မၢ်ကူး 14
14
တဲၤကဳထာ်ကၠးလၤအကမဲၤသံယ့ၣ်ရှူး
(လူၤ ၂၄:၅၀-၅၃, သဓဳဖဳး ၁:၉-၁၁)
1ပွဲးလ့ၤသလိးကၱာ်တဲၤအၣ်တကဳာ်ကမံၤ တပာ်ကိာ်နီးအပွဲဓဳၤဘိးထၱးကဲၤ. အဘဲာ်ဝ့ၤကၠံၢ်သဲပ့ၤ လီၤ. မဲၤကနဳၤပၠၤလှူၣ်ထာ်ဘၱာ်စဲာ်, အဝှ့းစဲာ်တစီာ် ကဳထာ်ကၠးလၤအကပိာ်ယ့ၣ်ရှူးကၱာ်မဲၤသံစဲာ်လီၤ. 2ပရၤဆါစဲာ်တစီာ်ဒီၣ်မၱာ်အတမီၤမဲၤပွဲပူၤနီး. မၤနဲၢ်, စဘဲာ်ၡဳပၠၤအပဳၤအဟီးကဝဲၢ်ထဳးထာ်ဒ့ဒီၣ်စဲာ်.
ယ့ၣ်ရှူးဘဲာ်သဖြိးဆံးနှူဝံာ်
(မး ၂၆:၆-၁၃, ယိၤ ၁၂:၁-၈)
3ဘ့ယ့ၣ်ရှူးအီၣ်ဒဳဘ့ၤသနံဒဳပူၤနဳၤ, စဆးနါကီၢ်ဝဲၤစူးဒဲးခဳးတဘဲာ်အလီၤ, အအီၣ်ဒဳ စီၤၡံမိၤထဲၢ်အကလးကၠံးတပွဲၤအၡံၣ်ပူၤနဳၤ, အမံၤ မှူး လ့ၤဘးနံၢ်ကဲၤတပွဲၤ. စလ့ၤအံာ်တဲၤနှူဝံာ်အလၱၢ်ဓဳၤ ပွၱၤသဲဆိးထဲၢ်ပၠၤ မဲၤအံာ်သဳာ်ထဳးနၢ်ဒူးအအီၣ်နံၢ် လဳၤဘိအမွှ့းတဒဳအပူၤနဳၤ. စမဲၤထဲဖးဝှါ တဲၤနှူဝံာ် အကဳဒဳၣ်, စလှီးလၤကဲၤတဲၤနှူဝံာ်နှူသရီဒဳယ့ၣ်ရှူး အကဳာ်ခဳးနဳၤ.
4ပၠၤတစီာ်စီာ်သဲးထဲးကီၤရဲၤကၱာ် ဒီၣ်ကဲၤအသးပူၤ, “စမဲၤကဲ လဳၢ်အိးလဳၢ်မါဆံးနှူဝံာ် ကယဳၤနဲၢ်. 5ကဆဲအၣ်ကဲစဲာ်တခီဒဳၣ်, အကနံၤဒဳၣ်လံဝ့ၤ ဝှိဒန့ၤရံအဘ့ာ်သဳကယဲၤဒဳၣ်ကအံာ်ဇၤ ပွဲၤအဆဲးညဲဖဳးတစီာ်နဳၤ.” စဲာ်တစီာ်ကီၤဝဲၢ်ကီၤဆဲ ဒီၣ်တၱၢ်ဒီၣ်တဲၤကဲၤအမံၤမှူးအနဳၤတပွဲၤ နဳၤ.
