မၢ်ကူး 10
10
တဲၤဖၱးစူးအတဲၤလၤဖြး
(မး ၁၉:၁-၁၂, လူၤ ၁၆:၁၈)
1စဟဲးထာ်ဝှါ လ့ၤနံၢ်ကဲၤယူဒၤက့ၤဒဳ ယၢ်ဒ့ၣ်လီၢ်ဝ့ၢ်တခီ, ကၱာ်ပၠၤအပဳၤအဟီးလ့ၤဘီာ်ချဳး ကဲၤစဲာ်. အစာ်ဘိစမဲၤနၱၤနီနဳၤ, စသိၣ် အံာ်သီအံာ်တပွဲး ပၠၤ.
2ဖၤရံၤၡဲတစီာ် လ့ၤဘဳာ်ခဳးဘဳာ်လဲၢ်ကဲၤစဲာ် စဒီၣ်, “အမံၤခဳ တပွဲၤ ပွဲၤကပၢ်ဖျီးမံစမှဲနဳၤအဘဲာ်နံၤ ပီၢ်တဲၤမှဲးလၤဧါ.”
3စဒဲက့ၤလၢ်ဝၤ, စဒီၣ်, “စီၤမိၤၡ့ထိးလၤ မှဲးလၤကဲၤသံစာ် တဲၢ်.”
4စဲာ်တစီာ်ဒီၣ်, “စီၤမိၤၡ့ အံာ်တပွဲးဝၤ အခွဲးအကဝၱးဝှါတဲၤ ထဳးဖြးအစဲာ်ဒဳၣ်အကလဲၢ်ကဲစဲာ်.”
5ယ့ၣ်ရှူးဒီၣ်က့ၤစဲာ်တစီာ်, “ဒဳသံသဳးဆး သးဆးအစဲ, စဝှ့း လၤနံၤကီသံတဲၤမှဲးလၤ. 6ပရၤဆါလှ့အကါထၱးခၣ်ဘီနဳၤ ‘ကဘၱာ် စဲာ် ဘီာ်လၤ ကဲၤပၠၤအမံၤခဳကၱာ်အမံၤမှူး.’ 7‘မဲၤကနဳၤအခဳး အစဲ အမံၤခဳတပွဲၤကဟဲးပၢ်ဝှါစမဳၤစပာ်ဒဳၣ်, စကအီၣ် ပျဳာ်ကီစမှဲ, 8စဲာ်ကၠံၢ်ပွဲၤကဖၱထာ်ကီတဲၤဖ့းတဲၤ ဟၱးတဓဲလီၤ.’ မဲၤကနဳၤ စတမၱာ်ပ့ၤတဲၤ ဖ့းတဲၤဟၱး ကၠံၢ်ဓဲနီး, မၱာ်တဓဲလီၤ. 9မဲၤကနဳၤကဘၱာ်စဲာ် လဲၢ်ပျဳာ် နဳၤပၠၤတဘဲာ်ထဳးပၢ် ဘဲာ်နီး.”
10ဘ့စဲာ်တစီာ်ဓဳၤက့ၤရှံၣ်ပူၤနဳၤ, အပျဲၢ် စဘီၣ်တစီာ်ဒဲကဲၤ စဲာ်အဘဲာ်ကၠးတဲၤဝၱၤတဲၤကဲအယဳၤနဳၤ, 11ကၱာ်စဒီၣ်ကဲၤလၢ် ဝၤ တစီာ်, “ကယါပၠၤ အလဲၢ်ကဲဝှါအမှဲ, အလ့ၤဖၱးစူးအလဝ့ၤတပွဲၤပွဲၤနဳၤ, စလၤကမဲာ်ကိာ်လၢ်ဝၤလီၤ. 12အမှဲတပွဲၤကလဲၢ်ကဲဝှါအဝၤ, စလ့ၤဖၱးအလဝ့ၤတပွဲၤမၱာ်မၱာ် စလၤကမဲာ်လီၤလီၤ.”
