Mothi 27
27
Pilatni sakangw Subrai Jisu
(Mark 15:1; Luk 23:1,2; Johon 18:28-32)
1Aichok aita chontai ojarok bai Jihudini okara chakara rok thi khalaikha tama khalaywi Jisunw buthalmanw. 2Bok Jisunw khagwi tilangwi Jihudiya amchoini twiphang Pilatni orw abwi rwkha.
Jihuda thwimani
(Prerit 1:18,19)
3Jisunw kena rokni yagw rumwi rwjak, o Jihuda jephuo nungkha Jisunw khatta ganang hinwi phunukha eiphuo bini khao dugu mangkha. Bw chontai ojarokbai okara chakararokni dayw o lep thamchi ruphaini pwisa manjak, obwnw philwi rwgwi sakha, 4"Ang khatta kwrwi kaisanw buthalni bagwi nokhni orw abwi rogwi bwbai ang kabangma sumsok khalaikha."
Bok sakha, "Obwbai chini tama? Imw nini tangdai."
5Ephuo o Jihuda o ruphaini pwisa roknw noktharw kokholwi kalangwi thangkha tei kutogw budok rwgwi thwikha.
6Chontai ojarok o rangroknw thumwi lagwi sakha, "I rangroknw noktharni ruai bai baksa dalwi tongmani chini kerong nalw baithe samung, twmwi hinba imw thwini morok. 7Jerw bokni bai bok kok taklaywi o rangbai buihani borogni bagwi sajrani#27:7 sajra Imw ongkhadoi jebwrok hani twk gola, mairang, maitwk tak boknw i mwngbai ringw. daini kwrwngsa mangkhorlwng ha paywi lakha. 8Obwni bagwi o harungnw tabokbw 'thwini harung' hinw. 9Imwbai diyari Jiromiyoni bisingtwi je kok sajak obw kwplwng ongkha: "Bok o lep chitham ruphaini pwisanw lakha. Imw ongkha Bini dwr jebw Israyelni borogrok Bini bagwi thik khalaijak. 10Subrai jekhlaiywi anw tholjak obwni kosol khalaywi bok sajrani harungni bagwi I rangroknw rwkha."
Pilat Jisunw swngkha
(Mark 15:2-15; Luk 23:3-5,13-25; Johon 18:33-19:16)
11Jisu ephuo twiphang Pilatni sakangw bachajak, tei Pilat Bwnw swngkha, "Nwng tama Jihudirokni bugra?"
Jisu joba rwgwi sakha, "Nwngse sakha."
12Chontai ojarok tei okara chakararok Jisuni baithe kabangma dosa rwni nangkha, matwr Jisu mwngsabw joba rwliya. 13Ephuo Pilat Bwnw swngkha, "Bok Nini baithe jeswk jora yakumu rwdok Nwng tama obwnw khanadokya?" 14Matwr Jisu mwngsabw kok philliya. Obwbai o twiphang amok chakha.
15Yokma terni jorao sakwlpharok sudam mapi borogni muchukmatwi jephwng kaisa alonginw yokrwgw. 16O jorao Jisu Barabba mwngwi kaisa alongi tongw. Jothobw siyw bw bwswk jora chaya samungbai kaphajak. 17Borogrok thumjalaywi phaikhalai, jerw Pilat boknw swngkha, "Nokh tamanw nai? Nokhni dayw ang swnw hogwi rwthai. Barabbanw na jebwnw Mosiho hin o Jisunw?" 18Pilat siyw, chontai ojarok Jisunw risi kagwi rumrwgwi rwgw.
19Pilat jephuo nalchirni jegao achokha aiphuo bihik bwnw sagwi hokha, "I khatta kwrwi borognw mwngsabw takhalaidi, miya horni emangw Ang Bini bagwi kabangma tekto manjak."
20Matwr chontai ojarok tei okara chakararok borogroknw jugogwi rwkha bok Barabbanw yokrwni bagwi biywi lanaitwi tei Jisunw buthaldi hinwi sanaitwi. 21Jerw twiphang borogroknw swngkha, "I kainwi daini ang nokhni dayw swrwnw hogwi rwthai?"
Bok sakha, "Barabbanw."