6ယ့ၣ်ရှူးဒီၣ်ထာ်ကဲၤ, “ဒီၣ်မဲးစဲာ်တမံမဲး. သံမဲၤဒၱာ်ဒါမၤစဲာ် ကနဳၤနဲၢ်. စမဲၤနံၤကဲၤယဲၤတဲၤအဝၱၤ အအဲးဆိးတမံၤလီၤ. 7ပၠၤအဆဲးညဲဖဳးတစီာ် အီၣ်သဲာ် ယိတပွဲးသံကါဒဳၣ်အခၠၱးအရါ လီၤသံမဲၤဇဳၤ ဇၤ တပွဲးစဲာ်တစီာ်တခီ. မၱာ်ယဲၤနဳၤ, တဘဲာ်ယအီၣ် ကိာ်သဲာ်ယိသံကါနီး. 8အမံၤမှူးယဳၤ, မဲၤ နံၤကဲၤယဲၤတဲၤပွ့ စမဲၤကဲာ်ထာ်နဳၤထဳ. စမဲၤနှူဝံာ်နှူ သရီယန့ၤဘၱစဲာ်မၱာ် စပြးတီၤလီၤယတဲၤဘဲာ်ဘူလါ အလ့ၤကါအနံၤခံ လီၤ. 9ယဒီဆးသံတဲၤ တၱၢ် တဲၤမှး, ဘ့ပၠၤကဒီထိးလၤနံၤတဲၤသးလဳၢ်သးလၤအံာ် အဝၱၤအကဲဒဳလၢ်ခဳးသဒဲဘဲာ်ဒဳဒီၣ်လဲၢ်ဝှးဝှါနဳၤ, ပၠၤကဒီဆးအံာ်ကိာ်ကီအမံၤမှူးတပွဲၤယဳၤအတဲၤမဲၤအအဲးအယဳၤ ဒဳတဲၤကမဳၤ ထာ်နံၤစဲာ်အပူၤနဳၤ.”
တဲၤဟိလါ
(မး ၂၆:၁၄-၁၆, လူၤ ၂၂:၃-၆)
10အပျဲၢ်အဘီၣ်ၡံးကၠံၢ်ပွဲၤအကျဲ, အမံၤ မၱာ်စီၤယူဒၤအံၣ်စကၤရံၤအိာ်တပွဲၤနဳၤ လ့ၤစာ်ထၱးကဲၤ ပၠၤလှူၣ်ထာ်ဘၱာ်စဲာ်တစီာ်စာ် ဘိထဲၢ် စကဟိလါပီၢ် ယ့ၣ်ရှူးဒဳစဲာ်တစီာ်အစူးခီးပူၤနဳၤ. 11စဲာ်တစီာ်သၱာ်ဟဲဘဲာ်တဲၤအယဳၤဒဳၣ်, စသးကနၢ် အံာ်ကဲၤကၱာ်စအဳလါကဲၤလၢ် ဝၤအကအံာ်စဲာ်ဝှိ. စဲာ်တခီစဝၢ်စါလှဲးကဲၤ အကြီာ်အပ့ၤအကဝှိလါ ယ့ၣ်ရှူးနဳၤ.
တဲၤအၣ်တကဳာ်ကမံၤတပာ်နီးအပွဲ
(မး ၂၆:၁၇-၂၅, လူၤ ၂၂:၇-၁၄,၂၁-၂၃, ယိၤ ၁၃:၂၁-၃၀)
12တဲၤအၣ်တကဳာ်ကမံၤတပာ်နီးအပွဲ အအူဆူးတနံၤနဳၤ, ထဲၢ်အနူၤအဒီအီၣ်ကမဲၤသံကဲၤ ပွဲးလ့ၤတလိးအသဳဖဳးအခၠၱးနဳၤ, အပျဲၢ်အဘီၣ်တစီာ်ဒဲ ကဲၤစဲာ်, “နသးနံၤဝၤပြးတီၤလီၤ ပွဲးလ့ၤတလိးအတဲၤ အၣ် ဒီၣ်လဲၢ်.”
13စဘါလှိးလ့ၤကဲၤအပျဲၢ်အဘီၣ်ကၠံၢ်ပွဲၤ ကၱာ်မှဲးလၤကဲၤစဲာ် တစီာ်, “လ့ၤနံၢ်ပီၢ်ဒဳအူးပူၤနဳၤ, ကၱာ်ဒီသံကစာ်ထၱးကီ ပၠၤအဟဲးယးအံာ် ထံကပဳၤ တပွဲၤဒဳၣ်, လိၤကိာ်စလ့ၤ. 14စလ့ၤနံၢ် ပီၢ်ပွဲၤ အၡံၣ်ဝှး ဝှါ, ဒီၣ်ပီၢ်ၡံၣ်အဘၱာ်စဲာ်, ‘ၡံၣ်ဒဳးပူၤထဲၢ်ယကအၣ်ကိာ်အပျဲၢ်အဘီၣ်တစီာ်အကါ ပွဲးလ့ၤတလိးအတဲၤအၣ်အလ့ၤအီၣ်ဒီၣ်လဲၢ်, ဆရၣ်ဒဲစာ်ဒဳၣ်.’ 15စဲာ်နဳၤစကဒဲလၱၢ်သံၡံၣ်ဒဳးအကီၢ်ထာ်တတီၤ ထဲၢ်အပြး တီၤ လီၤထဳနဳၤ. အလ့ၤအနဳၤ, မၱာ်တပွဲးသံကပြးနှဲး တီၤလီၤဘဲာ်အလ့ၤကနံၤ ခံတချဳးနဳၤ.”
