Johon 4
4
Somoriyo birok
1Jisu siywi mankha je Phorisirok khanajak Bw Johonni solaibw kabangma sagri banaidok arw baptismo rwdok. 2(Matwr Jisu Saklai baptismo rwdokya, Bini sagrirokse rwdok), 3aithani Jisu Jihudiya amchoinw yakarwi arwbw Galilo philwi thangkha. 4Tei Galilo thangphuni Bw Somoriya amchoitwi khalaywi mathangkha. 5Bw Somoriyani Sukhor hinnai kami khungsago phaikha. O kami ongkha Jakob bini basala Josepnw rwnai harumni koriyw. 6O jegao Jakobni kua tongw. Jisu lama himtwi himtwi lengkha, aithani Bw kuani koreo achukkha.
Aiphuo sal diphwrjak. 7-8O jorago Somoriyani birok kaisa odayw twi khokni phaikha. Jisu bwnw sakha, "Anw twi thocha khandiba."(Aiphuo Jisuni sagrirok chamung paini kamio thangjak).
9O Somoriyo birokma Bwnw sakha, "Anglai Somoriyo birok. Nwng Jihudi ongwi takhalaywi ani dayw twi bidok?" Birokma i koknw sakha twmwi hinba ephuo Jihudi rok Somoriyo rokbai kisabw kathaklaiya.
10Jisu o birokmanw joba rwkha, "Nwng jwtini siyw hintilai Kaitorni ruai tama tei Swbw nini dayw twi bidok hai nwngse Bini dayw twi bikhamw tei Bw nwnw twi kathang rwkhamw."
11O birokma sakha, "Matwr Nini daywlai twi tisani mwngsabw kwrwi kuabw kodur thugo. Halai Nwng bwdaini o kathang twinw manthai? 12Nwng ta chini hodaipiri Jakobni naywi manchuk? I kuanw bwse chwnw rwgw. Aiphuo bw sakbw i kuani twi nwngo tei bini basarok arw bini sadoan sohngbw idaini twi nwnglayo."
13Aiphuo Jisu sakha, "Je borog i twinw nwng bw arwbw twi kangnw. 14Matwr Ang je twi rwnw, obonw je nwngnw bw arw twi kangjagalak. O twi bini kha bisingo ubur baywi kalainai twimukni kosol ongwi paiphlaiya langma ruai rwnw."
15Obwbai o birokma Jisunw sakha, "Iswkhlai Nwng khakhamwi o twinw anw rwdi ang arw idayw phaywi twi tisani nangyatwi."
16Jisu bwnw sakha, "Thangdi, nasainw irw ringwi twbwdi."
17Birokma sakha, "Matwr anilai chala kwrwi."
Jisu bwnw sakha, "Nwng thiki sakha nini chala kwrwi. 18Twmwi hinba ibisingwse nini chala kaiba ongoi thanjak, arw tabok jebw nwngbai baksa tong bw nasaiya. Nwng kwbwi sadok."
19Aiphuo birokma Jisunw sakha, "Ang tabok biji mangkha Nwng kaisa diyari. 20Chini hodaiprirok i hapongw lobw, matwr nokh Jihudirok sagw Jirusalemse o jega jerw borogrokni lobthai kalaiyw."
21Jisu bwnw sakha, "Birok, Ani koknw paitokdi, imwtwi jar jora phaidok jephuo Apha Kaitorni lobma nokh i hapongwbw khalai galak, Jirusalemobw khalai galak. 22Nokh Somoriyorok tanw loblai nokh siya! Chwng Jihudirok tanw lob chwng obwnw siyw, twmwi himba Jihudirokni dainise tekhokma phaiyw. 23Matwr o jo sokphaidok, tei tabokse o jo sokpayoi paikha jephuo kwbwi lobnairok phalabai tei kwbwibai chini Aphanw loblaino. Apha imwtwijar lobnairoknwse naitubw. 24Kaitorse phala, Jebwrok Bwnw loblai, bok phalabai tei kwbwibai malobnw."
25Ephuo o birokma sakha, "Ang sio, Mosiho, jenw Khristo hin Bw phaidok. Bw jephuo phainw eiphuo chwnw jotho sanw." 26Jisu bwnw sakha, "Angse Bw, Jebw nwngbai kok sadok."
27O jorago Bini sagrirok philwi phaikha tei Jisunw birokma kaisabai kok samani nungwi amok chalaikha. Matwr hekpwng kaisabw swngliya, "Nwng tama naidok?" eba "Nwng tani bwbai kok sadok?"
