သျှင်လုကာ 22
22
အခန်း (၂၂)
ကိုယ်တော်ယေရှုကို သတ်ပစ်ဖို့ကြံစိုင်ခြင်း
(သျှင်မဿဲ ၂၆:၁-၅။ သျှင်မာကု ၁၄:၁-၂။ သျှင်ယောဟန် ၁၁:၄၅-၅၃)
1ယေပြီးကေ ပသခါပွဲတော်လို့ခေါ်ရေ တဆီးမဲ့မုန့်ပွဲတော် အချိန် နီးလာဗျာလ်ဖြစ်တေ။ 2ဂျူးပုရောဟိတ်အကြီးအကဲတိနန့် ကျမ်းတတ်ဆရာရို့က ကိုယ်တော်ယေရှုကို တတိတ်သျှေသတ်ဖို့ နည်းလမ်းကို ရှာနီကတ်ပါရေ။ ဇာတွက်နန့်ဆိုကေ သူရို့က လူတိကို ကြောက်နီရေအတွက်နန့် ဖြစ်တေ။ 3ယေပြီးကေ သာဝက တစ်ဆယ့်နှစ်ပါးထဲမာ ပါဝင်သူ ယုဒရှကာရုတ်ဘားကို မာရ်နတ် ဝင်ပူးလီရေ။ 4ယေတွက်နန့် ယုဒက ဂျူးပုရောဟိတ်အကြီးအကဲတိနန့် ဗိမာန်တော်စောင့် အရာဟိတိဘားကို လားဗျာလ် ကိုယ်တော်ယေရှုကို ဖမ်းဖို့အတွက် သူရို့ကို ဇာပိုင် လုပ်ရဖို့ ဆိုစွာကို ပြောလီရေ။ 5ယင်းသူရို့ကလည်း ဝမ်းသာကတ်ပြီးကေ ယုဒကို ဒင်္ဂါးပီးဖို့ သဘောတူလိုက်လီရေ။ 6ယေတွက်နန့် ယုဒက သဘောတူလို့ လူထုပရိတ်သတ် မဟိရေအချိန်မာ ကိုယ်တော်ယေရှုအား သူရို့ လက်ထဲကို ဖမ်းပနာ အပ်နိုင်ဖို့ အခွင့်အရီးကောင်းကို စောင့်နီလီရေ။
ပသခါပွဲတော်အတွက် ပြင်ဆင်ခြင်း
7ယေပြီးကေ တဆီးမဲ့မုန့်ပွဲတော်လို့ ခေါ်ရေ ပသခါပွဲတော်အတွက် သိုးသျှေကို ပူဇော်ရရေနိန့်ကို ရောက်လာပါရေ။ 8ယေတွက်နန့် ကိုယ်တော်ယေရှုက ပေတရုနန့်ယောဟန်ရို့ကို “ပသခါပွဲတော်မာ ငါရို့ အတူတူစားဖို့အတွက် လားဗျာလ် ပြင်ဆင်ကတ်ပါ” လို့ မိန့်တော်မူပါရေ။
9သူရို့ကလည်း “အသျှင်၊ ကျွန်တော်ရို့ကို ဇာနီရာမာ ပြင်ဆင်စီချင်ပါလဲ” လို့ လျှောက်လီရေ။
10ကိုယ်တော်က “မြို့ထဲကို ဝင်ရေအခါ ရီအိုးထမ်းလာရေ လူတစ်ယောက်ကို မြင်လိမ့်မေ။ သူ့နောက်ကို လိုက်ပြီးကေ သူဝင်ရေအိမ်ကို ဝင်ကတ်ပါ။ 11ယေပြီးကေ အိမ်သျှင်ကို ‘ကျွန်တော်ရို့၏ဆရာက တပည့်တော်တိနန့်အတူတူ ပသခါပွဲတော်အတွက် စားသောက်ဖို့ အခန်းက ဇာမာဟိပါလဲလို့ သင့်ကို မိန်းခိုင်းလိုက်ပါရေ’ လို့ ပြောလိုက်ကတ်။ 12ယင်းခါ အိမ်သျှင်က သင်ရို့ကို အထက်ကို ခေါ်လားပြီးကေ အဆင်သင့် အသုံးပြုလို့ရဖို့ အခန်းကြီးတစ်ခန်းကို ပြပါလိမ့်မေ။ ယင်းအခန်းမာ ပသခါပွဲတော်အတွက် ပြင်ဆင်ကတ်ပါ” လို့ မိန့်တော်မူပါရေ။