16အပျဲၢ်အဘီၣ်တစီာ် လ့ၤကဲၤ ကၱာ် ဘ့စဓဳၤလ့ၤအူးပူၤနဳၤ, စစာ်ထၱးကဲၤလဳစါစဲး အစာ်ဘိ ယ့ၣ်ရှူးမှဲးလၤအဓ့ နဳၤ, ကၱာ်ဒီစဲာ်တစီာ် ပြးကဲၤ ပွဲး လ့ၤတလိးအတဲၤအၣ်.
17ဘ့တဲၤခံးလၤကဲၤနဳၤ, ယ့ၣ်ရှူးကၱာ် အပျဲၢ်အဘီၣ်ၡံး ကၠံၢ် ပွဲၤဓဳၤလ့ၤကဲၤ. 18စဲာ်တစီာ်ဆးနါခွဲဘးစူးဒဲးခဳးကၱာ် ဘ့စအၣ်သဗ့ တဲၤအၣ်အခၠၱး နဳၤ, ယ့ၣ်ရှူးဒီၣ်ကဲၤ, “ယဒီၣ်သံအတၱၢ်အမှး, ဒဳသံအအၣ် ယံၢ်အီယံၢ်ယဲၤအကျဲတပွဲၤနဳၤ, ကဟိ လါကီယဲၤ.”
19ဒဳတဲၤအဳးသဳးအဳးသးအပူၤ, အပျဲၢ်အဘီၣ်ဒဲစာ်က့ၤစဲာ်တပွဲၤဝှါတပွဲၤ, “မၱာ်နသးအဲးဒီၣ်ယဲၤဧါ.”
20စဒီၣ်က့ၤလၢ်ဝၤတစီာ်, “အမၱာ်သံၡံး ကၠံၢ်ပွဲၤအကျဲတပွဲၤ, မၱာ်စဲာ်ထဲၢ်အသြူ နံၢ်ကိာ် အတကိာ်ယစီးလီၤပူၤတပွဲၤနဳၤ. 21ပၠၤ အဖဳးနဳၤ စလ့ၤကိာ်စကျဲးအစာ်ဘိစဲာ်စါထံ ဒီဆးစဝၱၤစကဲနဳၤ. အဘဲာ်ဝှိး ကၱကဲာ်မၱာ်ပၠၤအဟိလါပၠၤအဖဳးတပွဲၤနဳၤ. စတအီၣ်လၤမၤနီးဒဳၣ် အကအဲး ဒဳၣ်ချဳလီၤ.”
လူၤမူၤဟဲးအတဲၤအၣ်
(မး ၂၆:၂၆-၃၀, လူၤ ၂၂:၁၄-၂၀, ၁ ကရံၣ် ၁၁:၂၃-၂၅)
22ဘ့တဲၤအၣ်အခၠၱးနဳၤ, စဖၱးတကဳာ်, စထါထာ်အံာ်တဲၤအလှူၣ်အတါ, စဘးဖးကၱာ် စအံာ် အပျဲၢ်အဘီၣ်တစီာ်, စဒီၣ်, “ဖၱးပီၢ်အယဳၤ, အယဳၤမၱာ် ယန့ၤဘၱစဲာ်.”
23အစာ်ဘိကနဳၤ, စဖၱးဖးလါ, စထါထာ် အံာ်တဲၤအလှူၣ်အတါ, စအံာ်အပျဲၢ်အဘီၣ်တစီာ်, ကၱာ် စဲာ်လဳစါစဲးအီကဲၤ.
24စဒီၣ်ကဲၤလၢ်ဝၤတစီာ်, “အယဳၤမၱာ် ယသွံၣ်, တဲၤလၤကျၤ အသွံၣ်ထဲၢ်အကဘဲာ်လှီး လၤ ကဲပၠၤလဳစါစဲးအနံၤခံ.” 25ယဒီ ဆးသံအတၱၢ် အမှး, ယကတအီပံပံးပ့ၤကီ သဳာ်ပၡံးသဲာ်အထံနီး, ထိဓဳၤ အနံၤအသဲကဘဲာ်ခၣ်လဲး, ယကအီကီဒဳ ကဘၱာ်စဲာ်အထံအက့ၤပူၤနဳၤ.
