မၢ်ကူး 15
15
ယ့ၣ်ရှူးဒဳစီၤပံၤလးအလှီမီၢ်
(မး ၂၇:၁-၂,၁၁-၁၄, လူၤ ၂၃:၁-၅, ယိၤ ၁၈:၂၈-၃၈)
1ဘ့လူၤမူၤဂီၤတဲၤလှၱထာ်နဳၤ, ပၠၤလှူၣ်တဲၤအဓဳၤတစီာ်, အန့ၤ ဓဳၤသး ပွ့ၤတစီာ်, အဝှ့းစဲာ်တစီာ်ကၱာ်ယူခဳးမၢ်ဓဳၤလဳစါစဲးလၤကျၤလှဲး ကဲၤ လၢ်ဝၤ. စစဳကျဳၤယ့ၣ်ရှူး, လ့ၤယဳၤအံာ်ကဲၤစဲာ်ဒဳ စီၤပံၤလးအီၣ်, ဝှါဒဳၣ် အံာ်လၤ ကဲၤစဲာ်ဒဳလၢ်ဝၤအစူးခီးပူၤနဳၤ. 2စီၤပံၤလးဒဲစဲာ်, “နဲၤမၱာ် ယူဒၤဖဳးအဆးဖြးဧါ.”
ယ့ၣ်ရှူးဒီၣ်ၡံက့ၤစဲာ်, “နဒီၣ်ထဳဓဳၤ.”
3ပၠၤလှူၣ်ထာ်အံာ်ဘၱာ်စဲာ်တစီာ်ဆးဝဲၢ် ကဲၤတဲၤကမဲာ်စလီၤ အမဳအမဳၤလီၤ. 4စီၤပံၤလးဒဲစာ်ကဒီစဲာ်, “စာ်ပီၢ်, ပၠၤဆးဝဲၢ်နလီၤ တဲၤ ကမဲးအမဳအမဳၤလီၤ, နတဒီၣ်ၡံတၤတမံနီးဧါ.” ပရၤဆါ စတဒီၣ်ၡံ က့ၤတမှိနီး.
5စီၤပံၤလးထဲးတမိၢ်တမှါဆိးကဲၤဒဳ ယ့ၣ်ရှူးတဒီၣ်က့ၤပၠၤအလံၢ်တမံနီးအစဲနဳၤ.
ယ့ၣ်ရှူးကၱာ်စီၤဘၤရးဘါ
(မး ၂၇:၁၅-၂၆, လူၤ ၂၃:၁၃-၂၅, ယိၤ ၁၈:၃၉—၁၉:၁၆)
6ဘ့ပွဲနံၤနဳၤ, အစာ်ဘိအနူၤအဒီ အီၣ်အဓ့ နဳၤ, ပၠၤဘါလှိးနဲၤ နီကဲၤပၠၤ အအီၣ်တဲၤဒဳးဝဲၢ်ကျဳၤအပူၤ တပွဲၤပွဲၤ, အစာ်ဘိပၠၤအတဲၤသးနံၤ အီၣ်ကၱာ်တၤ ထာ်အဓ့နဳၤ. 7ဘနဳၤအခၠၱး, ပၠၤထဲၢ်အမံၤမၱာ်စီၤ ဘၤ ရးဘါတပွဲၤအီၣ်ပျဳာ်ပျဳာ် ကိာ်ကဲၤပၠၤအထာ်ဒ့ဒီၣ်တဲၤ ကၱာ်အမဲၤသံပၠၤတစီာ် အကါ, ဒဳတဲၤကၱတၱၢ်အပူၤနဳၤ. 8ပၠၤအပဳၤအဟီးတစီာ်ကဲာ် ဧဳၤထာ်ကၱာ်တၤကဲၤစီၤပံၤလး ထဲၢ်တဲၤ အနူၤအဒီစမဲၤနဲၤနီအယဳၤနဳၤ.
9စဒဲစာ်လၢ်ဝၤတစီာ်, “သံသးနံၤ ယဘါလှိးနံၤသံ ယူဒၤဖဳးအဆး ဖြး တပွဲၤနဳၤဧါ.” 10မၤနဲၢ်, စသၱာ်ဟဲကဲၤပၠၤလှူၣ် ထာ်ဘၱာ်စဲာ်တစီာ်အံာ်လၤ ယ့ၣ်ရှူးစစူးခီးပူၤ မၱာ်ဒဳတဲၤသးကျးအစဲနဳၤ.
