Mark 10
10
Chala bwrwi kaklainai kothoyw phwrwngma
(Mothi 5:31,32; 19:1-10; Luk 16:18)
1Jerw Jisu Kophornahum yakarwi Jihudiya amchoini arw Jordon twibukni oijang narw thangkha. Tei kodur borog arwbw Bini dayw phaywi thumja laikha. Aiphuo Bw jwnwm jekhalaywi phwrwng obwtwijar khalaywi boknw phwrwngni nangkha. 2O jorao Phorisirok phaiywi Jisunw bajai naini bagwi swngkha, "Mosini kerongnalni maping kaisa chala tama bini bwrwinw kakmanw?"
3Jisu bokni kokni joba rwgwi sakha, "Mosi nokhnw ta tholjak?"
4Bok sakha, "Bw kaklainai poklai rwgwi sakni bwrwinw kakdi hinwi suijak."
5Jisu boknw sakha, "Nokhni kha karak thani Mosi o tholmwngnw suimani. 6Matwr takni cheng phini imw suijak tongw, 'Kaitor boknw chala tei birok khalaywi takjak.' 7'Obwni bagwi borog boma bophanw yakarwi rwnw tei bwrwibai kwrwngjaknw, 8tei bok kainwini basak kwrwngsa ongnai.' Aithani bok tabok arw kainwiya kaisase. 9Aithani bagwi Kaitor jebwnw kwrwngrwjak borog obwnw pharok takhalaitwk."
10Jerw jephuo Jisu tei Bini sagrirok arwbw nogw phaikha, bok o kothoyw Jisunw swngkha. 11Aiphuo bw boknw sakha, "Kaisachwk sakni bwrwinw kagwi arw kaisanw lakhalai, bw bini bwrwini baithe sinalchua khalayw, 12Arw Bwrwibw jwtini sakni chalanw kagwi arw kaisanw lakhalai bwbw sinalchua khalaiyw."
Charai roknw lagwi phwrwngmani
(Mothi 19:13-15; Luk 18:15-17)
13Jerw borogrok gira gira cherokroknw Jisuni dayw twbwgwi phaini nangkha, jate Bw bokni sakagw Bini yak tonnaitwi. Matwr sagrirok o borogroknw kulni nangkha. 14Aiphuo Jisu obwnw nungwi thamchi kakha tei sagriroknw sakha, "Cherokroknw Ani dayw phaini rwdi, boknw tamathakdi, twmwi hinba Kaitorni auar boktwijar borogroknise. 15Ang nokhnw daijw khalaywi sadok, cherokni kosol kaisaswk Kaitorni auarnw goseywi layakhalai bok kaisabw Kaitorni auarw thangma galak."
16Jerw Jisu cherokroknw Bini khuriyw lakha tei bokni bokhorogw yak tonwi hamari rwkha.
Kaisa ganang borog
(Mothi 19:16-30; Luk 18:18-30)
17Jisu jephuo lamao akhoka aiphuo kaisa borog khalwi Bini dayw phaikha arw Bini sakangw yathwi mokoromwi sakha, "O gam Elim, anw sadi, paiphlaiya langma manani bagwi ang tama tama khalaitai?"
18Jisu bwnw sakha, "Anw tani gam hindok? Kaitorni bader arw kaisabw gam kwrwi. 19Nwnglai tholmwng roknw siyw, "Tabuthaldi, sinalchua takhalaidi, takhokdi, misa yakumu tarwdi, tabanedi, nini nama naphanw borom rwdi.'"
20O borogsa Bwnw sakha, "Elim girani jimin ang imwroknw paleywi phaijak."
21Aiphuo Jisu bini aita naikhokha tei bwnw hamjakha. Bw sakha, "Kwrwngsa manwi nini khalaijiya tongw. Thangdi, nini jebw jebw tong obwnw phalwi bigra roknw yakpi rwdi. Obwbai nwng chukhani rangri mannai. Obw phaikhalai phaywi Ani sagri ongphaidi."
22I koknw khanagwi borogsani makhang kwswm ongkha. Twmwi hinba bini kabang rangri tongw hinwi bw duguchak ongkha tei thangwi paikha.
23Aiphuo Jisu korekara naikhogwi bini sagriroknw sakha, "Ganangrokni dayw Kaitorni auarw hapni bari karak!"
24Bini koknw khanagwi sagrirok amok chalaikha, matwr Jisu arwbw boknw sakha, "Basarok, jebwrok rangmaini sakagw puiton khalai bokni bagwibw Kaitorni auarw hapni bari karak! 25Kaitorni auarw kaisa ganang habmani naikhalai sibi balamtwi ut hapni kalaisa ongnw."
26Aiphuo bok arw kabangma amok chagwi salaini nagkha, "Halai swrw sumsok daini tekhokma mannai?"
27Jisu bokni aita naikhogwi sakha, "Borog phariya, matwr Kaitor phariya mwngsabw kwrwi, Kaitor jotho phariyw."
28Aiphuo Pitor bwnw sakha, "Naidi, chwng chini jotho yakarwi nini sagri ongkha."