26စဲာ်တစီာ်သါပိၢ်ဝှါ တဲၤထါထာ်အံာ်အတဲၤသါပိၢ်ဒဳၣ်, စလ့ၤဘးကဲၤဒဳ သဳာ်စၤယံးခီးလီ အီၣ်နဳၤ.
တဲၤဒီဆးတီၤလီၤစီၤပ့းတရူးအတဲၤယၤဘံာ်
(မး ၂၆:၃၁-၃၅, လူၤ ၂၂:၃၁-၃၄, ယိၤ ၁၃:၃၆-၃၈)
27မဲၤဝှါဒဳၣ်, ယ့ၣ်ရှူးဒီၣ်ကဲၤစဲာ်တစီာ်, “သံလဳစါစဲးကစွဲးသံ ဝံၢ်ကၱာ်ပၢ်လၤဓ့ၢ်ကီယဲၤ. မၤနဲၢ်, တဲၤဝှ့းလၤကဲၤဒဳစဲာ်စါထံအပူၤကယဳၤ,
‘ယကပျဲသံကီအစာ်အံာ်သဳတပွဲၤနဳၤ,
ကၱာ်သဳဖဳးတစီာ်ကစွဲးဖြူးစွဲးဖြၱလဳၢ်ကီ.’
28ပရၤဆါ ဘ့ယထာ်ပဳၤက့ၤဝှါနဳၤ, ယကလ့ၤအူဆူးကီသံဒဳ ကၤလံၤလဲနဳၤ.”
29စီၤပ့းတရူးဒီၣ်ကဲၤစဲာ်, “ပၠၤအတဲၤဘူၣ်ကကျ့ၤကျၢ်နီၣ်သီ ကိအပွဲၤနှီနူၤ, ယအဲကတမၱာ်တပွဲးကနဳၤနီး.”
30ယ့ၣ်ရှူးဒီၣ်ကဲၤစဲာ်, “ယဒီၣ်နဲၤအတၱၢ် အမှး, ခိတဟဲးတဆဲကၱာ်ၡၱအိးကၠံၢ်ပျာ်နှၱနီးနူၤ, နကယၤဘံာ်ကီယဲၤသဳပျာ်.”
31ပရၤဆါ, စီၤပ့းတရူးဒီၣ်ဝ့ၤဒဳတဲၤသး ဆိးအပူၤ, “ယကသံဘဲာ်ကိာ်နကါနှီနူၤ, ယတယၤဘံာ်ပံပံးနဲၤနီး.”
အလဝ့ၤတစီာ်မၱာ်မၱာ်ဒီၣ်ကဲၤကနဳၤလီၤလီၤ.
ယ့ၣ်ရှူးအတဲၤဆဲးညဲပီၤတီၤကၱာ်အတဲၤသံ
(မး ၂၆:၃၆-၄၆, လူၤ ၂၂:၃၉-၄၆)
32မဲၤဝှါ စဲာ်တစီာ်လ့ၤဘးကဲၤ တဲၤအလ့ၤ တချဳးထဲၢ်ပၠၤယဳၤ အမံၤက့ၤသစ့ၤမနၤနဳၤ, စဒီၣ်ကဲၤ အပျဲၢ်အဘီၣ်တစီာ်, “ဆးနါလါအီၣ် ပီၢ်ဘ့ယဳၤ ဘ့ယသဘဲထာ်သဗ့နဳၤ.” 33ကၱာ်စယဳၤလ့ၤကဲၤ စီၤပ့း တရူး, စီၤယၤကိာ် ကၱာ် စီၤယိၤဟၣ် လ့ၤကိာ်စကါ. ဘ့နဳၤစအဳးသဳးအဳး သးကၱာ် သဳးကဳၤသးကဲၢ်ဆိးကဲၤ. 34စဒီၣ်ကဲၤလၢ်ဝၤ တစီာ်, “ယအဳးမှူအဳးရၤဆိးထိကၱာ်ယကမီသံကဲၤနဳၤ. အီၣ်ဘ့ယဳၤကၱာ်တိၤအံာ် ပီၢ်.”
