သျှင်လုကာ 23
23
အခန်း (၂၃)
ကိုယ်တော်ယေရှုကို ပိလတ်ဘုရင်ခံဘားကို ခေါ်လားခြင်း
(သျှင်မဿဲ ၂၇:၁-၂၊ ၁၁-၁၄။ သျှင်မာကု ၁၅:၁-၅။ သျှင်ယောဟန် ၁၈:၂၈-၃၈)
1ယေပြီးကေ တရားရုံးမာ စုဝီးနီကတ်တေ လူအများရို့က ထဗျာလ် ကိုယ်တော်ယေရှုကို ပိလတ်ဘုရင်ခံဘားကို ခေါ်လားကတ်လီရေ။ 2ယင်းသူရို့က “ဒေလူက ကျွန်တော်ရို့၏တိုင်းသူပြည်သားတိကို တစ်ပတ်လိမ်ပနာ လှည့်စားနီစွာကို တွိ့ရပါရေ။ သူက ရောမဘုရင်ကြီးကို အခွန် မဆက်သဖို့ ပြောဗျာလ် ကိုယ့်ကိုယ်ကိုလည်း မေရှိယလို့ ခေါ်ရေ ဘုင်ရင်တစ်ပါးဖြစ်တေလို့ ပြောနီပါရေ” လို့ ပြောပနာ ကိုယ်တော်ကို စလို့ စွပ်စွဲကတ်ပါရေ။
3ယေပြီးကေ ပိလတ်ဘုရင်ခံက ကိုယ်တော်ယေရှုကို “သင်က ဂျူးလူမျိုးတိ၏ဘုရင် ဟုတ်လား” လို့ မိန်းရေခါ
ကိုယ်တော်ကလည်း “သင်ပြောရေအတိုင်းရာ ဖြစ်တေ” လို့ ပြန်လို့ မိန့်တော်မူပါရေ။
4ယေပြီးကေ ပိလတ်ဘုရင်ခံက ဂျူးပုရောဟိတ်အကြီးအကဲတိနန့် လူထုပရိတ်သတ်ကို “ဒေလူမာ အပြစ်တစ်ခုလည်း ငါ မတွိ့ရပါ” လို့ ပြောလိုက်ပါရေ။
5ယေကေလည်း သူရို့က “ဒေသူစွာ ဂါလိလဲပြည်ကပင် စပြီးကေ ဂျေရုဆလင်မြို့ကိုရောက်ရေအထိတိုင်အောင် ယုဒပြည်တစ်ပြည်လုံးအား ဟောပြောသွန်သင်ပြီးကေ လူတိကို ကတောက်ကချားဖြစ်အောင် နှိုးဆော် နီပါရေ” လို့ ပြောကတ်လီရေ။
ကိုယ်တော်ယေရှုကို အုပ်ချုပ်ဟေရုဒ်ဘားကို ခေါ်လားခြင်း
6ပိလတ်ဘုရင်ခံ ယင်းစကားကို ကြားရရေအခါ “ဒေလူက ဂါလိလဲပြည်သားလား” လို့ မိန်းလီရေ။ 7ကိုယ်တော်ယေရှုက ဟေရုဒ်အုပ်ချုပ်ရေ ဂါလိလဲနယ်က ဖြစ်စွာကို သိရေအခါ ပိလတ်က သူ့ကို ဟေရုဒ်ဘားကို ပို့လိုက်လီရေ။ ယင်းအချိန်မာ ဟေရုဒ်က ဂျေရုဆလင်မြို့မာ ရောက်ဟိနီပါရေ။
8ဟေရုဒ်က ကိုယ်တော်ယေရှု၏အကြောင်းကို ကြားထားလို့ တွိ့ချင်နီစွာမာ ကြာနီဗျာလ် ဖြစ်ရေအတွက်နန့် ကိုယ်တော်ကို တွိ့ရရေအခါ ကောင်းကောင်းကြီး ဝမ်းသာလီရေ။ သူက ကိုယ်တော်ယေရှု ပြုတော်မူရေ အံ့ဩဖို့ကောင်းရေ နိမိတ်လက္ခဏာတစ်ခုခုကို မြင်ရဖို့ မျှော်လင့်ကတ်ပါရေ။ 9ယေတွက်နန့် ဟေရုဒ်က ကိုယ်တော်ကို မိန်းခွန်းအများကြီး မိန်းကေလည်း ကိုယ်တော်က တစ်ခုကိုလေ့ မဖြေပီးခပါ။ 