Mark 9
9
1Tei Bw arwbw boknw sakha, "Ang nokhnw daijw khalaywi sadok, nokh irw bachagwi tongjakrok, nokhni bisingw kainwi kaitham tongw, bok Kaitorni auar pharanbai phaimani nungyasak thwigalak."
Jisuni saoai kwchwng ongkha
(Mothi 17:1-13; Luk 9:28-36)
2Nokha saldokni jerw Pitor, Jakob tei Johonnw tilangwi Jisu hapong kuchugw thangkha arw bokni sakangw Bini saoai kwchwng ongkha. 3Bini ri chumrok iswkjora bak bak chwngkha jebw hayungni ri chum sunairok kaisabw bwtwijar khalaywi sumanya. 4Jerw Eliyo bai Mosiho phaywi nungjak phaikha tei Jisubai kok sani nangkha.
5Aiphuo Pitor Jisunw sakha, "Elim, chwng irw tongmani gamse ongkha. Chwng irw rinok khungtham tangnw, Nini bagwi khungsa, Mosini bagwi khungsa, tei Eliyoni bagwi khungsa."
6Bok iswk jora kirilaikha je, tamanw sani nangnw obwnw Pitor bijiywi manliya. 7Aiphuo chumui dolasa phaywi boknw phwng phaikha, tei o chumui bisingni i kok khanakha, "Bw Ani khajani Sajla, nokh Bini koknw khanadi!"
8Atakkiyani sagrirok ijang uijang naikhoka tei nungkha Mosibai Eliyo odayo kwrwikha, arw Jisuno simin bokbai baksa bachajak nungkha. 9Sagrirok hapongni akhogwi phaiphini Jisu boknw tholma rwkha, "Borogni Sajla kwthwini thangwi bachayasak nokh o nungnainw obwnw kaisanwbw tasadi."
10Sagrirok Jisuni tholmano sokhrwkha, "Matwr kwthwini thangwi bachanai sema tama?" Obwnw bokni bai bok salaini nanglaikha. 11Bok Jisunw swnglaikha, "Kerongnal phwrangsa rok tamani sa, je Eliyose pwilagw maphainai?"
12Jisu boknw sakha, "I kok daijw, Eliyo sakangw phaywi jotho pwilani kosol philwi twbwnw. Matwr Borogni Sajlanw lagwi tani imwtwijar khalaywi kathar elembakgw suijak tong je, Bw kodur dugu masoinai tei borogrok Bwnw gwinw khalaigalak?#9:12 Jisaiyo 53 13Matwr ang nokhnw sadok, Eliyoni kotho jekhalaywi kathar Elembakgw suijak tong obwtwijar khalaywi Bw phaikha, tei borogrok bwnw jekhalaywi khalaini muchuk obwtwijar khalailaikha."
Jisu chaya phalabai manjajak charaisanw hamrwkha
(Mothi 17:14-21; Luk 9:37-43)
14Jephuo bok kothe sagrirokni dayw phaikha, aiphuo bok nungkha boknw kitingwi kodur borog thumjalaijak tei raida phwrangsa kainwi kaitham bokbai tokra rwlaidok. 15Borogrok Jisunw nungwi amok chajalaikha tei khalwi thangwi Bwnw hamchang rwkha. 16Jisu Bini sagriroknw swngkha, "Nokh bokbai tama kothoy lagwi tokra rwlaidok?"
17Borog beser bisingni kaisa sakha, "Elim, ani basa chalanw Nini dayw twphaijak, bwnw chaya phala rumjak jebw bwnw boba khalaywi tonw. 18O phala jephuo bwnw rumwi setra aiphuo bwnw asar rwgwi hagw khibiyw. Bini bukhok daini khuktwi bosbom akhogw tei bw bua bai bua oalwi karak ongwi thangw. Ang nini sagriroknw o pholanw akhorwgwi hodi hinwi kabokjak, matwr bok pharijiya."
19Jisu boknw sakha, "Paitokma kwrwi borogrok! Nokh bai Ang arw sal bwswk tongthai? Arw sal bwswk nokhnw khalog janai? Charaisanw Ani dayo twbwdi."
20Borogrok aiphuo charaisanw Jisuni dayw twbwkha. Jisunw nungwi o chaya phala o charaisanw karak khalaywi rumwi setrakha tei o charaisani bukhokni bosbom akhotwi akhotwi hagw kalaywi baram baram thepragwi tongkha. 21Jisu o charaisani bophanw swngkha, "Bini obwtwijar ongmani salbwswk kakha?"
O charaisani bopha sakha, "Charai phangsini jimin." 22"O chaya phala hor bai twio khibiywi bwnw kodur buthalni naikha. Halai Nwng jwtini mwngsaswk khalai mangkhalai, chwnw khaphurwi kisa chuba ja di!"
23Jisu bwnw sakha, "Nwng tani hingkha, 'Nwng jwtini phariyo hingklai?'" Je paitok bini bagwi churokbw ongmanw."
24Aiphuo o charaisani bopha chirigwi karabwi sakha, "Ang paitogw, ani paitokmanw karak khalaywi rwdi!"
25Kabangma borogroknw baksa khalaywi khalwi phaimani nugwi Jisu o chaya pholanw daisa rwgwi sakha, "O nathong bai bobani chaya phala, Ang nokhnw tholma rwdok, o charaisanni bisingni akhogwi phaidi. Bini bisingw nwng arw tahapdi!"