35စခဲလ့ၤအလှီမီၢ်တကၱာ်, ဝှါဒဳၣ်, အကဖၱထာ်ဇၤဘ့ာ်မ့ဒဳၣ်, နၣ်ရၱၣ်အခၠၱးအကျၤကဖျီး သလိး ဒီပီၢ်ဧဲၤစဲာ်အနံၤခံနဳၤ, စဖျးတကဳးလၤစန့ၤ လၢ်ခဳးကၱာ်သဘဲထာ်ကဲၤ. 36စဒီၣ်, “အဳအပာ်, တဲၤလဳစါစဲး အီၣ်နစူးခီးပူၤလီၤ. ဖၱးကဲ ဖျီးမံပီၢ်ဖးလါအယဳၤ. ပရၤဆါ, တမၱာ်ပီၢ်ထ့အဘဲာ်ယသးနီး. မၱာ်တဲၤကမဲၤဒီဧဲၤအန့ၤ ထ့အဘဲာ်နသးလီၤ.”
37မဲၤဝှါ စက့ၤဘးထၱး စအပျဲၢ်အဘီၣ်တစီာ်နဳၤ, အနဳၤတစီာ် ဆီးမံလဳၢ်ကဲၤ. စဒီၣ်ကဲၤစီၤပ့းတရူး, “စီၤၡံမိၣ်, နဆီးမံကဲၤဧါ. နတတိၤ အံာ်ကဲာ်ထာ် သၣ်ကီတနၣ်ရၱၣ်အပူၤနီးဧါ. 38တိၤအံာ် ကၱာ်သဘဲ ထာ်ပီၢ်စာ်ဘိထဲၢ် နတလၤတ့ၢ်နံၢ်တဲၤနှး ကါအကျဲနီးနဳၤ. အသးတမဲ သးအဲးမဲၤတပွဲးတဲၤအအဲး, မၱာ်အန့ၤဘၱစဲာ်အခဳးအအါတအီၣ်နီး.”
39စက့ၤဘးသဘဲကဲၤအစာ်ဘိ စသဘဲထာ်အအူဆူးတပျာ် နဳၤ. 40မဲၤဝှါဒဳၣ်, စက့ၤဘးထၱးလၢ်ဝၤတစီာ်တပျာ်ဗ့ၤ ကၱာ်စာ်ထၱး ကဲၤ လၢ်ဝၤတစီာ်ဆီးမံသဗ့. စဲာ်တစီာ်တဘါထာ်ကဲၤထာ် အကၢ်ဓူနီးအခဳးအစဲ, စတဒီၣ်ဇၤက့ၤယ့ၣ်ရှူး အလံၢ် တမံနီးနီး.
41စက့ၤဘးထၱးလၢ်ဝၤသဳပျာ်တပျာ်ကၱာ် စဒီၣ်ကဲၤလၢ်ဝၤတစီာ်, “သံဆီးမံသဗ့ဝ့ၤဧါ. သံအီၣ် စဳးအီၣ်မီၤတပွဲးသံအဲလီၤဧါ. တးဟဳခး. အခၠၱးဘဲာ်ထဳ. စာ်ပီၢ်, သံကစာ်ထၱးကဲၤပၠၤအဖဳးဘဲာ်ဟိလါ ဒဳပၠၤအကၱကဲာ် တစီာ်အစူးခီးပူၤနဳၤ. 42ဝဲၢ်ထဳးထာ်ခး, ကလ့ၤကဲၤ. စာ်ပီၢ်နူၤ, အဟိလါယဲၤတပွဲၤဓဳၤလ့ၤထဳ.”
ယ့ၣ်ရှူးဘဲာ်ဖီးဘဲာ်စဳ
(မး ၂၆:၄၇-၅၆, လူၤ ၂၂:၄၇-၅၃, ယိၤ ၁၈:၃-၁၂)
43ဘ့စဒီၣ်ထာ်ကနဳၤအခဲနဳၤ, အပျဲၢ်အဘီၣ်ၡံးကၠံၢ်ပွဲၤအကျဲ တပွဲၤ, ထဲၢ်စီၤယူ ဒၤနဳၤ, ပီးထာ်ပျဳာ်ပျဳာ်ကၱာ်ကဲၤပၠၤအပဳၤအဟီးအဟဲး အံာ်ဒာ်ဆ့, သဘါ, နှဲးမူၢ် နှဲးထး. အဘါလှိးလ့ၤပၠၤအယဳၤတစီာ်မၱာ်ကဲၤ ပၠၤလှူၣ်တဲၤအဓဳၤ, အဝှ့းစဲာ်ကၱာ်အန့ၤဓဳၤသးပွ့ၤတစီာ်နဳၤ. 44အဟိ လါစဲာ်တပွဲၤနဳၤ ဒီဆးကဲၤစခီတစီာ်တဲၤမှါအံာ်တဓဲ ကယဳၤ, “ပၠၤထဲၢ်ယကဖီးဘးနှူဝံာ်တပွဲၤနဳၤ, မၱာ်စဲာ် လီၤ. ပိာ်ကၱာ်ဟဲးဖျီးမံအံာ်စဲာ်ဒဳတဲၤဆီး အံာ်ဝၢ်အံာ်အပူၤနဳၤ.”