ယ့ၣ်ရှူးဟိးဝၱၤအပံၤစဖဳး
(မး ၁၉:၁၃-၁၅, လူၤ ၁၈:၁၅-၁၇)
13ပၠၤတစီာ်လ့ၤအံာ်အပံၤစဖဳးဒဳ ယ့ၣ်ရှူး အီၣ်စာ်ဘိထဲၢ်စကဟိးဝၱၤလၢ်ဝၤနဳၤ, ပရၤဆါ အပျဲၢ်အဘီၣ်တစီာ်ဟီတပွဲးအလ့ၤအံာ်အပံၤ စဖဳး တစီာ်နဳၤ. 14ယ့ၣ်ရှူးစာ်ထၱးဒဳၣ်စသးတမီၤ တပွဲးနီးကၱာ်စဒီၣ် လၢ်ဝၤ, “အပံၤစဖဳး တစီာ်ကလ့ၤ ထၱးဒီဧဲၤယဲၤ. မဲၤဒၱာ်ဒါမဲၤစဲာ်မဲး. မၤနဲၢ်, မီၢ်ခဳးအထံ အက့ၤမၱာ်စအဲ. 15ယဒီဆးသံအတၱၢ်အမှး, ပၠၤကတဖၱးမၤမီၢ်ခဳးအထံအက့ၤအစာ်ဘိအပံၤ စဖဳးနီးနဳၤ, တလ့ၤနံၢ်ဘဲာ်အပူၤ နီး.” 16စဖီးကျဳၤအံာ်ဝှါလၢ်ဝၤ, ထဲးလၤစစူးလၢ်ဝၤအခဳးကၱာ် ဟိး ဝၱၤကဲၤစဲာ်တစီာ်.
တဲၤနံၤအီယီၤအၣ်အတဲၤဘဲာ်ၡဳ
(မး ၁၉:၁၆-၃၀, လူၤ ၁၈:၁၈-၃၀)
17ဘ့ယ့ၣ်ရှူးဟဲးကိာ်ကျဲးနဳၤ ပၠၤတပွဲၤစွဲး လ့ၤထၱးစဲာ်, ဓဳၢ်နှဳ လါစလှီမီၢ်ကၱာ်ဒဲကဲၤလၢ်ဝၤ, “ဆရၣ်အအဲး, စာ်ဘိထဲၢ်ယကနံၤဘဲာ်တဲၤ သမိလၤထူ လၤပျဳၤနဳၤယကမဲၤဘဲာ်တၤနဲၢ်.”
18ယ့ၣ်ရှူးဒီၣ်စဲာ်, “နဒီၣ်မၤယဲၤအအဲးနဲၢ်. အအဲးမၱာ်ဘၱာ်စဲာ် တပွဲၤလီၤ. 19နသၱာ်ဟဲတပွဲး ကဘၱာ်စဲာ်အတဲၤမှဲးလၤ, ‘မဲၤသံမဲး ပၠၤမဲး. မဲၤလၤကမဲာ်မဲး. အၣ်ဟူၣ်မဲးတဲၤမဲး. တဲၤအတတၱၢ် တမှးနီး နဳၤ ခးမဲးနန့ၤသဲသၱးမဲး. လှီးလှၱလှီးပျဲာ်မဲး. ဒဳဘဲာ်ယး ဘဲာ်နမဳၤနပာ်.’ ”
20စဒီၣ်က့ၤကဲၤယ့ၣ်ရှူး, “ဆရၣ်, တဲၤအယဳၤတစီာ်ယဳၤနဳၤ ယတီၤနံၤလှ့ယပံၤစဖဳးဝ့ၤနဳၤ.”
