Prerit 27
27
Pol Romo thangmani tei kothoma pirmani
1Jephuo thi ongkha je chwng rungtor#27:1 rungtor Borog kabang chaknai jar rung jebwnw pangaibai chokni nangya. bai Italiyw thangnai, aiphuo Pol tei arw kainwi kaitham chupjajak roknw Juliyo mwngni kaisa rasa sengkrakni ojani yagw abwi rwkha. Bw ongkha Habugrani sengkrak dagini kaisa. 2Chwng Adramuttiyoni phainai rungtor kwrwngsago kakha tei odaini thangni rumkha. I rungtor Asiani jate jar jegao thangjannai kok tongw. Thisolonikiyoni Aristarkh mwngni kaisa Mesidoniyan chwngbai baksa tongw. 3Jerwni salo chini rungtor Sidonw suikha. Juliyo Polbai rak gam yakwl khalaikha. Bw Polnw bini aphak rokbai malaini bagwi khalon rwkha, jate o aphakrok Polni bagwi nangnai manwi khunwi rwmannaitwi. 4Odaini chwng rungtor khengwi Sidon auli yakarwi thangkha. Nobar chini ulta aita tongmani bagwi Saipras twibongni jejang aita nobar kwrwi chwng sijang aita thangkha. 5Jerw chwng Kilikiya tei Pamphuliyani sakangw je twijlang tong o twijlang balwi Lukiya amchoini Mura aulio thaibuk ongkha. 6Odayw rasa sengkrakni oja kwrwngsa rungtor mangkha jebw Alekjandriyoni Italiyo thangdok. Tei chwng jotho o rungtorw kalaikha. 7Chini rungtor kabangma sal jora twlwk twlwk thangdok arw belai tektobai Klidon aulio kasok phaikha. Nobarni bagwi chwng jedayw thangni naikha orw thangmanliya. Aithani chwng Solomoni aulinw balwi thangyasak jora chwng Krit twibongni koretwi khalaywi kalai lamatwi thangkha. 8Jerw belai tekto bai twibongni kandatwi thangtwi thangtwi Laseya aulini koreni kwrwngsa jegao sokphaikha jebwni bwmwng ongkha Machang Potasroy. 9Chwng orw thangphini kodur jo hogwi pairwjak. Jihudirokni nakarma terni#27:9 nakarma terni Lebiyo lobong 23: 26-32 khep jerw imw ongkha pwila aitani maisingni jo, i joragw nobar bangbar gamya thani chini bagwi thangnai bari karak ongwi kakha. Aithani Pol boknw hus khalaikha, 10"Naidi ang nungkho dok chini i hwingchokgw belai guna ongnw, o guna keber rungtor arw manwi khunwini ongnw obwya, chini langmani bw guna ongnw." 11Rasa sengkrakni oja matwr Polni kok khanaya karwi rungtorni rungita tei rungtorni nophangsani kok khanakha. 12O gati maising honi podia jegaya hinwi kodur borogrok thi khalaikha je, odaini hwingchok gwi pharihalai Phwinikgw thangwi maising honw. Phwinik Potasroy ongkhadwi maisingw Krit twibongni rungtor tonni kachang jega. Twmwi hinba i twibong rungtor roknw oatwi nobarni rwkkhiya khalayw.
Kirimasincha Oatwi nobarni bisingw rungtor
13Jerw jephuo sal yaksi ni nobar twlwk twlwk sipni nangkha aiphuo bok bakha kakha bok jebwnw naikha obwse ongkha. Aithani bagwi rungtorni rungol tisagwi Krit twibongni kanda twi thangkha. 14Matwr rangsa jerw o twibong daini Urakulo hinwi kwrwngsa kirimasincha oatwi nobar chengkha, 15tei rungtor o kirimasincha oatwi nobarw kalaikha, chwng arw rungtorni mar larwkmanliya. Aithani chwng chini rungtornw nobar jejangtwi sib ojangtwi thangni rwkha. 16Jerw Koda mwngwi kwrwngsa gira twibongni jejang nobar kisa tong chwng oijang thangkha arw rungtorw je rung gira tong o rungnw chwng belai tekto khalaywi nachrani yakni yokrwkha. 17Arw borogrok o rung giranw swtwnwi rungtorw tisakha. Obwni jerw bok rungtor baywi kalaiyatwi budokbai obwnw gam khalaywi rabwi khaha. Surti mwngni twibomni chorw rungtor kachajani kiriywi poainw tikhalaywi rungtornw nobarw thangrwni nangkha. 18Oatwini lwngsima banghalai, jerwni salw borogrok rungtorni hilik hilik manwi khunwinw twiyw khibini nangkha. 19Salthamni salw bok sakni yakbai rungtorni jugalnai manwi khunwi twiyw khibikha. 