Jenadik 23
23
Abraham nabelik tèk untok namkep mayad léh eh Sarah
1Sarah nakebes bil umor eh 127 tawon. 2Rik nak nakebes èn kote Kiryat-Arba (rik puꞌdoh umkòw Hèbròn) èn tèk Kanaꞌan. Dak Abraham nahõg bok nayèm-yam ma kènbes léh eh.
3Hòj sòj nòm nak, Abraham naperak ma mayad léh eh dak nawèk natèrbuk ma sènꞌòy Hèt, rik umgèl-gel èn negerik nak. Dak Abraham nachal ma umnak, 4#Ibr 11:9,13; Tèn 7:16. “Yék doh sènꞌòy nòm jèꞌrok rik igel samak nyob; og lah che yék imbelik tèk supaye imkep mayad léh yéh.”
5Sènꞌòy Hèt nak umsaꞌod, 6“Yãng, kandék kiꞌanggap hãk nak tuwak rik rayak èn kaum hãh rik gèl-gel èn anuh samak kandék. Kandék kenèmbek kitabéh kimꞌog ma hãk tèk nèmkep kandéh rik paléng méj. Pili lah hék tempad rik hachèn, dak kep lah léh hãh èn anak.”
7Dak Abraham nated dak nangõb èn mad umnak, 8dak nachal, “Nak lah, che gerèk nak, tulong lah semany ma Èpròn kuwòt Sohar nak, 9supaye namjuwal ma yék guwok rik mok èn chening selay eh èn apah Makpéla nak. Perak lah rik nak namjuwal tèk nak ma yék untok hèrgak rik ngam, èn mad nyob doh, supaye tèk nak namjadik milik yék.”
10Bil nak umnak umbecharak èn tempad terènbuk èn rèngkak gerbang kote nak. Dak Èpròn, rik bartèk nak, nagèl-gel èn anak samak sènꞌòy Hèt rik gèhnih. Dak èn mad kenèmbek sènꞌòy rik mok èn anak, Èpròn nasaꞌod ma Abraham, 11“Hõy, yãng! Keyòkh lah ma yék: selay inak yék akal iꞌog ma hãk, bok iꞌog keꞌjèk guwok rik mok èn anak. Yék iꞌog ma hãk puꞌdoh, èn mad kéy kaum rik yéh doh. Wèk lah bok kep ma léh hãh nak.”
12-13Kenèmbek sènꞌòy Hèt rik gèl-gel èn anak tik umkèngyòkh ma nèlchal wèh nak. Dak anak Abraham nangõb wèl èn mad umnak kenèmbek, dak nasaꞌod wèl ma Èpròn, “Keyòkh lah ma doh, yék imchal! Yék ichèn imbayar hèrgak rik ngam ma selay hãh nak. Kod lah duid nòm yék doh supaye yék imkep léh yéh èn anak.”
14Èpròn nasaꞌod ma Abraham, 15“Nak, yãng. Hèrgak tèk nak had 400 duid pèrak. Sènꞌòy gerèk ar doh tok payah lah amcha-chal jerok-jerok ma hèrgak duid rik amès nak hék. Wèk lah bok kep ma léh hãh nak.” 16Abraham nasetujuk ma hèrgak rik Èpròn nadéh nak. Rik nak nakiloh 400 duid pèrak, nahoh ma chare keniloh sènꞌòy rik umjèlwal bil jènman nak. Dak anak Abraham naꞌog duid nak ma Èpròn, èn mad kenèmbek sènꞌòy Hèt nak.
17-20Dak gerèk nak lah Abraham nabelik tèk nòm Èpròn nak èn mad sènꞌòy Hèt rik umbeterabuk èn rèngkak gerbang kote naꞌtèk. Dak tèk Èpròn nak najadik milik Abraham: selay, guwok, ròb kenèmbek jehuk rik mok èn tèk nak. Selay eh nak èn apah Makpéla, tilok ma Mamré (rik umkòw keꞌjèk Hèbròn) èn tèk Kanaꞌan. Dak Abraham najadik tèk nak tempad kubor kewarge eh. Dak anak Abraham nadol mayad léh eh Sarah èn kelòj guwok èn selay nak.
ទើបបានជ្រើសរើសហើយ៖
Jenadik 23: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.