46Dak rik nak hès nayak tabol nak nòm pòg eh dak naꞌog ma yék imꞌòng, bok nachal nachèn namtèrꞌòng wèl ma mèn unta yéh keꞌjèk. Jadik yék iꞌòng, dak rik nak natèrꞌòng keꞌjèk ma mèn unta yéh. 47Pas nak yék itanyak ma rik nak, kuwòt chok rik nak. Dak nanak nasaꞌod rik nak kuwòt Bètuèl, bok atak eh Nahor ròb ayak eh Milkah. Kerek nak yék ibèrtap subang èn mëh eh dak itèrlòg nar gelang nak èn chènrèng eh. 48Dak anak yék itud isindol bok iꞌèhmah ma TUHAN, Allah tuwan yéh Abraham. Sebab Rik Nak hòj natilèk nòng bok naꞌéd yék sejèkh ma Ribkah, kuwòt babok sakèy tuwan yéh, supaye namjadik léh kuwòt tuwan yéh.
49Jadik puꞌdoh, kalòw lah nyomsayèkh bok nyomsetiye ma tuwan yéh Abraham, chal lah ‘Hek.’ Tapik kalòw hõy, chal lah ‘Hõy’ supaye yék imlèkh ilok rik haros imteꞌèl.”
50Dak Laban ròb Bètuèl wèsaꞌod, “Kenèmbek doh nalãj nòm TUHAN; yar tok barhak yamchal hek atòw hõy. 51Nak, udoh lah Ribkah. Éd lah rik nak namwèk samak hãk, supaye rik nak namjadik léh kuwòt tuwan hãh nak, gerèk rik TUHAN hòj napèrnéh nak.” 52Dak bil kuli Abraham hòj nakeyòkh ma nèlchal umnak, rik nak natud bok nasindol ma TUHAN. 53Kerek nak kuli nak natèrwòl barang penakèy mas ròb pèrak, ròb nèglòg rik méj-méj, dak naꞌog kenèmbek nak ma Ribkah. Dak rik nak naꞌog hadiah rik mèlhal ma kelok ròb amèk Ribkah keꞌjèk.
Ribkah naperak ma kewarge eh dak najog ma tèk Kanaꞌan
54Nòm kerek nak kuli Abraham ròb sènꞌòy gèhnih rik hèh-hoh samak rik nak umga-géy dak umꞌa-òng, dak layèg nak umselòg èn anak. Dak bil hòj umwòg yèhyah jakal eh nak, kuli Abraham nak nachal, “Or lah yék immak ma tuwan yéh.”
55Tapik amèk ròb kelok Ribkah nak wèchal, “Perak lah Ribkah nak namgel agat samak kandék. Kirak-kirak sepuloh arik wèl, bok boléh rik nak nawèk.”
56Tapik kuli nak nachal, “TUHAN hòj naꞌuy ma nèbchib yék behasil. Jadik agok lah huwok ma yék. Or lah yék immak puꞌdoh ma tuwan yéh.”
57Dak wènar nak wèsaꞌod, “Jok lah èk èmkòw ma Ribkah bok èmtanyak ma rik eh.” 58Dak wènar nak wèkòw ma Ribkah dak wètanyak, “Hachèn ke hamhoh ma sènꞌòy doh?”
Dak Ribkah nasaꞌod, “Hek, ichèn.”
59-60Kerek nak kewarge Ribkah umperak ma Ribkah namhoh samak kuli Abraham ròb hèhoh eh. Dak mok néy kuli babok rik bejagak ma Ribkah nòm tik amès eh nahoh keꞌjèk. Dak kewarge Ribkah nak umsemany ma TUHAN namteꞌèl méj ma rik nak bok umchal:
“Kandék kiꞌas TUHAN namꞌog ma hãk, Ribkah, waris rik ibuk geb,
sampéy tok dapad mukirak.
Dak kiꞌas mèn waris hãh akal umkèrlah ma mèsmus um,
bok umkuwase ma kote um.”
61Kerek nak Ribkah ròb mèn kuli bèꞌbok eh umbesayab, dak umnak umꞌòj ma mèn unta dak umwèk samak kuli Abraham nak. Jadik kuli Abraham nak naꞌéd Ribkah dak umwèk.
Isak nababéy ma Ribkah
62Bil nak Isak hòj namak nòm perigi rik umdéh Beꞌèr Lahay Roy,#Jen 16:14. dak rik nak nagel èn Pantil Gurun Negèb èn tèk Kanaꞌan. 63Dak bil néy lèngꞌakh rik nak nahuwòl untok namchèb-chib bok nambebèdlod èn selay nak. Dak anak rik nak nanéh bok natèrbuk ma mèn unta umla-lãj. 64Ribkah pon nanéh bok natèrbuk ma Isak. Dak rik nak nataw nòm unta eh, 65dak natanyak ma kuli Abraham nak, “Chok ibabeh tuy, rik chèb-chib èn selay bok nalãj ma èk?”
Dak kuli nak nasaꞌod, “Rik nak tuwan yéh.” Jadik Ribkah nakod abat selindang eh dak nakub ma mad eh.
66Dak kuli nak nachèl-chal ma Isak kenèmbek hal rik hòj nateꞌèl hatòp. 67Isak naꞌéd ma Ribkah wèmòj ma kelòj kémah rik amèk eh Sarah nagel nèng-nèng tòp.#24:67 Amèk Isak, Sarah, hòj nakebes nèng-nèng tòp. Jadik bil Isak naꞌog ma Ribkah kémah amèk eh nak, maksod eh Ribkah najagak ma kewarge kaum umnak, nagantik nòm amèk Isak nak. Nòm kènbes amèk eh hatòp, Isak nangòm geb. Tapik hòj nababéy ma Ribkah, Isak nasayèkh geb ma rik nak, dak sebab nak hup sèndéh eh nak hòj gèk eh.
ទើបបានជ្រើសរើសហើយ៖
Jenadik 24: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.