21ယ့ၣ်ရှူးစာ်ဝဲၢ်စဲာ်ဒဳတဲၤဘဲာ်လီၢ်အပူၤ ကၱာ်ဒီၣ်ကဲၤလၢ်ဝၤ, “နမီၤမဲၤအီၣ်ဝ့ၤတဓဲဗ့. က့ၤပီၢ်, ဆဲကဲလဳနတၱၢ်နတဲၤကၱာ်အံာ်ပီၢ် အဆဲး ညဲဖဳးတစီာ်. နကနံၤဘဲာ်ကီတၱၢ်ဓဳၤတဲၤဓဳၤဒဳမီၢ်ခဳးနဳၤ. ဝှါဒဳၣ်, လိၤ ကိာ်ပီၢ် ယလ့ၤ,” စဒီၣ်လၢ်ဝၤဓဳၤ. 22စစာ်လၤ သယိးကၱာ်ဟဲးဖျီးမံကဲၤ. မၤနဲၢ်, စတၱၢ်စတဲၤအီၣ် အဲးအီးဆရးကဲၤအခဳးအစဲနဳၤ.
23ယ့ၣ်ရှူးစာ်ခွဲဘးဝှါ, ဒီၣ်ကဲၤစပျဲၢ်စဘီၣ် တစီာ် “ပၠၤအနံၤ အီယီၤအၣ်တစီာ်ကလ့ၤနံၢ်ဘဲာ်ကဘၱာ်စဲာ် အထံအက့ၤပူၤနဳၤအပၤ ကီ ပွ့းတဲၢ်.”
24မဲၤကနဳၤဒဳၣ်, စပျဲၢ်စဘီၣ်တစီာ်ထဲး တမိၢ်တမှါဆိးကဲၤဒဳစတဲၤယၱၢ်ဘဲာ်အစဲ. ပရၤဆါယ့ၣ်ရှူးဒီၣ်စဲာ်တပျာ်ဗ့ၤ, “ဖဳးလံၤတစီာ်, ပၠၤအဆးၡံအံာ် အတၱၢ်အတဲၤတစီာ်ကလ့ၤနံၢ်ဘဲာ် ကဘၱာ်စဲာ်အထံအက့ၤပူၤ နဳၤအပၤကီပွ့းတဲၢ်. 25ကီၤလၤအူးတဒဳကလ့ၤနံၢ်နှါဒဲးအကးဇဲပူၤ တခီဒဳၣ်အကၡဳ ဒဳၣ်လံတပွဲးအနံၤအီယီၤအၣ်တပွဲၤကလ့ၤနံၢ်ကဘၱာ်စဲာ် အထံအက့ၤပူၤနဳၤခီ.”
26စဲာ်တစီာ်ထဲးတမိၢ်တမှါဒဳၣ်ချဳဝ့ၤတပွဲး. စလၤဒီၣ်လၤဆး လၢ်ဝၤ, ကၱာ်ဒီၣ်ကဲၤ, “ပီၢ်ပွဲၤကနံၤ ဘဲာ်ဇၤဒီတဲၤယဳၤက့ၤစာ်က့ၤပွဲၤ.”
27ယ့ၣ်ရှူးစာ်ဝဲၢ်ဝှါစဲာ်တစီာ်စဒီၣ်, “ပၠၤအနံၤခံအတဇၤနီး ဟဳ. ပရၤ ဆါကဘၱာ်စဲာ်အနံၤခံ တဲၤ တဇၤနီးတအီၣ်တမံနီး. မၤနဲၢ်, ကဘၱာ်စဲာ်ဇၤတဲၤ လဳစါစဲးလီၤ.”
28စီၤပ့းတရူးဒီၣ်စဲာ်, “စာ်ပီၢ်ဝၤပၢ်ဖျီးမံ တဲၤကိမံၤမံၤကၱာ်လိၤ ကိာ်ထဳနလ့ၤ.”
