မၢ်ကူး 12
12
ပၠၤအခွဲးအံာ်သဳာ်ပၡံးမူၤအကလဲၤ
(မး ၂၁:၃၃-၄၆, လူၤ ၂၀:၉-၁၉)
1ယ့ၣ်ရှူးဒီဆးကဲၤပၠၤတဲၤကလဲၤ. “ပၠၤတပွဲၤမဲၤသဳာ်ပၡံးက့ၤ, စဝ့ၤဝှါထီးဝ့ၤစခူးလၤ ကဲၤအၡံးအံာ်သဳာ်ပၡံးအပီၤ, ပြးထာ်ကဲၤတဲၤတိၤ အံာ်အလ့ၤ. မဲၤဝှါဒဳၣ်, စနှးပၠၤမဲၤလှဲတဲၤခွဲးအံာ် သဳာ်ပၡံးက့ၤတစီာ်, ကၱာ်စဟဲးကဲၤဒဳ ပၠၤဒဳထံက့ၤ အအီၣ်ယၱၤနဳၤ. 2ဒဳအခၠၱးဘဲာ်တပျာ်, စသဓဳလ့ၤ ကဲၤစဇိၤဖဳးတပွဲၤကလ့ၤဖၱးအဖီအသဲာ်ဒဳပၠၤအခွဲးအံာ် သဳာ်ပၡံး က့ၤတစီာ်အီၣ်နဳၤ. 3ပရၤဆါ စဲာ်တစီာ် ဖီးကဲၤလၢ်ဝၤ, တ့ၤပဳၤဝှါ လၢ်ဝၤဒဳၣ်နှးက့ၤသဒဲကဲၤစဲာ်. 4စသဓဳလ့ၤဒီစဇိၤဖဳးအလဝ့ၤတပွဲၤ. ပရၤဆါ အယဳၤတပွဲၤမၱာ်မၱာ်, စဝှ့ကဲၤလၢ်ဝၤအကဳာ်အကီ ကၱာ်လဳၤ, စမဲၤယူၢ်လၤကါကဲးကဲၤလၢ်ဝၤ. 5စသဓဳလ့ၤအလဝ့ၤတပွဲၤဗ့ၤ, ဒဳၣ် အယဳၤတပွဲၤစမဲၤ သံကဲၤလၢ်ဝၤတခီ. စသဓဳလ့ၤဝ့ၤပၠၤအလဝ့ၤပွ့ တမံၤ ပ့ၤ. တစီာ်စီာ်, စတ့ၤစပဳၤလၢ်ဝၤ, တစီာ်စီာ်, စမဲၤသံကဲၤ. 6စဖဳး ခဳထဲၢ်စဘဲာ်လီၢ်အီၣ်တၤဝ့ၤ တပွဲၤဗ့ဒဳၣ်, အကူဓူၤလါစသဓဳ လ့ၤကဲၤ လၢ်ဝၤကၱာ် စဒီၣ်, ‘စဲာ်တစီာ်ကယးဘဲာ်ပီၢ်ဒီယဖဳးခဳမီၢ်.’ 7ပရၤ ဆါ ပၠၤအခွဲးအံာ်သဳာ်ပၡံးက့ၤတစီာ်ဒီၣ်လှဲးလၢ်ဝၤ, ‘အယဳၤမၱာ် အကနံၤ ဘဲာ်တဲၤအံာ်လၤနံၤတပွဲၤနဳၤ, လ့ၤ, ကမဲၤသံစဲာ်ဝှါဒဳၣ်, တဲၤအံာ်လၤနံၤ တစီာ် ကမၱာ်လဳ ကီကအဲပ့ၤလီၤ.’ 8မဲၤကနဳၤဒဳၣ်, စဖီးဝှါလၢ် ဝၤ, စမဲၤသံကဲၤလၢ်ဝၤ, ကၱာ်ထၱးဖျီးမံကဲၤလၢ်ဝၤ ဒဳသဳာ်ပၡံးက့ၤအချဳနဳၤ.