26Aiphuo o chaya phala chirigwi charaisanw karak khalaywi setragwi rumkha tei bini bisingni akhogwi phaikha. Obwbai charaisa thwijakni kosol khalaywi kalaywi tongjak nugwi kodur borog salaiba, "Bw thwise thwikha." 27Matwr Jisu o charaisanw yak rumwi tisakha tei bw bachakha.
28Obwni jerw Jisu bai Bini sagrirok nok khungsago habkha tei Bini sagrirok tep khalaywi Bwnw swngkha, "Chwng tamani bagwi obwnw rwkhlai manliya?"
29"Suri sankhalaise obwtwijar chaya pholanw rwkhlai homanw." Ai hinwi Jisu sakha.
Jisu sakni thwinai kotho lagwi arwbo oaisa sakha
(Mothi 17:22-23; Luk 9:43-45)
30Jerw bok o jeganw yakarwi Galil amchoini bisingtwi khalaywi thangkha. Jisu naikha bok bwrw tongdok obwnw kaisabw siyatwi, 31tamni hinba aiphuo Bw Bini sagriroknw phwrwngdok. Bw boknw sakha, "Borogni Sajlanw borogrokni yagw rumwi rwnw tei bok Bwnw buthalwi pairwnai. Matwr salthamni salw arwbw Bw thangwi bachanai."
32Sagrirok Bini kokni sema bijimanniya, arw bok o kothoynw lagwi Bwnw swngni kirilaikha.
Kaitorni mokolw swrw jothoni solai gara?
(Mothi 18:1-5; Luk 9:46-48)
33Obwni jerw Jisu bai Bini sagrirok Kophornahumo phaikha. Nok bisingw thangwi Jisu Bini sagriroknw swngkha, "Nokh lamagw tama kothoy lagwi tokra rwlaikha?"
34Sagrirok phwrwk pharak khalaywi tonglaikha, tamni hinba swrw jothoni solai gara obwnw lagwi bok lamago tokra rwlaijak. 35Aiphuo Jisu achugwi O sagri kaichinwi nw ringkhogwi sakha, "Swkang ongni muchuknai borog bw jothoni ulo matongnai tei jothoni seleng bw maongnai."
36Tei Bw charai kaisanw lagwi sagrirokni sakangw bamkha arw o charainw khuriyo lagwi Bw sakha, 37"Kaisaswk Ani mwngwi imwtwijar charainw yachagwi lakhalai bw Anwbw yachagw, tei bw keber Anw mamangya, Anw je honaisa Bwnw bw yachagw."
Swrw chini phaiching
(Mothi 10:40-42; Luk 9:49,50)
38Johon Jisunw sakha, "Phwrangsa, borog kaisanw Nini mwngni pharanbai chaya phala rwkhlaimani chwng nungkha. Chini borogya hinwi chwng bwnw obwtwijar takhlaidi hinkha."
39Jisu sakha, "Bwnw aikhlaywi tahindi, tamni hinba Ani mwngwi amok chajanaijar samung tangwi paywi kaisabw Anw seja khalaimanya, 40tamni hinba jebw chini beaita tongya, o borogbw chini phaichingse. 41Ang nokhnw daijw khalaywi sadok, kaisaswk nokhnw Mosihoni borog hinwi twi gelesa khanw hingkhai, bw bini amrainw kamajagalak."
Sumsokni kothoy
(Mothi 5:13-16; 18:6-9; Luk 14:34,35; 17:1,2)
42"Kaisachwk jwtini Anw paitoknai i cherokrokni bisingni kaisaswknw sumsokni lamagw tilangw hingkhalai bini gwdanao jata thaisa khagwi bwnw twijalangw khibimani bini bagwi arw gam ongnw. 43Nini yak jwtini nwnw sumsokni lamagw tilangkhalai obwnw tanwi pairwdi. Yak kongnwi lagwi morkeni horo khammani solai, khora ongwi paiphlaiya langmagw habmani arw gam ongnw. 44[Morkeo borog kwthwini bakhan chanai yongrok oaisabw thwiya tei hotbw thwiya.]#9:44 Markni kwrwngsa kwrwngnwi kacham Grik bijabw i khep tei 46 khep kwrwi. 45Nini yakung jwtini nwnw sumsokni lamagw tilangkhalai obwnw tanwi pairwdi. Yakung kongnwi lagwi morkeni hotbai khammani solai, khora ongwi paiphlaiya langmagw habmani arw gam ongnw. 46[Morkeo borog kwthwini bakhan chanai yongrok oaisabw thwiya tei hotbw thwiya.] 47Tei nini mokol jwtini nwnw sumsokni lamagw tilangkhalai obwnw sukugwi pairwdi, mokol kolnwi lagwi morkeni hotbai khammani solai mokol kolsabai paiphlaiya langmagw habmani arw gam ongnw. 48Morkeo borog kwthwini bakhan chanai yongrok oaisabw thwiya tei hotbw thwiya.
49"Som rwjakni kosol churokni sakaobw hot rwanw.
50"Som gam, matwr som bini parabnainw kamajakhalai tama khalaywi nwng o somnw arw parab rwthai? Nokhni kha bisingw som tondi tei nokh kaisa bai kaisa khakchangw tongdi."
ទើបបានជ្រើសរើសហើយ៖
Mark 9: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh