Mothi 25
25
Kaichi birokni naisrwng
1"O jorao chukha auar imwtwijar kaichi birokni kosol ongnw, jebwrok sakni aphakchwkmani chamwrwinw lamjogwi laini bagwi chati lagwi phatarw thangkha. 2Bokni bisingw kaiba bedaman, tei kaiba bujugnang tongw. 3Bedaman birokrok bokni chati lalailakha matwr logeo thok laniya. 4Bujugnang birokrok bokni chatibai baksa kotrao thokbw lakha. 5Chamwrwi phaini lerdok thani bok bukhorok juku jukugwi thugwi paikha.
6"Jerw hor kacharw chirikmani khanakha, 'Naikhodi, chamwrwi phaidok! Chamwrwinw lamjogwi laini bagwi akholaidi.' 7Aiphuo o birokrok bachagwi bokni chati salamlaikha. 8Tei bedamanrok buju gnang roknw saba, 'Nokhni thok daini chwnw kisa rwdi, tamni hinba chini chati thwywi thangdok.' 9Aiphuo o bujugnangrok joba rwgwi sakha, 'Jeswk thok tong omwbai chwng bai nokhni kulok galakna, obwni solai nokh phalnogw thangwi nokhni bagwi thok paywi ladi.' 10O bedaman birokrok jephuo thok paini thangkha aiphuo chamwrwi sokpaywi paikha arw jebwrok jugalwi tongjak bok chamwrwi bai baksa kaijalabariyw habkha. Bok jotho haboi paikhalai duar khagwi pairwkha.
11"Jerw o bedamanrok phaywi sakha, 'Subrai, Subrai, chwnw duar khengwi rwdi. 12Matwr chamwrwi joba rwgwi sakha, 'Daijw khalaywi sadok, ang nokhnw siniya.'"
13Kokdumani paithak dayw Jisu sakha, "Obwni bagwi chetwn tongdi, tamni hinba o sal tei o jorani koknw nokh kaisabw siya.
Seleng kaithamni naisrwng
(Luk 19:11-27)
14"Chukha auar imwtwijar kaisa borogni kosol jebw buihao thangnai aguo bini selengroknw ringkhogwi bini jotho rangri bokni yagw abwi kalangkha. 15O selengrokni hantani maping bw kaisanw lep ba sai rangchakni pwisa, arw kaisanw lep nwi sai tei arw kaisanw lep sai rangchakni pwisa rwkha. 16Jebw lep ba sai rangchakni pwisa manjak bw obwnw lagwi bebar khalaywi arw lep ba sai rangchakni pwisa amrai khalaikha. 17Jebw lep nwi sai rangchakni pwisa mangkha bwbw obwtwijar khalaywi arw lep nwi sai rangchakni pwisa amrai khalaikha. 18Matwr jebw lep sai rangchakni pwisa mangkha bw hakor chogwi bini nophangsani pwisanw huywi tonkha.
19"Kabangma salni jerw o nophangsa phaywi selengrokni daini thikip bikha. 20Jebw lep ba sai rangchakni pwisa manjak bw arw lep ba sai rangchakni pwisa amrai khalaywi phaywi sakha, 'Nwng anw lep ba sai rangchakni pwisa rwjak. 21Naidi, ang arw lep ba sai rangchakni pwisa amrai khalaikha." Aiphuo bini nophangsa bwnw sakha, 'Gamse ongkha. Nwng gam tei paitokjuai seleng. Nwng kisa kothoyw paitokjuai thani ang nwnw kabang manwini bak rwnw. Phaidi, angbai baksa chadi nwngdi."
22Jebw lep nwi sai rangchakni pwisa manjak bw arw lep nwi sai rangchakni pwisa amrai khalaywi sakha, 'Nwng anw lepnwi sai rangchakni pwisa rwjak. Naidi, ang arw lep nwi sai rangchakni pwisa amrai khalaikha." 23Aiphuo bini nophangsa bwnw sakha, 'Gam ongkha. Nwng gam tei paitokjuai seleng. Nwng kisa manwibai paitokha thani ang nwnw kabang manwini bag rwnw. Phaidi, angbai baksa chadi nwngdi."