9“မဲၤကနဳၤဒဳၣ် သဳာ်ပၡံးက့ၤအဘၱာ်စဲာ် ကမဲၤပီၢ်စာ်တဲၢ်. စကလ့ၤကၱာ်မဲၤကဲမဲၤလှဲမဲၢ်ကီ အခွဲးအံာ်သဳာ်ပၡံးက့ၤတလၢ်နဳၤ, ကၱာ်စကအံာ်လၤ ကီသဳာ်ပၡံးက့ၤဒဳပၠၤအလဝ့ၤတစီာ်နဳၤ. 10သံ တဖးဘဲာ် ကဲၤဒဳစဲာ်စါထံပူၤနဳၤနီးဧါ.
‘လဳၤထဲၢ်အပြးထာ်ရှံၣ်တစီာ် ထၱးဖျီးမံကဲတမဲနဳၤ,
ဖၱထာ်ကဲၤၡံၣ်အကါဒီ.
11ကဘၱာ်စဲာ်မဲၤကဲၤတဲၤကယဳၤ
ကၱာ်အမီၤအမၤတပွဲးဒဳဝၤကၢ်ဓူပူၤတဘဲာ်နီးဧါ.’”
12ပၠၤတစီာ်သးအဲးပိာ်ၡးတပွဲးယ့ၣ်ရှူး, ပရၤဆါ စၡံးဆါနံၤ ပၠၤအပဳၤအဟီးအလ့ၤ. မၤနဲၢ်, စဲာ်တစီာ်သၱာ်ဟဲထဲၢ်တဲၤကလဲၤအယဳၤမၱာ် စဲာ်တစီာ် အဝၱၤအကဲအစဲနဳၤ, စလဲၢ်လၤတၤကဲဝှါယ့ၣ်ရှူးဒဳၣ် စဟဲးဖြူး လၤဖြၱထာ်လဳၢ်တပွဲး.
တဲၤအံာ်ကဲစၤအတဲၤမှူ
(မး ၂၂:၁၅-၂၂, လူၤ ၂၀:၂၀-၂၆)
13အလ့ၤကါ ပၠၤတစီာ်သဓဳလ့ၤဖၤရံၤၡဲဖဳး တစီာ်ကၱာ် ဆးဖြး ဟ့ၣ်ရိၤ အပၠၤတစီာ် စာ်ဘိထဲၢ် စကဆဲးနံၤယ့ၣ်ရှူးတ့ၢ်ခးဒဳစတဲၤယၱၢ် ဘဲာ်တစီာ်အကျဲ နဳၤ. 14စဲာ်တစီာ်လ့ၤကၱာ်ဒီၣ်ကဲၤယ့ၣ်ရှူး, “ဆရၣ်, ဝၤသၱာ်ဟဲတပွဲးထဲၢ်နမၱာ်အတၱၢ်အမှး, ကၱာ်နတၡံးဆါပၠၤတဗွဲနီး, နတစာ် ပၠၤအမူၢ်ကါ တဗွဲနီးနီး, ကၱာ်နတဖၱးဓဳၤဖၱးမူၤပၠၤတဗွဲနီးနီး. မၱာ်နသိာ်အံာ် သီအံာ်ကဘၱာ်စဲာ်အကျဲးအသအီ ဒဳတဲၤတၱၢ်တဲၤမှးအပူၤလီၤ. ကအံာ်ကဲ စၤတဲၤမှူမၱာ် ဝၤဘဲာ်အံာ်တပွဲးဧါ, ဝၤတဘဲာ်အံာ်နီးတခီဧါ.”
15ယ့ၣ်ရှူးသၱာ်ဟဲစတဲၤလၱးမးကးကွဲဒဳၣ်, စဒီၣ်လၢ်ဝၤ, “သံ ဘဳးမါယသးနဲၢ်. အံာ်ယဲၢ်ပံဆးတဒန့ၤရံ, ဒဳၣ်ယကစာ်စမး.”
