မၢ်ကူး 16
16
ယ့ၣ်ရှူးအတဲၤထာ်ပဳၤက့ၤ
(မး ၂၈:၁-၈, လူၤ ၂၄:၁-၁၂, ယိၤ ၂၀:၁-၁၀)
1ဘ့မူၤနံၤဆီးဒဲဝှါအအူဆူးတနံၤ ကဳၤထာ် ဝှါနဳၤ, နီၢ်မၤရၱမၤ ကဒၤလ့ၣ်, နီၢ်မၤရၱ စီၤယၤကိာ် အမဳၤ, ကၱာ်နီၢ်စၤလိၣ်လ့ၤအံာ်ကဲၤတဲၤ နှူဝံာ် နှူသရီစာ်ဘိထဲၢ်စဲာ်တစီာ်ကသဖြိးပီၢ်ယ့ၣ်ရှူးအစဳးနဳၤ. 2တဆီးဒဲဝှါအအူဆူးတနံၤလူၤမူၤဂီၤ သးဘံဝ့ၤအခၠၱး, လူၤမူၤထာ်ကါကလီနဳၤ, စဲာ်တစီာ်ထာ်ကဲၤလူၢ်ခဳး. 3စဒီၣ်လှဲးကဲၤလၢ် ဝၤ, “ပီၢ်ပွဲၤ ကဆးဖျီမံနံၤဝၤလဳၤဓဳၤအအီၣ်ဘံာ်လူၢ်ပူၤ နဳၤပွဲၤ.”
4ဘ့စစာ်ထာ်နဳၤ, စစာ်ထၱးကဲၤလဳၤဓဳၤဘဲာ် ဆးဖျီမံထဳ, လဳၤ မၱာ်အဓဳၤဇၱၢ်ဓဳၤဇိၢ်. 5ဘ့စလ့ၤနံၢ်လူၢ်ပူၤအခဲ, စဲာ်တစီာ် စာ်ထၱး ကဲၤအဘီာ်လီးဖဳး တပွဲၤ ဆးနါလါအီၣ်ဒဳ အစူးတထွဲးတခီ, စသီးၡံာ်ဒဳ ဇိၤအဘိာ်သါ, ဒဳၣ်စဲာ်တစီာ်ထဲးတမိၢ်တမှါ ကဲၤ.
6စဒီၣ် လၢ်ဝၤတစီာ်, “သးကနၢ်ပီၢ်မဲး. သံဝၢ်စါလှဲးယ့ၣ်ရှူး နစၤရ့ၤဖဳး, ထဲၢ်အဘဲာ်ထးလၤ ကျဳၤသံကဲၤတပွဲၤနဳၤ. စထာ်ပဳၤက့ၤထဳ, စတအီၣ်ဘ့ ယဳၤနီး. စာ်ပီၢ်အလ့ၤအကျဲးထဲၢ်ပၠၤဘဲလါကဲၤစဲာ်နဳၤ. 7ပရၤဆါ ဒဳၣ်, လ့ၤကၱာ်ဒီဆးပီၢ်စပျဲၢ်ဘီၣ် တစီာ်, ကၱာ်စီၤပ့းတရူး ထဲၢ်စလ့ၤနံၢ်ထဳ ကၤလံၤလဲက့ၤ ဒဳသံလှီမီၢ်နဳၤ. ဒဳနဳၤသံကစာ်ထၱးစဲာ်အစာ် ဘိစဒီဆးကဲၤသံနဳၤ.”
8စဲာ်တစီာ်ဟဲးထာ်ကၱာ်စွဲးဖျီးမံကဲၤဒဳ လူၢ်ခဳး, မၤနဲၢ်, စကနၢ် တဇၱၤကၱာ်စသဳးစသး တဝၱၢ် တဝ့ၤကဲၤ, ကၱာ်စဲာ်တစီာ်တဒီဆးကဲၤပၠၤတဗွဲတမံနီး, ဒဳစၡံးဆါကဲၤအခဳးအစဲနဳၤ.
ယ့ၣ်ရှူးအတဲၤဒဲလၱၢ်ထာ်အန့ၤ
(မး ၂၈:၉-၁၀, ယိၤ ၂၀:၁၁-၁၈)
9ဘ့ယ့ၣ်ရှူးထာ်ပဳၤက့ၤဝှါတဲၤသံအကျဲ, တဆီးဒဲအအူဆူး တနံၤဂီၤသးဘံနဳၤ, စပီၤထာ်ထၱးအူဆူး နီၢ်မၤရၱ မၤကဒၤလ့ၣ်, ထဲၢ်စနှး ဟဲး ထာ်ကဲတဲၤၡံးတဲၤနှဲး သါသိးတဒဳအဟၱးကျဲတပွဲၤနဳၤ. 10စလ့ၤဒီဆးကဲၤပၠၤထဲၢ် အအီၣ်ကိာ်ကဲၤယ့ၣ်ရှူးအကါ လှ့နဳၤတစီာ်နဳၤ, ဘ့ စဲာ်တစီာ် ယဳၤအံာ်ဟးအံာ်စဲာ် အခဲနဳၤ. 11ဘ့စဲာ်တစီာ်သၱာ်ဟဲဘဲာ် ယ့ၣ်ရှူးအီၣ် သမိတပွဲးကၱာ် နီၢ်မၤကဒၤလ့ၣ်စာ်ထၱးဘဲာ်စဲာ်နဳၤ, စတဘူၣ်တပွဲးနီး.