13ယေပြီးကေ ပေတရုနန့်ယောဟန်ရို့ ထွက်လားရေခါ သူရို့က ကိုယ်တော် မိန့်မှာတော်မူရေအတိုင်းတွိ့ရလို့ ပသခါပွဲတော်အတွက် အစားအစာတိကို ပြင်ဆင်ကတ်လီရေ။
နောက်ဆုံးဂတိသစ္စပြုစားပွဲ
(သျှင်မဿဲ ၂၆:၂၆-၃၀။ သျှင်မာကု ၁၄:၂၂-၂၆)
14ပသခါပွဲတော်စားသောက်ဖို့ အချိန်ကျလာရေအခါ ကိုယ်တော်က သာဝကတိနန့်တတူ စားပွဲခုံမာ ထိုင်လီရေ။ 15ယေပြီးကေ ကိုယ်တော်က သူရို့ကို “ငါ ဒုက္ခဝေဒနာခံစားပနာ အသီမခံရခင် ဒေပသခါပွဲတော်ကို သင်ရို့နန့်တတူတူ စားဖို့ ငါ ကောင်းကောင်း အလိုဟိရေ။ 16သင်ရို့ကို ငါ ပြောမေ။ ဘုရားသျှင်၏သာသနာတော်ထဲမာ ဒေပသခါပွဲတော်၏အဓိပ္ပါယ်#22:16 ပသခါပွဲတော်၏အဓိပ္ပါယ်မာ ပသခါသိုးငယ်ကို ပူဇော်ရေအတွက်နန့် ဂျူးလူမျိုးတိ ကျွန်ဘဝမှ လွတ်မြောက်လာရေပိုင် ကိုယ်တော်ယေရှု အသက်စွန့်လှူလိုက်တေအတွက်နန့် ဘုရားသျှင်၏လူမျိုးတိ အပြစ်က လွတ်မြောက်လားစွာကို ဆိုလိုစွာ ဖြစ်ပါရေ။ ကိုယ်တော်ယေရှုနန့် ပသခါ သိုးငယ်ကိုနှိုင်းထားစွာဖြစ်ပါရေ။ ပြည့်စုံခြင်းကို မရောက်သိတိုင်အောင် ငါက အရာထပ်လို့ ပသခါပွဲတော်ကို စားဖို့ မဟုတ်ပါဗျာလ်” လို့ မိန့်တော်မူလီရေ။
17ယေပြီးကေ ကိုယ်တော်က ခွက်ကို ယူပနာ ဘုရား၏ကျေးဇူးတော်ကို ချီးမွမ်းပူဇော်ပြီးကေ “ဒေစပျစ်ဝိုင်ခွက်ကို ယူဗျာလ် အချင်းချင်း ဝီပြီးကေ သောက်ကတ်ပါ။ 18သင်ရို့ကို ငါ ပြောမေ၊ အဂုကစလို ဘုရားသျှင်၏သာသနာတော် မပေါ်ထွန်းခင်အထိတိုင်အောင် စပျစ်သီးကရရေ စပျစ်ဝိုင်ကို ငါ လုံးဝ မသောက်ပါဗျာလ်” လို့ မိန့်တော်မူပြီးရေခါ
