Jenadik 14
14
Abram nakèrlah ma empad rajak bok natèrgos ma Lòt
1-8Èn tèk-tik Lòt tok najèg-jog ma Luwag Yordan nak, hòj mok limak sènꞌòy rajak rik beperintah èn tèk nak. Rik umnak Bèra rajak kote Sòdom, Birsah rajak kote Gomora, Sinab rajak kote Adma, Sèmeber rajak kote Sèboꞌim, bok rajak nòm kote Béla (rik umdéh keꞌjèk kote Soꞌar).
Tapik mok keꞌjèk empad sènꞌòy rajak nòm belah mòy. Rik umnak Amrapèl rajak negare Babiloniya, Ariyokh rajak negare Èlasar, Kèdorlaomer rajak negare Èlam, bok Tidal rajak negare Goyim. Rajak Kèdorlaomer nak rajak rik paléng rayak èn belah nak. Dak rik nak ròb tigak rajak gèhnih rik hèh-hoh ma rik nak umwèk bok umkèrlah ma limak rajak èn Luwag Yordan nak, sampéy Rajak Kèdorlaomer nak hòj nabekuwase ma kenèmbek belah nak. Dak pas nak untok nar belas tawon napakse ma limak rajak gèhnih nak mubayar chukay ma rik nak. Tapik èn tawon rik tigak belas nak, limak rajak naꞌtèk hòj umjèk mubayar chukay nak wèl bok umlawan ma rik nak. Jadik èn tawon empad belas nak Rajak Kèdorlaomer samak tigak rajak gèhnih naꞌtèk umbekumpol tentere umnak bok umkerawad untok muparang wèl ma limak rajak nak.
Dak èn nèbchib umnak, umserang bok umkèrlah ma sènꞌòy Rèpayim èn kote Asteròt-Karnayim. Pas nak umkèrlah ma sènꞌòy Susim èn kote Ham, bok ròb sènꞌòy Èmim èn Pantil Kiryatayim. Dak nòm nak umnak umkerawad wèl sampéy umlòy ma kote Èl-Paran, tilok ma pantil gurun, dak umkèrlah keꞌjèk ma sènꞌòy Hori rik umgèl-gel èn mèn pok Sèyir. Kerek nak mèn rajak nak umlos wèl ma Èn-Mispat (puꞌdoh umdéh tempad nak Kadès). Dak nòm nak umnak umkèrlah wèl ma kaum Amalèkh bok umkuwase ma kenèmbek tèk um, dak umkèrlah keꞌjèk ma kaum Amori rik umgèl-gel èn kote Haséson-Tamar.
Nòm kerek nak limak rajak nòm kote Sòdom, Gomora, Adma, Sèboꞌim, ròb Béla nak umkumpol tentere um dak umkerawad ma Luwag Sidim (rik puꞌdoh umdéh Luwag Òng Pang Kèsbes), bok umbetabéh untok muparang. 9Dak limak rajak nak umlawan ma empad rajak gèhnih naꞌtèk: Kèdorlaomer rajak Èlam, Tidal rajak Goyim, Amrapèl rajak Babiloniya, bok Ariyokh rajak Èlasar.
10-12Empad rajak nak rik mèngnang, dak rajak kote Sòdom ròb Gomora samak tentere wèh nak umda-dok. Èn luwag nak mok ibuk jehòl rik bartar, bok bil umdèk-dok nak mok rik kèꞌlek ma kelòj jehòl nak. Dak rik umgèhnih umda-dok ma pok-pok. Dak empad rajak nak umrus kenèmbek harte èn Sòdom ròb Gomora, ròb kenèmbek mènhik um.
Abram natèrgos ma Lòt
Bil nak Lòt, kuman Abram nak, hòj nagel èn kote Sòdom nak. Jadik mèn mèsmus naꞌtèk umròt ma Lòt keꞌjèk, bok umrus kenèmbek harte eh. Pas nak umwèk.