45မဲၤဝှါဒဳၣ်, စလ့ၤဝဲၢ်တနၢ်ကဲၤယ့ၣ်ရှူးအလီၤ ကၱာ်ဒီၣ်ကဲၤ စဲာ်, “ဆရၣ်, ဆရၣ်,” ကၱာ်စဖီးနှူဝံာ်ကဲၤလၢ်ဝၤ. 46ဘ့နဳၤလီၤ, ပၠၤပိာ်ဝဲၢ် ကဲၤစလီၤကၱာ်ဖီးကဲၤစဲာ်. 47အဆီ ထဳးအီၣ်ပၠၤကျဲတပွဲၤ ဘ့းထာ်ကဲၤအဒာ်ဆ့ ကၱာ်ပ့ၢ်လၤတ့ၢ်ကဲၤပၠၤလှူၣ်တဲၤအဓဳၤ အဇိၤဖဳးအနံၤကူၤ. 48ယ့ၣ်ရှူးဒီၣ်ကဲၤစဲာ်တစီာ်, “သံလ့ၤအံာ်ဒာ်ဆ့ ကၱာ်နှဲး မူၢ်နှဲးထာ်ဒဳသံကပိာ်ယဲၤမၱာ်, သံပဲၢ်ယဲၤအစာ်ဘိ ပၠၤအအၣ်ဟူၣ်မဲၤကဲတဲၤ နဳၤဧါ. 49လှ့ယအီၣ် ကိာ်ဝ့ၤသံကါ, ကိလူၤမူၤနံၤ, ယသိၣ်အံာ် သီအံာ် တဲၤဒဳဘူၣ်ဘျီၣ်အပူၤနဳၤ, သံတပိာ်တစဳတပွဲးယဲၤနီး. ပရၤဆါမၱာ် အစာ်ဘိစဲာ်စါထံကဘဲာ်ပ့ထာ်နဳၤ.”
50ဘ့နဳၤအခဲအပျဲၢ်အဘီၣ်တစီာ် ပၢ်လၤ ဓ့ၢ်ကဲစဲာ်ကၱာ်စွဲးဖျီမံ လဳၢ်ကဲၤ.
51အဘီာ်လီးဖဳး အကိထာ်နံၤတကၱယၢ်ဖဳး တဘဲာ်လီၢ်တပွဲၤ လိၤကိာ်စလ့ၤ. ပၠၤလှီဝဲၢ်ပိာ်စဲာ်ဒဳၣ်, 52စပၢ်ဖျီးမံတကၱယၢ်ဖဳးကၱာ် စွဲးတကျူ ထူး ကဲၤ.
ယ့ၣ်ရှူးဒဳပၠၤလှူၣ်တဲၤအဓဳၤအခဳးအယူခဳး
(မး ၂၆:၅၇-၆၈, လူၤ ၂၂:၅၄-၅၅,၆၃-၇၁, ယိၤ ၁၈:၁၃-၁၄,၁၉-၂၄)
53မဲၤဝှါဒဳၣ်စဲာ်တစီာ်လ့ၤအံာ်ကဲၤယ့ၣ်ရှူး ဒဳပၠၤလှူၣ်တဲၤအဓဳၤ အခဳးအီၣ် ကၱာ်ပၠၤလှူၣ်ထာ်တဲၤ အဓဳၤအလဝ့ၤတစီာ်, အန့ၤဓဳၤသးပွ့ၤကၱာ် အဝှ့းစဲာ်တစီာ်လ့ၤဓဳၤလဳၢ်ကဲၤ. 54စီၤပ့းတရူးလိၤကိာ်စလ့ၤ ဒဳအတပီၤနဳၤ, ထိစဓဳၤဒဳ ပၠၤလှူၣ်တဲၤအဓဳၤအခဳး အၡံၣ်အဝ့ၤပူၤနဳၤ. ဘ့နဳၤစဆးနါလါအီၣ်ကိာ်ကဲၤတဲၤ ခၱတဲၤပွဲၤတစီာ်အကါကၱာ်ဆူဧူၢ်ကဲၤမှၱး.
