Mark 8
8
Jisu borog kai brwisainw charwkha
(Mothi 15:32-16:4)
1Jerw salsa arwbw kabangma borog kuthum phaikha. O Borog rokni dayo mungsa chamwng kwrwi hinwi Jisu Bini sagriroknw ringwi sakha, 2"I borogroknw Ang khakhamjadok, twmwi himba tini saltham kadok bok angbai baksa baksa tongmani, matwr bokni dayo mungsa chamwng kwrwi. 3Ang jwtini boknw charwya karwi nugo hogw hingkhai, bok lamago mursa thangnai, twmwi hinba bokni bisingni kabangma borog kachalni phailaijak."
4Sagrirok Jisunw sakha, "I hangkw kwrwi jagao i kabangma borogrokno charwni bagwi, bwdaini iswk chamungnw manthai?
5Jisu boknw swngkha, "Nokhni dayo lep bwswk auan tong?"
Sagrirok sakha, "Lepsni auan tongw."
6Bw borogroknw hagw achukdi hinwi tholkha. Jerw Bw o auan lebsininw lakha arw Kaitornw hambai rwgwi sapaikha tei borogroknw bakgwi rwni bagwi sagrirokni yagw rwkha. 7Sagrirokni dayo aa gira maknwi maktham tongw. Jisu aa gira rokni bagwibw Kaitornw hambai rwkha tei borogroknw bakgwi rwdi hinwi sagriroknw sakha. 8Arw borogrok jothobw owk plwngsa chalaikha, Jerw bara turoknai bechalaroknw sagrirok kholwi lagwi khopara khungsini pwlwng rwkha. 9-10Odayw brwisai twtwi borog tongw. Ulo Jisu o borogroknw hamalai rwkha tei sagrirok bai baksa rungw kagwi Dolmanutha jilao thangkha.
Phorisirok Jisu bai tokra rwlaikha
(Mothi 16:1-16; Luk 9:18-20)
11Odayo Phorisirok phaywi Jisu bai tokra rwlaikha. Bwnw bajai naini bagwi chukhani mwngsaswk sidom naini bikha. 12Jisu hangla kalok hogwi sakha, "Tabokni borogrok tamani bagwi sidomni samung naini hin? Ang daijw khalaywi nokhnw sadok, boknw omwtwijar mwngsa sidom phunukglak." 13Iswk jora sagwi Bw boknw yakarwi arwbw rungw kagwi twithuni uijang narw thangkha.
Jisu sagriroknw hus khaywi tongdi hinkha
(Mothi 16:1-16; Luk 9:18-20)
14Sagrirok logeyo auan lani palokjak, rungw bokni dayw keber auan lepsani bader arw auan lepsabw kwrwi. 15O joragw Jisu boknw sakha, "Nokh chetwn tongdi, Phorisirok bai Herodni chothani kothoyw hus khaywi tongdi."
16Aithani bagwi bokni bai bok salaini nangkha, "Chini dayw auan kwrwi hinwise Bw o koknw sakha."
17Bok ta kothoyw sadok Jisu obwnw biji manwi boknw swngkha, "Nokh tamani nokhni dayo auan kwrwi hinwi salaidok? Nokh tama tabokbw siyakho dwi? Nokh tama bijiyakho dwi? Nokhni bakharok tama iswk karak? 18Nokhni mokol tongwibw nokh tama nungya? Khunjur tongwibw nokh tama khanaya? Nokhni tama bakhabw kaya dwi? 19Jephuo ang kai ba sai borogroknw auan lepba swpaywi charwjak, aiphuo nokh khopara bwswk auan bara kholwi tisajak?" Bok sakha, "Khopara chinwi."
20Jisu arwbw sakha, "Halai jephuo Ang borog kai brwisaini bagwi auan lepsini swpaiphini aiphuo nokh khopara bwswk auan bara kholwi tisajak?" Bok sakha, "Khopara sni."
21Aiphuo Bw boknw sakha, "Nokh tama tabokbw bijiya?"