13Tapik mok néy sènꞌòy rik nada-dok nòm mèsmus nak. Dak rik nak nawèk bok naripod kenèmbek ilok rik nabelakuk nak ma Abram, sènꞌòy Ibrani nak. Abram nagel tilok ma jehuk rèꞌyak anok Mamré, sènꞌòy Amori nak. Mamré nak mok nar pek eh, Èskol ròb Anèr. Umnak ròb Abram hòj umbeperahod untok mutulong kaban rik um bok mulawan ma mèsmus um. 14Bil hòj nakeyòkh gah mèn mèsmus naꞌtèk hòj umròt ma kuman eh Lòt, Abram nakòw ma 318 sènꞌòy bèhbeh rik gèl-gel samak rik nak bok rik hòj lèng-lèkh beparang. (Umnak kenèmbek kuwòt kuli Abram, jadik umnak pon umjadik kuli Abram nòm tik èꞌjok um). Dak umnak umhoh ma empad sènꞌòy rajak naꞌtèk sampéy ma kote Dan. 15Èn anak Abram napèrmòy ma kuli eh umjadik maròp kumpolan, dak bil gagid layèg nak umserang ma mèsmus um bok umkèrlah ma umnak. Dak umnak umhambad ma mèsmus nak sampéy ma kote Hobah, èn apah utare kote Damsìk. 16Dak Abram nakod wèl kenèmbek harte rik hòj umrus hatòp nak. Dak natèrgos ma Lòt samak kenèmbek harte eh, bok mèn bèꞌbok ròb sènꞌòy mòy rik mèsmus nak umròt hatòp nak.
Mèlkisedèkh natèrbuk ma Abram
17Hòj nòm kerek Abram nakèrlah ma Rajak Kèdorlaomer ròb tigak rajak rik hèh-hoh ma rik nak, èn nèbchib nèꞌmak eh nak rajak Sòdom nalãj namtèrbuk ma Abram èn Luwag Sawéh (rik umdéh keꞌjèk Luwag Rajak). 18Dak mok néy sènꞌòy rajak mòy rik bekenëh Mèlkisedèkh, rik nak rajak kote Salèm. Rik nak keꞌjèk néy sènꞌòy imam Allah Rik Paléng Balikh. Rik nak nahuwòl nòm Salèm naꞌèn ruti ròb òng anggor ma Abram.#Ibr 7:1-10. 19Dak rik nak nasemany ma Allah namteꞌèl méj ma Abram, nachal,
“Yék ipèꞌtak ma Allah Rik Paléng Balikh,
Rik perèjhéj langid ròb bumi,
namteꞌèl méj ma Abram!
20Èhmah lah ma Allah Rik Paléng Balikh,
Rik hòj natulong ma hãk hamkèrlah ma mèsmus hãh.”
Dak anak Abram nasér kenèmbek barang rik hòj narus nòm mèsmus naꞌtèk namjadik sepuloh penol. Dak rik nak naꞌog ma Mèlkisedèkh néy penol nòm barang nak.
Rajak Sòdom nasemany ma Abram namtèrmak sènꞌòy nòm kote eh
21Dak nòm kerek nak rajak Sòdom nasemany ma Abram, “Tèrmak lah sènꞌòy nòm kote inak, rik mèn mèsmus umròt hatòp nak. Dak kenèmbek barang kinak rik nyob rus hatòp boléh dol rik ma rik hãh.”
22Tapik Abram nasaꞌod, “Yék hòj ipèrhod ipantakh èn mad TUHAN, Allah Rik Paléng Balikh, rik perèjhéj langid ròb bumi: 23Yék tok ibeterime ilok-ilok pon nòm hãk, yab menang atòw talik kasod pon. Bok gerèk nak lah hãk akal tok hadapad hamchal ma chok-chok pon hãk nak irik èy-uy ma yék imjadik kaye. 24Jadik yék tok ikèd-kod ilok-ilok, had nèygéy rik mèn kuli yéh hòj umgéy nak. Tapik yék isemany hãk hamsér ènsekh harte nak ma kéy-kéy idoh rik umhèh-hoh belawan samak yék — Anèr, Èskol, ròb Mamré.”
ទើបបានជ្រើសរើសហើយ៖
Jenadik 14: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.