10ယေပြီးကေ ဂျူးပုရောဟိတ်အကြီးအကဲတိနန့် ကျမ်းတတ်ဆရာတိက ထဗျာလ် ကိုယ်တော်ကို ကောင်းကောင်းပပြင်း စွပ်စွဲကတ်လီရေ။ 11ဟေရုဒ်က သူ၏စစ်သားတိနန့်တတူ ကိုယ်တော်ကို သရော်တော်တော်နန့် သွန်းကတ်ပြောင်ကတ်ပနာ ကိုယ်တော်အား တော်ဝင်ကိုယ်ရုံကို ဝတ်စီပြီးကေ ပိလတ်ဘုရင်ခံဘားကို ပြန်လို့ ပို့လိုက်ပါရေ။ 12ဟေရုဒ်နန့်ပိလတ်ရို့က အယင်က ရန်ဖက်တိ ဖြစ်ကတ်ကေလည်း ယင်းနိန့်တိမာ မိတ်ဆွီတိ ဖြစ်လားကတ်ပါရေ။
ကိုယ်တော်ကို သီဒဏ်ပီးခြင်း
(သျှင်မဿဲ ၂၇:၁၅-၂၆။ သျှင်မာကု ၁၅:၆-၁၅။ သျှင်ယောဟန် ၁၈:၃၉-၁၉:၁၆)
13ပိလတ်ဘုရင်ခံက ဂျူးပုရောဟိတ်အကြီးအကဲတိ၊ ဂျူးလူမျိုးဂေါင်းဆောင်တိနန့် လူထုပရိတ်သတ်တိကို စုဝီးစီပနာ 14“ဒေသူက လူတိကို ကတောက်ကချားဖြစ်အောင် နှိုးဆော်နီရေလို့ သင်ရို့ ပြောပြီးကေ ငါ့ဘားကို ခေါ်လာကတ်တေ။ ယေကေလည်း ငါက သင်ရို့အားလုံးဟိမာ စစ်ဆီးခကေလည်း သင်ရို့ စွပ်စွဲနီရေအတိုင်း ဒေလူ အပြစ်လုပ်ထားစွာ တစ်ခုကိုလေ့ မတွိ့ရပါ။ 15ဟေရုဒ်ကလည်း သူ့ကို အပြစ်ရှာလို့ မတွိ့ရေအတွက်နန့် ငါရို့ဘားကို ပြန်လို့ ပို့လိုက်စွာ ဖြစ်တေ။ ဒေလူမာ သီရလောက်အောင် အပြစ်လုပ်ထားစွာ တစ်ခုလည်း မဟိပါ။ 16ယေတွက်နန့် သူ့ကို ကြိမ်ဒဏ်ပီးဗျာလ် ပြန်လွတ်လိုက်မေ” လို့ ပြောလီရေ။ 17ပိလတ် ယင်းပိုင်ပြောရစွာက ပသခါပွဲတော်နိန့်မာ အကျဉ်းသားတစ်ယောက်ကို လွတ်ပီးရရေ ထုံးစံဟိလို့ ဖြစ်ပါရေ#23:17 ဒေစာကြောင်းက မူရင်းကျမ်းစာတစ်ချို့မာ မပါဝင်ပါ။။
18ယေကေလည်း လူထုပရိတ်သတ်အားလုံးက#23:18 ဒေနီရာမာ လူထုပရိတ်သတ်ဆိုစွာက ဂျူးပုရောဟိတ်အကြီးအကဲတိ၏လူတိ ဖြစ်ပါရေ။ “သူ့ကို သတ်ပါ။ ကျွန်တော်ရို့အတွက် ဗာရဗ္ဗကို လွတ်ပီးပါ” လို့ တညီတည်း အသံအကျယ်ကြီး အော်ကတ်လီရေ။ 19ဗာရဗ္ဗက မြို့ထဲမာ ပုန်ကန်မှုနန့် လူသတ်မှုကို လုပ်ခရေအတွက်နန့် ထောင်ထဲမာ အချုပ်ကျ ခံနီရပါရေ။
20ပိလတ်က ကိုယ်တော်ယေရှုကို လွတ်ပီးချင်ရေအတွက်နန့် လူထုပရိတ်သတ်ကို အရာတစ်ခေါက်ထပ်လို့ ပြောလိုက်ပါရေ။ 21ယေကေလည်း သူရို့က “သူ့ကို လက်ဝါးကပ်တိုင်ထက်မာတင်လို့သတ်လိုက်ပါ။ သူ့ကို လက်ဝါးကပ်တိုင်ထက်မာ တင်လို့ သတ်လိုက်ပါ” လို့ အော်ကတ်လီရေ။
