Prerit 4
4
Jihudi hakra baichuk sakangw Pitor bai Johon
1Pitor arw Johon jephuni borogrokbai kok salaidok, aiphuo noktharni Jihudi chontairok, noktharni sotaingrokni birinpha arw Soddukirok bokni dayw phaikha. 2Aiphuo Pitor arw Johon borogroknw phwrwnglaidok tei sadok je Jisu kwthwi daini thangwi bachajak arw imw majra khalayw je kwthwirokbw thangwi bachanw tei i kokni bagwi bok Pitor bai Johonnw thamchi kakha. 3Bok Pitor bai Johonnw rumkha matwr swinda ongwi paikha thani boknw jerwni sal jora alongw chubwi tongkha. 4Matwr jebwrok Pitorni kok khanajak bokni bisingni kabangma borog paitokkha: omobai paitoairok remw bangwi ba sai twtwi ongkha.
5Jerwni salw Jihudi sakwlpharok, okara chakara rok tei kerongnal phwrangsa rokbai baksa khalaywi Jirusalemw thumjalaikha. 6Sirw Chontai oja Hanon, Kayapha, Johon, Aleksandor arw hakra chontaini nokni kainwi kaitham borog tongw. 7Bok Pitorbai Johonnw bokni sakangw bacharwgwi swngkha, "Nokh bw pharanbai eba bagribai i samungroknw tangdok?"
8Aiphuo Pitor Phala Kathar bai kwplwng ongwi boknw sakha, "Sakwlpharok tei okara chakara rok. 9Kaisa boyanw chubamani bagwi arw bw tama khalaywi himmakha o kothoyw jwtini nokh chwnw tini swngw, 10iswkhalai nokh jotho arw Israelni jotho borogrok i koknw sithwk, imw Nasorotni Jisuni mwngbaise ongkha! Jenw nokh kruso rwgwi buthaljak, Kaitor Bwnw kwthwirokni bisingni thangrwgwi tisakha, Bini bagwise i borogsa tini gam khalaywi hamwi nokhni sakangw bachagwi tongdok. 11Gitsonghitao imw suijak tongw Jisu ongkha, 'O holong jebwnw nokh itangirirok yakhakka, arw imwse tabok jothoni solai nangchuknai holong ongkha.' 12Keber Jisuse kaisa, Jebw borognw sumsok daini tekhokman. Swngsarw Bini bumungse kwrwngsa pharan jebw borognw tekhokmanw." 13Pitor bai Johonni sagwn nungwi tei bok je suikhai maya arw hentra borog omono siywimanwi o ojarok amok chalaikha, arw Johon bai Pitor Jisuni loge tongjak omwnwbw bok bujiywi mankha. 14Je borogsa hamjak bwnw Pitor bai Johonni koreyw bachagwi tongmani nungwi bokni sani arw mungsa kwrwiha. 15Aithani bagwi hakra baichukni ojarok bok kainwino phatarw thandi hinwi tholkha. Omo paihalai bok baksa khalaywi salailaini nangkha. 16Bok sakha, "I borogroknw lagwi chwng ta khalaitai? Jebwrok Jirusalemw tong bok jotho siyw je, imorok kwrwngsa amok samung tangjak, arw chwng o koknw goseyabw tongmaya. 17Matwr i kok borogni dayw arw pwlwngyatwi aithani bok kainwinw chwng masikirinw, Jisuni kothoyw bok arw mwngsa sayatwi."
18Bok arwbw Pitor bai Johonnw bisingw ringkhoka arw Jisuni mwngwi mwngsa sayatwi eba phwrwngyatwi hinwi tholma rwkha. 19Matwr Pitor bai Johon omoni joba rwgwi boknw sakha, "Nokhse nalchir khalaidi, Nokhni tholmanwde palethai, ha Kaitorni tholmanw palethai? Kaitorni mokolw bwbo thi? 20Twmwi himba jebwnw chwng nungjak tei khanajak omonw chwng saya bader tongma galak."
21Omoni jerw bok Pitor bai Johonnw arw kabang khalaywi sikiriywi yakarwi hoka. Bok kainwinw senji rwni mwngsa lama manliya twmwi himba jebw jebw ongwi thangkha omonw nungwi borogrok Kaitornw loblaidok. 22Twmwi himba je borognw i amok samungni bisingtwi hamrwjak, bini cha chibrwini bw sakao.
Paitoairokni surimung
23Pitor bai Johon yugwi bokni sakni borogrokni dayw philwi thangkha arw chontai oja tei okara chakararok boknw ta ta sajak o kokroknw boknw sakha. 24I kok khanagwi paitoairok jotho baksa khalaywi Kaitorni dayw suri sanlaikha, "Subrai, nokha, hayung, dolia tei odayw jebwrok tong omoroknw taknaisa Nwngse. 25Nwng Phala Katharni bisingtwi Nini seleng chini hodaipiri Dayudni bukhoktwi sajak, "Dopharok tani iswk thamchi kalaidok?
'Tani bok Kaitorni baithe bwdwng rainal khalaika?
26Hayungni bugrarok choba khalaini bagwi tiyar ongkha, arw sengkwlrok Subrai Kaitorni baithe tei Bini Khristoni baithe baksa onglaikha.'
27I auliose Nini kathar seleng Jisu Jebwnw Nwng koboljak Bini baithe Herod, Pontiyo Pilat, Jihudirok tei Israyelrokbw baksa onglaijak. 28Nini pharan arw muchumungtwi aguni jimin jebw ongnw hinwi Nwng thi khalaijak, o samungnw khalaini bagwise bok baksa onglaikha. 29Arw tabok, o Subrai, imwrok chwnw ta khalaywi sikiridok omo Nwng naikhodi, Chwnw Nwng Nini koknw sani kharakrwdi tei pharan rwdi. 30Borogroknw hamrwni bagwi tei Nini kathar seleng Jisuni mwngwi amok tei sidomni samung khalaini bagwi Nini yak hokodi. 31O paitoairok suri sanpalai halai, bok jedayw thumjalaijak o jega kwlwywi kakha. Tei bok jotho Kathar Phalabai kwplwng ongkha arw kharagwi Kaitorni kok sakha.
Paitoairokni pabaksa
32Aiphuo paitoairokni jothoni kha singli baksa onglaijak. Kaisabw bokni rangrini mwngsanwbw sakni hinwi saya, matwr bokni jotho manwi bok kaisabai kaisa baglaywi lalaiyw. 33Pirisairok hakra pharan bai Jisuni thwinai daini thangwi bachanaini kothoyw yakumu rwgwi thani nangkha. Bokni jothoni sakagw Kaitorni kotor khakhamma tongw. 34-35Bokni bisingw kaisabw biyal borog kwrwi, twmwi himba jebwrokni rangri eba nok tong bok omoroknw phalwi o rangnw twbwgwi pirisairoknw rwphayw. Ulo jeni jeswk rang nang, omoni maping pirisairok boknw bakgwi rwgw. 36Lebiyo bosongni Josep hinwi borog kaisa tongw. Bini nok ongkha Saipras twibongw. Pirisairok bwnw Barnoba kok ongkha khabaja rwnai hinwi ringw. 37Bini harum chopalasa tongw, bw omonw phalwi o rangnw pirisairokni dayw twbwgwi rwphaiha.
ទើបបានជ្រើសរើសហើយ៖
Prerit 4: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
