Prerit 5
5
Ononiyo bai Saphira
1Ononiyo hinwi borog kaisa tongo arw bini bihikni bwmwng Saphira. Bok kainwi miliywi bokni harum kwrwngsa phalka. 2Phalwi je rang maha odaini bagsa pirisai rokni dayw twbwgwi rwphaikha, matwr bok khogwi rang bagsa bokni dayw tonwi rwkha. Bini bihik i kothoyw siyw arw bwbo basaibai thancha ongjak.
3Aiphuo Pitor sakha, "Ononiyo nwng tani saknw Saitannw nini khanw twidulni rwkha arw harum phalnaini rang daini bagsa larwgwi Phala Katharni dayw tani misa sakha? 4Harum phalyoho suni omw ta nokniyadwi? Arw omonw phalwi rang mannai omobw ta nokhni bagriyw tongjiya? Nokh imwtwi jar khachap bwrwni manha? Nwng borogni daywya matwr Kaitorni daywse misa saha." 5I kokrok khananai loge loge Ononiyo hao kalaywi thwiha, tei jebwrok i ongnai tolpiroknw khanakha, bok jotho kabangma kirilaikha. 6Ulo chakwlwirok bachagwi bwnw ribai khobwi phatarw tilangwi phubha. 7Arw udam tham paihalai Ononiyoni bihik sirw phaiha, matwr ta ongjak omonw bw siya. 8Aiphuo Pitor bwnw swngkha, "Anw sale nwngbai Ononiyo ta iswk rangbai o harumnw phaljak?" Bw saha, "Owk, iswk rangbaise phaljak."
9Aiphuo Pitor bwnw sakha, "Subraini phalanw bajai naini bagwi nokh tani thancha ongkha? Khanadi, Jebwrok nasainw phubni thanjak, bok duar koriyw supaiha arw bok nwnwbw phatarw tilangwi thangnw."
10Saphira loge loge Pitorni yathwi koriyw kalaywi thwiha. Tei o chakwlwirok bisingw phaywi bwnw thwijak khalaywi nungkha arw bok bwnwbo phatarw tilangwi bini basaini koriyw phubha. 11Aiphuo mothani jotho borog, tei jebwrok i ongnai tolpiroknw khanakha, bok jotho kabangma kirilaikha.
Pirisairokni amok samung
12Pirisairok borogrokni bisingw kabang amok amok samung tangw, arw paitoairok jotho Solomonni noksarw baksa khalaywi thumjalayw. 13Kothe borogrok bokbai baksa daljani kharaklaiya, matwr jotho borom khalayw. 14Arw kabangma borogrok Subrainw paitokkha arw paitoairokbai baksa daljani nangkha. 15Pirisairok jebw khalailaidok omonw nungwi, borogrok hayaroknw khat sakao bogwi lama lamao tonphaini nangkha, Pitor o lamatwi jephuni thang aiphuo bini sampliphwng hayarokni sakao kalainaitwi. 16Jirusalemni korekarani jatejar kamini borogrok bokni hayaroknw tei chaya phala rumjajak roknw twbwgwi phaywi meche meche ongni nangkha, arw bok jothobw hamkha.
Pirisairokni samung thakrwni bagwi Jihudirokni chaitokma
17Omo paihalai hakra chontai arw Sodduki dagini je borogrok bwbai baksa tong bok khamreni nangkha. 18Bok pirisairoknw rumwi alongw chubwi tonkha, 19matwr horo Subraini kaisa suari phaiywi o alongni duar khengwi rwkha. Bw pirisairoknw alongni phatarw tilangwi sakha, 20"Thangdi tei noktharni kholagw bachadi, arw borogroknw katal langmani kothoyw sadi."
21Bok o kokni maping phurung aisiri siri noktharw thangwi phwrwngni rumkha.