22ယေခါ ပိလတ်က “ဒေသူ ဇာပိုင်အပြစ်မျိုးကို လုပ်ထားခလို့လဲ။ သူ့ကို သီဒဏ်ပီးရလောက်အောင် အပြစ်ကို ငါ မတွိ့ပါ။ ယင်းတွက်နန့် သူ့ကို ကြိမ်ဒဏ်ပီးဗျာလ် ပြန်လွတ်ပီးလိုက်မေ” လို့ သူရို့ကို တတိယအကြိမ် ပြောလီရေ။
23ယေကေလည်း လူထုပရိတ်သတ်တိက ကိုယ်တော်ယေရှုကို လက်ဝါးကပ်တိုင်ထက်မာတင်လို့သတ်ဖို့အတွက် ဆက်ပြီးကေ ပိုလို့ ရရောင်းဆူဗျာလ် အော်နီကတ်လီရေ။ နောက်ဆုံးမာ သူရို့ တောင်းဆိုစွာတိက အောင်မြင် လားလီရေ။ 24ယေတွက်နန့် ပိလတ်ကလည်း လူထုပရိတ်သတ် တောင်းဆိုရေအတိုင်း လုပ်ပီးဖို့ ဆုံးဖြတ်လိုက်လီရေ။ 25သူက လူထုပရိတ်သတ် တောင်းဆိုရေအတိုင်း ပုန်ကန်မှုနန့် လူသတ်မှုကို လုပ်ခလို့ ထောင်ထဲမာ အချုပ်ကျ ခံနီရသူကို လွတ်ပီးလိုက်ပြီးကေ ကိုယ်တော်ယေရှုကို ယင်းသူရို့၏သဘောဆန္ဒအတိုင်း လုပ်ဆောင်စီဖို့ သူရို့ဘားကို လွှဲပီးလိုက်လီရေ။
ကိုယ်တော်ယေရှုကို လက်ဝါးကပ်တိုင်ထက်ကို တင်လို့ သတ်ခြင်း
(သျှင်မဿဲ ၂၇:၃၂-၄၄။ သျှင်မာကု ၁၅:၂၁-၃၂။ သျှင်ယောဟန် ၁၉:၁၇-၂၇)
26စစ်သားတိက ကိုယ်တော်ကို ခေါ်လို့ လားနီစိုင် ကုရေနေမြို့သား ရှိမုန်ဆိုသူက တောရွာမှ ပြန်လာစွာကို မြင်ရေအခါ သူ့ကို ဖမ်းလို့ ခေါ်ပနာ ကိုယ်တော့်နောက်က လက်ဝါးကပ်တိုင်ကို ထမ်းလို့ လိုက်စီပါရေ။ 27လူထုပရိတ်သတ်အများကြီးနန့်တတူ ကိုယ်တော်အတွက် ကောင်းကောင်း ယူကျိုးမရ ဝမ်းနည်းပနာ ငိုနီကတ်တေ မမာ့တိက ကိုယ်တော့်နောက်မှ လိုက်လားကတ်ပါရေ။ 28ယေခါ ကိုယ်တော်ယေရှုက ယင်းသူရို့ဘက်ကို လှည့်ပြီးကေ “ဂျေရုဆလင်က မမာ့တိ၊ ငါ့အတွက် မငိုကတ်ပါကေ့။ သင်ရို့နန့် သင်ရို့၏သားသမီးတိအတွက်ရာ ငိုကတ်ပါ။ 29ဇာတွက်နန့်ဆိုကေ ‘မြုံနီရေ မမာ့တိ၊ ဝမ်းမကြီးဖူးရေ ဝမ်းတိနန့် နို့မတိုက်ဖူးရေ သားမြတ်တိကရာ မင်္ဂလာဟိကတ်ပါရေ’ လို့ လူတိအများကြီးက ပြောကတ်ဖို့နိန့်တိ ကျရောက်လာလိမ့်မေ ဖြစ်တေ။ 30ယင်းအချိန်ကိုရောက်ကေ ကျမ်းစာမာ ရီးသားထားရေအတိုင်း
လူတိက တောင်တိကို ‘ငါရို့အထက်က ပြိုကျကတ်ပါ’ လို့ ပြောပြီးကေ