22Ephuo Pilat boknw sakha, "Halai Jebwnw Mosiho hin o Jisunw lagwi ang tama khalaitai?"
Bok jotho sakha, "Bwnw kruso rwrothok."
23Pilat hinka, "Tamani bagwi, Bw tama khatta khalaikha?"
Obwbai bok arwse chirik chirigwi sani nangkha, "Bwnw kruso rwrothok."
24Jephuo Pilat nungkha bw mwngsabw khalai mandokya tama hinba arwse bok golmal khalaidok, ephuo bw twi lagwi borogrokni sakangw yak sugwi sakha, "I borogsani thwini bagwi ang daichaya, Nokhse daicha."
25Borogrok philwi sakha, "Chwngbai chini basarok Bini thwini daicha ongnai."
26Ephuo Pilat Barabbanw borog rokni yagw hogwi rwkha, arw Jisunw lathamsakbai bugwi kruso rwdi hinwi thwlkha.
Selengrok Jisunw thechra thwngkha
(Mark 15:16-20; Johon 19:2,3)
27Ephuo twiphang Pilatni sengkrak rok Jisunw Pilatni baichuk nogw tilangwi thangkha tei jotho sengkrak roknw Jisunw kiting rwgwi thumkha. 28Bok Jisuni ri chumnw khugwi arw Bwnw kachak ri chumrwkha. 29Arw bok busubai motok banaywi Jisunw hongrokha tei Bini yagw kwrwngsa latha rwkha, jerw Bini sakangw yesu mokromwi achok rwkha, Bwnw theta khalai hinka, "Chwngsacha, Jihudini bugrani!" 30Aiphuo bok Bwnw khuktwi salka tei o lathabai Bini bokhorogw tukkha. 31Bwnw theta khalai paikhalai jerw bok o rinw khengwi rwkha tei arwbw Bini sakni ri chumnw kangrwgwi Bwnw kruso rwni bagwi tilangwi thangkha.
Krusni sakagw Subrai Jisu
(Mark 15:21-32; Luk 23:26-43; Johon 19:17-27)
32Odaini thangphuni selengrok Kuriniyo aulini Simon hinwi borog kaisabai nunglaikha. Selengrok bwnw Jisuni krusnw balwi tilangdi hinwi thwlkha. 33Jerw bok Golgatha hinwi kwrwngsa jegao phaika, jebwni sema "Bokhorok Chara Jega." 34Odaio sokpaywi bok uamtwi bwtwi dayw mwkhwrwi bwtwi dalwi Jisunw khanrwkha. Jisu obwnw bukhogw rwgwi arw nwngni nainiya.
35Jisunw kruso rwgwi paywi selengrok gana khlaiwi bini ri chungnw boknibai bok baklai lalaikha. 36Aiphuo bok orw achugwi Bwnw mwrwgwi tongni nangkha. 37Bok Jisuni bokhorok sakagw kruso Bini khatani kok ai hinwi suiywi bugwi rokha, "I Jisu, Jihudini bugra." 38Ephuo bok kainwi sikoknwbw Jisubai baksa kruso rojak, kaisanw yagara aita arw kaisanw debara aita. 39Jebwrok o lamatwi thanglaidok bok kopa nalwi Jisunw theta khalai sakha, 40"Oi, Nwngyadwi Jihudirokni noktharnw sapaywi arwbw obwnw saltamni bisingw tangmanw! Halai taboklai saknw rokhiya khalai. Nwng jwtini Kaitorni basa hingkalai halai Krusni akhogwi phaidi."
41Obwtwijar khalaywi chontai ojarok tei kerongnal phwrangsa rok arw okara chakararok Jisunw theta khalai hingka, 42"O borogsa arw borogroknw rokhiya khalaiyw, matwr taboklai saknw rokhiya khalaimiya. Bwlai Israyelrokni bugra! Tabok krus daini akhogwi phaithok. Halai chwng bwnw paitoknai. 43Bw Kaitorni sakagw paitokgwi tongw, Halai tabok Kaitor Bini sakagw sokh manjamwng tongw hingkhalai Bw Bwnw idaini tekhoktok. Bwlai saknw Kaitorni Sajla hinwi hinw." 44Jisubai baksa je sikok roknw kruso rwrwjak bokhbw o koknw sagwi theta khalaika.
Subrai Jisu thwimani
(Mark 15:33-41; Luk 23:44-49; Johon 19:28-30)
45Jerw o salw diphwr dam chinwini jimin sarini dam tham jora jotho amchoi andar ongwi tongkha. 46Tei sarini dam thamni jorao Jisu chirigwi sakha, "Eli, Eli, lema sabaktani," eba Kaitor ani, Kaitor ani, Tani nwng Anw yakarwi thangkha?"
47Jebwrok odayw bachalaijak bokni bisingni kainwi kaitham bini o koknw khanagwi sakha, "Bw Eliyonw ringkhodok."
48Bokni daini kaisa aiphuo khalwi thangwi kwkhwrwi uamtwi bwtwiyo sponj chwmwi lakha tei latha kwrwngsani bokhorogw obwnw khagwi Jisunw nwngni rwkha. 49Matwr kotherok sakha, "Tongthok, naigarano Eliyo Bwnw rokhiya khalainide phaino."
50Jisu arwbw oaisa chirigwi paywi Bw Bini paithak hangala hokha. 51Aiphuo loge loge Jihudirokni noktharni porda sakani jimin tola jora kichigwi chelaknwi ongwi thangkha arw bangla ongkha arw kabangma holong baywi thangkha. 52Arw kabangma simalwng khulaijakha tei Kaitorni je borogrok thwi thangjak bokni bisingni kabangma thangwi bachakha. 53Tei Jisu thangwi bachagwi paikhalai bok simalong daini akhogwi kathar aulio bisingw thangkha. Bok odaio kabangma borogbai nungjakha.
54Krusni koreyw birinpha tei sengkrak rok jebwrok bwbai baksa Jisunw mwrwklaidok, bok bangla tei kothe jotho tolpinw nugwi kabangma kirima habwi salaikha, "Daijwse, Bw ongkha Kaitorni Sajla."
55Kabangma birimarokbw odaini langchao bachagwi jotho naijak. Jisunw mwngni bagwi bok Galilni Bwbai baksa phaijak. 56Bokni dayw tongw Mogdolini Moriyom, Jakobbai Josepni boma Moriyom bai Sibdiyoni basala Jakob bai Johonni boma.
Subrai Jisuni simalong
(Mark 15:42-47; Luk 23:50-56; Johon 19:38-42)
57Swinda ongkhalai jerw Arimathiya kamini Josep mwngwi ganang borog kaisa Jirusalemw phaikha. Bwbo kaisa Jisuni sagri ongjak. 58Pilatni orw thangwi bw Jisuni basaknw naikha. Ephuo Pilat bwnw o basaknw rwni bagwi tholkha. 59Josep Jisuni basaknw tilangwi kwchwng Gadubai dulkha, 60tei Jeba katal mangkhor bw sakni bagwi chogwi tongjak odayw o basaknw tongkha. Jerw bw o hakoni bokhogw holong gara kwrwngsa phwngwi kalangwi thangkha. 61Matwr o Mogdolini Moriyom bai kubun Moriyom odayw o mangkhorni sakangw achogwi tongkha.
62Jerwni salo, eba jugalnai salni jerw salo chontai ojarokbai Phorisirok Pilatni sakangw joma ongwi sakha, 63"Twiphang, chini bakha kakha, o thokainaisa kathang tongphini chwnw sajak, 'Ang saltam jerw thangwi bachanai.' 64Okwithani tholma rwdi saltam jora obwnw mwrokgwi matongnaitwi. Aya khalai Bini sagrirok phainw arw o mangwdanw khogwi tilangnw tei borogroknw sanw, 'Bw kwthwini thangwi bachajak.' Halai pwilani phemolok mani naikhalai paithakni phemlokma arwse chaya ongnw."
65Ephuo Pilat boknw sakha, "Nokh morokgwi tongnairoknw tilangwi jekhalaywi phare arai khalai morokroni jugaldi." 66Aiphuo bok mangkhornw rwkkhiya khalaini bagwi holongni sakagw marka khalaika tei sotaingroknw odayw kalangkha.
ទើបបានជ្រើសរើសហើយ៖
Mothi 27: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
