Johon 5
5
Lengkhoknai salw Jisu hamrwkha
1I tolpini jerw Jisu Jirusalemw thangkha, twmwi hinba o jorao Jihudirokni kwrwngsa ter tongw. 2Jirusalemw Merani duaphang koreyo pukhir khorsa tongw oro nukhung ganang gati krwngba tongw. Ibriyo kokbai o pukhirni bwmwng Bwitsoda. 3O jegarogw kabangma hanyarok kalaywi tonglayw. Kana, lenga, boya rokbw oro tongw. Bok twi kutulnaini bagwi nasingwi tonglayw.
4Twmwi hinba baithak baithak joragw kaisa suari o pukhirw akhogwi phayo tei twi kutulrwgo, aiphuo je sakang pukhiro akhoman bini hanyarok hamwi thangw. O hanyarok pukhirni twi kutulnaini bagwi nasingoi tongw.
5Bisi chitham char jora bugioi tongnai kaisa hanyabw orw tongw. 6Jisu bwnw nungkha arw siywi mankha bw kabangma sal jora oro kalaioi tongdok aiphuo Jisu bwnw swngkha, "Nwng tama hamni nayw?"
7O hanyaba joba rwkha, "Twi kutulnai loge loge anw pukhiro akhorwgwi rwnai jar ani kaisabw kwrwi. Ang thangtwi thangtwi arw kaisa ani sakangw akhogwi payo."
8Jisu bwnw sakha, "Bachadi nini thuyamnw tisagwi lagwi himwi beredi. 9Eiphuo o hanyasa loge loge hamkha tei thuyam tisagoi himkha. O salba ongkha lengkhonai sal.
10Aithani Jihudi ojarok o hamnaisanw sakha, "Tini lengkhonai sal, chini ikimni maping nini thuyam balthai kalaiya."
11Eiphuo bw O ojaroknw sakha, "Matwr anw hamrwnaisa Bwse anw sao, 'Nini thuyam lagoi himwi beredi.'"
12Bok o borogsanw swngkha, "Nwnw thuyam tisagwi himwi beredi hinwi sanaisa O Borogsa swrwbw?"
13Matwr hamnaisa bw siya bwnw swrw hamrwkha. Oro kabangma borog thumjalaijak thani Jisu sinijakya karwi odaini thangmakha.
14Obwni jerw Jisu Noktharw o borogsanw nungwi sakha, "Naidi, nwng hamkha, nini arw chaya mwngsachwk ongyatwi nwng arw sumsok takhlaidi." 15O borogsa Jihudi ojarokni dayw thangwi sakha, je borog bwnw hamrwjak Bw ongkha Jisu.
Sajlani bagurai
16Jisu lengkhonai salo imwtwijar samungrok tangdok thani Jihudi ojarok Bwnw satokma rwni chengkha. 17Aiphuo Jisu o bokhorok roknw sakha, "Ani Apha jwnwmni samung tangwi thangdok tei Angbw samung tangdok."
18Jisuni i koknw khanagwi Jihudi ojarok Bwnw arw jobor buthalwi pairwni naikha, twmwi hinba Bw keber lengkhonai salni kerong sapaidok omoya, Kaitornw Apha hinwi ringwi Bw saknw Kaitorbai baksabw khalaidok.
19Obobai Jisu o ojaroknw sakha, "Ang kwbwi sadok, Sajla Bini sakni daini mwngsabw khalaimanya. Aphanw jebw khalaimani nung keber obwnwse khlaimanw, twmwi hinba Apha jebw khalai Sajlabw obwnwse khalayo. 20Apha Sajlanw hamjagw Arw Bw jebw khalai jotho Sajlanw phunogw. Bw Sajlanw imwrokni solaibw aro kotor samungroknw phunuknai, aiphuo nokh amok chalainai. 21Apha jekhalaioi thwijakroknw langmarwgoi bacharw, thi obwtwi jar Sajlabw jenw langma rwni muchu bwnw langma rwgw. 22Twmwi himba Apha kaisani nalchir khalaiya, matwr jotho nalchirni tangdai Sajlanw rwjak, 23Aphanw jotho jekhlayoi borom rw obotwijar khlayoi Sajlanwbw borom rwnaitwi. Twmwi himba Sajlanw je borom rwya bw Aphanwbw borom rwya Jebw Bwnw hoka.