19မုန့်ကို ယူပြီးကေ ဘုရားသျှင်၏ကျေးဇူးတော်ကို ချီးမွမ်းပူဇော်ပနာ မုန့်ကိုဖဲ့လို့ တပည့်တော်တိကို ပီးပြီးကေ “ဒေမုန့်က သင်ရို့ကို ပီးရေ ငါ၏ခန္ဓာကိုယ် ဖြစ်တေ။ ငါ့ကို သတိရရေ အနီနန့် စားကတ်ပါ” လို့ မိန့်တော်မူရေ။
20ယင်းပိုင်းမျိုး စားပြီးရေခါ ကိုယ်တော်က စပျစ်ဝိုင်ခွက်ကို ကိုင်ပနာ “ဒေစပျစ်ဝိုင်က သင်ရို့အတွက် ငါ၏သွီးကို သွန်းလောင်းထားရေ ဘုရားသျှင်နန့် သဘောတူညီမှုအသစ် ဖြစ်တေ။ 21ယေကေလည်း ငါ့ကို ငါ့ရန်သူတိ လက်မာ အပ်ဖို့လူက ဒေစားပွဲခုံမာ ငါနန့်အတူတူ စားနီရေ။ 22လူ့သားတော် သီရဖို့ ဆိုစွာက ဘုရားသျှင် အလိုဟိရေအတိုင်း ဖြစ်တေ။ ယေကေလည်း လူ့သားတော်ကို ရန်သူတိ လက်ထဲကို အပ်ဖို့လူက ဒုက္ ခကြုံရလိမ့်မေ ဖြစ်တေ” လို့ မိန့်တော်မူပါရေ။ 23ယေခါ တပည့်တော်ရို့က သူရို့ဘားက ဇာသူက ယင်းပိုင် မကောင်းရေအရာတိလုပ်ဖို့ ရွယ်စူးနီလဲလို့ အချင်းချင်း မိန်းနီကတ်လီရေ။
ဇာသူအကြီးမြတ်ဆုံးလဲ
24ယေပြီးကေ တပည့်တော်တိက သူရို့အထဲက ဇာသူ့ကို အကြီးမြတ်ဆုံးထားဖို့လဲဆိုစွာနန့် ပတ်သတ်လို့ အချင်းချင်း ဂရုန်းဂရင်း ဖြစ်နီကတ်တေ။ 25ကိုယ်တော်က သူရို့ကို “ဂျူးလူမျိုးမဟုတ်သူရို့၏ဘုရင်တိက သူရို့၏တိုင်းသူပြည်သားတိဘားမာ အမိန့်အာဏာနန့် အုပ်ချုပ်ဗျာလ် သူရို့အာဏာကို အသုံးပြုပြီးကေ သူရို့ကိုလည်း ‘အများအကျိုးဆောင်နီရေလူတိလို့ ခေါ်စီချင်ကတ်တေ’ 26ယေကေလည်း သင်ရို့က ယင်းသူရို့ပိုင် မဖြစ်စီပါကေ့။ သင်ရို့ထဲမာ အရီးပါဆုံးသူက အရီးမပါဆုံးသူပိုင် ဖြစ်သင့်ပြီးကေ သင်ရို့ ဂေါင်းဆောင်လုပ်သူလည်း အငှါးသားတိပိုင် ဖြစ်နီရမေ။ 27စားပွဲမာ စားသောက်ဖို့အတွက် ထိုင်နီသူနန့် အစားအသောက်တိနန့် လောကွပ်လုပ်သူရို့မာ ဇာသူက ပိုလို့ အရီးပါဆုံး ဖြစ်ဖို့လဲ။ စားပွဲမာ ထိုင်ပြီးကေ စားနီသူက ပိုလို့ အရီးပါဆုံးဖြစ်တေ မဟုတ်လား။ ယေကေလည်း ငါက သင်ရို့တိကြားမာ အစားအသောက်တိနန့် လောကွပ်လုပ်သူပိုင် ဖြစ်တေ။ 28ငါက အခက်အခဲနန့် ကြုံလာရရေအခါမာလည်း သင်ရို့က