11ဘ့နဳၤအခဲလီၤ, ပၠၤလှူၣ် ဘၱာ်စဲာ် တစီာ် သကါထာ်ကဲၤ ပၠၤတစီာ်အကါ စာ်ဘိထဲၢ် စဘါ လှိးပီၢ်စီၤဘၤရးဘါဒဳလၢ်ဝၤအလ့ၤနဳၤ.
12စီၤပံၤလးဒီၣ်ကဲၤစဲာ်တစီာ်, “ယကမဲၤ အံာ်ဘဲာ်ပၠၤထဲၢ်သံ ယဳၤစဲာ်ယူဒၤဖဳးအဆးဖြး အယဳၤတပွဲၤစာ်တဲၢ်.”
13ပၠၤကဲာ်ဧဳၤထာ်ၡံကဲၤစဲာ်အလံၢ်, “လှၱး ထာ်ကျဳၤသံစဲာ်.”
14စီၤပံၤလးဒီၣ်ကဲၤစဲာ်တစီာ်, “မၤနဲၢ်, စတဲၤကမဲာ်မၱာ်ကဲၤ တၤနဲၢ်.”
ပၠၤတစီာ်ကဲာ်ဧဳၤထာ်ဆိးဒဳၣ်ချဳကဲၤ, “လှၱးထာ်ကျဳၤသံစဲာ်.”
15စီၤပံၤလးထဲၢ်အသးအဲးမဲၤဘဲာ်သးပၠၤ အပဳၤအဟီးတပွဲၤနဳၤ, ဘါလှိးထာ်နံၤကဲၤစဲာ်တစီာ် စီၤဘၤရးဘါ, မဲၤဝှါဒဳၣ်, စနှးကဲၤပၠၤ ကမူၢ်ကထး ယ့ၣ်ရှူး ဝှါဒဳၣ်, စအံာ်လၤကဲၤလၢ်ဝၤစဲာ်တစီာ် အစူးခီးပူၤ, စာ်ဘိထဲၢ်အကထးလၤကျဳၤသံစဲာ်နဳၤ.
ကျံဖဳးတစီာ်အတဲၤဆီးလူဆီယဲၢ်ယ့ၣ်ရှူး
(မး ၂၇:၂၇-၃၁, ယိၤ ၁၉:၂-၃)
16ကျံဖဳးတစီာ်လ့ၤနံၢ်အံာ်ကဲၤယ့ၣ်ရှူးဒဳ ၡံၣ်ဓဳၤအရှံၣ်အီပူၤ, ထဲၢ်ပၠၤယဳၤအမံၤ ပြ့ၣ်တိရံၣ်ယဲၣ် အပူၤ, ကၱာ်ယဳၤလၤတ့ၢ်ပျဳာ်ကျံဖဳးသဒဲဖဳးဒဳး. 17စသီးနံၤ ကဲၤလၢ်ဝၤ ၡံာ်ဒဳအလၱၤတဘဲာ်. စဘၱသကွါ ဝှါတၤဆူးစာ်ဘိခဳးစီနဳၤဒဳၣ်, စဖျးလၤကဲၤလၢ် ဝၤအကဳာ်ခဳး. 18ကၱာ်စဆီးလူကဲၤလၢ်ဝၤ, “ဘဲာ်မီၤ, ယူဒၤဖဳးအဆးဖြး.” 19စတကျီၢ်အံာ်ကဲၤလၢ် ဝၤအကဳာ်ကၱာ်ကပီၤမူၤ. စထွၱးနံၢ်လၢ်ဝၤအကၢ်ဓူပူၤ. စဓဳၢ်နှဳလါလၢ်ဝၤအလှီမီၢ်, ကၱာ်ဒဳဘဲာ်ယးဘဲာ်ပရၤ ဆးကဲၤစဲာ်. 20စဆီးလူဆီယဲၢ်ဝှါလၢ်ဝၤဒဳၣ်, စဘဳာ်လၤတ့ၢ်ၡံာ်ဒဳအလၱၤတဘဲာ်နဳၤ ကၱာ် သီး ထာ်နံၤက့ၤလၢ်ဝၤစၡံာ်ဒဳကၱာ်စန့ၤ, ဝှါဒဳၣ်, စဟဲးအံာ်ကဲၤလၢ်ဝၤစာ်ဘိထဲၢ် စကလှၱးထာ်ကျဳၤသံလၢ်ဝၤနဳၤ.