28Aiphuo o birokma bini gola khibiywi kamio thangkha arw borogroknw sakha, 29"Nokh kaisa borognw phaiywi naiphaidi. Ang ani langmagw jebw khalaikha Bw anw jotho sagwi rwkha. Halai Bwdwi tama o Mosiho?" 30Obwbai borogrok kamini akhogwi Jisuni dayw phaini rumkha.
31Imwni bisingw Bini sagrirok Bwnw kabogwi sakha, "Elim, mwngsachwk chadi."
32Jisu boknw sakha, "Ani dayw chamwng tongw, jebwni kothoyw nokh siya."
33Obwnw khanagwi sagrirok sakrokni bisingw salaini nangkha, "Hai tama Bwnw kaisachwk chamwng twbwgwi rwphaijak?"
34Ephuo Jisu boknw sakha, "Anw Je hokha, Bini muchokmanw palenai arw Bini samung sokrwnai ongkhadwi Ani chamung. 35Nokh tama saya, 'Arw tal brwini jerw thaichlwi ranai jo sokpainw?' Naidi Ang nokhnw sadok, mokol tisagwi oaisa bari aita naikhodi, thaichlwi rani jo ongkha. 36Jebw thaichlwi ra, bw tabokse srangpai mandok tei paiphlaiya langmani bagwi thaichlwi thumdok. Obwni bagwi bwchlwi kainaisa tei thaichlwi ranaisa, kainwibw baksa khaywi tongthokjagw. 37Twmwi hinba irw i kok kwbwi hinwi majra ongw je, 'Kaisa bolw tei arw kaisa ragw.' 38Ang nokhnw imwtijar thaichlwi rani bagwi hoka, jebwni bagwi nokh tangsrang khalaijiya. Kotherok tangsrangkha arw nokh o tangsrangni thaichlwi rakha."
39O birokma imwnw sagwi yakumu rwkha, "Ang jebw jebw khalaijak oboroknw jotho Bw anw sagwi rwkha." Bini i koknw khanagwi o kamini kabangma Somoriyo Jisunw paitoklaikha. 40Aithani jephuo Jisuni dayw o Somoriyorok phaikha, ephuo bok Jisunw bokbai baksa tongdi hinwi kabokkha. Obwni bagwi Jisu odayw salnwi tongkha. 41Aiphuo Bini kok khanagwi arw kabangma borog paitokha. 42O birokmanw bok sakha, "Tabok je chwng paitokkha obw nini kokbaiya, matwr Bini koknw khanagwi chwng bijimangkha kwbwise Bw borogni tekhoknaisa."
Jisu kaisa hayanw hamrwkha
43O salnwini jerw Bw Galilo thangkha. 44Jisu sakse sajak diyari bini sakni kamiyw borom manya. 45Jirusalemw Jisu terni joragw jebw jebw khalaijak, Galilni borogrok o terw thangjak thani bok jotho nungjak. Oboni bagwi Jisu jephuni Galilw thangkha aiphuni odaini borogrok Bwnw phaiham rwkha.
46Jerw Jisu arwbw Galilni o kanna kamio thangkha, jedayw bw twinw uamtwi bwtwi khalaijak. Odayw kaisa bugra kamlani basala hayagw bugidok. 47Jisu Jihudiya daini Galilw phaijak hinwi khanagwi o bugra kamla Jisuni dayw thangkha tei Bwnw kabogwi sakha kisa khakhamdi, Kophornahumo thangwi ani basanw kisa hamrwdi, twmwi hinba aiphuo basala thwini ongjak.
48Jisu o kamlanw sakha, "Mwngsa sidom eba amok samung nungya khai nokh paise paitokgalak." 49Ephuo o kamla sakha, "Khakhamwi kisa ani basa thwinai aguo phaidi." 50Jisu bwnw sakha, "Nwng thandi nasala hamkha." Obwbai bw Jisuni kok paitokgwi thangkha.
51O kamla jephuo nogw philwi thandok aiphuo bw bini gabur rokbai malaikha tei bok bwnw sakha, "Nasala hamwi paikha."
52Bw o gabur roknw swngkha, "Baiphuo bw hamkha?"
Bok sakha, "Miya diphwr dam sa jogo bini kulum hamkha."
53Obwbai bopha bijikha, thi o jorago Jisu sajak, "Nasala hamkha." Ephuo o kamla tei bini nukhungni jotho borog bwnw paitokkha.
54Jihudiyani Galilw phainai jerw imw ongkha Jisuni nwithek pala amok chanai samung.
ទើបបានជ្រើសរើសហើយ៖
Johon 4: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