24"Matwr jebw lep sai rangchakni pwisa manjak bw phaywi saba, 'Elim, ang siyw nwng kirimasincha jar borog. Nwng jedayw bwchwlwi khibijiya odaini ragw tei jedayw saljiya odaini kholw. 25Obwni bagwi ang kiriywi phatarw thangwi hakor khulioi nini rangnw huywi tonjak. Ibile naidi, nini manwi nini tongw.' 26Matwr bini nophangsa joba rwgwi bwnw saba, 'Kikhri tei sele seleng! nwnglai sibele, ang jedayw bolya odaini ragw tei jedayw salya odaini kholw. 27Halai majonrokni dayw ani rangnw tani rwliya? Obwnw khalaitilai ang phaywi rangbw mangkhamw tei lagaibw mangkhamw.' 28Obw paikhlai bw sakha, 'Nokh bini daini rangroknw lagwi jebwni lep chi sai rangchakni pwisa tong bwnw rwdi. 29Jeni tong bwnw arw rwnw tei obwni bagwi bini arw kabang ongnw. Matwr jeni kwrwi bini dayw jeswk tong obwnwbw bini daini swywi lanw. 30O chogya selengnw phatarni andarw khibiywi rwdi, odayw borogrok karaplainw tei tentrokmabai buabai bua oalwi tonglainw.'
Jotho dophani nalchir
31"Borogni Sajla jotho suariroknw logeyo lagwi jephuo sakni chwngsachabai phainw ephuo Bw Bugra hinwi Bini bukajirao chwngsachabai achuknw. 32Tei jotho dophani borogrok bini sakangw thumjalainw, mera bengnairok jekhalaywi mera bai prunnw juta khalai, obwtwijar khalaywi Bwbw borogroknw baknwi khalaywi baknai. 33Bw Bini yagara phaising meraroknw tonnai tei prunroknw yaksi phaising tonnai.
34"Aiphuo bugra Bini yagara phaisingni borogroknw sanw, 'Nokh jebwrok Ani Aphani hamari manjak, nokh phaidi, tei o hayungni pwingman ongphaidi jebw swngsar chengphuo nokhni bagwi jugalwi tonjak. 35Tamni hinba ang ukhrijaphini nokh chani rwjak, Ang twi kangjaphini nokh Anw twi khanjak, Ang jephuo naroai ongwi phaikha aiphuo nokh Anw saklom rwjak, 36Jephuo udala tongjak, aiphuo nokh anw ri chumrwjak, jephuo haya kalaijak aiphuo nokh Anw mwngjak, tei Ang jephuo alongw chubjajak ephuo nokh anw naini thangjak.'
37Aiphuo o raidiarok joba rwgwi Bwnw sanw, 'Subrai, baiphini nwnw ukhrijamani nungwi chani rwkha, eba twi kangjamani nungwi twi khankha? 38Baiphuo nwnw naroai hinwi saklom rwjak, iba udala nungwi ri chumrwjak? 39Tei chwng nwnw baiphuo phwng haya kalaijak eba alongw chwbjajak hinwi siywi naini thanjak? 40"Obwnw joba rwgwi bugra boknw sanw, 'Ang nokhnw kwbwi kwbwi sadok, nokh jephini Ani takhukrokni bisingni jothoni solai kisa nangru takhukni bagwi imwnw khalaikha, aiphuo nokh obwnw Ani bagwise khalaikha.' 41"Aiphuo o Bugra bini yaksi aitani borogroknw sanw, 'O sraimung ganang borogrok, Ani koreni nokh kachalw thangdi. Saitan tei bini suarirokni bagwi kirimasincha hot jebw jugalkha, orw thangwi kalaidi. 42Twmwi hinba jephuo Ang ukhrijak, aiphuo nokh anw charwjiya. Jephuo Ang twi kangjak aiphuo nokh Anw twi khanjiya. 43Jephini naroai ongwi phaijak aiphuo saklom rwjiya, jephuo Ang rini bader udala tongjak aiphuo anw ri chumrwjiya, jephuo haya kalaijak tei alongw chupjagwi tongjak aiphuo anw naini thangjiya.'
44"Aiphuo bok Bwnw sanw, 'Subrai, chwng baiphuo Nwnw ukhrijak, twi kangjak, naroai hinwi nungwi, ri kwrwi udala, lumjak eba alongw tongw, nungwi chubajiya?'"
45"Joba rwgwi Bw boknw sanw, 'Ang nokhnw kwbwise sadok, nokh jephuo Ani takhokrokni bagwi imwnw khalaijiya, jebwrok nangruya, aiphuo nokh Ani bagwise khalaijiya.'"
46Obwni jerw Jisu sakha, "I borogrok mol brumni satok manni thanw, matwr o raidia borogrok paiphlaiya langma mannai.
ទើបបានជ្រើសរើសហើយ៖
Mothi 25: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
