မၢ်ကူး 11
11
ယ့ၣ်ရှူးလ့ၤနံၢ်ယရူၤၡလ့ၣ်အူးတဲၤဓီၤတဲၤသ့းအကျဲ
(မး ၁၈:၆-၉, လူၤ ၁၇:၁-၂)
1ဘ့စဓဳၤဘိးထၱးယရူၤၡလ့ၣ်အူး, ဘ့ၤသဖၤက့ဒဳ ကၱာ်ဘ့ၤသနံဒဳအကါထၱး သဳာ်စၤယံး ခီးလီနဳၤ, ယ့ၣ်ရှူးသဓဳလ့ၤအပျဲၢ်အဘီၣ်ကၠံၢ် ပွဲၤ 2ကၱာ်ဒီၣ်စဲာ်တစီာ်, “လ့ၤနံၢ်ဒဳ ဒဳထဲၢ်အဒးဝဲၢ်သံ အီၣ်တဒဳးဆီ နူၤ. သံကစာ် ထၱးကီသရၱာ်ဒဳဖဳး ထဲၢ်ပၠၤတဒီၣ်ဘဲာ်အံာ်အခဳးတခါ နှၱနီးတဒဳ ဘဲာ်စဳဝဲၢ်ကျဳၤ. ဘါပျဲးကဲအပံၤဒဳၣ်က့ၤမှီးအံာ်ပီၢ်ဒဳယအီၣ်. 3ဘ့ာ်မ့ ပၠၤကဒဲသံတပွဲၤပွဲၤ, ‘သံမဲၤကဲၤတၤနဲၢ်.’ ဒဳၣ် ဒီၣ်စဲာ်, ‘ဘၱာ်စဲာ်သးမဲၤအံာ်, ဝှါဒဳၣ်စကသဲက့ၤပျာ်ပျါ တပွဲးဘ့ယဳၤ.’ ”
4ဘ့စပျဲၢ်စဘီၣ်ကၠံၢ်ပွဲၤဓဳၤနံၢ်ဒဳပူၤနဳၤ, စစာ်ထၱးကဲၤပၠၤစဳဝဲၢ်သရၱာ်ဒဳဖဳးဒဳကျဲး ဝဳၢ်လီၤခးကျဲၢ် ထၱးတဒဳ, ဒဳၣ်စဘါပျဲးကဲၤသရီာ်ပံၤ. 5ပၠၤအအီၣ်စကါထၱးတစီာ်ဒီၣ်ကဲၤ, “သံဘါပျဲးမၤသရၱာ်ဒဳ အပံၤနဲၢ်.”
6စဒီဆးလၢ်ဝၤအစာ်ဘိယ့ၣ်ရှူး မှဲး လၤနဳၤ ဒဳၣ်ပၠၤနှးဟဲးအံာ် တပွဲးစဲာ်တစီာ်. 7မဲၤဝှါစက့ၤမှီးအံာ်သရၱာ်ဒဳဖဳးဒဳယ့ၣ်ရှူးအီၣ်နဳၤ, ကၱာ်စဒဲထာ်စၡံာ်ဒဳအခဳး, ဝှါဒဳၣ်ယ့ၣ်ရှူးထာ်ဒီၣ်ကဲၤ. 8ပၠၤအီၣ်အဲဗွဲ ဒဲလါအၡံာ်ဒဳဘ့ကျဲးလီၤ, အလဝ့ၤ တစီာ်ပ့ၢ်သဳာ်ဖါဖဳးကၱာ်ဒဲလၤကျဲးပူၤ. 9ပၠၤလိၤ ကိာ်စကါ, အဟဲးစလှီမီၢ်တစီာ်စီာ်, အဟဲးစလ့ၤကါတစီာ်စီာ်, ကဲာ်ဧဳၤထဳထာ်အလ့ၢ်ကၱာ်ဒီၣ်,
“ဟိၣ်စဲနၣ်.
အဘဲာ်ဟိးဝၱၤမၱာ်အလ့ၤဒဳဘၱာ်စဲာ်အမံၤအပူၤတပွဲၤနဳၤ.