Jisu kana kaisanw mokol nungrwkha
22Jisu bai Bini sagrirok Bwitsoda kamio phaikha. Oroni borogrok kana kaisanw Jisuni dayw twiphaikha arw kanasani basagw kisa yak tondi hinwi bok Jisunw hayokkha.
23Jisu o kanasanw yak rumwi kamini phataro tilangkha. Bw o borogsani mokolw khuktwi phulkha tei bini sakagw yak tonwi bwnw swngkha, "Nwng tama mwngsaswk nungdok?"
24O borogsa mokol phiyokha tei sakha, "Ang borog roknw nungdok, bok naini bophangni kosol, matwr bok himdok."
25Jisu o borogsani mokolw arw oaisa yak rwkha. Aiphuo o kanasa naikhokha tei bini mokol hamwi thangkha. Bw jotho parai parai khalaywi nungkha. 26Jisu bwnw i koknw sagwi nogw hokha, "O kamio tase tathangsidi."
Pitor sakha Subrai Jisuse Mosiho
(Mothi 16:13-20; Luk 9:18-21)
27Aiphuo Jisu Bini sagrirok bai Kwisoria Philipi aulini korekarani kamirokgw thanglaikha. Lamao Bw boknw ai hinwi swngkha, "Anw sadi, Ang swrw obwnw lagwi borogrok tama sa?" 28Sagrirok sakha, "Dagisa hinw baptismo rwnai Johon, tei dagisa hinw Eliyo, dagisa diyarirokni bisingni kaisa hinw."
29Aiphuo Jisu boknw swngkha, "Halai nokh tama hin? Ang swbo?"
Pitor sakha, "Nwng o Mosiho."
30Jisu boknw i koknw kaisanwbo tasadi hinwi tholkha.
Jisu Bini thwinainw lagwi sakha
(Mothi 16:21-28; Luk 9:22-27)
31Aiphuo Jisu Bini sagriroknw ai hinwi phwrwngkha, "Borogni Sajla kodur dugu mabuginw, okara chakararok, chontai ojarok tei kerongnal phwrangsa rok Bwnw gwinw khalaigalak. Bwnw buthalwi pairwnai, hekphwng Bw salthamni salo kwthwi daini thangwi bachanai." 32Bw o koknw boknw galang galang khalaywi sakha, obwni bagwi Pitor Bwnw simin pangkaisa tilangwi daisa rwni nagnkha. 33Jisu ulphilwi Bini sagrirokni aita naiswkha tei Pitornw daisa rwgwi hinkha, "Saitan, nwng Ani daini thangdi. Twmwi hinba nini i oansokma Kaitorni daini phaijiya borogni dainise phaiyw."
34Aiphuo Jisu borogroknw tei Bini sagriroknw Bini dayw ringkhogwi sakha, "Kaisaswk ani lamao phaini naikhalai bw bini muchukmwngtwi tahimthwk, sakni krusnw sak balwi lathwk arw Ani ukhum ukhum phaithwk. 35Kaisaswk sakni langmanw rwkhiya khalaini muchukhalai bw bini kwbwi langmanw kamajanw, matwr kaisaswk ani bagwi tei Kaitor rwnai kaham kothoni bagwi bini langmanw kamajao hingkhalai, bw kwbwi langmanw rwkkhiya khalainw.
36"Kaisaswk jwtini jotho swngsarnw manw, matwr obwni bagwi o borog bini kwbwi kwbwi langmanw kamajagw hingkhalai bini tama amre? 37Twmwi hinba kwbwi langmanw philwi manni bagwi bini rwjanai jar tama tong? 38Twmwi hinba i molw tongnai borogrokni bisingni jebwrok sumsok tei sinalchua khalai, bok kaisachwk jwtini Ani bagwi tei Ani kokni bagwi lachijagw, halai jephuo Borogni Sajla kathar Suarirokbai baksa Bini Phani chwngsachabai phainw, aiphuo Bwbo o borognw lagwi lachijaknw."
ទើបបានជ្រើសរើសហើយ៖
Mark 8: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh