Mothi 26
26
Jisunw buthalni bagwi kok taklaima
(Mark 14:1,2; Luk 22:1,2; Johon 11:45-53)
1Jisu o kokroknw sagwi paywi, Bini sagriroknw sakha, 2"Nokhlai siyw arw salnwini jerw yokma ter, tei borogni sajla kruso rwni bagwi rumwi rwjanw."
3Ephuo chontai ojarok tei okara chakararok hakra chontai Kayaphani nogw thumjalaikha, 4tei Jisunw rumwi twi phaywi buthalwi pairwni bagwi khogwi rainal khalailaikha. 5Matwr bok salaikha, "Yokma terwya, twmwi hinba aiphuo borogrokni bisingw tanlasukla ongmanw."
Subrai Jisuni bokhorokgw thok lumani
(Mark 14:3-9; Johon 12:1-8)
6Jisu jephuo Bwithoniyao kuriya kaphajak Simonni nogw, aiphuo kaisa birima Bini orw phaikha. 7O birima kwrwngsa holong kuphulni botolw khalaywi morokma ganang thok mutum twbwi phaijak. Jisu jephuo chani achukha aiphuo bw Bini bokhorogw o thoknw lugwi rokha.
8Sagrirok obwnw nugwi chajaya ongwi sakha, "I morokma thoknw tani phiyakdok? 9Imwnw phalwilai kabangma rang mangkhamw tei o rangnw bigra roknw rwmankha mw." 10Jisu I koknw bijimawi sagriroknw sakha, "Nokh I birimanw tani dugu rwlaidok? Bwlai ani bagwi gam samungse tangdok. 11Bigra roklai nokhbai jwnwmni tongnw, matwr anglai nokhbai jwnwmni tongalak. 12Bw I thok mutumnw Ani basagw lugwi Anw mankhorni bagwi jugalrwgdok. 13Ang nokhnw kwbwi khalai sadok, swngcharw jeswk jegao kathar kok pirjaknw odayw I birokmani koknw bakha karwni bagwi bini I samungni koknwbw masanai."
Jihuda Jisubai thokhokma khalaini bagwi gosekha
(Mark 14:10,11; Luk 22:3-6)
14Ephuo o chinwi sagri daini Iskoriyot Jihuda hinwi sagri kaisa chontai ojarokni dayw thangwi sakha, 15Jisunw nokhni yagw rumwi rwkhalai nokh anw ta rwthai?"
Aiphuo bok bwnw lep thamchi ruphaini pwisa rwkha. 16Aiphuni jimin Jihuda Jisunw rumwi rwni bagwi hamdal rutubni nangkha.
Jisu bini sagrirokbai paithak yokma ter khalaikha
(Mark 14:12-16; Luk 22:7-20; Johon 13:21-30; 1 Korinthiyo 11:23-25)
17Chotha kwrwi aouan terni pwilani salw sagrirok Jisuni orw phaywi swngkha, "Nini bagwi Yokma terni chamwng chwng bwrw jugalthai?"
18Jisu sakha, "Aulio thangwi o chongjak borognw sadi, Elim sagw, 'Ani jo kore phaikha. Ani sagrirokbai baksa yokma ter nini nogwse palenai. 19Jisu bini sagriroknw jekhalaywi sajak bok arai khalaiwi yokma terni chamwng jugalkha.
20Jerw swinda ongkhalai Jisu o kai chinwi sagrinw lagwi chani achokha. 21Chamwngni molo Jisu sakha, "Ang nokhnw kwbwi khalai sadok, Nokhni daini kaisa Anw kenarokni yagw rumrwgwi rwnai."
22Obwbai sagrirok kabangma dugu manwi kaisani jerw kaisa Jisunw swngni nangkha, "Bw ta ang, Subrai?"
23Jobagw Bw boknw sakha, "Jebw Angbai baksa batiyo auan chwmdok bwse angbai thokhoknai. 24Kathar Elembakgw borogni Sajlanw lagwi jekhalaywi suijak Bw arai khalaiywi thwinai, matwr oborogsani bagwi imw bwswkse tentrokma jar, jebw borogni sajlanw thokhokjak! Bw achaiya tilaise bini bagwi gam ongkhamu."
25Jebw Jisunw thokhokni thandok o Jihuda sakha, "Elim, bw ta ang?"
Jisu bwnw sakha, "Nwngse sakha."
26Chamwng nwngmwng ongdok, Araijar joragw Jisu auan lagwi Kaitornw hambai rwkha. Jerw Bw oannw bechek bechek khalaikha tei sagriroknw rwgwi sakha, "Imwnw ladi arw chalaidi, Ibw ani basak."
27Obw paywi bw piyang lagwi Kaitornw hambai rwkha tei obwnw sagriroknw rwgwi sakha, "Piyangni I uamtwi bwtwi nokh jotho nwngdi, 28twmwi hinba imw Ani thwi jeba Kaitorni katal akhanw daijw khalaiyw jebw kabangma borogni sumsokni nakarmani bagwi rwjanai. 29Ang nokhnw sadok, tabokni jimin Ang arw oaisabw uamtwi bwtwi nwngalak, o sal jora, jephuo Ang Ani Aphani auarw nokhbai baksa arwbw uamtwi bwtwi nwngnw."
30Jerw bok rachamwng tangsa rachabwi Joipal Hapongw thangkha.
Pitorni yachakyani kok
(Mark 14:27-31; Luk 22:31-34; Johon 13:36-38)
31Ephuo Jisu boknw sakha, "Tinini horo nokh jotho Ani bagwi khalwi thanglainw, je khalaywi Elembagw sajak, 'Ang mera bengnaisanw buthalwi pairwnai, tei mera jakni jotho merarok ijang uijang saljagwi kalainw.' 32Matwr Anw teisakthang rwkhalai nokhni sakang ang Galilo thangnw."
33Aiphuo Pitor sakha, "Nwnw jotho yakarwi thangphapw ang yakarwi thangalak."
34Jisu bwnw sakha, "Ang nwnw kwbwi sadok, tini horo tokla kichiyakho suni nwng Anw oaitham narang khalainw."
35Pitor Jisunw sakha, "Ang nwngbai baksa thwijanai kalaikhalaibw hekphwng ang oaisabw sagalak, nwnw siniya hinwi." Arw sagrirokbw jotho o koknw salaikha.
Getsimani bwlwngw
(Mark 14:32-42; Luk 22:39-46)
36Jerw Jisu sagrirokbai baksa Getsimani hinwi kwrwngsa jegao thangkha tei sagriroknw sakha, "Ang jeswk jora orw thangwi surinw osok jora nokh irw achugwi tonglaidi."
37Jerw Bw Pitor bai Sibdiyoni basala kainwinw Bwbai baksa tilangkha. Aiphuo Bw dugu manni nangkha tei uanamao kalaini nangkha."
38Aiphuo Bw boknw sakha, "Ani bakhani dugu iswk jora kabang ongdok je Ang bakha kadok Ang thwywise thanw, nokh irw tongdi tei Angbai baksa mwkchwngwi tongdi."
39Jerw bw orwni kisa kachalw thangwi hagw yesu mokromwi achukha tei suri sanwi sakha, "Ani apha, jwtini pharihalai i duguni piyang Ani daini kachalw thangthwk. Hekphwng Ani muchumwng twiya, nini muchumwngtwi ongthok."
40Jerw Bw sagrirokni orw phaywi nungkha bok thugwi paijak. Bw Pitornw sakha, "Imw tama! Angbai baksa nokh udamsabw thuyagwi tongmanliya? 41Sichagwi tongdi arw suridi, nokh bajemwngw kalaiyatwi, phalani muchuma tongw matwr basak kebel.
42Bw arw oaisa suriywi sakha, "O Ani Apha, Jwtini Ang i duguni nwngkhapnw khamka manwngnai hingklai, tei jwtini Nwng i duguni piyangnw Ani daini kachalw tilang manya hingklai, Nini muchokmatwi ongthwk." 43Bw philwi phaywi nungkha bok arwbw thulaijak, twmwi hinba bokni mokol mwktrwibai hilikjak.
44Ephuo Bw boknw yakarwi thangkha tei tharem pala o aguni kosol hai koknw sagwi surikha. 45Jerw bw sagrirokni orw phaywi sakha, "Nokh tabokbw thudok arw lengkhodok? Naidi, jo sokpaikha, Borogni sajla sumsok ganang rokni yagw rumwi rwjanai. 46Bachadi, himdi chwng thangnw, naikhodi, jebw Anw kenarokni yagw rumwi rwnai bw sokpaikha."
Kenarokni yagw Subrai Jisu
(Mark 14:43-50; Luk 22:47-53; Johon 18:3-12)
47Jisu aiphuobw kok sadok, o joragw Jihuda odayw phaikha. Bw o chinwi sagri daini kaisa. Bwbai baksa kabangma borog lathabai sengsa tobwi phaijak. Chontai ojarok bai okara chakararok boknw hogw. 48Jebw Jisunw kenarokni yagw rumrwgwi rwdok o Jihuda o borogrokbai kwrwngsa sidom thik khalaijak, Bw sajak, "Ang Jenw mutum chanw Bw o borog, Nokh bwnw rumdi." 49Aithani Jihuda oaisagwi Jisuni dayw thangwi sakha, "Elim, khulumkha." I koknw sagwi bw Jisunw mutum rwkha.
50Jisu bwnw sakha, "Aphaksa, nwng jebwnw khalaini phaijak obwnw khalaidi. Aiphuo loge loge o borogrok phaywi Jisunw rumkha."