10အဘဲာ်ဟိးဝၱၤမၱာ်ဝၤပာ် စီၤဒၤဝံးအထံအက့ၤဒဳအလ့ၤ ယဳၤနူၤ.
ဟိၣ်စဲနၣ်, ဒဳအထာ်ယၱၤကဓူၤနဳၤ.”
11မဲၤဝှါယ့ၣ်ရှူးလ့ၤနံၢ်ကဲၤယရူၤၡလ့ၣ် အူးပူၤ, ကၱာ်ဒဳတဲၤ လှူၣ်ၡံၣ်ဓဳၤအပူၤနဳၤ, စစာ်ခွဲဘး တဲၤလဳစါစဲးဝှါဒဳၣ်, လူၤမူၤလၤသူးလၤဘါ ကဲၤ, စဲာ်ကၱာ်အပျဲၢ်အဘီၣ်ၡံးကၠံၢ်ပွဲၤလ့ၤကဲၤဒဳဘ့ၤသနံဒဳနဳၤ.
ယ့ၣ်ရှူးဝှိးကၱကဲာ်သဳာ်ဓဳၤထံသဲာ်အမူၤ
(မး ၂၁:၁၈-၁၉)
12အလ့ၤကါတနံၤ စဟဲးထာ်ဝှါ ဘ့ၤသနံဒဳဒဳၣ်, အသးဝံာ် ထာ်ကဲၤစဲာ်. 13ဒဳအတပီၤနဳၤစကဲာ်ထၱးသဳာ်ဓဳၤထံသဲာ်အီၣ်ပ့ထာ် ကၱာ် အလှဲာ်အဖါတဘီ, ဒဳၣ်စကစာ်ထၱးသဲလဲးသလီ အဖီအသဲာ်ဧါနဳၤ စလ့ၤစာ်ကဲၤ. ပရၤဆါဘ့စဓဳၤဝဲၢ် အလီၤနဳၤ, စတစာ်ထၱးအသဲာ်တမဲနီး, မၱာ်ထ့အလှဲာ် လီၤ. မၤနဲၢ်, တဘဲာ်သဳာ် ဓဳၤထံသဲာ်ဘဲာ်ထာ်အခၠၱး နှၱနီးအစဲနဳၤ. 14စယၱၢ်ဘဲာ်ထၱးကဲၤသဳာ်အနဳၤ တဘီကၱာ်စဒီၣ်, “ခဳနူၤယဳၤ ဖျီအလှီမီၢ်ပၠၤကတအၣ် ဘဲာ်ဒီဧဲၤနသဲာ်နဖီတခါနီး.”
ကၱာ်စခၱစပၠၤတစီာ်သၱာ်ဟဲကိာ်ဘဲာ်တပွဲး.
တဲၤမဲၤပျၱမဲၤစါက့ၤတဲၤလှူၣ်ၡံၣ်
(မး ၂၁:၁၂-၁၇, လူၤ ၁၉:၄၅-၄၈, ယိၤ ၂:၁၃-၂၂)
15မဲၤဝှါစထာ်ကဲၤဒဳယရူၤၡလ့ၣ်အူးနဳၤ. စလ့ၤနံၢ်ကဲၤတဲၤလှူၣ် ၡံၣ်အပူၤ ကၱာ်စနှးဟဲးထာ်ဖျီးမံကဲၤပၠၤ အဓူၢ်အီဆဲအၣ်တဲၤဒဳ တဲၤလှူၣ် ၡံၣ်ဓဳၤအပူၤတစီာ်. စဘးတကီးလၤတ့ၢ် ကဲၤပၠၤအဘါချဲးဝှိတစီာ်အစူး ဒဲးခဳးကၱာ် အဆဲသကဳတြူၤအဒဳတစီာ်အကါတီး. 16စတအံာ် ကဲၤပၠၤအကဟဲးဇၢ်အံာ်တဲၤထီတဲၤလၤဒဳတဲၤလှူၣ်ၡံၣ်ပူၤ တဗွဲနီး. 17စဒီထိးလၤလၢ်ဝၤတစီာ်, စဒီၣ်, “ဒဳစဲာ်စါထံအပူၤနဳၤ, ‘ယၡံၣ်ကဘဲာ်ယဳၤ ကီ ပၠၤခွံဖဳး လဳစါစဲးအတဲၤသဘဲထာ်အံာ်အၡံၣ်’ အဝှ့းလၤဒဳၣ် တဘဲာ်နီး ဧါ. မၱာ်သံနူၤသံမဲၤအံာ်တပွဲးစဲာ်ပၠၤအၣ် ဟူၣ်မဲၤကဲတဲၤအီၣ်ခဳးအံာ်အလ့ၤ တခီ.”