ယ့ၣ်ရှူးဒဲလၱၢ်ထာ်အန့ၤ
(လူၤ ၂၄:၁၃-၃၅)
12မဲၤဝှါ, ယ့ၣ်ရှူးဒဲလၱၢ်စီးကျၱးအန့ၤဒဳ စဲာ်တစီာ်အကျဲကၠံၢ်ပွဲၤ, ဘ့စဟဲးပိာ်ဒဳအခၠၱးနဳၤ. 13စဲာ်တစီာ်က့ၤဒီဆး စခီအလဝ့ၤတစီာ်မၱာ် မၱာ်, ပၠၤတဘူၣ်တပွဲးစဲာ်နီးနီး.
အပျဲၢ်အဘီၣ်တစီာ်အတဲၤဘဲာ်သဓဳ
(မး ၂၈:၁၆-၂၀, လူၤ ၂၄:၃၆-၄၉, ယိၤ ၂၀:၁၉-၂၃, သဓဳဖဳး ၁:၆-၈)
14အကဓူၤလါ, စပီၤထာ်ထၱးကဲၤ အပျဲၢ်အဘီၣ်ၡံးတပွဲၤဒဳဒၱ ဝၢ်ထၱးနဳၤ, ကၱာ် စဟီကဲၤ လၢ်ဝၤဒဳစတဘူၣ်တနဲၢ်တစီာ်နီး, ကၱာ်စသဳး ဆးသးဆးအစဲနဳၤ, ထဲၢ်ဒဳစတဘူၣ်ပၠၤထဲၢ်အစာ်ထၱး စထာ်ပဳၤက့ၤထဳတစီာ်နီးနဳၤ.
15စဒီၣ်ကဲၤလၢ်ဝၤတစီာ်, “ဟဲးပီၢ်လၢ်ခဳးသဒဲဘဲာ်အခဳး, ဒီၣ် အူဆးအူပီၢ်ပၠၤလဳ စါစဲးတဲၤသးလဳၢ်သးလၤအံာ်အဝၱၤအကဲ. 16ပၠၤအဘူၣ်ကၱာ်အနံၤဘဲာ်တဲၤဖဳးစူထံတစီာ်, ကနံၤဘဲာ် ကီတဲၤယဳၤက့ၤစာ် က့ၤ, မၱာ်အတဘူၣ်နီး တစီာ်ကဘဲာ်ကီတဲၤစံးရး. 17အဘူၣ်တစီာ် အနံၤခံတဲၤအဟိအကလဲၤ ကမၱာ်ကီကယဳၤ, ဒဳယမံၤအပူၤ စကနှးဟဲး ထာ်ဖျီးမံကီတဲၤၡံးတဲၤနှဲး, စကဒီၣ်အံာ်ကီ တဲၤယၱၢ်ဘဲာ်အသဲ. 18စကပိာ်ကီဝူၤသဲထဲး, စကအီနံၤနီၣ်သီတဲၤအစံးအပဲၢ်နှီနူၤအကတဘဲာ် ထံး ဘဲာ်ဒိကီစဲာ်နီး. စကထဲးလၤစစူးခီးအရွှံးအဆဲ တစီာ်အခဳးကၱာ်အနဳၤ တစီာ်ကမှးက့ၤကီ.”
ယ့ၣ်ရှူးက့ၤထာ်မီၢ်ခဳး
(လူၤ ၂၄:၅၀-၅၃, သဓဳဖဳး ၁:၉-၁၁)
19ဘ့ယ့ၣ်ရှူးယၱၢ်ဘဲာ်ထၱးဝှါစဲာ်တစီာ်ဒဳၣ်, စက့ၤထာ်ကဲၤဒဳမီၢ် ခဳးကၱာ် ဆးနါလါကဲၤဒဳကဘၱာ်စဲာ် အစူးတထွဲးတခီနဳၤ. 20အပျဲၢ် အဘီၣ်တစီာ်ဟဲးကၱာ် ဒီၣ်အူဒီဆးကဲၤတဲၤတကွၢ်လဲၢ်, ဒဳဘၱာ်စဲာ်အတဲၤ မဲၤဇဳၤ, ကၱာ်အတဲၤမဲၤမှ့းမဲၤကျဳၤစလ့ၢ်စဝှဲးအပူၤကၱာ်အံာ်လၤနံၤစဲာ် အကမဲၤတဲၤအစီးကျၱးစီၤၡဲတစီာ်လီၤ.
ទើបបានជ្រើសរើសហើយ៖
မၢ်ကူး 16: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.