တောင်ကုန်းတိကိုလည်း ‘ငါရို့ကို ဖုံးထားကတ်ပါ’ လို့ ပြောကတ်လိမ့်မေ။ 31ဇာတွက်နန့်ဆိုကေ သူရို့က
စိမ်းနီရေ အပင်တိပိုင် အပြစ်ကင်းစင်ရေ ငါ့မာတောင် ဒေလောက်ဆိုးစွာတိဖြစ်နီကေ ခြောက်နီရေအပင်တိပိုင် အပြစ်ဒုစရိုက်သားတိဖြစ်တေ သင်ရို့ဘားမာ ဇာလောက်တောင် ဆိုးလီဖို့လဲ” လို့ မိန့်လီရေ။
32သူရို့က အရာရာဇဝတ်သားနှစ်ယောက်ကိုလည်း ကိုယ်တော်နန့်တတူ သီဒဏ်ပီးဖို့ ခေါ်ခလီရေ။ 33သူရို့က “ဦးဂေါင်းခွံ” နာမေဟိရေ နီရာကိုရောက်ရေခါ ကိုယ်တော်ယေရှုကို လက်ဝါးကပ်တိုင်ထက်ကို တင်ပနာ သံမှို ခတ်လိုက်ကတ်ပါရေ။ သူရိုက ရာဇဝတ်သားနှစ်ယောက်ကိုလည်း ကိုယ်တော်၏လက်ယာဖက်မာ တစ်ယောက်၊ လက်ဝဲဖက်မာတစ်ယောက် လက်ဝါးကပ်တိုင်ထက်ကို တင်ဗျာလ် သံမှို ခတ်လိုက်ကတ်တေ။ 34ယေခါ ကိုယ်တော်ယေရှုက “အဖဘုရားသျှင်၊ သူရို့က သူရို့လုပ်မိနီရေအရာကို မသိရေအတွက် သူရို့ကို ခွင့်ရွှတ်တော်မူပါ” လို့ ဆုတောင်းလီရေ။#23:34 အဂုရီးသားထားရေ ကျမ်းစာက ကျမ်းစာတစ်ချို့မာ မပါဝင်ပါ။ ယေပြီးကေ စစ်သားတိက ကိုယ်တော်၏အဝတ်တိကို မဲနှိုက်ပနာ ဝီလို့ ယူကတ်ပါရေ။ #မ၊ ၂၇:၃၅။ မာ၊ ၁၅:၂၄။ ယော၊ ၁၉:၂၄
35လူအများကြီးက အပါးသျှေမာ ရပ်လို့ ကြည့်နီကတ်စိုင် ဂျူးလူမျိုးဂေါင်းဆောင်တိက ကိုယ်တော်ယေရှုကို သရော်ကတ်ပနာ “ယင်းသူက အရာလူတိကို ကယ်တင်ခရေ။ သူက ဘုရားသျှင် ရွီးချယ်တော်မူရေ မေရှိယမှန်ကေ ကိုယ့်ကိုယ်ကို ကယ်တင်ပါ” လို့ ပြောကတ်လီရေ။
36စစ်သားတိကလည်း ကိုယ်တော့်ကို သရော်ကတ်ပြီးကေ ကိုယ်တော်ဘားကို လာဗျာလ် ချဉ်ရေ စပျစ်ရည်ကို#23:36 ချဉ်ရေစပျစ်ရီဆိုစွာက အချဉ်အရည်တစ်မျိုးဖြစ်ပါရေ။ အနာတိ သက်သာဖို့အတွက် အသုံးပြုကတ်ပါရေ။ ယုဒသန်ကျမ်းမာ ပုံးရည်လို့ ဖော်ပြပါရေ။ တိုက်စီပါရေ။ 37သူရို့က ကိုယ်တော်ကို “သင်က ဂျူးလူမျိုးတိ၏ဘုရင်မှန်ကေ ကိုယ့်ကိုယ်ကို ကယ်တင်ပါ” လို့ ပြောကတ်ပါရေ။
38ကိုယ်တော်၏ဂေါင်းထက်မာလည်း “ဒေသူက ဂျူးရို့၏ဘုရင်ဖြစ်တေ” လို့ ရီးထားရေ ဆိုင်းဘုတ်ကို ချိတ်ထားလီရေ။
39လက်ဝါးကပ်တိုင်ထက်မာ ချိတ်ထားခံရရေ ရာဇဝတ်သားနှစ်ယောက်ထဲမှ တစ်ယောက်က ကိုယ်တော်ကို “သင်က မေရှိယ ဟုတ်လာ။ မေရှိယအသျှင်ဟုတ်ကေ သင့်ကိုယ်သင် ကယ်တင်ပြီးကေ ငါရို့ကိုလည်း ကယ်တင်ပီးပါ” လို့ သရော်လို့ ပြောလီရေ။