20Kabangma sal jora sal eba handuguri mwngsabw nungjaniya arw akaita nobar sibni nangkha. Paithagw chwng rwkhiya manni jotho khadung yakarwi rwkha. 21Borogrok kabangma salni jimin mwngsa chajiya hinwi Pol bokni sakangw bachagwi sakha, "Naidi, ani kok khanagwi Krit twibongni rungtor yakarya tongmani nokhni thi ongkhamung. Halai i dosa tei gunani yakni nokh rwkhiya mangkha mwng. 22Matwr tabok ang nokhnw kabogw, nokh kharakdi, twmwi hinba nokhni kaisabw thwigalak, keber i rungtorse piyaknai. 23Twmwi hinba ang Je Kaitornw lob o Kaitorni kaisa suari thangnai horw ani koriyw bachakha, 24arw sakha, 'Pol, takiridi. Nwng Kwisorni sakangw mabachanw. I rungtorw jebwrok nwngbai baksa thandok bokni jothoni langmanw Kaitor khaphurwi nwnw rwkha.' 25Aithani kharakdi. Kaitorni sakao ani i paitokma tongo je, Bw anw jebw sajak obwse ongnai. 26Matwr chwng jephwng kwrwngsa twibongni kandao thangwi kachanw." 27Chwng Andriya twibomni sakatwi arai khalaywi thangni nangkha. Oatwini sal chibrwini salo horthugwi rungitai rokni bakha kakha bok hakongni koriyw sokphaidok. 28Bok ratagwi naikha odaini twi muk charchi kuthok. Obwni rangsa jerw bok arwbw ratagwi naikha je, odaini twi muk dokchi. 29Bokni rungtor gara gara holongnw dumnw obwnw kiriywi, bok rungtorni ukhum aitani kwrwng bwrwi khengor khibikha arw salni porni bagwi suri sanni nagkha. 30Jerw rungtorni rungitairok khalwi thangni bagwi rungtorni sakang aitani khengor khibinai nathal kariywi rungtorni rung giranw twibomw tikhalaikha. 31Matwr Pol birinpha tei rasa sengkrakni oja rokni bachungw sakha, "I borogrok jwtini rungtorw tongya tilai halai nokh rwkhiya mangalak." 32Aiphuo sengkrak rok rungni budok ragwi rwkha, arw obw twiyo thangwi kalaikha. 33Phurung ongnai aguo Pol jothono mwngsaswk chadi kabogwi sakha, "Tini chibrwi sal ongkha, ta ongnw ongya obwnw oansogwi nokh chaya karwi tongkha mwngsa chamwngbw chajiya. 34Tabok ang nokhnw mwngsaswk chagwi ladi hinwi kabokjagw. Thangwi tongni bagwi nokhni kisa chathai kalaiyw. Naidi, nokhni bukhurokni kwrwngsa khanai hoda piyak galak." 35I koknw sagwi Pol auan lagwi bokni jothoni sakangw Kaitornw hambai rwkha, arw obwnw sapaywi chani nagkha. 36Aiphuo bok jotho khabaja manwi chani nagkha. 37Chwng rungtorw joma kai nwi ra snichidok borog tongw. 38Jothobw owk pwlwngsa chagwi jerw rungtorni heleng khalani bagwi jotho gom twibomw khibikha. 39Phurungw bok jeganw sini maniya, matwr imwtwijar kwrwngsa gira dekjlang nungkha jebwni kandao hachikong bai kwplwng. Bok thi khalaikha, pharihalai rungtornw o kandagw tisani hinwi. 40Aithani bok rungtorni khengor roknw rasogwi rwkha arw obwroknw twibomw kalaini rwkha arw pangaini rabjak budokroknwbw khengwi rwkha. Obwni jerw bok nobarni bukhukni sakango poai tisagwi rwkha, 41matwr rungtorba twi kanda aita thangwi chorw kachakha. Arw rungtorni Sakangni bokchoba juaiya ongwi paikha arw phalbai tukjagwi ukhum aitani kocho kocho ongwi baywi thangni rumkha. 42Aiphuo sengkrakrok chupjak roknw buthalni hinwi thi khalaika, bokni bisingni kaisabw twi yogwi khalwi thangmayatwi. 43Matwr rasa sengkrakni oja Polni singli mwthangni naikha hinwi sengkrak rokni muchungmani kosol samung tangni rwniya. Bw boknw thwlkha, jebwrok twi yokni rwng bok twi yogwi hakongw thangwi kathwk, 44tei arwrok jotho rungtorni tokta eba mwngsachwk bophang bokcho rumwi odayo thantwk. Arai khayoi jotho kachang khayoi hatwngo suikha.
ទើបបានជ្រើសរើសហើយ៖
Prerit 27: TPE
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2025 Bible Students Fellowship of Bangladesh