ငါနန့်တတူ ဟိနီခကတ်တေလူတိ ဖြစ်တေ။ 29ငါ၏အဖဘုရားသျှင်က ငါ့ကို ဘုရင်ပိုင် အုပ်ချုပ်ရဖို့ အခွင့်အာဏာကိုပီးရေပိုင် ငါကလည်း သင်ရို့ကို ဘုရင်ပိုင် အုပ်ချုပ်ရဖို့ အခွင့်အာဏာကို ပီးမေ။ 30ယေနန့် ငါ၏သာသနာတော်ထဲမာ သင်ရို့က ငါ့စားပွဲမာ ငါနန့်အတူတူ စားကတ်သောက်ကတ်ရဖို့။ ယေနန့် သင်ရို့က ပလ္လင်ထက်မာ ထိုင်ဗျာလ် အစ္စရေးမျိုးနွယ်စု တစ်ဆယ့်နှစ်စုကိုလည်း အုပ်ချုပ်ကတ်ရလိမ့်မေ” လို့ မိန့်တော်မူရေ။
ပေတရုငြင်ပယ်ဖို့အကြောင်းကို ကြိုတင်လို့မိန့်တော်မူခြင်း
(သျှင်မဿဲ ၂၆:၃၁-၃၅။ သျှင်မာကု ၁၄:၂၇-၃၁။ သျှင်ယောဟန် ၁၃:၃၆-၃၈)
31ကိုယ်တော်က ဆက်ပြီးကေ “ရှိမုန်၊ ရှိမုန်၊ နားထောင်ပါ၊ လယ်သမားက စပါးစိကို အခွံနန့် ခွဲခြားပစ်ရေပိုင် မာရ်နတ်ကလည်း သင်ရို့ တစ်ယောက်ချင်းစီကို စမ်းသပ်ဖို့ အခွင့်ကို တောင်းနီဗျာလ်။ 32ယေကေလည်း ရှိမုန် သင် ငါ့ကို ဆက်လို့ ယုံကြည်နီဖို့စွာကို ငါ ဆုတောင်းပါရေ။ သင် နောင်တရပြီးကေ ငါ့ဘားကို ပြန်လှည့်လာရေအခါမာ သင်၏ညီအစ်ကိုတိဖြစ်တေ အရာတပည့်တိကိုလည်း ငါ့ကို ပိုလို့ ယုံကြည်မှု ခိုင်မြဲစီဖို့ ကူညီပီးပါ” လို့ မိန့်မှာတော်မူလီရေ။
33ယေခါ ရှိမုန်ပေတရုက “အသျှင်၊ ကျွန်တော်က ကိုယ်တော်နန့်တတူတူ ထောင်ကိုဖြစ်ဖြစ်၊ သီဖို့ပင်ဖြစ်ဖြစ်လိုက်ဖို့ အဆင်သင့် ဟိနီပါရေ” လို့ လျှောက်တင်ပါရေ။
34ယေခါ ကိုယ်တော်က “ရှိမုန်၊ သင့်ကို ငါ ပြောမေ။ ဒေနိန့် ကြက်မတွန်ခင် သင်က ငါ့ကို မသိပါလို့ သုံးခါတိတိ ငြင်းလိမ့်မေ” လို့ မိန့်တော်မူပါရေ။
ဖေသာအိတ်၊ ခရီးလားရေအိတ် နန့် ဒါးရှည်
35ယေပြီးကေ ကိုယ်တော်က တပည့်တော်တိကို “ငါက သင်ရို့ကို ဖေသာအိတ်၊ လွယ်အိတ်နန့် ဖိနပ်တိကိုတောင် မယူလားစီဘဲနန့် ဘုရားသျှင်၏သတင်းကောင်းကို ဟောပြောဖို့အတွက် မြို့တိရွာတိကို စီလွှတ်ခစိုင်က သင်ရို့မာ တစ်ခုခု လစ်ဟင်းမူတိ ဟိခကတ်လာ” လို့ မိန်းတော်မူရေ။