29ယ့ၣ်ရှူးဒီၣ်က့ၤစဲာ်, “ယဒီဆးသံအတၱၢ် အမှး, ပၠၤထဲၢ် အဘဲလါတၤကဲအၡံၣ်အဖါ, မၱတမၱာ်နီး အသဲပူၤဝ့ၤ, မၱတမၱာ်နီးအမဳၤအပာ်, အဖဳးအလံၤ, အလၢ်ခဳးဓဳၤကျဲ ဒဳယခဳးယစဲ ကၱာ်တဲၤသးလဳၢ်သးလၤ အံာ်အဝၱၤအကဲအခဳးအစဲတပွဲၤနဳၤ, 30တနံၤ ဘဲာ်က့ၤအီၣ်အဲးထာ် အပျာ်တကယဲၤဒဳခဳနူၤယဳၤ, ရှံၣ်ဖါ, သဲပူၤသဲဝ့ၤ, မဳၤပာ်ဖဳးလံၤ, လၢ်ခဳး ဓဳၤကျဲ, ပျဳာ်ပျဳာ်ကၱာ်တဲၤလိၤမဲၤဆဲးညဲကၱာ်ဒီအလှီမီၢ်အနံၤခံ တဲၤသမိလၤ ထူလၤပျဳၤနီးနဳၤတအီၣ်ဘဲာ်နီး. 31အအူလူၢ်လူၢ်အလ့ၤကါ, အလ့ၤကါကါအအူလူၢ်, တဲၤကမဲၤကီအန့ၤဒဳၣ်.”
တဲၤဒီဆးတီၤလီၤတဲၤဆဲးညဲပီၤတီၤသဳပျာ်တပျာ်
(မး ၂၀:၁၇-၁၉, လူၤ ၁၈:၃၁-၃၄)
32စဲာ်တစီာ်လ့ၤထာ်ကိာ်ကျဲးဒဳအလ့ၤ ယရူၤၡလ့ၣ်အူးနဳၤ, ကၱာ်ယ့ၣ်ရှူးလ့ၤကဲၤဒဳစဲာ်တစီာ်အလှီမီၢ်, ဒဳၣ်စထဲးတမိၢ်တမှါလဳၢ်ကဲၤတစီာ်. ပၠၤ အလ့ၤကိာ်စလ့ၤတစီာ်မၱာ်ၡံးဆါကဲၤကဲၤ. ယ့ၣ်ရှူးယဳၤ အပျဲၢ်အဘီၣ်ၡံးကၠံၢ်ပွဲၤတပျာ်ပ့ၤ, ကၱာ်ဒီဆးကဲၤ လၢ်ဝၤတၤကဖၱထာ်နံၤစဲာ်နဲၤနဳၤ. 33စဒီၣ်, “စာ်ပီၢ်, ဝၤထာ်ယရူၤၡလ့ၣ်အူး. ပၠၤအဖဳးခဳယဳၤ, ကဘဲာ်ဟိလါကီပၠၤလှူၣ်တဲၤ အဓဳၤကၱာ်အဝှ့းစဲာ် တစီာ် အစူးခီးပူၤ. စကစံးရးသံကီလၢ်ဝၤ, အါလါနံၤကီစဲာ် ပွဲၤသူကူာ်ဖဳးအစူးခီးပူၤ. 34စကမဲၤယဳၤမဲၤနှါ ကီလၢ်ဝၤ. ထွၱးဘၱထွၱးဘီာ်ကီစဲာ်. မူၢ်ထာ်ဝှါစဲာ်, စကမဲၤ သံကီလၢ်ဝၤ. ကၱာ်သဳနံၤတနံၤစကထာ်ပဳၤက့ၤ ကီ.”
စီၤယၤကိာ်ကၱာ်စီၤယိၤဟၣ်အတဲၤသးအဲၤနံၤ
(မး ၂၀:၂၀-၂၈)
35စီၤယၤကိာ်ကၱာ်စီၤယိၤဟၣ်, ထဲၢ် စီၤစ့းဘ့းဒဲအဖဳးခဳ လ့ၤ ထၱးယ့ၣ်ရှူးကၱာ်စဒီၣ်, “ဆရၣ်, ဝၤသးအဲးနံၤနဲၤအကမဲၤနံၤဝၤ ထဲၢ်ဝၤ တၤနဲၢ်အသရ့ နဳၤ.”
