Jenadik 22
22
Allah natarèk ma pechaye Abraham
1 #
Ibr 11:17-19. Hòj maròp tawon nòm kerek nak, Allah natarèk ma pechaye Abraham. Allah nakòw, “Abraham!”
Dak Abraham nasaꞌod, “Ilok, Tuhan?”
2Allah nachal, “Éd lah ma kuwòt hãk — hek, Isak, kuwòt hãh rik tungal nak, rik hasayèkh geb — bok wèk lah ma belah Moriyah. Yék akal itilèk néy pok ma hãk. Èn anak cheleg lah kuwòt hãh nak, dak chur bok jamuk ma Yék.” #2 Sej 3:1.
3Is jakal eh nak, yèhyah tik chup, Abraham napèlngal palok os untok namchur jenamuk nak, dak namèrwãd palok os eh nak bok nabeg èn kerek kuda kelday eh. Dak rik nak naꞌéd Isak ròb nar sènꞌòy kuli eh, dak umwa-wèk ma tempad rik Allah hòj nachal ma rik nak. 4Bil hòj arik tenigak nak, Abraham nanéh nòm jerok ma tempad nak. 5Dak rik nak nachal ma wèh kuli eh nak, “Deh lah èn anuh samak kuda kelday doh. Yék ròb Isak akal yawèk ma tuy untok yamsindol ma TUHAN, pas nak bok yalos ma kaꞌan.”
6Abraham naꞌor ma Isak namgulap palok os untok namchur jenamuk nak. Dak Abraham irik èn-èn chinèr ròb rènghòng, dak wènar nak wèchib samak. 7Dak Isak nachal ma apak eh, “Apak!”
Abraham nasaꞌod, “Ilok, agah?”
Dak Isak nachal, “Palok ròb rènghòng hòj mok, tapik èn lok kuwòt kambikh biri rik amjamuk akal?”
8Abraham nasaꞌod, “Allah irik akal natabéh kuwòt kambikh biri untok jenamuk nèrchur nak.” Dak wènar nak wècha-chib wèl.
9Bil hòj wèlòy ma tempad rik Allah hòj nachal nak, Abraham nateꞌèl tempad jenamuk èn anak, dak nachatuk palok eh èn balikh nak. Dak nabeg ma kuwòt eh Isak dak nasèrlòg èn balikh palok èn tempad jenamuk nak.#Yak 2:21. 10Dak anak Abraham nakod chinèr untok namcheleg ma kuwòt eh. 11Tapik Melaykat TUHAN tok-tok naꞌèh-éh ma rik nak nòm langid, “Abraham, Abraham!”
Abraham nasaꞌod, “Ilok, Tuhan?”
12Dak Allah nachal, “Agok lah teꞌèl ilok-ilok pon ma kuwòt hãh nak! Puꞌdoh Yék ilèkh hãk kemën-kemën hapechaye bok hataꞌãd ma Yék, sebab hãk tok hajèk-jèk hamꞌog ma Yék kuwòt hãh, kuwòt hãh rik tungal nak.”
13Dak anak Abraham nawãr bok nanéh mok néy kambikh biri beh rik nasèg-sòg tandok eh èn jangkar. Rik nak nakod kambikh beh nak dak naged, dak nachur bok najamuk ma TUHAN nagantik nòm kuwòt eh. 14Abraham nadéh kenëh tempad nak “TUHAN natabéh ilok rik èperlu.” Dak sampéy lah puꞌdoh pon sènꞌòy umchal “Èn balikh pok TUHAN, Rik Nak natabéh ilok rik èperlu.”
15Dak anak Melaykat Tuhan nakòw wèl ma Abraham nòm langid. 16Rik Nak nachal, “Gerèk doh lah nèlchal TUHAN: hãk hòj hateꞌèl hal doh bok hãk tok hajèk-jèk hamꞌog ma Yék kuwòt hãh, kuwòt hãh rik tungal nak. Sebab nak, Yék ipèrhod ipantakh nòm Rik Yéh, #Ibr 6:13,14. 17Yék pastik akal iteꞌèl méj ma hãk beduyon-duyon, bok iꞌuy ma waris hãk jajéh geb, gerèk pèrlòy èn langid bok pantéy èn béng laud. Dak waris hãh nak akal umkèrlah ma mèsmus um, bok umkuwase ma kote um. #Ibr 11:12. 18Nòm waris hãk akal iteꞌèl méj ma kenèmbek kaum èn bumi, sebab hãk hòj hataꞌãd ma nèrꞌor Yék.” #Tèn 3:25. 19Nòm kerek nak wèlos lah Abraham ròb Isak ma nar kuli naꞌtèk, dak umnak samak-samak ummak ma Beꞌèr-Séba, dak Abraham nagel wèl èn anak.
Waris Nahor, mèrpek Abraham
20Dak nòm kerek nak Abraham nakeyòkh gah mèrpek eh Nahor. Milkah, léh Nahor nak, hòj nayos mok lapan kuwòt bèhbeh eh. Udoh lah kenëh kuwòt Nahor nak:
21Us, kuwòt eh rik mulak long;
Bus, pek eh;
Kemuèl, rik najadik apak Aram;
22Kesèd, Haso, Pildas, Yidlap, ròb Bètuèl.
23Bètuèl nak apak Ribkah, rik najadik léh Isak.
Rik umbelapan doh lah kuwòt rik Milkah nayos untok Nahor, mèrpek Abraham nak. 24Nahor mok léh eh rik mòy wèl, néy kuli babok rik bekenëh Réyuma. Dak Réyuma nak keꞌjèk nayos kuwòt untok Nahor; kenëh umnak Tébah, Gaham, Tahas ròb Maꞌakah.
ទើបបានជ្រើសរើសហើយ៖
Jenadik 22: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.