16စလ့ၤအံာ်ပံဆးဒဳၣ်, ယ့ၣ်ရှူးဒဲကဲၤစဲာ်, “ပီၢ်ပွဲၤအယီၤကၱာ် အလ့ၤအကျဲး ပွဲၤ.”
စဒီၣ်က့ၤလၢ်ဝၤ, “ကဲစၤအဲ.”
17ယ့ၣ်ရှူးဒီၣ်ၡံက့ၤစဲာ်တစီာ်, “အံာ်လၤကဲစၤကယါအဘဲာ် ကၠး ကဲစၤနဳၤ, ကၱာ်အံာ်လၤကဘၱာ်စဲာ် ကယါအဘဲာ်ကၠးကဘၱစဲာ်နဳၤ.”
စဲာ်တစီာ်ထဲးတမိၢ် တမှါနံၤကဲၤယ့ၣ်ရှူးအလ့ၤအဇၱၢ်အဇိၢ်ဒဳး.
စၤဒူးကဲဖဳးကၱာ်တဲၤထာ်ပဳၤက့ၤ
(မး ၂၂:၂၃-၃၃, လူၤ ၂၀:၂၇-၄၀)
18စၤဒူးကဲဖဳးထဲၢ် အတဘူၣ်တဲၤထာ်ပဳၤ က့ၤနီးတစီာ် လ့ၤ ထၱးယ့ၣ်ရှူး, ထိးစာ်ဒဲစာ်စဲာ်, စဒီၣ်, 19“ဆရၣ်, စီၤမိၤၡ့ဝှ့းလၤနံၤ ကဲၤဝၤစဒီၣ်, ‘ပၠၤတပွဲၤ အသဲပူၤဝ့ၤကသံဆီတဖဳးဘ့ာ်မ့ဒဳၣ် စသဲပူၤဝ့ၤ ကဖၱးက့ၤဘဲာ်အမှူးကမဲၤတပွဲၤနဳၤ, စကအီၣ်အံာ်ဘဲာ်စမဲၢ်အခွံအသလဲ လီၤ.’ 20အသဲပူၤဝ့ၤအီၣ်သါသိးတပွဲၤ. အဓဳၤပွ့ၤတပွဲၤဖၱးအမှဲ, စသံဆီတဖဳး, 21ဒဳၣ်စပံးကီဖၱးက့ၤစမှဲ ကၱာ် သံဆီတဖဳးကဲၤကဲၤ. ဒဳၣ်သဳပွဲၤတပွဲၤမၱာ်မၱာ် မဲၤကဲၤကနဳၤလီၤလီၤ. 22ဒဳၣ်အသဲပူၤဝ့ၤ သါသိးတပွဲၤဖၱးအမံၤမှူးတပွဲၤနဳၤ ဒဳၣ်သံဆီတဖဳးလဳၢ်ကဲၤ. အကူဓူၤ လါ အမံၤမှူးမၱာ်မၱာ်သံကဲၤကဲၤ. 23မဲၤကနဳၤဒဳၣ်ဒဳတဲၤထာ်ပဳၤက့ၤအမူၤ နံၤနဳၤ, စဲာ်တစီာ်ကထာ်ပဳၤက့ၤတပျာ်အမံၤမှူးတပွဲၤကမၱာ်ကီ ဘဲာ်လဲၢ်တပွဲၤပွဲၤအမှဲပွဲၤ. မၤနဲၢ်, အမံၤခဳသါသိးတပွဲၤဖၱးကဲၤစဲာ်အစာ်ဘိလၢ်ဝၤအမှဲ နဳၤ.”
