Jenadik 15
15
TUHAN nateꞌèl perènhod ma Abram
1Hòj nòm kerek nak, TUHAN nabecharak ma Abram èn kelòj perènnéh, “Agok tukh, Abram. Yék irik bejagak ma hãk, gerèk alad kenabeh, bok akal iꞌog ma hãk upah rik rayak.”
2-3Tapik Abram nachal, “TUHAN yéh rik bekuwase! Ilok gunak eh hamꞌog upah nak ma yék, kalòw tok mèk-mok kuwòt yék? Hãk tok haꞌèg-og kuwòt ma yék, bok bil yék ikebes tok mèk-mok waris yéh. Rik bewaris kenèmbek harte yék had kuli yéh, Èliéser nòm kote Damsìk nak.”
4TUHAN nasaꞌod, “Hõy! Kuli hãh nak akal tok nabewaris ma harte hãk. Hãk akal hadapad kuwòt rik hãh, bok rik nak lah akal nawaris kenèmbek harte hãk.” 5Dak TUHAN naꞌéd ma Abram nahuwòl dak nachal ma rik nak, “Néh lah ma langid, bok chubak kirak mèn pèrlòy. Hãk akal mok waris rik jajéh gerèk pèrlòy nak.”#Rm 4:18; Ibr 11:12. 6Abram napechaye ma TUHAN, dak sebab nak TUHAN naꞌanggap ma rik nak sènꞌòy rik kènmën. #Rm 4:3; Gal 3:6; Yak 2:23.
7TUHAN nachal wèl ma rik nak, “Yék lah TUHAN. Yék irik hòj èd-éd ma hãk nòm kote Ur èn tèk Babèl, untok imꞌog tèk doh ma hãk namjadik milik hãk.”
8Tapik Abram natanyak, “Hek, TUHAN yéh rik bekuwase, tapik gerèk lok yék dapad imlèkh tèk doh akal najadik milik yék?”
9TUHAN nasaꞌod, “Èn lah ma Yék tigak lawok rik umor um hòj nalòy tigak tawon: néy ikor lembu bok, néy ikor kambikh bok, néy ikor kambikh biri beh. Bok èn keꞌjèk néy chèp kukur ròb néy chèp kukur rik tik ajok.” 10Dak Abram nakod mèn lawok nak dak naꞌèn ma Allah bok naged. Abram napag lembu, kambikh, bok kambikh biri nak umjadik nar, dak nadol lawok nègpag nak piléng-piléng. Tapik nar chèp nak tok napèg-pag. 11Dak mèn chèp umlãj untok muchòh ma sasok nak, tapik Abram nakiron um.
12Bil mad is nak natekèd namjèdlũd, Abram nasèglòg nawel. Tok-tok rik nak nagahmak nèngtukh rik lahĩd geb. #Ayb 4:13,14. 13Dak anak TUHAN nachal ma rik nak, “Lèkh lah: waris hãk akal umgel gerèk sènꞌòy nòm jèꞌrok èn tèk kaum mòy. Dak kaum mòy nak akal umpakse ma kenèmbek waris hãk umkerèꞌjak gerèk kuli umnak, bok akal umkeseh ma umnak selamak empad ratos tawon. #Her 1:1-14; Tèn 7:6. 14Tapik Yék akal ihukom ma kaum nak. Dak nòm kerek nak, waris hãh akal umhuwòl nòm negerik nak bok umꞌèn harte rik ibuk.#Her 12:40,41; Tèn 7:7. 15Tapik kalòw rik hãh nak, jerok umor hãh, bok akal hamèk-mak méj ma yak dòt bej hãh, dak sènꞌòy umkep mayad hãh. 16Hòj nòm kerek empad ratos tawon nak, waris hãh akal umlos wèl ma tèk Kanaꞌan doh. Dak bil nak akal ikiron ma sènꞌòy Amori rik gèl-gel èn anuh. Puꞌdoh tik tok nalèy-lòy mase untok imhukom ma umnak. Tapik bil mase nak akal ihukom um sebab bil nak tènꞌèl jèdhad umnak hòj lèrhir geb.”
17Bil mad is hòj najelũd bok hòj layèg, tok-tok Abram nanéh et pasu rik mok berènghõng èn kelòj bok chèlꞌũl ròb ad karuk rik chèk-chak lèny-lany, wèdor èn gagid séj mèn lawok rik Abram napag naꞌtèk. 18Bil is nak keꞌjèk TUHAN nateꞌèl perènhod samak Abram bok nachal, “Yék iꞌog ma waris hãk kenèmbek tèk doh: nòm sempadan negerik Mesir sampéy ma òng rik rayak nak, Òng Tibok Èprat. #Tèn 7:5. 19Bok yék iꞌog ma waris hãh kenèmbek tèk nòm kaum rik umgèl-gel èn anuh: sènꞌòy Kèni, Kènas, Kadmon, 20Hèt, Pèris, Rèpayim, 21Amori, Kanaꞌan, Girgasi, ròb Yèbusi.”
ទើបបានជ្រើសរើសហើយ៖
Jenadik 15: KKT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 Wycliffe Bible Translators, Inc.