40ယေကေလည်း အရာရာဇဝတ်သား တစ်ယောက်က ယင်းသူ့ကို “သင်က ဒေလူနန့်တူရေ ပြစ်ဒဏ်စီရင်စွာကို ခံရယင်းပင် ဘုရားသျှင်ကို မကြောက်လား။ 41ငါရို့က ငါရို့ အပြစ်လုပ်မိရေအတွက် အပြစ်ဒဏ်ခံရစွာက တန်ပါရေ။ ယေကေလည်း ဒေလူက အပြစ်တစ်ခုလည်း လုပ်ထားစွာ မဟိခပါ” လို့ ဆူလိုက်လီရေ။
42ယေပြီးကေ သူက ကိုယ်တော်ယေရှုကို “ကိုယ်တော်ယေရှု သင်က သျှင်ဘုရင်တစ်ပါးအနီနန့် အုပ်ချုပ်ဖို့ ပြန်လာရေအချိန်မာ ကျွန်တော့်ကို အတွက်ပေါ်ပါ” လို့ လျှောက်လီရေ။
43ယေခါ ကိုယ်တော်ယေရှုက “သင့်ကို ငါ အမှန်ပြောမေ။ သင်က ဒေနိန့်မာပင် ငါနန့်တတူတူ ပရဒိသုဘုံမာ ဟိနီလိမ့်မေ#23:43 ပရဒိသုဘုံ ဆိုစွာက ဖြောင့်မတ်တေလူရို့၏အသက်ပြန်ရင်စွာနန့် နောက်ဆုံး တရားစီရင်စွာကို မျှော်နီရေ အီးချမ်းရေ နီရာဖြစ်ပါရေ။ ” လို့ မိန့်တော်မူရေ။
ကိုယ်တော်ယေရှု အသက်ဇိဝိတဒါနပြုတော်မူခြင်း
(သျှင်မဿဲ ၂၇:၄၅-၅၆။ သျှင်မာကု ၁၅:၃၃-၄၁။ သျှင်ယောဟန် ၁၉:၂၈-၃၀)
44ယင်းအချိန်က မွန်းတည့်ချိန် ဖြစ်နီကေလည်း ယင်းအချိန်ကစလို့ သုံးချက်တီးအထိတိုင်အောင် တစ်တိုင်းပြည်လုံးစွာ အမှောင်ကြီး ကျနီပါရေ။ 45နီရောင်ပျောက်လားပြီးကေ ဗိမာန်တော်ထဲမာဟိရေ လိုက်ကာဟတ်ကြီးက#23:45 ယင်းလိုက်ကာဟတ်က မြင့်မြတ်ရေနီရာနန့် အမြင့်မြတ်ဆုံးနီရာကြားမာ ကာထားရေ ကောင်းကောင်းကြီးပနာထူရေ လိုက်ကာဟတ်ဖြစ်တေ။ အလယ်ကောင်ကနီ နှစ်စိတ် စိတ်လားလီရေ။ 46ကိုယ်တော်ကလည်း အသံအကျယ်ကြီးနန့် “အဖဘုရားသျှင်၊ ကျွန်တော့်ဝိညာဉ်ကို အသျှင်၏လက်ထဲမာ အပ်ပါရေ” လို့ မိန့်လီရေ။ ယင်ပိုင်မိန့်တော်မူပြီးကေ ကိုယ်တော်က အသက်ကို စွန့်တော်မူလီရေ။
47ဒေပိုင်ဖြစ်ပျက်လားစွာတိကို မြင်လိုက်တေ ရောမတပ်မှူးက ဘုရားသျှင်ကို ချီးမွမ်းပူဇော်ပနာ “ဒေလူက အမှန်ပင် ဖြောင့်မတ်သူဖြစ်တေ” လို့ ပြောကတ်လီရေ။ 48ယင်းမြင်ကွင်းကို ကြည့်ဖို့ ရောက်လာကတ်တေ လူထုပရိတ်သတ်ကြီးက ယင်းအဖြစ်ပျက်ကို မြင်ရေအခါမာ ရင်ဖက်ကို ထုဗျာလ် ယူငင်မရ ဝမ်းနည်းပက်လက်နန့် ကိုယ့်အိမ်ကိုကိုယ် ပြန်လားကတ်လီရေ။ 49ယေကေလည်း ကိုယ်တော့်ကို သိရေမိတ်ဆွီတိကစဗျာလ် ဂါလိလဲပြည်ကနီ ကိုယ်တော်နောက်က လိုက်လာကတ်တေ မမာ့တိက ကိုယ်တော်ကို သင့်ရုံလောက် အဝီးတစ်နီရာက ရပ်လို့ စောင့်ကြည့်နီကတ်လီရေ။