24ယ့ၣ်ရှူးဒီၣ်ၡံစဲာ်တစီာ်, ကၱာ်ဒီၣ်, “သံကမဲးမၱာ်သဲအယဳၤ တဓဲအခဳးအစဲနဳၤ, မၱာ်သံတသၱာ်ဟဲနီးဧါ. မၤနဲၢ်ဒဳၣ် သံတသၱာ်ဟဲကဲၤတဲၤဝှ့းလၤမၱတမၱာ်နီး ကၱာ်ကဘၱာ်စဲာ် အစိသလဲနီးအစဲနဳၤ. 25ဒဳစဲာ်တစီာ်ထာ်ပဳၤက့ၤတဲၤသံ အကျဲနဳၤ, တဲၤဖၱးမှဲဖၱးဝၤတအီၣ် မဲၤနီး. စမၱာ်အစာ်ဘိ မီၢ်ခဳးပွဲၤဇဳၤအအီၣ်ဒဳမီၢ်ခဳးနဳၤ လီၤ. 26အဘဲာ်ကၠးအသံတစီာ်အတဲၤထာ်ပဳၤက့ၤနဳၤ, သံတဖးဘဲာ် စီၤမိၤၡ့အစဲာ်ပူၤ, ဘ့ဇီၢ်ဇွံၤတပြဳၤအကျဲနဳၤ, ဘၱာ်စဲာ်ဒီၣ်စဲာ်စာ် တဲၢ်နီးဧါ, ‘ယဲၤမၱာ်စီၤအၤဘြၤဟၣ်အဘၱာ်စဲာ်, စီၤအံၤစဲးအဘၱာ်စဲာ် ကၱာ်စီၤယၤကိာ် အဘၱာ်စဲာ်နဳၤနီးဧါ.’ 27စတမၱာ် အသံတစီာ် အဘၱာ်စဲာ်နီး, မၱာ်အအီၣ်တစီာ်အဘၱာ်စဲာ် တခီ. မဲၤကနဳၤဒဳၣ် သံကမဲးလဳၢ်ကျံးကျံးကဲၤဟဳ.”
တဲၤမှဲးလၤအဓဳၤကဓူ
(မး ၂၂:၃၄-၄၀, လူၤ ၁၀:၂၅-၂၈)
28အဝှ့းစဲာ်အကျဲတပွဲၤလ့ၤဒဳၣ် သၱာ်ဟဲ ဘဲာ် လၤဒီၣ်လၤဆး လှဲးလၢ်ဝၤ, ကၱာ်ယ့ၣ်ရှူးအတဲၤ ဒီၣ်ၡံစဲာ်တစီာ် မၱာ်ထ့အဘဲာ်အပီၤလီၤအခဳးအစဲ, စဒဲ ကဲၤလၢ်ဝၤ, “တဲၤမှဲးလၤလဳလဳစါစဲးအကျဲအကဳာ်ခွံး မၱာ်ဘဲာ် လဲၢ်တမှိမှိ.”
29ယ့ၣ်ရှူးဒီၣ်ၡံက့ၤစဲာ်, “တဲၤမှဲးလၤလဳ လဳစါစဲးအကျဲ, အကဳာ်ခွံးမၱာ်, ‘ဆီးခ့န့းပီၢ်, အဳ အံၣ်စရ့လးအခွံ, ဝၤဘၱာ်စဲာ်, မၱာ်ဘၱာ်စဲာ်တပွဲၤလီၤ.’ 30ဘဲာ်လီၢ်ပီၢ်နဘၱာ်စဲာ်ဒဳနသဳးလဳၢ်သးစါ, နသးသဒဲမဲ, နတဲၤသၱာ်တဲၤဇၤကၱာ်နတဲၤခဳးတဲၤအါ လဳစါစဲး. အယဳၤမၱာ်တဲၤမှဲးလၤအကဳာ်ခွံးအခၣ်ထၱး တမှိလီၤ. 31တဲၤမှဲးလၤ ကၠံၢ်မှိတမှိ မၱာ်စာ်ဘိ ကနဳၤလီၤလီၤ. ‘ဘဲာ်လီၢ်ပၠၤနဇဳၤခဳးဇၤဝၤ, စာ်ဘိ နဘဲာ်လီၢ်လၤက့ၤနန့ၤနဳၤ.’ တဲၤမှဲးလၤအလဝ့ၤဆီးဆူ အဓဳၤဒဳၣ်လံယဳၤတအီၣ်မဲၤနီး.”