29Jisu sakha, "Ang nokhnw daijw khalai sadok, kaisaswk Ani bagwi arw Kaitorni rwnai kothomani bagwi bokni nok hok, takhuk bukhuk, Ma pha, basa bwtwi arw harung hatai yakarwi rwjak, 30bok i molo bini rasabang kwbang nok hok, takhuk bukhuk, ma, basa bwtwi tei harung hatai mannai arw obwni loge loge satokmabw mabuginai tei phainai molo bw paiphlaiya langma mannai. 31Matwr tabok jebwrok pwila, bok paithakgw khalainai, arw tabok jebwrok paithakgw, bok pwila ongnai.
Subrai Jisu tharem pala Bini thwinaini kothoyw sakha
(Mothi 20:17-19; Luk 18:31-34)
32Omo paikhlai Jisu tei Bini sagrirok Jirusalem aita thangni nangkha, tei Jisu bokni sakang sakang thangdok. Sagrirok amok chalaidok, tei je borogrok bokni ukhum ukhumw thanglaidok bok kiri kiriywi thanglaidok. Aiphuo Jisu Bini kai chinwi sagrinw pang kaisa tilangwi Bini sakni sakao jebw jebw ongnw omonw lagwi sani nangkha. 33Jisu boknw sakha, "Naidi, chwng Jirusalemw thangdok, odaiyw Borogni Sajla chontai ojarok arw raida phwrwngnai rokni yagw rumwi rwjanai. Bok Bini nalchir khalaywi Bwnw buthalwi pairwnai chugw hinwi thi khalainai tei Bejihudirokni dayw bwnw rumwi rwnai. 34Arw bok Bwnw thechra thwngnw, Bini basagw khuktwi salnw, Bwnw lathamsakbai bunw tei buthalwi pairwnw. Matwr saltamni salw Bw arwbw thangwi kasanai."
Jakob bai Johonni kabokma
(Mothi 20:20-28)
35Jerw Sibdiyoni basala kainwi Jakob bai Johon, Bini dayw phaywi sakha, "Elim, chini muchumwng ongkha imw, chwng jebw nai Nwng chini bagwi obwnw khalaidi."
36Jisu sakha, "Nokh Anw nokhni bagwi ta khalairwni muchuk?"
37Bok sakha, " Nwng jephuo chwngsacha bai bugiri khalainw aiphuo chini daini kaisa Nini yagara aita arw kaisa yaksi aita achok mannaitwi."
38Jisu boknw sakha, "Nokh ta naidok nokh obwnw siya. Ang je duguni nwngkhap bai nwngni thangdok nokh ta obwbai nwngmagw? Eba je baptismo Ang lani thangdok, o baptismonw tama nokh lamannw?"
39Bok sakha, "Chwng, pharinw."
Jisu boknw sakha, "Ang jebwbai nwng, obwbai nokhbw nwngnai tei ang jekhalaywi baptismo lajak nokhbw obwtwijar khalaywi baptismo lanw. 40Matwr jebwrokni bagwi Ani yagara eba yaksi aita achuknai jega thi khalaijak, bokni bader arw kaisanwbw achukrwni Ani bagri kwrwi."
41I koknw khanagwi arw kaichi sagri Johon bai Jakobnw thamchi kalaikha. 42Aiphuo Jisu boknw jothonw baksa khalaywi ringkhogwi sakha, "Nokh siyw je, Bejihudini sakwlpharok bokni sakagw bagurai phunugw, tei bokni ojaroknibw bokni sakagw sarai baguraima tongw. 43Matwr nokhni bisingw obw ongthaiya, obwni naikhalai nokhni bisingw je kotor ongni nai, bw nokhni mwngnaisa maongnw. 44Arw je pwila ongni nai bw jothoni seleng maongnai. 45Twmwi hinba Borogni Sajla mwngjani bagwi phaiya matwr mwngnise phaiyw arw kabangma borogni yoknai morok hinwi sakni singlinw rwnise phaiyw."
Kana Borotimoy hamkha
(Mothi 20:29-34; Luk 18:35-43)
46Jerw Jisu bai Bini sagrirok Jiriho aulio thangkha. Jephuo Jisu tei Bini sagrirok arw kodur borogbai baksa aulini thanglaidok aiphuo Timothiyoni basa Borotimoy hinwi kaisa kana bigra lama koriyo achukjak. 47Bw jephuo khanakha je Bw ongkha Nasarotni Jisu, aiphuo bw chirigwi sakha, "O Jisu Dayudni basa, anw khairokdi."
48Obwbai kainwi kaitham bwnw daisa rwgwi phwrwk tongdi hinwi sakha, matwr bw arwse chirigwi sakha, "Dayudni basa, anw khairokdi."
49Jisu bathagwi sakha, "Bwnw ringkho."
Borogrok kanasanw ringkhogwi sakha, "Takiridi, bachadi. Jisu nwnw ringkhodok." 50Aiphuo bw bini basakni gadunw kibiywi bachulugwi bachakha tei Jisuni dayw thangkha.
51Jisu bwnw swngkha, "Nwng Anw nini bagwi tama khalairwni muchuk?"Kanasa sakha, "Elim, ang nungni nayw."
52Jisu sakha, "Thangdi, nwng paitokha thani hamkha." Obwbai o borogsa loge loge nungkha arw lamatwi Jisuni ukhum ukhum thangni nangkha.
ទើបបានជ្រើសរើសហើយ៖
Mark 10: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh