Johon 6
6
Ba sai borognw charwmani
(Mothi 14:13-21; Mark 6:30-44; Luk 9:10-17)
1Obwni jerw Jisu Galil twithuni uijang narw thangkha. I twithunw Tibiriya twithubw hinw. 2Kabangma borog Jisuni ukhum ukhum thangkha, twmwi hinba Bw hanya roknw hamrwni je amok samung roknw tangjak obwroknw bok nungjak. 3Jisu Bini sagri roknw lagwi kwrwngsa hapong sakagw kagwi achukha. 4O jorao Jihudi rokni yokma ter koreo sokpaijak. 5Jisu naikhogwi naikha kodur borog Bini dayo phaijak. Bw Philipnw sakha, "I borog roknw charwni bagwi auan chwng bwrwni paithai?" 6Philipnw bajaywi naini bagwi Bw o koknw sakha, twmwi hinba Bw siyw Bw tama khalaini thangdok.
7Philip Jisunw sakha, "Bok jotho kisa khaywi chakhaiphwng taldokni srangpaini rangbw kulokgalak."
8Jisuni sagrirokni bisingni kaisani bwmwng Andriyo, bw ongkha Simon Pitorni takhuk. Bw Jisunw sakha, 9"Irw kaisa charaini dayw auan lepba tei aa maknwi tongw matwr iswk borogni bagwilai imw kulok galak." 10Jisu sakha, "Borogroknw achokrwgwi rwdi." O jegao kabangma jabara tongo borogrok oboni sakago achoklaikha. Odayw chalani remthai sai ba twtwi. 11Obwni jerw Jisu auanroknw lagwi Kaitornw hambai rwkha tei jebwrok orw achukjak boknw bagwi rwkha. Obotwijar khalaywi Bw aabw rwkha. Je jeswk naikha osok mangkha.
12Borogrok ok swplwngwi chapalaikhalai Jisu Bini sagriroknw thwlkha, "Chapalaijiya auan bechala piyakyatwi thumwi tisadi." 13Borogrok chagwi paywi o auan lepbani jeswk bechala bara ongjak obonw sagrirok thumwi khung chinwi janga swplwngkha.
14Jisuni i amok samung nungwi borogrok sani nagkha, "Hayungw je diyari phaitai kok tong kwbwise imw o diyari." 15Obwbai Jisu bijikha borogrok bwnw mar khalaywi Bwnw bokni bugra khalaini bagwi rumni phaidok. Aithani Bw saichong arw kwrwngsa hapongw thangkha.
Subrai Jisu twibomni sakago himkha
(Mothi 14:22-33; Mark 6:45-52)
16Sariri ongkhai Jisuni sagrirok twibom kandao thangkha, 17tei rungw kagwi Kophornahum aulio thangni bagwi twithu balni rumkha. O jorago andar ongwi paijak, matwr Jisu aiphuobw bokni orw phaiyakho. 18Nobar hung hung sibdok thani twibomni gara gara phal phaidok. 19Ba dok kilomitar rung thangnai jerw bok nungkha Jisu twibomni sakatwi himwi bokni rung koreo phaidok. Imwnw nungwi sagrirok khw kirilaikha. 20Ephuo Jisu sagriroknw sakha, "Takiridi, Angse."
21Aiphuo sagrirok sokmanjagwi Bwnw rungw tisagwi lakha, tei bok jedayo thangdok o rung loge loge orw soikha.
Kathang chamwngni kothoyw
22Twithuni uijang narw je borogrok turukjak, oboni jerwni salw bok bijimankha, aguni salw odayw rung khungsase tongw. Bok arw bijimangkha Jisu o rungo sagrirokbai kajia, sagrirok bokmamang thangjak. 23Matwr Tibiriya aulini thainwi thaitam rung orw phaikha, jedayw Subrai hambai rwgwi paywi borogrok auan chajak. 24Aithani borogrok jephuo nungkha, Jisu tei Bini sagrirokbw orw kwrwi, ephuo bok o rung rogo kagwi Jisunw rutubni bagwi Kophornahum aulio thangkha. 25Orw suiywi bok Jisunw twithuni uijang narw rutubwi manwi swngkha, "Elim, Nwng irw baiphuo sokphaikha?"