32အဝှ့းစဲာ်တပွဲၤနဳၤဒီၣ်ၡံက့ၤစဲာ်, “အဘဲာ်ဇၱၢ်တပွဲးဟဳ, ဆရၣ်. နဒီၣ်တဲၤတၱၢ်တဲၤမှးလီၤ. မၤနဲၢ်, ဘၱာ်စဲာ်အီၣ်တပွဲၤလီၤ. ဒဳစဲာ်အလှီ မီၢ်နဳၤ ဘၱာ်စဲာ်အလဝ့ၤတအီၣ်မဲၤနီး. 33ပၠၤထဲၢ်အဘဲာ်လီၢ်ကဘၱာ် စဲာ် ဒဳအတဲၤသၱာ် တဲၤဇၤလဳစါစဲး, ဒဳအသးသဒဲမဲ, ကၱာ်အတဲၤခဳးတဲၤအါ လဳစါစဲး, ကၱာ်အဘဲာ် လီၢ်ပၠၤအဇဳၤခဳးဇၤဝၤတစီာ် အစာ်ဘိအဘဲာ်လီၢ် လၤက့ၤအန့ၤနဳၤ, အဲးဒဳၣ်လံကၱာ် တဲၤလှူၣ်ဆိးဘိ ကၱာ်တဲၤလှူၣ်ထာ်အံာ် အလဝ့ၤ လဳစါစဲးနဳၤ.”
34ယ့ၣ်ရှူးသၱာ်ဟဲဒဳစဒီၣ်ၡံက့ၤလၢ်ဝၤ ဒဳတဲၤပျၱၢ်တဲၤပျၤအပူၤ အစဲဒဳၣ်, စဒီၣ်လၢ်ဝၤ, “နဲၤယဳၤ, နတအီၣ်ယၱၤကၱာ်မီၢ်ခဳးအထံအက့ၤနီး.”
အနဳၤဝှါအလ့ၤကါ, ပၠၤတပွဲတဒဲစာ်ဘူၣ်ပ့ၤစဲာ်နီး.
တဲၤဒဲအဘဲာ်ကၠးခရၱာ်
(မး ၂၂:၄၁-၄၆, လူၤ ၂၀:၄၁-၄၄)
35ဘ့ယ့ၣ်ရှူးသိၣ်က့ၤသီက့ၤတဲၤဒဳ တဲၤလှူၣ်ၡံၣ်အပူၤနဳၤ, စဒီၣ်, “အဝှ့းစဲာ်တစီာ်ဒီၣ်အဲဒဳ ခရၱာ်မၱာ်စီၤဒၤဝံးအဖဳးခဳစာ်တဲၢ်. 36စီၤဒၤဝံး အန့ၤဘၱစဲာ်သဲန့ၤ, ဒီၣ်ဒဳသးစါထံအပူၤ, စဒီၣ်,
‘ကဘၱာ်စဲာ်ဒီၣ်ယဘၱာ်စဲာ်,
“ဆးနါအီၣ်ဘ့ယစူးတထွဲး,
ထိယပဲၢ်လၤနဒ့ဒီၣ်တစီာ်ဒဳနခၣ်အၱသးလဲၢ်နဳၤ.”’
37မဲၤကနဳၤဒဳၣ်, စီၤဒၤဝံးသဲန့ၤယဳၤစဲာ် ‘ယဘၱာ်စဲာ်,’ အစဲဒဳၣ်, စကဘဲာ်ဒီလၢ်ဝၤအဖဳးခဳ စာ်တဲၢ်.”