18ပၠၤလှူၣ်ထာ်အံာ်ဘၱာ်စဲာ်တစီာ်ကၱာ် အဝှ့းစဲာ်တစီာ်ကၱာ် သၱာ်ဟဲဘဲာ်ဒဳၣ်, စဝၢ်လှဲးကဲၤ ကျဲးသအီစာ်ဘိထဲၢ်စကမဲၤသံလၢ်ဝၤနဳၤ. မၤနဲၢ်, စၡံးဆါနံၤလၢ်ဝၤအလ့ၤ. ပၠၤလဳၢ်စါစဲာ်ထဲးတမိၢ်တမှါ နံၤစတဲၤ သိာ်တဲၤသီအလ့ၤအခဳး အစဲနဳၤ.
19ထိမၱာ်လူၤမူၤလၤကဲၤနဳၤစဟဲးထာ်ကဲၤ အူးအချဳ.
သဳာ်ဓဳၤထံသဲာ်အမူၤနှီကဲၤ
(မး ၂၁:၂၀-၂၂)
20လူၤမူၤဂီၤစဓဳၤလ့ၤဘ့စလ့ၤကိာ် အအူဆူးတနံၤနဳၤဒဳၣ်, စစာ်ထၱးကဲၤ သဳာ်ဒဳးထံ သဲာ်မူၤတဘီအဝှ့အကြးလဳၢ်ဓဳၤဒဳအခၣ်ဝံၤနဳၤကဲၤ. 21စီၤပ့းတရူးကမဳၤထာ်နံၤဒဳၣ်စဒီၣ်လၢ်ဝၤ, “ဆရၣ်, သဳာ်ဓဳၤထံ သဲာ်မူၤနဝှိးကၱကဲာ်တဘီဝှ့ကြးလဳၢ်ကဲၤ.”
22ယ့ၣ်ရှူးဒီၣ်က့ၤစဲာ်တစီာ်, “ဘူၣ်ပီၢ် ကဘၱာ်စဲာ်. 23ယဒီဆးသံအတၱၢ်အမှး, ပၠၤတပွဲၤပွဲၤကဒီၣ်မၤခီးလီအယဳၤတမဲယဳၤ, ‘ဝဲၢ်ထဳးကၱာ် စူလါတ့ၢ်ပီၢ်နန့ၤဒဳပဲာ်လဲာ်ပူၤ,’ ကၱာ်စတထဲးနံၤဝံနံၤဝၤ နီး, စဘူၣ်သ့ပွ့ၤဒဳအကမဲၤအန့ၤ ဒဳၣ်, စဒီၣ်အသရ့ အကဖၱထာ်တပွဲး. 24မဲၤကနဳၤဒဳၣ်, ယဒီၣ်သံ ကယါ သံတၤတဲၤဒဳတဲၤသဘဲအပူၤနဳၤ, ဘူၣ်ပီၢ်သံ ကနံၤဘဲာ်တပွဲးကၱာ်အကဖၱထာ်နံၤကီသံ. 25ဘ့သံဆီ ထဳးအီၣ်တၤသဘဲထာ်အခၠၱးနဳၤ, ဘါပျဲးပီၢ်ပၠၤ ကယါအမဲၤကမဲာ်ဘဲာ်သံ တစီာ်နဳၤ, စာ်ဘိထဲၢ်သံပာ်အအီၣ်ဒဳမီၢ်ခဳးတပွဲၤကဘါပျဲးပီၢ်သံတဲၤ ကမဲးနဳၤ. 26သံကတဘါပျဲးဘ့ာ်မ့တဲၤနီးဒဳၣ် သံပာ်အအီၣ် မီၢ်ခဳးပွဲၤ မၱာ်မၱာ်ကတဘါပျဲးတပွဲးသံတဲၤကမဲာ်နီးနီး.”