55ပၠၤလှူၣ်တဲၤအဓဳၤတစီာ်ကၱာ် အန့ၤဓဳၤ သးပွ့ၤလဳစါစဲးတစီာ် သကါထာ်ပၠၤအကါ ကခးအန့ၤ သဲသၱး, အကဆးဝဲၢ်ပီၢ်ယ့ၣ်ရှူးအလီၤ တဲၤကမဲာ် စာ်ဘိထဲၢ် စကမဲၤသံဇၤပီၢ်လၢ်ဝၤအနံၤခံ, နီၣ်သီနှီနူၤ, တကဲာ်ထၱးနီး. 56မၤနဲၢ်, ပၠၤအီၣ်အဲပွဲၤခးသဲ သၱာ်အန့ၤဒဳတဲၤတတၱၢ်တမှးနီးအပူၤ, ပရၤဆါအတဲၤ ယၱၢ်ဘဲာ်တနံၤရၢ်လှဲးလၢ်ဝၤနီး.
57ပၠၤတစီာ်စီာ် ခးကဲၤသဲသၱးအတတၱၢ် တမှးနီးကၱာ်ဒီၣ်ကဲၤ, 58“ဝၤသၱာ်ဟဲဘဲာ်စဒီၣ်, ‘ယကမဲၤလၤဖြးကဲတဲၤလှူၣ်ၡံၣ်ထဲၢ်ပၠၤ ပြးအံာ်အစူးခီး ယဳၤ, ကၱာ်သဳနံၤအဓၢ်ပူၤ ယကပြးထာ်က့ၤကီတဲၤ လှူၣ် ၡံၣ်အလဝ့ၤတဝၤ, ထဲၢ်ပၠၤတပြးထာ်အံာ်ဘဲာ် အစူးခီးနီးနဳၤ.’ ” 59ပရၤဆါစဲာ်တစီာ်မၱာ်မၱာ် စခးသဲသၱးအတလၤလှဲးလၢ်ဝၤနီးနီး.
60ပၠၤလှူၣ်တဲၤအဓဳၤအခဳးဝဲၢ်ထဳးဒဳယူခဳးနဳၤ, စဒီၣ်ကဲၤယ့ၣ်ရှူး, “နတဒီၣ်က့ၤဇၤပၠၤအခးအန့ၤ သဲသၱးတစီာ်အတဲၤယၱၢ်ဘဲာ်တမံနီးဧါ.”
61မၱာ်တဘးဘးယ့ၣ်ရှူးအီၣ်ဒဳၣ်လီၤ. စတဒီၣ်ကဲၤတဲၤအလံၢ်တမံနီး.
ပၠၤလှူၣ်တဲၤအဓဳၤအခဳး ဒဲကဒီစဲာ်တပျာ်ဗ့ၤ, “နဲၤမၱာ်ခရၱာ် ကဘၱာ်စဲာ် အဘဲာ် ဟိးဝၱၤတပွဲၤအဖဳးဧါ.” 62ယ့ၣ်ရှူးဒီၣ်ကဲၤစဲာ်, “ယမၱာ်စဲာ် ဟဳ. သံ ကစာ်ထၱး ဘဲာ်ကီပၠၤအဖဳးဆးနါလါအီၣ် ဒဳတဲၤခဳး တဲၤအါဓဳၤအစူး တထွဲးတခီဘဲာ်အီၣ်နဳၤကၱာ် အလၤ မီၢ်ခဳးအတဲၢ်သဘဳာ်အကျဲတပွဲၤနဳၤ.”
63ဘ့နဳၤပၠၤလှူၣ်တဲၤအဓဳၤအခဳး ထဳးထဲးလဲးကဲၤအၡံာ်ဒဳ ကၱာ်စဒီၣ် ကဲၤ, “အလဳၤပၤဝ့ၤဒီ သဲသၱးတစီာ်ဒီၣ်လဲၢ်ဗ့ၤ. 64သံ သၱာ်ဟဲဘဲာ်ထဳစတဲၤဝှိးဒါအတဲၤယၱၢ်ဘဲာ်. သံကမဳၤစာ်တဲၢ်. စတဲၤကမဲာ် အီၣ်ဧါ. နီးဧါ.”