24"Ang nokhnw kwbwi sadok, ani kok khananaisa tei anw honaisano jebo paitok bini paiphlaiya langma tongw. Bwnw khatta ganang hinwi rumgalak, tamni hinba bw thwinai daini langmagw balwi thangkha. 25Ang nokhnw kwbwi sadok, O jo sokphaidok, arai tama obw tabokse sokphaikha, jephuo thwijakrok Kaitorni Sajlani kharang khananw tei bok thangnw. 26Twmwi hinba, Aphani jetinjar langma rwnai pharanba tong omotwijar Bw Bini Sajlanwbw langma rwnai phranba rwjak.
27"Apha Sajlanw borogni nalchir khalainai bagri rwjak, twmwi hinba Bw Borogni Sajla. 28I koknw khanagwi amok taongdi, twmwi hinba o jora phaidok, mangkhoro tongnairok bok jotho Borogni Sajlani kharang khananai, 29arw akhogwi phainai. Jebwrok samung gam tangjak bok paiphlaiya langmanw manni bagwi bachanw, tei samung chaya tangjakrok bok satok manni bagwi bachanw. 30Ang sakni daini mwngsabw khaimanya: Ang jekhlaywi khana, keber obotwijar nalchir khalaiyw. Ani nalchir daijw nalchir, twmwi hinba Ang Saknw khachangrwni chaitokya matwr Anw Je hoka Bwnwse khachangrwni chaitokgw.
Subrai Jisuni kothoyw yakumu
31"Ani phaising Angse yakumu rwgw hingkhai hai Ani o yakumu kwbwiya. 32Arw kaisa tongw Jebw Ani kothoyw yakumu rwdok, tei Ang sio Ani kothoyw bw rwnai yakumu kwbwi. 33Nokh Johonni dayw borog hogwibw swngkhorwjak tei bw kwbwini kothoyw yakumu rwjak. 34Ang borogni yakumu sakao puitonya, matwr nokh sumsokni yoknaitwi aithanise i kokroknw sadok. 35Johonse ongkha o chati jebw chwngjak tei pohor rwjak, nokh rangsa jorani bagwi bini o pohorw tongthokni goselaijak. 36Matwr Johonni yakumuni naywibw Ani arw yakumu gorja tongw, tamni hinba Apha Anw je samung roknw tangni rwjak Ang obwroknwse tangdok. tei obwrok Ani kothoyw i yakumu rwgo je, Aphase Anw hogw. 37O Apha, Anw honaisa, Bwse Ani kothoyw yakumu rwjak, Bini kharang nokh oaisabw khanayajiya, Bw baraijar omonwbw nungjiya. 38Tei Bini koktang nokhni khaobw tongya, Twmwi hinba Bw Jenw hokha nokh Bwnw paitokya. 39Nokh kathar bijabnw bakha rwgwi pokreo, twmwi hinba nokh bakha kago obobai paiphlaiya langmanw mannw. Matwr o bijablai Ani kothoywse yakumu rwgw, 40Matwr nokh langma manani bagwi Ani dayw phainise naiya. 41"Ang borogni daini lobma yachakya, 42Matwr Ang nokhnw siyw, nokhni khaolai Kaitorni hamjakma kwrwi. 43Ang Ani Aphani mwngwi phaikha matwr nokh Anw yachagwi ladokya, Matwr kaisaswk jwtini bini sakni mwngwi phayw nokh bwnw yachagwi lanai. 44Nokh tamakhayoi paitokmanthai twmwi himba nokhlai kaisa arw kaisani daini lobma yachagw, matwr o kaisachuchui Kaitorni daini phainai lobmani bagwi nokh chaitokya? 45Bakha takadi Aphani sakangw Ang nokhnw dosa rwnw, Matwr Mosi jebwni sakao nokh khadung larwgwi tongdok o Mosise nokhnw dosa rwdok. 46Twmwi hinba nokh Mosinw paitoktilai, hai Anwbw paitokkhamu, twmwi hinba Mosilai Ani kothoywse suijak. 47Matwr nokh jwtini bini suinainw paitokyakhlai, hai Ani koknw takhalaywi paitokthai?"
ទើបបានជ្រើសរើសហើយ៖
Johon 5: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