ကိုယ်တော်ယေရှုကို သင်္ဂြိုလ်ခြင်း
(သျှင်မဿဲ ၂၇:၅၇-၆၁။ သျှင်မာကု ၁၅:၄၂-၄၇။ သျှင်ယောဟန် ၁၉:၃၈-၄၂)
50ယင်းအချိန်ခါမာ တရားလွှတ်တော်အဖွဲ့တိ ဖြစ်တေ ယောသပ်လို့ခေါ်ရေ ဖြောင့်မတ်တေ လူတစ်ယောက်က ယင်းနီရာမာ ဟိနီလီရေ။ 51သူက ကိုယ်တော်ယေရှုကို တစ်ခြားလွှတ်တော်အဖွဲ့ဝင်တိ ပြုလုပ်ခရေ ဆုံးဖြတ်ချက်တိကို သဘောမတူခပါ။ သူက ယုဒပြည် အရိမဿဲမြို့မှ လာသူဖြစ်ပြီး ဘုရားသျှင်၏သာသနာတော်ကို စောင့်နီသူလည်း ဖြစ်ပါရေ။ 52သူက ကိုယ်တော်၏အလောင်းကို သင်္ဂြိုလ်ခွင့်ရဖို့ ပိလတ်ဘားက တောင်းရေခါ ပိလတ်ကလည်း ခွင့်ပြု ပီးခလီရေ။ 53ယေတွက်နန့် သူက ကိုယ်တော်၏ခန္ဓာကိုယ်ကို လက်ဝါးကပ်တိုင်ကနီ အောက်ကိုချပြီးကေ ကောင်းကောင်း ကောင်းရေပိတ်စနန့် ပတ်လိုက်လီရေ။ ယေပြီးကေ ကျောက်အကြီးသန် တစ်လုံးကို ထွင်းထားပြီးကေ တစ်ယောက်ကိုလေ့ မသင်္ဂြိုဟ်ရသိရေ သင်္ချိုင်းဂူအသစ်ထဲမာ ကိုယ်တော်၏အလောင်းကို ထားလီရေ။ 54ယင်းနိန့်စွာ ပြင်ဆင်ရရေနိန့် ဖြစ်ပြီးကေ#23:54 ပြင်ဆင်ရရေ နိန့်ဆိုစွာက ဥပုသ်နိန့် မကျခင် အဖိတ်နိန့်ဖြစ်တေ။ ဥပုသ်နိန့်ကို ကူးဖို့ အချိန်နီးကပ်နီဗျာလ် ဖြစ်ပါရေ။
55ဂါလိလဲပြည်က ကိုယ်တော်နန့်တတူ လိုက်ပါလာရေမမာ့တိလည်း ယောသပ်နောက်ကို လိုက်လာဗျာလ် သင်္ချိုင်းဂူမာ ကိုယ်တော်၏အလောင်းကို ဇာပိုင်ထားစွာကို မြင်ကတ်ရလီရေ။ 56ယေပြီးကေ သူရို့က အိမ်ကို ပြန်လားခပြီးကေ ကိုယ်တော်၏အလောင်းကို ပူဇော်ဖို့အတွက် ဆီမွှီးတိနန့် အမွှီးနံ့သာတိကို ပြင်ဆင်ကတ်လီရေ။ ယေကေလည်း သူရို့က ပညတ်တော်အရ ဥပုသ်နိန့်မာ အနားယူကတ်ရလီရေ။
ទើបបានជ្រើសរើសហើយ៖
သျှင်လုကာ 23: RKINR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Sittwe (မြောက်ပိုင်း ရခိုင်) Bible by Beyond Translation is licensed under Creative Commons Attribution-ShareAlike 4.0 License.