တဲၤထးလၤကျဳၤယ့ၣ်ရှူးသဳာ်ပျီၤထူၣ်စူညါအလီၤ
(မး ၂၇:၂၇-၃၁, ယိၤ ၁၉:၂-၃)
21ပၠၤထဲးကျဲၢ်နံၤကဲၤပၠၤကူၤရ့ၤန့ဖဳး စီၤၡံမိၣ်, ထဲၢ်စီၤအလ့း စၣ်ဒြူးကၱာ် စီၤရူၤပၤအပာ်အအီၣ်ဒဳလဲၤပူၤအက့ၤတပွဲၤနဳၤဒဳၣ်, ပၠၤနှး နဳၤနှးပဲၤကဲၤ စဲာ်အကယးဇဳၤယ့ၣ်ရှူးအသဳာ်ပျီၤထူၣ်စူညါ. 22ပၠၤဓဳၤ လ့ၤဒဳ ကီၤလၤကီၤသါ, (ထဲၢ်တဲၤကဳာ်ခွံးအလ့ၤ) တချဳးနဳၤ, 23ပၠၤအံာ် ကဲၤစအီ သဳာ်ပၡံးထံ အအီၣ်ကျဲဒီၣ်ကၱာ်မူရၣ်, မၱာ်ယ့ၣ်ရှူးတအီကဲၤနီး. 24စဲာ်တစီာ်လှၱးဝဲၢ်ကျဳၤဝှါစဲာ်ဒဳၣ်, စဘဳာ်မဲကၱာ် ပ့ၤနံၤ ကဲၤလၢ်ဝၤစၡံာ်ဒဳ.
25ပၠၤထးလၤကျဳၤကဲၤစဲာ်ဒဳသဳာ်ပျီၤထူၣ်စူညါ အလီၤ နဳၤ, မၱာ်ကဲၤဘ့ လူၤမူၤဂီၤလွံၢ်သိးတနၣ်ရၱၣ် နဳၤ. 26ဒဳစကဳာ်ခဳးနဳၤတဲၤဝှ့းလၤအီၣ် ကဲၤကယဳၤ, “ယူဒၤဖဳးတစီာ်ဆးဖြး.” 27ပျဳာ်ပျဳာ်ကၱာ်စဲာ်နဳၤ, ပၠၤ ထးလၤကျဳၤကဲၤတ့ၤဝှ့ဖဳးကၠံၢ်ပွဲၤ, ဒဳစစူးတထွဲးတခီဘဲာ်တပွဲၤ ကၱာ်ဒဳစစူး တစၱး တခီဘဲာ်တပွဲၤ.
28တဲၤဝှ့းလၤနှဲးအီၣ်, အဒီၣ်, “စကဘဲာ်တဲၤလဲၢ်ပျဳာ် စဲာ်ကၱာ် ပၠၤမဲၤ ကမဲးတဲၤဖဳး” ပ့ထာ်ဇီၤထာ်ကဲၤ. 29ပၠၤလ့ၤကိာ်က့ၤကိာ် ဘိး ထၱးတစီာ်ထဳးတယံၢ်အကဳာ်, ကၱာ်ဒီၣ်ယဳၤဒီၣ်လဲၢ်စဲာ်, ဒီၣ်ကဲၤ, “ဟါ ဟါ, နကမဲၤကဲတဲၤလှူၣ်ၡံၣ်, မဲၤဝှါသဳနံၤလီၤနကပြးထာ်က့ၤနဒီၣ်သဲဓဳၤ နၱၢ်. 30မဲၤလှိ ထာ်က့ၤနန့ၤကၱာ်ခဲလါတ့ၢ်ပီၢ်ဒဳသဳာ် ပျီၤအလီၤနဳၤတခး.”