36ယ့ၣ်ရှူးဒီၣ်က့ၤစဲာ်တစီာ်, “သံသးအဲး နံၤယကမဲၤနံၤသံ တၤနဲၢ်.”
37စဲာ်တစီာ်ဒီၣ်, “မဲၤပီၢ်စာ်ဘိထဲၢ် ဝၤကဆးနါဘဲာ်ဒဳနစူးတစၱးတပွဲၤကၱာ်နစူးတထွဲးတပွဲၤ ဒဳနတီၤနသ့းအပူၤနဳၤ.”
38ယ့ၣ်ရှူးဒီၣ်က့ၤစဲာ်တစီာ်, “သံတၤကဲၤ တၤနဲၢ်နဳၤသံတသၱာ်ဟဲမဲၤနီး. သံအီကဲာ်ထာ်ပီၢ် ဖးလါ ထဲၢ်ယအီနဳၤကၱာ်သံခးကဲာ်ထာ် ပီၢ်တဲၤခးဖဳးစူ ဒဳယခးဖဳးစူနဳၤဧါ.”
39စဒီၣ်က့ၤလၢ်ဝၤတစီာ်, “ဝၤကဲာ်ထာ် တပွဲး.”
ယ့ၣ်ရှူးဒီၣ်က့ၤစဲာ်တစီာ်, “ဖလါထဲၢ်ယအီနဳၤ သံကအီဘဲာ်တပွဲး. တဲၤဖဳးစူထံဒဳယခးနဳၤမၱာ်မၱာ် သံကခးဘဲာ်တပွဲး. 40ပရၤဆါ အကဆးနါ ဘဲာ်ဒဳယစူးတစၱးကၱာ်ယစူးတထွဲးနဳၤ တဘဲာ်ယကအံာ် သံနီၤ. အဘဲာ်ကၠးဒဳအဘဲာ်ပြးတီၤလီၤဝှါထဳအနံၤခံတစီာ်နဳၤလီၤ.”
41အပျဲၢ်အဘီၣ်အလဝ့ၤအပွဲၤၡံးသၱာ်ဟဲဘဲာ် တဲၤအယဳၤဒဳၣ်, စဲာ်တစီာ်အသး တမီၤကဲၤစီၤယၤကိာ် ကၱာ် စီၤယိၤဟၣ်အခဳးနီး. 42ယ့ၣ်ရှူးယဳၤဝှါ စဲာ်တစီာ်စဒီၣ်လၢ်ဝၤ, “သံသၱာ်ဟဲဘဲာ်တပွဲးထဲၢ်ဒဳ ပွဲၤသူ ကူးဖဳးတစီာ်အကျဲ အခဳး အန့ၤတစီာ်အူအံာ်စာ် အံာ်စဲာ်အစာ်ဘိစဘၱာ်စဲာ် ကျဲးထီးနဳၤ, ကၱာ်ပၠၤအဓဳၤအမူၤတစီာ်ဒဲလၱၢ်ထာ်အဖျူအသရ့ာ်. 43ပရၤဆါ တဲၤတဘဲာ်မဲၤအန့ၤကၱာ်သံကနဳၤနီး. မၱာ်ဒဳသံကျဲနဳၤ ပၠၤ အသး ဖၱထာ်အခဳးအန့ၤတပွဲၤနဳၤစကမၱာ် ဘဲာ်သံဇိၤ သံပွဲၤတခီ. 44ကၱာ် ကယါပၠၤအသးအဲးဖၱ ထာ်အအူဆူးတပွဲၤနဳၤ, စကမၱာ်ဘဲာ်လဳ စါစဲးအဇိၤ လီၤ. 45မၤနဲၢ်ကဒီၣ်ဓဳၤဒဳၣ်, ပၠၤအဖဳးလ့ၤလၤ ဒဳ လၢ်ခဳးယဳၤမၱာ် တဘဲာ်ပၠၤကခးဇိၤစဲာ်အနံၤခံနီး, မၱာ်စခး ဇိၤပၠၤတခီ, ကၱာ်စအံာ် လၤဖျီးမံး ကဲၤစသးစာ်ဘိထဲၢ် စကပွၱၤက့ၤပီၢ်ပၠၤအီၣ်အဲဗွဲနဳၤ.”