26Jisu joba rwkha, "Ang nokhnw kwbwi sadok, nokh amok ongnai samung nungjak hinwi Anw rutubdok obwya, obwni naikhalai ouk swplwngwi auan machajak thanise naitubdok. 27Matwr je chamwng piyagwi thang o chamwngni bagwi kulokmaya ta ongdi. Je chamwng sumoi thangya obwni naikhlai paiphlaiya langmase rwgo oboni bagwise kulokmaya onglaidi. O chamwngnwse Borogni Sajla nokhnw rwnai, twmwi hinba Apha Kaitor phunukjak je Bini i samung tangni bagri tongw.
28Ephuo borogrok Jisunw swngkha, "Halai Kaitorni samung tangni bagwi chwng ta makhalainw?"
29Jisu boknw sakha, "Kaitor nokhni daini i samungnw nayw, omo ongkha Bw Jenw hokha nokh Bwnw paitokdi."
30Ephuo bok Bwnw swngkha, "Nwng iswk baitinjar amok samung tangthai jebwnw chwng nungnw tei paitoknw? Nwng ta samung khalaitai? 31Chini hodaipiri roklai panthwr jilagw Manna chajak. Kathar bijabw suijak tongw, 'Kaitor chukha daini boknw chamwng charwkha.'"
32Jisu boknw sakha, "Ang nokhnw kwbwi sadok, Mosi nokhnw o chamung chukhani rwjiya, matwr Ani Aphase nokhnw chukha daini kwbwi chamwng rwdok. 33Chukha daini akhogwi phaywi Jebw borognw langma rw Bwse Kaitorni rwnai chamwng."
34Borogrok Bwnw sakha, "Elim hai chwnw jwnwm o chamwngnwse rwdi."
35Jisu boknw sakha, "Angse o kwthang chamwng. Ani dayw jebw phai bw arw ukhri jakglak. Jebw Anw paitoknai bw arw kangbw kangalak. 36Anglai nokhnw sajak, nokh Anw nungjak matwr hek paitokya. 37Apha Anw jebwroknw rw bok jotho Ani dayw phainw. Jebw Ani dayw phainw Ang bwnw phatarw khibigalak. 38Twmwi hinba Ang Ani muchumungni kosol samung tangni phaijia, matwr Anw honaisani muchumungni kosolse samung tangni chukha daini akhogwi phaijak. 39Anw honaisani muchumwng ongkha arai, Bw Anw rwnairokni daini Ang kaisanwbw kamajayatwi obwni solai paithak salw boknw mwthangoi tisanaitwi. 40Ani Aphani muchumwng arai nokhni bisingni jebwrok Sajlanw nungwi Bwnw paitok bok paiphlaia langmanw mannaitwi. Tei Angse boknw paithak salw mwthangwi tisanai."
41Ephuo Jihudirok Jisuni baithe nali kalaikha, twmwi hinba Jisu sajak, "Chukha daini chamwng jebw akhogwi phaijak Angse o chamwng."
42Bok sakha, "Imw tama Josepni basala Jisuyadwi? Bini boma bophanw lai chwng sinio. Hai Bw tamakhlaywi saman, "Ang chukha sakani akhogwi phaikha?"
43Jisu boknw sakha, "Ang jebw sakha omoni bagwi nali takalaidi. 44Ani Apha, Anw honaisa Bw swtwnwi twbwya halai kaisabw Ani dayw phaimanya. Tei Angse bwnw paithak salw mwthangwi tisanai. 45Jisaiyo diyari suijak, 'Bok jotho Kaitorni dayw swrwngmwng mannw.' Je Aphani dayw khanagwi swrwngmwng mankha, bwse Ani dayw phayw. 46Aphanw kaisabw nungjia, keber Kaitorni daini phainaisa Bwse Bwnw nungjak. 47Ang nokhnw kwbwi sadok, kaisachwk Anw paitogo hingkhai bw aiphuo paiphlaia langmanw manw."
48"Angse auan jebw langma rw. 49Nokhni hodaipirirok panthor jilagw Manna chajak, matwr bok jotho thwijak. 50Matwr imw ongkha o auan jebw chukha sakani akhogwi phaikha, jebwnw chakhalai borog thwigalak. 51Angse o kwthang auan jebw chukha sakani akhogwi phaikha. I auan chanaisa bw molbrungni bagwi langma mannai. Ani basakse o auan. Borogrok langma mannaitwi aithani Ang Ani i basaknw rwnai."
52I koknw khanagwi borogrokni bisingw tokra tokri chengkha. Bok sani nangkha, "Tama khalaywi I borogsa Bini basak chwnw charwman?"
53Jisu boknw sakha, "Ang nokhnw kwbwise sadok, Borogni Sajlani bakhan chayakhlai tei Bini thwi nwngkhlai nokhni bisingo langma kwrwi. 54Kaisachwk jwtini Ani bakhan chagw tei Ani thwi nwngw bw paiphlaia langma manjak, tei Ang bwnw paithak salw mwthangwi tisanai. 55Ani bakhanse jai chamwng tei Ani thwise jai nwngmwng. 56Jebw Ani bakhan cha tei Ani thwi nwng Bw Ani bisingwse tongw tei Angbw bini bisingw tongw. 57Kathang Apha Anw hokha tei Aphani bagwise Ang kwthang tongw. Thi obotwijar jebw Ani bakhan cha bwbo Ani bagwise kwthang tongnai. 58Imw o auan jebw chukha sakani akhogwi phaikha. Nokhni hodaipiri rok je mannanw chagwibw thwiywi thangkha imw obotwijarya. I chamwng chanaisa bw molbrungni bagwi langma mannai."
Kabangma sagrirok Jisunw yakarkha
59Kophornahumni thum nogw phwrwngphuni Jisu i koknw sajak. 60Bini sagrirokni bisingni akhuni borog i koknw khanagwi sakha, "Imw aise karak phwrwngma. Swrw imonw yachakman?"
61Jisu sakni bakhabai bijimankha, Bini sagrirok i kothoynw lagwi boknibai bok kok kabang salaidok. Aithani Bw boknw sakha, "Obobai tama nokh mwngsaswk bedisao kalaidok? 62Hai Borogni Sajla aguo jerw tongjak Bwnw orw kasagwi thangmani nungkhai nokh tama satai? 63Borogni basak mwngsa kamniya, Phala katharse langma rwgo. Ang nokhnw je kokroknw sadok obw pholang tei langmabai kwplwng, 64matwr nokhni bisingw kaisa kainwi tongw jebwrok Anw paitokya."
Swrw swrw Jisunw paitok galak tei swrw Bwnw kenarokni yagw rumwi rwnw Jisu pwilani jimin obonw siyw. 65Aithani Bw sajak, "Imwni bagwi Ang sadok Apha lama jugalya halai kaisabw Ani dayw phaimaya."
Pitor Subrai Jisunw gosekha
66Jisuni I kokni bagwi sagrirokni bisingni kodur sagri philwi thangkha arw Bwbai baksa himni thangni yakarwi rwkha. 67Aithani Jisu o chinwi sagrinw sakha, "Nokhbw tama thangni nayw?"
68Simon Pitor Jisunw sakha, "Subrai, chwng swrwni dayw thangtai? Paiphlaia langmani koklai keber Nini daywse tongw. 69Chwng paitokha tei siywibw mankha, Nwngse Kaitorni o kathar Borog."
70Ephuo Jisu Boknw sakha, "Ang tama nokh kai chinwinw saywi lajiya? Matwr nokhni bisingw kaisa Saitanbai twiduljadok." 71Irw Jisu Simon Iskoriotni basala Jihudani kok sadok, jebw kaichinwini bisingni kaisa. Twmwi hinba Jihuda ulo Jisunw kenarokni yagw rumrwgwi rwnai.
ទើបបានជ្រើសរើសហើយ៖
Johon 6: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