31ပၠၤလှူၣ်တဲၤအဓဳၤတစီာ်ကၱာ် အဝှ့းစဲာ် တစီာ်မၱာ်မၱာ် ဒီၣ်ကိာ် ကဲၤပၠၤတစီာ်အကါ, “စမဲၤလှိထာ် သဲပၠၤနၱၢ်. မၱာ်စတမဲၤလှိထာ်ဇၤက့ၤစန့ၤနီး. 32ခဳနူၤယဳၤမ့ၤၡံအၤ, အံၣ်စရ့လးဖဳးအဆးဖြး, ကက့ၤ လၤ ဒီဧဲၤဒဳသဳာ်ပျီၤထူၣ်စူညါလီၤစာ်ဘိထဲၢ်ဝၤကစာ်ထၱး ကၱာ်ကဘူၣ်ပီၢ်စဲာ်နဳၤ.”
ပၠၤအဘဲာ်ထးဝဲၢ်ကျဳၤပျဳာ်စဲာ်တစီာ်မၱာ်မၱာ်ထဲးကဲ ထဲးအိးကဲၤစဲာ်စဲာ်.
ယ့ၣ်ရှူးအတဲၤသံ
(မး ၂၇:၂၇-၃၁, ယိၤ ၁၉:၂-၃)
33ဘ့လူၤမူၤထံးထာ်နဳၤ, တဲၤခံးလၤကဲၤ သဒဲထံသဒဲက့ၤအပူၤ, ထိဓဳၤလူၤမူၤထံချဲးဘးသဳ နၣ်ရၱၣ်နဳၤ. 34ဘ့နဳၤအခၠၱးနဳၤ, ယ့ၣ်ရှူးကဲာ်ဧဳၤ ထာ်ဆိးကဲၤ, “အ့ၤလိအံၤ, အ့ၤလိအံၤ, လၤမါစၤဘၤဃသၤနံ” အထာ်ပဳၤထာ်ဘါမၱာ်, “အဳဘၱာ်စဲာ်, ယဘၱာ်စဲာ်, နပၢ်ဖျီးမံမါယဲၤနဲၢ်.”
35ပၠၤအဆီထဳးအီၣ်ဘိးထၱးစဲာ်ဘ့နဳၤတစီာ် သၱာ်ဟဲဘဲာ်တဲၤအလ့ၢ်ယဳၤ ဒဳၣ်, စဒီၣ်လှဲးကဲၤလၢ်ဝၤ, “ဆီးခ့န့းပီၢ်နဳၤ, စယဳၤထာ်ကဲၤ စီၤ အ့ၤလံယၤ.” 36မၱာ်စဲာ်တစီာ်အကျဲတပွဲၤ, စွဲးလ့ၤဖၱးကဲၤတဲၤအလၤသအိး, အယိၤ ကျဳၤဇၤထံတမဳၤနဳၤ, ကၱာ်စသြူ လါနံၢ်သဳာ်ပၡံးထံအၡၱးအကျဲ ကၱာ်စစဳဝဲၢ်ကျဳၤ ဝှါကပီၤတဘီအလီၤဒဳၣ်, စအံာ်ထာ်ကဲၤလၢ်ဝၤ အီကၱာ်ဒီၣ်ကဲၤ, “ခဳနူၤယဳၤ, ကစာ်မိၢ်ကိာ်, ဘဲာ်တဘဲာ်နီးစီၤအ့ၤလံယၤကလၤမဲၤလှိထာ်က့ၤစဲာ်လီၤမီၢ်.”
37ယ့ၣ်ရှူးကဲာ်ဧဳၤထာ်ဆိးတပျာ်ဗ့ၤကၱာ်စသးဟဲးထာ်ကဲၤ.
38ဘ့နဳၤအခဲ, တဲၤသဲးဒဳးဒၱာ်ဒါတကၱယၢ် အအီၣ် တဲၤလှူၣ် ၡံၣ်အပူၤဘဲာ်ထဲးလဲးကဲၤ ကၠံၢ်ကီလၢ်ဘ့အကဳာ်ထိဓဳၤလၤအကါနဳၤ. 39ကျံဖဳးတကယဲၤအခဳးတပွဲၤ, ဆီထဳးအီၣ်စကါထၱး, သၱာ်ဟဲ ဘဲာ်စကဲာ်ဧဳၤကၱာ်စာ်ထၱး ကဲၤလၢ်ဝၤအတဲၤသံ အယဳၤဒဳၣ်, ဒီၣ်ဖျီထာ်ကဲၤ, “ပၠၤ အယဳၤတပွဲၤမၱာ်သ့ပွ့ၤ ကဲၤဘၱာ်စဲာ်အဖဳးအတၱၢ်အမှးဟဳ.”