51O joragw Jisubai baksa tongnai rokni bisingni kaisa bini sengsanw tikhalaikha arw tanwi hakra chontaini kaisa selengni khunjurnw ragwi pairwkha. 52Aiphuo Jisu bwnw sakha, "Nini sengsanw nini seng khapw tondi, twmwi hinba jebwrok sengsa yakwl khalai bok sengsabai thwio. 53Nwng tama bwkha ka, Ang Ani Aphanw ringkho khalai Bw tabok Anw sai sai suari hogalak? 54Matwr obw jwtini ongw, halai Kathar Elembakni kok barai khalaywi kwplwng ongthai? Elembagwlai suijak tongw imwrok arai khalaywi ongthai."
55Jerw Jisu o borogroknw sakha, "Ang tama sikok de, je nokh Anw sengsa, latharok lagwi rumni phaiba? Anglai salbiti noktharw achugwi phwrwngjak, aiphuolai nokh Anw rumjiya. 56Matwr imwrok ongba Kathar Elembagw diyarirok jeba suijak obw kwplwng ongnaitwi." Sagrirok aiphuo jotho Jisunw kalangwi khalwi thangkha.
Kotor chontairokni sakangw subrai Jisuni nalchir
(Mark 14:53-65; Luk 22:54,55,63-71; Johon 18:13,14,19-24)
57Jeborok Jisunw rumjak bok Bwnw hakra chontai Kayaphani nogw tilangwi thangkha. Odayw raida phwrangsa rok tei okara chakararok jotho thumjalaikha. 58Pitor kachalni Jisuni ukhum ukhum hakra chontaini khola jora thangkha tei paithakgw ta ongnw obwnw naini bagwi bisingw habwi sotaing rokbai baksa achokha.
59Jisunw buthalwi pairwni bagwi chontai ojarok tei hakra baichukni jotho borogrok misa yakumu rutulaikha. 60Alok misa sathai odayw phailaijak, matwr hekphwng bok bokni bakhani maping mwngsa misa yakumu manliya. Paithakgw kainwi borog phaywi sakha, 61"I borogsa sajak, Bw Kaitorni noktharnw nachra khalaywi obwnw saltamni bisingw obwnw arwbw tangwi rwmanw."
62Ephuo hakra chontai bachagwi Jisunw sakha, "Nwng tama mwngsa joba rwya? Bok Nini beaita imwrok tama yakumu rodok?" 63Matwr Jisu phwrwk khalaiywi tongkha. Aiphuo hakra chontai bwnw sakha, "Nwng kwthang Kaitorni mwngwi swmai tangwi chwnw sadi, Nwng tama o Khristo, Kaitorni Sajla?"
64Aiphuo Jisu bwnw sakha, "Wk, nwng daijw kok sakha. Matwr Ang nokhnw imwnwbw sadok, tabokni jimin nokh borogni sajlanw kaplaisa Kaitorni yagara aita achogwi tongmani tei chumwibai baksa phaimani nungnai."
65Ephuo hakra chontai bini sakni chumjak rinw sichigwi sakha, "Bw Kaitornw seja khalaikha. Chini dayo arw sathai tani nang? Taboklai nokh khanadok, Bw Kaitornw seja khalaikha. 66Nokh tama bwkha ka?"
Bok sakha, "Bw thwitai kalayw."
67Ephuo bok Jisuni makhangw khuktwi salkha tei gusi bai thapara rwkha. 68Bok sakha, "Oi Mosiho kokmai sale, swrw Nwnw bukha?"
Pitor Jisunw narang khalaikha
(Mark 14:66-72; Luk 22:56-62; Johon 18:15-18,25-27)
69O jorao Pitor kholagw achugwi tongjak. Kaisa selengjwk bini orw phaywi sakha, "Galilni Jisubai baksa nwngbw tongya phile."
70Matwr Pitor jothoni sakangw Jisunw narang khalaywi sakha, "Nwng tama sadok ang obwnw siya."
71Obwni jerw Pitor akhogwi kholani duar koreo thangkha. Arw kaisa selengjwk bwnw nungwi odaini borogroknw sakha, "I borogsabw Nasarotni Jisubai baksa tongw."
72Aiphuo Pitor samai tangwi arwbw narang khalaywi sakha, "Ang i borogsanw siniya."
73Obwni kisa jerw, odayw jebwrok bachagwi tongjak bok Pitorni orw phaywi sakha, "Nwngbw thi bokni bisingni kaisa, tamni hinba Nini kok samani nungwi obwnw bijiywi mandok."
74Aiphuo Pitor saknw sraikha tei samai tangwi sani nangkha, "Ang I borogsanw mosolom siniya." Tei aiphuo loge loge tokla kichiksakha.
75Ephuo Jisu sanai koknw Pitorni bakhao kakha, "Tokla kichikyakho suni nwng oaitham Anw siniya hinnw." Arw Pitor phataro thangkha tei dugubai lachimabai karapni nangkha.
ទើបបានជ្រើសរើសហើយ៖
Mothi 26: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