ယ့ၣ်ရှူးအတဲၤအံာ်သဓံအဘဲာ်ကၠး ပၠၤအဝှ့းစဲာ်တစီာ်
(မး ၂၃:၁-၃၆, လူၤ ၂၀:၄၅-၄၇)
ဒဳၣ်ပၠၤအပဳၤအဟီးထဲၢ်အဆီးခ့န့းဘဲာ်တစီာ် သဳးလဳၢ်သးလၤ အံာ်ဆိး ကဲၤ. 38ဒဳစတဲၤဒီထိး လၤအပူၤ, ယ့ၣ်ရှူးဒီၣ်, “ဟဲးကိပီၢ် ပၠၤ အဝှ့းစဲာ်တစီာ်နဳၤ. စဘဲာ်လီၢ်ဟဲးကိဟဲးသီးအံာ်ၡံာ်ဒဳ ဓီၢ်ဓိၤဘ့တဲၤပွၱၤအံာ်ဆဲ အံာ်အလ့ၤနဳၤ, စသးအဲးနံၤ ပၠၤကနှူဆဲးစဲာ်ကၱာ်ဒဳဘဲာ်ယးဘဲာ်စဲာ်. 39ဒဳ ဘူၣ်ဘျီၣ်ပူၤမၱာ်ဝၱၤ, ဒဳၡံးလၢ်ပွဲးပူၤမၱာ်ဝၱၤ, စသးအဲးဆးနါအီၣ်တဲၤလ့ၤ အအဲးကဓူ. 40စဖၱးအၣ်ဓူၢ်ကဲအမှူးကမဲၤအၡံၣ်အဖါ, ဝှါဒဳၣ်, စာ် ဘိ ထဲၢ်စတဲၤကမဲာ်တလှၱထာ်ပီၢ်နီးအနံၤခံ, စသဘဲ ထာ် ထိဇၱၢ်ထိဇိၢ်ဒဳး တပွဲးကဲၤ. စဲာ်တစီာ်ကခးဘဲာ် တဲၤစံးရး အဆိးဒဳၣ်ချဳလီၤ.”
အမှူးကမဲၤအကြ့းလၱၤ
(လူၤ ၂၁:၁-၄)
41ယ့ၣ်ရှူးဆါနါအီၣ်ကဲၤဒဳတဲၤလှူၣ်အကြ့း အလှီမီၢ်, စာ်ကဲၤ ပၠၤဘဲနံၢ်ဝှိဒဳကြ့းပူၤနဳၤ. ပၠၤအယဲၢ်ဓၢ် တစီာ်ဘဲနံၢ်အီၣ်အဲးတပွဲး. 42ဘ့နဳၤပၠၤအမှူး ကမဲၤအဆဲးညဲတပွဲၤဘဲနံၢ်ကြ့းလၱၤကၠံၢ်ဘဲာ်, ထဲၢ်အအီၣ်ယူတကွာ်ဒြၤလီၤနဳၤ. 43ယ့ၣ်ရှူးယဳၤလၤ တ့ၢ်ပျဳာ်ဝှါစပျဲၢ်စဘီၣ်တစီာ်, စဒီဆးကဲၤလၢ်ဝၤ, စဒီၣ်, “ယဒီဆးသံအတၱၢ်အမှး, အမှူး ကမဲၤအဆဲးညဲအယဳၤ တပွဲၤဘဲနံၢ်တဲၤလှူၣ်ကြ့းပူၤယဳၤ, အအီၣ်အဲး ဒဳၣ်လံကဲၤ ပၠၤအလဝ့ၤလဳစါစဲးတစီာ်အအဲ. 44မၤနဲၢ်, ပၠၤ တစီာ် ဘဲလါတဲၤလှူၣ်ဒဳစဝှိဓဳၤထဲဓဳၤအပူၤနဳၤ, မၱာ်စဲာ်နဳၤ, စဘဲနံၢ်လဳၢ် ကျံးကျံးဒဳ စတဲၤဆဲးညဲ ကၱာ်စတဲၤအၣ်အံာ် အီအံာ်အနံၤခံအကျဲနဳၤ.”
ទើបបានជ្រើសរើសហើយ៖
မၢ်ကူး 12: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.