40အမံၤမှူးအီၣ်ဒဳအတပီၤ, အစာ်ဝဲၢ်စဲာ် အီၣ်ကဲၤတစီာ်. စဲာ် တစီာ်အကျဲမၱာ်ကဲၤနီၢ်မၤရၱ မၤကဒၤလ့ၣ်, စီၤယၤကိာ်အၡံးဖဳးတပွဲၤ, ကၱာ်စီၤယိၤစ့ၣ် အမဳၤနီၢ်မၤရၱ, ကၱာ်နီၢ်စၤလိၣ်. 41စဲာ်တစီာ်လိၤ ကိာ်ကၱာ် မဲၤဇဳၤကဲၤစဲာ်လှ့စအီၣ်ဝ့ၤကၤလံၤလဲအက့ၤနဳၤ. အမံၤမှူးအီၣ် အဲးအီးအီး ထဲၢ်အအီၣ်ဒဳယရူၤၡလ့ၣ် အထာ်ကိာ်စကါမှၱာ်အီၣ် ကဲၤကဲၤ.
တဲၤဘူလါယ့ၣ်ရှူး
(မး ၂၇:၅၇-၆၁, လူၤ ၂၃:၅၀-၅၆, ယိၤ ၁၉:၃၈-၄၂)
42တဲၤခံးလၤကဲၤ ကၱာ်ဒီအမၱာ်ကဒီ တဲၤပြးတီၤလီၤအနံၤ, ထဲၢ် (လူၤမူၤလၤတချူးကၱာ် ယူဒၤဖဳးအမူၤဆီးဒဲအနံၤ) နှၱနီးနဳၤ. 43စီၤယိၤသးထဲၢ်အအီၣ်ဒဳအရံၤမၤသဲအူးတပွဲၤ ဓဳၤဘးကဲၤ. စဲာ်မၱာ်ပၠၤယူဒၤ ဖဳးတစီာ်အယူခဳးအန့ၤဓဳၤ သးပွ့ၤတပွဲၤ. စမၱာ်ပၠၤအတိၤအံာ်တီၤလီၤမီၢ်ခဳး အထံအက့ၤတပွဲၤ. စခူတပွဲးပွ့အစာ်ဘိ စလ့ၤထၱး စီၤပံၤလးကၱာ်တၤကဲၤ ယ့ၣ်ရှူးအစဳးနဳၤ. 44စီၤပံၤလးထဲးတမိၢ်တမှါကဲၤဒဳယ့ၣ်ရှူးသံ ပျါ ကဲၤဒဳၣ် စယဳၤကဲၤကျံဖဳးတကယဲၤအခဳးကၱာ်ဒဲစာ်ကဲၤလၢ်ဝၤ ထဲၢ်ယ့ၣ်ရှူး သံဝှါကဲၤဧါနဳၤ. 45စီၤပံၤလးသၱာ် ဟဲ ဘဲာ်ယ့ၣ်ရှူးသံဝှါကဲၤဒဳၣ်, စအံာ်ကဲၤစီၤယိၤသး ယ့ၣ်ရှူးအစဳး. 46စီၤယိးသးပွၱၤဝှါလူၢ်အတကၱယၢ်ကၱာ်ဒီ စဘဲလါကဲၤလၢ်ဝၤဒဳလဳၤပူၤ, ထဲၢ်ပၠၤပြး ထာ်ကိာ်လဳၤဆီး နဳၤ. မဲၤဝှါဒဳၣ်, စဘးတကျဳဘံာ်ကဲၤ လဳၤပူၤကၱာ်လဳၤဓဳၤတမဲ. 47နီၢ် မၤရၱမၤကဒၤလ့ၣ် ကၱာ်နီၢ်မၤရၱ စီၤယိၤစ့ၣ်အမဳၤ, စာ်နှဲလါအံာ်ကဲၤ အလ့ၤထဲၢ်ပၠၤဘူလါစဲာ်တကျးဝးနဳၤ.
ទើបបានជ្រើសរើសហើយ៖
မၢ်ကူး 15: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.