ယေခါ တပည့်တော်တိက “မဟိခပါ” လို့ လျှောက်တင်ပါရေ။
36ယေခါ ကိုယ်တော်က “ယေကေလည်း အဂုခါမာ ဖေသာအိတ်ဟိကေ ယူကတ်ပါ။ လွယ်အိတ်ဟိကေလည်း ယူကတ်ပါ။ သင်ရို့မာ ဒါးမဟိကေ အဝတ်အစား တစ်ချို့ကို ရောင်းဗျာလ် ဒါးဝယ်ကတ်ပါ။ 37သင်ရို့ကို ငါ ပြောချင်စွာက ‘သူက ရာဇာဝတ်သားအဖြစ် သတ်မှတ်စွာခံရမေ’ လို့ ကျမ်းစာမာ ရီးထားရေ ငါ့အကြောင်းက ပြည့်စုံလာဖို့ဗျာလ် ဖြစ်တေ ယင်းအရာတိက မကြာခင် အမှန်တကယ် ဖြစ်ပျက်လာဖို့ဗျာလ်” လို့ မိန့်တော်မူရေ။
38ယေခါ တပည့်တော်ရို့က “အသျှင်၊ ကြည့်ပါ။ ကျွန်တော်ရို့ဘားမာ ဒါးနှစ်ချောင်းဟိပါရေ” လို့ လျှောက်တင်လို့
ကိုယ်တော်က “လုံလောက်ဗျာလ်” လို့ မိန့်တော်မူလီရေ။
သံလွင်တောင်ထက်မာဆုတောင်းခြင်း
(သျှင်မဿဲ ၂၆:၃၆-၄၆။ သျှင်မာကု ၁၄:၃၂-၄၂)
39ယေပြီးကေ ကိုယ်တော်ယေရှုက လုပ်လိလုပ်ထဟိရေအတိုင်း သံလွင်တောင်ထက်ကို ကြွတော်မူလီရေ။ တပည့်တော်ရို့ကလည်း သူ့နောက်ကို လိုက်လားကတ်ပါရေ။ 40ကိုယ်တော်က ယင်းနီရာကို ရောက်ရေခါ တပည့်တော်တိကို “သင်ရို့ အပြစ်လုပ်မိအောင် ဆွဲဆောင်စွာ မခံရစီဖို့ ဘုရားသျှင်ဘားမာ ဆုတောင်းကတ်ပါ” လို့ မိန့်တော်မူရေ။ 41ယေပြီးကေ ကိုယ်တော်က သူရို့ဘားကနီ သင့်ရုံလောက်ဝီးရေနီရာကို လားဗျာလ်ဒူးထောက်ပနာ 42“အို အဖဘုရားသျှင်၊ အဖဘုရား အလိုဟိကေ ကျွန်တော်ဘားမာ ဖြစ်လာဖို့ ဒုက္ခဆင်းရဲတိကို ပယ်ဖျက်ပီးတော်မူပါ။ ယေကေလည်း ကျွန်တော်၏အလိုအတိုင်း မဟုတ်ဘဲ အဖဘုရားသျှင်၏အလိုအတိုင်းရာ ဖြစ်စီတော်မူပါ” လို့ ဆုတောင်းလီရေ။ 43ယေခါ ရွှီမြို့တော်က သမ္မာဒေဝနတ်တစ်ပါးက လာပနာ ကိုယ်တော်ကို အားပီးလီရေ။ 44ကိုယ်တော်က ကောင်းကောင်းကြီး ဝမ်းနည်းပူဆွီးဗျာလ် အာရုံစူးစိုက်ပြီးကေ ဆုတောင်းရေအခါ ကိုယ်တော်ဘားက စီးလို့ ကျလာရေ ချွေးလုံးချွေးစက်တိက သွီးစက်တိပိုင် မြီကြီးထက်ကို ကျတော်မူလီရေ။