အကၢ်ဓူခံးစီၤဘၣ်တံၤမဲ
(မး ၂၀:၂၉-၃၄, လူၤ ၁၈:၃၅-၄၃)
46ကၱာ်စဲာ်တစီာ်ဓဳၤလ့ၤကဲၤဒဳ ယရံၤဃိအူး နဳၤ. ကၱာ်ဒီဘ့ယ့ၣ်ရှူးဟဲးထာ်ယရံၤဃိအူး ပျဳာ်ပျဳာ်ကၱာ် စပျဲၢ်စဘီၣ်တစီာ် ကၱာ်ပၠၤအပဳၤအဟီးတစီာ်အခၠၱးနဳၤ, အကၢ်ဓူခံးတပွဲၤထဲၢ်စီၤတံၤမဲအဖဳး, စီၤဘၣ်တံၤမဲ ဆးနါလါအီၣ်ကဲၤဒဳကျဲးဝဳၢ်လီၤကၱာ်တၤအၣ်ကဲၤတဲၤ. 47ဘ့စသၱာ် ဟဲဘဲာ်အမၱာ်ယ့ၣ်ရှူးနစၤရ့း ဖဳး နဳၤဒဳၣ်, စကဲာ်ဧဳၤထာ်ကၱာ်ဒီၣ်, “ယ့ၣ်ရှူး, စီၤဒၤဝံး အဖဳး, ခီးဝဲၤဘဲာ်ပီၢ်ယဲၤတကၱာ်.”
48ပၠၤတစီာ်ဟီစဲာ်ကၱာ်နှးအီၣ်ဇီၤကဲၤစဲာ်. ပရၤဆါစကဲာ်ဧဳၤ ထာ်ဆိးဒဳၣ်ချဳကဲၤ, “စီၤဒၤဝံးအဖဳး, ခီၣ်ဝဲၤဘဲာ်ပီၢ်ယဲၤတကၱာ်.”
49ယ့ၣ်ရှူးဆီထဳးအီၣ်ဝှါ စနှးကဲၤပၠၤကလ့ၤအံာ်စဲာ်.
ပၠၤအယဳၤလ့ၤအကၢ်ဓူခံးဒဳယ့ၣ်ရှူးအီၣ်တစီာ် ဒီၣ်စဲာ်, “လဲၢ်ခူပီၢ်နသး. ဝဲၢ်ထဳး, စယဳၤနဲၤ.” 50စပၢ်လၤတ့ၢ်ကဲဝှါစၡံာ်ဒဳချဳ, ဝှၱစကးစဝဲၢ်ထဳးကၱာ် လ့ၤထၱးကဲၤယ့ၣ်ရှူး.
51ယ့ၣ်ရှူးဒီၣ်စဲာ်, “နသးအဲးနံၤယကမဲၤ နံၤနဲၤတၤနဲၢ်.”
အကၢ်ဓူခံးတပွဲၤဒီၣ်က့ၤစဲာ်, “ဆရၣ်, စာ်ဘိထဲၢ် ယကစာ်ထၱးဇၤ က့ၤတဲၤနဳၤ.”
52ယ့ၣ်ရှူးဒီၣ်စဲာ်, “က့ၤဒီဧဲၤ. နတဲၤဘူၣ် မဲၤလှိထာ်ထဳနဲၤ.”
တပျာ်ခါလီၤ, စကၢ်ဓူလှၱထာ်က့ၤကၱာ် စဟဲးကိာ် ကဲၤယ့ၣ်ရှူးအကါ ဒဳကျဲးလီၤနဳၤ.
ទើបបានជ្រើសរើសហើយ៖
မၢ်ကူး 10: GBA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Geba Roman New Testament © Bible Society of Myanmar, 2021.