ယ့ၣ်ရှူးအဖျူအသရ့ာ်
(မး ၂၁:၂၃-၂၇, လူၤ ၂၀:၁-၈)
27ယ့ၣ်ရှူးက့ၤဘးဒဳယရူၤၡလ့ၣ်အူးပူၤ, စဟဲးပိးလိးကဲၤဒဳ တဲၤလှူၣ်ၡံၣ်ဓဳၤအပူၤနဳၤ. ဘ့နဳၤ ပၠၤလှူၣ်ထာ်အံာ်ဘၱာ်စဲာ်, အဝှ့းစဲာ်တစီာ် ကၱာ် အန့ၤဓဳၤသးပွ့ၤတစီာ်လ့ၤထၱးစဲာ် ကၱာ်စဒီၣ်လၢ်ဝၤ, 28“ပီၢ်ပွဲၤ အံာ်နဲၤတဲၤအဖျူ အသရ့ာ်ဒဳနကမဲၤတဲၤ အယဳၤတစီာ်ပွဲၤ, ကၱာ်ပီၢ်ပွဲၤသဓဳ နဲၤဒဳနကမဲၤတဲၤ အယဳၤတစီာ်ပွဲၤ.”
29ယ့ၣ်ရှူးဒီၣ်ကဲၤစဲာ်တစီာ်, “ယဲၤမၱာ်မၱာ် ယကဒဲသံတဲၤဒဲတဓဲ, ဒဳၣ်ဒီဆးက့ၤပီၢ်ယဲၤ, ခၣ်လဲး ယကဒီဆးကီသံတၤအဖျူ အသရ့ာ်အခဳးအစဲ ယမဲၤကဲၤတဲၤအယဳၤနဲၢ်နဳၤ. 30စီၤယိၤဟၣ် အတဲၤဖဳးစူထံ မၱာ်အဘဲာ်ကၠးမီၢ်ခဳးဧါ. မၱာ်အဘဲာ်ကၠး ပၠၤဧါ. ဒီဆးပီၢ်ယဲၤ.”
31စဲာ်တစီာ်ဒီၣ်ဘဲာ်ဆးဘဲာ်ကဲၤလၢ်ဝၤ ကယဳၤ, “‘အအီၣ်ဒဳ မီၢ်ခဳးနဳၤ’ ဝၤကဒီၣ်မၤဒဳၣ်, ‘သံတဘူၣ်မၤစဲာ်နီးနဲၢ်,’ စကဒီၣ်ဓဳၤ, 32‘အဘဲာ်ကၠးပၠၤလီၤ,’ ကဒီၣ်မၤဒဳးဒဳၣ်,” စၡံးဆါနံၤ ပၠၤအလ့ၤ. မၤနဲၢ်, ပၠၤ တစီာ်ဘူၣ်ကဲၤထဲၢ်အဖဳးစူထံ စီၤယိၤဟၣ် မၱာ်ပဝှံအနှဲးတပွဲၤအစဲနဳၤ.
33စဒီၣ်က့ၤယ့ၣ်ရှူး, “ဝၤတသၱာ်ဟဲနီး.”
ယ့ၣ်ရှူးဒီၣ်စဲာ်တစီာ်, “ယမဲၤတဲၤအယဳၤတစီာ် တၤအဖျူ အသရ့ာ် အပူၤ နဲၤနဳၤမၱာ်မၱာ်, ယတဒီဆးဇၤသံနီးနီး.”
ទើបបានជ្រើសរើសហើយ៖
မၢ်ကူး 11: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.