45ကိုယ်တော်က ယင်းပိုင် ဆုတောင်းပြီးကေ တပည့်တော်တိဘားကို ပြန်လာရေအခါ တပည့်တော်တိက ဝမ်းနည်းပက်လက်နန့် နွမ်းပနာ အိပ်မွန်းကျနီကတ်စွာကို တွိ့ရေလီရေ။ 46ယေခါ ကိုယ်တော်က တပည့်တော်ရို့ကို “သင်ရို့ ဇာအတွက်နန့် အိပ်မွန်းကျနီကတ်လဲ။ သင်ရို့ အပြစ်လုပ်မိအောင် ဆွဲဆောင်စွာတိ မခံရစီဖို့ ထဗျာလ် ဆုတောင်းကတ်ပါ” လို့ မိန့်တော်မူရေ။
ကိုယ်တော်ယေရှုအဖမ်းခံရခြင်း
(သျှင်မဿဲ ၂၆:၄၇-၅၆။ သျှင်မာကု ၁၄:၄၃-၅၀။ သျှင်ယောဟန် ၁၈:၃-၁၁)
47ကိုယ်တော် ဒေပိုင်မိန့်တော်မူနီစိုင်မာပင် သာဝက တစ်ဆယ့်နှစ်ပါးထဲက တစ်ပါးဖြစ်တေ ယုဒက လူအကျိုင်းအရွီပြတ် တစ်ကျိုင်ကို ဦးဆောင်ပနာ ကိုယ်တော်ဘားကို ခေါ်လာပြီးကေ သူက ကိုယ်တော်ကို နမ်းဖို့ အနားကပ်လီရေ။ 48ကိုယ်တော်က သူ့ကို “ယုဒ သင်က လူ့သားတော်ကို နမ်းဗျာလ် သစ္စာဖောက်စွာလား” လို့ မိန့်လီရေ။
49တပည့်တော်တိက ဇာပိုင်မျိုး ဖြစ်ပျက်လာဖို့ ဆိုစွာကို သိရေအတွက်နန့် ကိုယ်တော်ကို “အသျှင်၊ ကျွန်တော်ရို့ သူရို့ကို ဒါးနန့် ခွတ်လိုက်ရဖို့လား” လို့ မိန်းလီရေ။ 50ယေပြီးကေ တပည့်တော်တိထဲမှ တစ်ယောက်က အကြီးဆုံးပုရောဟိတ်တစ်ပါး၏နောက်လိုက်အငှါးသားကို ဒါးနန့်ခွတ်လိုက်လို့ ညာဖက်နားရွက် ပြတ်လားလီရေ။
51ယေခါ ကိုယ်တော်က “ဒေလောက်နန် တန့်ဖိ” လို့ မိန့်တော်မူပြီးကေ ယင်းပြတ်ကျလားရေ အငှါးသား၏နားရွက်ကို လက်နန့်တို့ပြီးကေ နဂိုအတိုင်း ဖြစ်လားစီပါရေ။
52ယေပြီးကေ ကိုယ်တော်က သူ့ကို ဖမ်းဖို့လာရေ ဂျူးပုရောဟိတ်အကြီးအကဲတိ၊ ဗိမာန်တော်အစောင့် အရာဟိတိနန့် ဂျူးလူမျိုးဂေါင်းဆောင်တိကို “သင်ရို့က ငါ့ကို ဖမ်းဖို့အတွက် ဇာတွက်နန့် ဒုတ်၊ ဒါးတိကိုင်လို ဒေနီရာကို လာကတ်စွာလဲ။ သင်ရို့က ငါ့ကို ရာဇဝတ်သားလို့ ထင်နီကတ်လာ။ 53ငါက နိန့်တိုင်း ဗိမာန်တော်မာ ဟိနီရေအချိန်မာ သင်ရို့ ဇာအတွက်နန့် ငါ့ကို မဖမ်းကတ်စွာလဲ။ ယေကေလည်း ဒေအချိန်က သင်ရို့၏အချိန်ဖြစ်လို့ မာရ်နတ်ကလည်း သူ၏တန်ခိုးနန့် မကောင်းရေအပြုအမူတိကို ပြုလုပ်ရေအချိန် ဖြစ်တေ” လို့ မိန့်တော်မူရေ။