Jephini hakra chontai arw bini logisongrok sokpaikha, aiphuo bok Israyelni je okara chakararok hakra baichukni adong boknw ringkhokha. Omo paihalai bok pirisairoknw alongni twbwgwi phaini bagwi kainwi kaitham noktharni sotaingroknw hoka. 22Matwr noktharni sotaingrok alongw thangwi boknw manliya, aithani bok philwi thangwi sakha, 23"Chwng thangwi nungkha alongni duaphang gam khalaywi khagwi gila rwjak, duaphangw duaphangw sotaing bachagwi tongjak, matwr duaphang khengwi bisingw thangwi chwng kaisanwbw nungniya." 24I koknw khanagwi noktharni sotaing birinpha tei chontai ojarok busmaya ongwi oansokni nangkha imwni thaimari ta ongnw. 25Aiphuo kaisa borog phaywi sakha, "Naidi, je borog roknw nokh alongw rwjak bok noktharw bachagwi borog roknw phwrwngdok," 26Aiphuo birinpha noktharni sotaing roknw tilangwi thangwi pirisai roknw philwi twkha. Matwr borogrok boknw holong koknw omonw kiriywi bok pirisairoknw mar khalainiya. 27Pirisairoknw twbwgwi bok hakra baichuk sakangw bacharwkha. Aiphuo hakra chontai pirisairoknw swngkha. 28O borogsani mwngwi ta phwrwngdi hinwi ang nokhnw karak khalaywi mathakjak. Matwr nokh nokhni phwrwngma bai Jirusalem pwlwng rwkha, tei o borogsa thwimaninw chwnw khatta rwdok. 29Aiphuo Pitor tei arw tongnai pirisairok joba rwkha, "Chwng borogni tholma palainaini naiywi Kaitorni tholmanw mapalenai, 30Jenw nokh kruso khachiywi buthaljak chini hodaipiri rokni Kaitor o Jisunwse kwthwi daini kathang khalaywi tisakha. 31Israyelni bukhorok tei tekhoknaisa hinwi Israyelni borogrokni kha sumsok daini philwi twphaini bagwi arw bokni sumsok nakarwi rwni bagwi Kaitor Bwnw chungchuk khalaywi Bini yagara phaising achukrwkha, 32chwng imwrokni sathai tei o Phala Katharbw sathai, Jenw Kaitor Bini kok khananai borogroknw rwjak." 33I kok khanagwi o ojarok thamchi kutulaikha tei pirisairoknw buthalni naikha. 34Matwr Gomoliyel hinwi Phorisi kaisa jebw hakra baichukni kaisa, bw ikimni phwrwngsa, jenw jotho borom rwgw, bw bachagwi o pirisairoknw rangsani bagwi pandani phatarw tilangwi thangdi hinkha. 35Obwni jerw bw hakra baichukni borog roknw sakha, "O Israyelni borogrok, o borogrokni kothoyw nokh jebw khalaini thandok o kothoyw kwrwk tongdi. 36Twmwi himba imwni aguo Thuda hinwi kaisa borog phaiywi saknw manchuk kaisa hinwi sajak, arw akhuni rabrwi borog bwbai baksa kwrwngjak. Bwnw buthalwi pairwkha arw bini jotho logisong rokbw sabrajagwi paikha. Omobai bini jotho thaikwrwi ongkha. 37Omo paikhalai borog thikinai jorao Galilni Jihuda phaikha arw pwital khalaini bagwi kisasa borogroknw bwbai baksa dalkha. Bwbw thwikha arw bini logisong rokbw jotho sabrajagwi thangkha. 38Omoni bagwi i habagw ang nokhnw sadok, nokh i borogrokni sakagw mwngsa takhalaidi. Boknw yakarwi rwdi, twmwi himba bokni bachung tei samung jwtini borogni daini ongw halai bokni samung thaikrwi ongnai, 39matwr jwtini Kaitorni daini ongw hingkhlai nokh boknw thakrw mangalak. Nokh Kaitorni baithe choba khalaidok." 40Aiphugw Gomoliyelni kokbai ojarok kok baksa ongkha. Bok pirisairoknw bisingw ringwi twbwgwi lathamsakbai buni nangkha. Omo paikhalai bok boknw yakarwi rwkha tei tholkha bok Jisuni mungbai arw mwngsa sayatwi. 41Omobai sagrirok tongthokmabai akhogwi thangkha twmwi hinba bok Jisunw mwnmani bagwi lachima nungni chogkkha. 42Bok jwnwmbiti noktharw tei nogw nogw thangwi phwrwngni nangkha tei Jisuse o Mosiho i kothoma pirni nangkha.
ទើបបានជ្រើសរើសហើយ៖
Prerit 5: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