စဲာ်လဳစါစဲးတစီာ်လၤကျၤလှဲးလၢ်ဝၤ ဒဳစတဲၤကမဲာ်အီၣ်, ကၱာ်စကဘဲာ်သံနဳၤ. 65တစီာ်စီာ်ထွၱးဝဲၢ်ကဲၤအပအဲးထံစလီၤ. တစီာ်စီာ် ဘါ ဘံာ်လၢ်ဝၤအကၢ်ဓူတကၱယၢ်, ကၱာ်စထီးကဲၤလၢ်ဝၤ. ကၱာ်စဒီၣ်ယဳၤ ဒီၣ် နှါလၢ်ဝၤ, “မဲၤပီၢ်နန့ၤပဝှံတကၱာ်နၢ်, အထီးနဲၤမၱာ်ပီၢ်ပွဲၤ.” တဲၤအခၱအပွဲၤ တစီာ်မၱာ်မၱာ်လှီဝဲၢ်စလီၤဒဲးကဲၤစဲာ်.
စီၤပ့းတရူးအတဲၤယၤဘံာ်ယ့ၣ်ရှူး
(မး ၂၆:၆၉-၇၅, လူၤ ၂၂:၅၆-၆၂, ယိၤ ၁၈:၁၅-၁၈,၂၅-၂၇)
66ဘ့စီၤပ့းတရူးအီၣ်ရှံၣ်ဓဳၤအချဳဘးနဳၤ, ပၠၤလှူၣ်တဲၤအဓဳၤ အခဳးအဇိၤမဳၤတပွဲၤလ့ၤ, 67စကဲာ်ထၱးစီၤပ့းတရူးကၤလဲၤအန့ၤမှၱး, စစာ်လၤတံၤ လၤဆ့းဝှါလၢ်ဝၢ်ဒဳၣ်, စဒီၣ်ကဲၤ, “နဲၤမၱာ်သဲအအီၣ်ကိာ် ယ့ၣ်ရှူး, နစၤရ့းဖဳးအကါတပွဲၤနဳၤနၱၢ်.”
68စီၤပ့းတရူးယၤဘံာ်တဲၤကၱာ်စဒီၣ်, “နဒီၣ်တၤနဲၢ်, ယတသၱာ်ဟဲကိာ်နဲၤနီး. နသးအဲးဒီၣ် တၤနဲၢ်.” မဲၤဝှါဒဳၣ်, စဟဲးထာ်ကိာ်ကဲၤခး ကျဲၢ်ဓဳၤ. ဘ့နဳၤၡံဖဲအိးထာ်ကဲၤ.
69ဇိၤမဳၤခဳနဳၤတပွဲၤ စာ်ထၱးကဒီစဲာ်ဒဳၣ်, စဒီဆးပၠၤအဆီထဳး ဘိးထၱးစဲာ်တစီာ်, “အယဳၤတပွဲၤ မၱာ်သဲပၠၤအအီၣ်စကျဲတပွဲၤနဳၤနၱၢ်.” 70ပရၤဆါဒဳၣ်စီၤပ့းတရူးယၤဘံာ်ကဒီတပျာ်ဗ့ၤ.
အီၣ်တဒဳးဗ့ၤ, ပၠၤအဆီထဳးအီၣ်တစီာ်ဒီၣ်ကဲၤ စီၤပ့းတရူး, “နမၱာ်လၤ ဓူစကျဲတပွဲၤပွဲၤ. နမၱာ်သဲကၤလံၤလဲဖဳးတပွဲၤတဘဲာ်နီးဧါ.”
71စီၤပ့းတရူးဝှိးကၱကဲာ် ကၱာ်ဝှိးဒါလါ အန့ၤ, စဒီၣ်, “ယတသၱာ်ဟဲမူ ပျးပၠၤထဲၢ်သံဒီၣ်အဝၱၤ အကဲတပွဲၤနီး.”
72ဘ့နဳၤၡၱဖဲအိးထာ်ကဲၤကၠံၢ်ပျာ်တပျာ်. စီၤပ့းတရူးကမဳၤထာ် နံၤက့ၤ ကဲၤယ့ၣ်ရှူးအတဲၤဒီၣ် တီၤလီၤ, ထဲၢ်စဒီၣ်ကဲၤလၢ်ဝၤ, “တချူး ကၱာ်ၡၱအိးကၠံၢ် ပျာ် နှၱနီးနဳၤ, နကယၤ ဘံာ်ကီယဲၤသဳပျာ်” နဳၤ. စီၤပ့းတရူးအသးတမီၤပ့ၤတကၱနီး ကၱာ်စဟးကြဳၤ ဟးကြၢ်ကဲၤ.
ទើបបានជ្រើសរើសហើយ៖
မၢ်ကူး 14: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.