ကိုယ်တော်ယေရှုကို ပေတရု ငြင်းဆိုခြင်း
(သျှင်မဿဲ ၂၆:၅၇-၅၈၊၆၉-၇၅။ သျှင်မာကု ၁၄:၅၃-၅၄၊၆၆-၇၂။ သျှင်ယောဟန် ၁၈:၁၂-၁၈၊၂၅-၂၇)
54ယေပြီးကေ သူရို့က ကိုယ်တော်ကို ဖမ်းပြီးကေ အကြီးဆုံးပုရောဟိတ်၏အိမ်တော်ကို ခေါ်လားလီရေ။ ပေတရုက မနီးမဝီးက နောက်ယောင်ခံဗျာလ် လိုက်လားလီရေ။ 55ယေပြီးကေ လူတစ်ချို့က အိမ်၏အလယ်ကောင်မာ ဝိုင်းလို့ ထိုင်ပြီးကေ မီးလှုံနီကတ်တေခါ ပေတရုက သူရို့နန့်တတူ လားဗျာလ် ထိုင်နီလီရေ။ 56အငှါးသမတစ်ယောက်က မီးလှုံဗျာလ် ထိုင်နီရေ ပေတရုကို မြင်ရေအခါ သူ့ကို စစိနနာကြည့်ပြီးကေ “ဒေလူက ယေရှုနန့် အပေါင်းအပါ ဖြစ်တေ” လို့ ပြောလီရေ။
57ယေကေလည်း ပေတရုက “အစ်မ၊ ကျွန်တော် ယင်းလူကို မသိပါ” လို့ ငြင်းလီရေ။
58တနားသျှေကြာရေခါ အရာလူတစ်ယောက်က ပေတရုကို မြင်လိုက်လို “သင်က သူရို့ထဲက တစ်ယောက်ဖြစ်တေ” လို့ ပြောလီရေ။
ယေကေလည်း ပေတရုက “မိတ်ဆွီ ကျွန်တော်က သူရို့ထဲမှ မဟုတ်ပါ” လို့ ငြင်းပြန်ရေ။
59အရာတစ်နာရီလောက်ကြာရေအခါ အရာလူတစ်ယောက်ကလည်း “ဒေသူက ဂါလိလဲပြည်သားဖြစ်လို့ ယေရှုနန့်တတူ ဟိနီခကတ်စွာက သီချာပါရေ” လို့ နောင်းနောင်းနင်းနင်း ပြောလီရေ။
60ယေကေလည်း ပေတရုက “မိတ်ဆွီ သင် ဇာတိ ပြောနီရေ ဆိုစွာကို ကျွန်တော် မသိပါ” လို့ ထပ်လို့ ငြင်းလိုက်တေ။ ယင်းပိုင် ပြောလိုက်တေ အချိန်မာပင် ချက်ချင်း ကြက်တွန်လီရေ။ 61ယေခါ အသျှင်က ပေတရုကို လှည့်ကြည့်တော်မူပါရေ။ ပေတရုက သူ့ကို အသျှင် မိန့်မှာခရေ “ဒေနိန့်ပင် ကြက် မတွန်ခင်မာ သင်က ငါ့ကို မသိပါလို့ သုံးကြိမ်တိတိ ငြင်းလိမ့်မေ” ဆိုရေ စကားကို အတွက်ပေါ်လီရေ။ 62ယေပြီးကေ သူက အပြင်ကို ထွက်ပြီးကေ ယူကျူးမရ ငိုနီလီပါရေ။
63ကိုယ်တော်ယေရှုကို စောင့်ကြည့်နီရရေ စစ်သားတိက ကိုယ်တော်ကို သရော်တော်တော်လုပ်ကပ်ပြီးကေ ဘုတ်သတ်ကတ်ပါရေ။ 64ကိုယ်တော်၏မျက်စိတိကို အဝတ်နန့်ချိုင်ထားပြီးကေ “သင့်ကို ဇာသူ ဘုတ်သတ်နီလဲ ဆိုစွာကို ဟောကြည့်ပါ” လို့ ပြောလီရေ။ 65ယေပြီးကေ ကိုယ်တော်ကို နည်းအမျိုးမျိုးနန့် ညှည်းဆဲနှိပ်စက်ပနာ မထီလေးစား ပြောကတ်လီရေ။
ကိုယ်တော်ယေရှုကို စစ်ဆီးမိန်းမြန်းခြင်း
(သျှင်မဿဲ ၂၆:၅၉-၆၆။ သျှင်မာကု ၁၄:၅၅-၆၄။ သျှင်ယောဟန် ၁၈:၁၉-၂၄)
66မိုးလင်းလာရေအခါ တရားလွှတ်တော်အဖွဲ့ဝင်တိဖြစ်ကတ်တေ ဂျူးလူမျိုးဂေါင်းဆောင်တိ၊ ဂျူးပုရောဟိတ်အကြီးအကဲတိနန့် ကျမ်းတတ်ဆရာတိက တရားလွှတ်တော်မာ#22:66 တရားလွှတ်တော်ဆိုစွာက ဂျူးလူမျိုးဂေါင်းဆောင်တိ အတူတူတွိ့ဆုံပနာ ဂျူးလူမျိုးတိနန့်ပတ်သတ်ဗျာလ် တရားစီရင်ဆုံးဖြတ်တေနီရာဖြစ်တေ။ တတူတူစုကတ်ပြီးကေ ကိုယ်တော်ကို သူရို့ရှိ့ကို ခေါ်လာဗျာလ် 67“သင်က မေရှိယ ဟုတ်လား၊ မဟုတ်လား ဆိုစွာကို ငါရို့ကို ဖြေပါ” လို့ ပြောကတ်ပါရေ။
ယေခါ ကိုယ်တော်က “သင်ရို့ကို ငါ ပြောပြကေလည်း သင်ရို့ ယုံကတ်ဖို့ မဟုတ်။ 68သင်ရို့ကို ငါ မိန်းကေလည်း သင်ရို့ ပြန်လို့ မဖြေကတ်။ 69ယေကေလည်း အဂုချိန်ကစလို့ လူ့သားတော်က တန်ခိုးတော်နန့် ပြည့်စုံရေ အဖဘုရားသျှင်၏လက်ယာဘက်မာ ထိုင်နီလိမ့်မေ” လို့ မိန့်လီရေ။
70ယေခါ သူရို့က “ဒေပိုင်ဆိုကေ သင်က ဘုရားသျှင်၏သားတော်လား” လို့ မိန်းကတ်တေခါ
ကိုယ်တော်က “သင်ရို့ ပြောရေအတိုင်းရာ ဖြစ်တေ” လို့ ပြန်လို့ ဖြေလီရေ။
71ယင်းသူရို့ကလည်း “ငါရို့ ကိုယ်တိုင် သူ့နှုတ်က ပြောစွာကို ကြားရဗျာလ်ဖြစ်လို့ အရာတခုသက်သီလေ့ မလိုပါဗျာလ်” လို့ ပြောကတ်လီရေ။
ទើបបានជ្រើសរើសហើយ៖
သျှင်လုကာ 22: RKINR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Sittwe (မြောက်ပိုင်း ရခိုင်) Bible by Beyond Translation is licensed under Creative Commons Attribution-ShareAlike 4.0 License.
